Bibliapita tapukïkuna
¿Imanirtaq mëtsikaq nunakuna juk Kamakoq kanqanman creiyan?
¿Manaku kawëqa juk milagru?
Kima waranqa watanönam pasashqa juk yachaq nuna kënö nir qellqanqampita: “Alläpa espantakïpaq y alläpa shumaq rurashqam këkä, tsëmi alabashqëki” (Salmu 139:14). Tsëqa rasumpam: quinuapita mas ichikllanlla cëlulapita llullu wamra formakanqanqa espantëpaqmi, ¿tsëqa manaku rasumpa? Mëtsikaq nunakunam pensayan llapan kawëyoqkunata juk Kamakoq ruranqanta. (Leyi Salmu 139:13-17 y Hebrëus 3:4.)
Ciëluta y Patsata Kamaq Jehoväqa jina kamashqam Patsachö këkaq llapan kawaqkunatapis (Salmu 36:9). Pëqa nunakunawanmi tukïnöpa parlashqa pëta reqiyänampaq. (Leyi Isaïas 45:18.)
¿Animalkunapitaku shamuntsik?
Wakin wakinchöqa cuerpuntsik cäsi igualan animalkunapawanmi. Tsënöqa nintsik llapantsiktapis Patsachö kawanapaq Dios ruramashqantsik kaptinmi. Pëqa manam juk animalpitatsu nunata rurashqa, sinöqa Patsachö këkaq allpapitam. (Leyi Genesis 1:24 y 2:7.)
Ishkë precisaq cösaskunam animalkunapita jukläyata ruramantsik. Punta kaqqa, Kamakoqnintsikta reqinapaq, kuyanapaq y respetanapaq kamashqa kanqantsikmi. Y ishkë kaqnam, imëyaqpis kawanapaq kamashqa kanqantsik, y animalkunaqa manam. Kanan witsanqa wanuntsik punta kaq nuna Diospa autoridäninta mana wiyakunqampitam. (Leyi Genesis 1:27 y 2:15-17.)