Pano ke padi kintu kya 3000, musāsudi umo wālembele amba: “Ami ne kipangwa kya malwa, kya kutendelwa.” (Ñimbo 139:14) Kitatyi kyobandaula muswelo utamanga mwana kushilwila ku kaseke kamo, mwene kikupanga luzakalo? Bantu bavule i betabije’mba kudi Umpangi wapangile bipangwa byūmi.—Tanga Ñimbo 139:13-17; Bahebelu 3:4.

Yewa wāpangile bintu byonso wāpangile kadi ne ntanda ikelwe’po ne būmi. (Ñimbo 36:9) Wesambile na bantu kadi witusapwilanga myanda imutala.—Tanga Isaya 45:18.

Mu tubintu tuvule, imbidi yetu iifwene na ya banyema. Inoko, bikele namino mwanda bantu ne banyema bāpangilwe abo bonso na Umpangi mwanda wa kwikala pano pa ntanda. Wāpangile muntu mubajinji, ku biloba bya panshi, ke ku banyemapo.—Tanga Ngalwilo 1:24; 2:7.

Bantu i beshile na banyema mu bintu bibidi bikatampe. Kibajinji, bantu badi na bukomo bwa kuyuka, bwa kusanswa ne kulēmeka Umpangi. Kya bubidi, banyema kebāpangilwepo kwikala’ko nyeke pamo na mwāpangilwe bantu. Inoko pano, bantu bonso i bapyane lufu mwanda muntu mubajinji wāpelele kulonda buludiki bwa Umpangi.—Tanga Ngalwilo 1:27; 2:15-17.