Ɛvolɛ 3,000 mɔɔ ɛze ɛhɔ la, edwɛkɛdwɛndolɛnli bie hɛlɛle kɛ: “Kɛzi ɛyɛle me la yɛ ɛzulolɛ yɛɛ nwanwane.” (Edwɛndolɛ 139:14, NW) Saa ɛsuzu kɛzi ngoane kɛkɛba ko kakyi yɛ adɔma la anwo a, asoo ɔnyɛ wɔ nwanwane? Menli dɔɔnwo fa abɔdeɛ mɔɔ ngoane wɔ nu la anwo ayɛlɛyelɛ maa Bɔvolɛ ne.—Kenga Edwɛndolɛ 139:13-17; Hibuluma 3:4.

Ahenle ne mɔɔ bɔle ewiade nee azɛlɛ ne kɛ bɛdɛnla zolɛ la a bɔle ngoane a. (Edwɛndolɛ 36:9) Yeha ɔ nwo edwɛkɛ yehile alesama.—Kenga Ayezaya 45:18.

Yɛ nwonane ne le kɛ nane ne mɔ ɛdeɛ ne la wɔ ndenle dɔɔnwo azo. Ɛhye le zɔ, ɔluakɛ Bɔvolɛ ne bɔle alesama nee nane kɛ bɛdɛnla azɛlɛ ne azo. Ɔvale ndɛtɛlɛ a ɔbɔle sonla mɔɔ lumua la, na ɔnvi nane nu.—Kenga Mɔlebɛbo 1:24; 2:7.

Alesama le ngakyile fi nane ne mɔ anwo wɔ ndenle ngakyile nwiɔ mɔɔ anwo hyia la azo. Mɔɔ lumua la, alesama kola nwu Bɔvolɛ ne, bɛkulo ye na bɛbu ye. Mɔɔ tɔ zo nwiɔ, bɛbɔle menli kɛ bɛdɛnla aze dahuu, noko bɛambɔ nane ne mɔ zɔ. Kɛkala yɛ muala yɛwu, ɔluakɛ sonla mɔɔ bɛlumuale bɛbɔle ye la anli Bɔvolɛ ne adehilelɛ zo.—Kenga Mɔlebɛbo 1:27; 2:15-17.