Sounpar 3,000 kei samwalahro, sounmelkahka men ntingihedi: “Komwi me ketin wiahda soahng koaros ni paliwereiet . . . wiepen nin limomwi kan me kapwuriamwei oh inenen mwahu mehlel.” (Melkahka 139:13, 14) Ni omw medewehla mwomwen seri men eh kin tepisang kisin war kis, ke seu kin pwuriamweikihla met? Aramas tohto kin kapingahki Sounkapikadao mwomwen mour koaros ar wiawihda.​—Wadek Melkahka 139:13-17; Ipru 3:4.

Meno me ketin kapikada lahng oh me ketin wiahda sampah pwe aramas oh mahn akan en kak kousoan ie, iei me pil wia utupen mour. (Melkahka 36:9) E ketin padahkihong aramas akan duwen ih.​—Wadek Aiseia 45:18.

Ni ahl tohto, mwomwen wiawihdahn paliwaratail kin duwehte wiawihdahn paliweren mahn akan. Met pwehki Sounkapikadao ketin kapikada aramas oh mahn akan koaros en mour pohn sampah. E ketin wiahda tepin aramaso, kaidehn sang mahn, ahpw sang pwehl.​—Wadek Senesis 1:24; 2:7.

Aramas akan weksang mahn akan ni ahl kesempwal riau. Keieu, aramas akan ahneki koahiek en ese, poakohng oh wauneki Sounkapikadao. Keriau, mahn akan sohte wiawihda pwehn mour kohkohlahte duwehte aramas akan. Ahpw met, aramas koaros sohsohki mehla pwehki tepin aramaso soikala sapwellimen Sounkapikadao kaweid.​—Wadek Senesis 1:27; 2:15-17.