Kipia se 3,000 xiuitl, se tlakatl kiijkuilok: “Nimitstlaskamati pampa nochi tinechsenkajki ma nieli se tlamantli tlen nelia kuajkualtsi” (Salmo 139:14). Kema tikita kenijkatsa se pilsiltsi tlamantli moskaltia uan mochiua se pilkonetsi, ¿timotlajtlanijtok kenijkatsa pano nopa? Miakej kiijtouaj nopa san toTeotsij ueli kichiua. (Xijpoua Salmo 139:13-17 uan Hebreos 3:4.)

Katli kichijki iluikaktli uan Tlaltipaktli nojkia kichijtok ma tiitstokaj (Salmo 36:9). Ya kinnojnotsa maseualmej uan kiniljuia kenijkatsa ya. (Xijpoua Isaías 45:18.)

Miak tlamantli tlen tijpiaj ipan totlakayo nojkia kipiaj tlapialmej. ToTeotsij kej nopa techchijki pampa kinekiyaya ma tiitstokaj ipan Tlaltipaktli. Kema toTeotsij kichijki nopa achtoui tlakatl kichijki ika tlaltejpoktli, amo tlen se tlapiali. (Xijpoua Génesis 1:24 uan 2:7.)

Maseualmej amo sanse ika tlapialmej ipan ome tlamantli. Se: Maseualmej tlalnamikij, teikneliaj uan kitlepanitaj katli kinchijki. Ome: ToTeotsij amo kinchijki tlapialmej ma itstokaj nochipa, uan maseualmej kena. Maske kiampa kinchijki, ipan ni tonali nochi mikij pampa nopa achtoui tlakatl amo kineltokak toTeotsij itlanauatiljuaj. (Xijpoua Génesis 1:27 uan 2:15-17.)