Ma bʼant junlo oxe mil abʼqʼi tkubʼlen ttzʼibʼen jun aj bʼitzil jlu: «Nchin labʼtiyeʼ tuʼnjuʼ nteneʼ ẍinkubʼ tbʼinchaʼna» (Salmo 139:14, Xjan Tuʼjil). Qa ma ximana tiʼj alkye tten in nel chʼiy jun kʼwaʼl tiʼj junx tal tiʼ aju célula tbʼi kyuʼn aj xnaqʼtzal, ¿nyape tbʼanel in nela jlu toj twitza? At nim xjal o kyqʼama qa at jun Bʼinchal tkyaqilju at. (Uʼjinxa Salmo 139:13-17 ex Hebreos 3:4.)

Aju kubʼ bʼinchante tkyaqilju at toj kyaʼj ax ikx kubʼ tbʼinchaʼn Txʼotxʼ tuʼn tten chwinqlal twitz (Salmo 36:9). In tzaj tqʼamaʼn Dios kye xjal alkyexix te. (Uʼjinxa Isaías 45:18.)

At nim tiʼchaq at tiʼj qxmilal aju chʼixmi ik tten ik tzeʼn qe txkup tuʼnju o che kubʼ bʼinchaʼn qe xjal ex qe txkup tuʼn kyanqʼin twitz Txʼotxʼ. Noqtzun tuʼnj, mintiʼ e kubʼ bʼinchaʼn xjal tiʼj txkup, quʼn atz kubʼ bʼinchaʼn xjal tiʼj quq, moqa tiʼj txʼotxʼ. (Uʼjinxa Génesis 1:24 ex 2:7.)

Noqtzun tuʼnj, junxitl qe xjal kywitz txkup tuʼnju, tnejel, e kubʼ bʼinchaʼn xjal tuʼn tten kyojtzqibʼil, tuʼn tten kykʼujlabʼil ex tuʼn kynimen teju Bʼinchal qe. Ex tkabʼ, tuʼnju e kubʼ bʼinchaʼn xjal tuʼn kyanqʼin te jumajx, atzun kye txkup mintiʼ e kubʼ bʼinchaʼn tuʼn kyanqʼin te jumajx. Noqtzun tuʼnj, kykyaqil xjal in che kyim toj ambʼil jaʼlo tuʼnju el tikʼun tnejel xjal aju tzaj qʼamaʼn te tuʼn Dios. (Uʼjinxa Génesis 1:27 ex 2:15-17.)