ʻI he taʻu nai ʻe 3,000 kuohilí, naʻe tohi ʻe ha tokotaha faʻu maau: “Kuo fakangeingei mo fakaofo hoku ngaohi e.” (Saame 139:14) ʻI hoʻo fakakaukau atu ki he founga ʻoku tupu ai ha kiʻi pēpē mei ha foʻi sela ʻe taha, ʻikai ʻoku tau ongoʻi mālūʻia ai? ʻOku ʻave ʻe he kakai tokolahi ʻa e fakahīkihikí ʻi hono ngaohi ʻo e ngaahi meʻa moʻuí ki he Tokotaha-Fakatupú.—Lau ʻa e Saame 139:13-17; Hepelū 3:4.

Ko e Tokotaha ko ia naʻá ne fakatupu ʻa e ʻunivēsí mo e māmani ke nofoʻí, naʻá ne toe fakatupu foki ʻa e moʻuí. (Saame 36:9) Kuó ne fetuʻutaki mo e faʻahinga ʻo e tangatá peá ne tala mai kiate kitautolu fekauʻaki mo ia tonu.—Lau ʻa e ʻAisea 45:18.

ʻOku meimei tatau hotau sinó mo e fanga manú ʻi he ngaahi tafaʻaki lahi. Ka ʻoku hoko eni koeʻuhí naʻe faʻu fakatouʻosi ʻe he Tokotaha-Fakatupú ʻa e tangatá mo e fanga manú ke nau moʻui ʻi he māmaní. Naʻá ne ngaohi ʻa e ʻuluaki tangatá ʻo ʻikai mei ha manu, ka naʻe ngaohi ia mei he kelekelé.—Lau ʻa e Sēnesi 1:24; 2:7.

ʻOku kehe ʻa e tangatá mei he fanga manú ʻi he founga mahuʻinga ʻe ua. ʻUluakí, ʻoku maʻu ʻe he tangatá ʻa e malava ke ʻilo, ʻofa mo fakaʻapaʻapaʻi ʻa e Tokotaha-Fakatupú. Uá, koeʻuhí naʻe ʻikai faʻu ʻa e fanga manú ke moʻui taʻengata, naʻe faʻu ʻa e tangatá ia ke moʻui taʻengata. Ka ʻi he taimi ko ení, kuo tukufakaholo ʻi he kakai kotoa ʻa e maté koeʻuhí naʻe talitekeʻi ʻe he ʻuluaki tangatá ʻa e tataki ʻa e Tokotaha-Fakatupú.—Lau ʻa e Sēnesi 1:27; 2:15-17.