Miṅwahani ya 3 000 yo fhiraho, murendi o ṅwala uri: “W[o] mbumba lwa vhuṱolo.” (Psalme ya 139:14) Musi ni tshi ṱhogomela nḓila ine ṅwana a vhumbea ngayo kha tsiki nthihi, naa a zwi ni mangadzi? Vhathu vhanzhi vha amba uri zwithu zwoṱhe zwi tshilaho zwo sikwa nga Musiki.—Vhalani Psalme ya 139:13-17; Vhaheberu 3:4.

We a sika fhethu hoṱhe nahone a ita uri ḽifhasi ḽi vhe fhethu hu dzuleaho, o dovha a ita na vhutshilo. (Psalme ya 36:9) O davhidzana na vhathu nahone a ri vhudza nga hae.—Vhalani Yesaya 45:18.

Mivhili yashu i ṱoḓa u fana na ya zwipuka nga zwithu zwinzhi. Fhedzi ndi ngauri vhathu na zwipuka vho itwa nga Musiki uri vha tshile kha ḽifhasi. O sika muthu wa u thoma a sa bvi kha tshipuka, fhedzi a tshi bva mavuni.—Vhalani Genesi 1:24; 2:7.

Hu na nḓila mbili dza ndeme dzine dza ita uri vhathu vha si fane na zwipuka. Ya u thoma, vhathu vha na vhukoni ha u ḓivha, u funa na u ṱhonifha Musiki. Ya vhuvhili, zwipuka a zwo ngo sikelwa u tshila tshoṱhe, fhedzi vhathu vho vha vho sikelwa u tshila tshoṱhe. Fhedzi zwino vhathu vhoṱhe vha a fa nga nṱhani ha uri muthu wa u thoma o landula vhulivhisi ha Musiki.—Vhalani Genesi 1:27; 2:15-17.