1. Engvângin nge Jehova chuan lâwmthu kan sawi a phu?

“THILPEK ṭha leh thilpêk famkim zawng zawng,” Petu Jehova chuan lâwmthu kan sawi a phu hle a. (Jak. 1:17) Hmangaihna nei berâm vêngtu a nih angin, kan tisa lam leh thlarau lam mamawh engkim a ngaihsak a ni. (Sâm 23:1-3) “Kan inhumhimna leh kan chakna” a ni a—a bîk takin manganna kan tawh hunah a ni lehzual! (Sâm 46:1) Fakna hla phuahtu chuan: ‘Jehova hnênah lâwmthu hril rawh u; ani chu a ṭha si a: a ngilneihna pawh kumkhuain a awm dâwn si a,’ a ti a. A thusawi thinlung zawng zawnga pawm chhan tûr tam tak kan nei a ni.—Sâm 106:1.

2, 3. (a) Malsâwmna kan dawnte hi a tûr rêng anga ngaih a hlauhawmna chu engte nge ni? (b) He thuziakah hian eng zawhnate nge kan sawiho vang?

² Engvângin nge lâwmthu sawi chungchâng ngaihtuah chu thil pawimawh tak a nih? Sawi lâwk ang ngeiin, tûn lai ni hnuhnûnga mite chuan lâwm nachâng an hre lo tawlh tawlh a. (2 Tim. 3:2) Mi tam tak chuan malsâwmna an dawnte chu a tûr rêngah an ngai a ni. Sumdâwnna khawvêl leh an thil siam chhuah fak mawinate  avângin, mi tam tak chuan an thil neiha lungâwi aiin, thil neih belh chu an tum ta zâwk a. He lâwm nachâng hriat lohna thlarau hian keini pawh min nghawng ve thei a ni. Hmân lai Israel mite ang bawkin, lâwm nachâng hre lo leh Jehova nêna kan inlaichînna hlu tak leh a hnên aṭanga kan dawn malsâwmnate ngaihhlutna kan tlachham ṭan thei a ni.—Sâm 106:7, 11-13.

³ Tichuan, fiahna khirh tak kan tawh huna thilthleng thei chu ngaihtuah bawk rawh. Chutiang hunah chuan mangan avângin malsâwmna kan dawnte chu kan theihnghilh nghâl thei a ni. (Sâm 116:3) Chuvângin, engtin nge lâwm nachâng hriatna thinlung chu kan neih reng theih ang? Fiahna khirh tak kan tawh lai pawhin engin nge thlîr dân dik nei reng tûrin min ṭanpui ang? I lo ngaihtuah ang u.

4. Engtin nge lâwm nachâng hriatna thinlung kan neih reng theih?

⁴ Lâwm nachâng hriatna thinlung nei tûr leh nei reng tûr chuan, Jehova hnên aṭanga kan dawn malsâwmnate ngaihlu taka chhûtin, a hmangaihna rinawm avânga min tihsakte chu ngun takin kan ngaihtuah bawk tûr a ni. Fakna hla phuahtuin chutianga a ngaihtuah chuan, Jehova thiltih ropui tam takte chu mak a ti hle a ni.—Sâm 40:5; 107:43 chhiar rawh.

5. Lâwm nachâng hriatna neih dân chungchângah tirhkoh Paula hnên aṭangin eng nge kan zir theih?

⁵ Lâwm nachâng hriatna chungchângah tirhkoh Paula hnên aṭangin thil tam tak kan zir thei a. A malsâwmna dawnte chu a chhût ṭhîn a ni ngei ang, tih tak zetin lâwmthu a sawi ṭhîn si a. “Sawichhetu leh tiduhdahtu leh sawisatu,” a ni tih a inhre chiang hle a ni. Tûn hmain thil sual a ti chung pawhin, Pathian leh Krista’n zahngaihna lantîra rawngbâwlna an kawltîr avângin lâwmthu a sawi a ni. (1 Timothea 1:12-14 chhiar rawh.) Paula chuan a Kristian unaute chu a ngaihlu hle bawk a, an mize ṭhate leh rinawm taka rawng an bâwlna avângin Jehova hnênah lâwmthu a sawi ṭhîn bawk. (Phil. 1:3-5, 7; 1 Thes. 1:2, 3) Chu bâkah, Paula chuan dinhmun hrehawm a tawrh khân, a hun taka thlarau lam unaute hnên aṭanga ṭanpuina a dawn avângin Jehova hnênah lâwmthu a sawi nghâl a ni. (Tirh. 28:15; 2 Kor. 7:5-7) Chuvângin, Paula’n Kristiante hnêna fuihna thu: “Lâwm nachâng hre rawh u . . . , fakna hla te, Pathian hla te, thlarau lam hla tea inzirtîrin inzilh tawn ula,” tia a ziak pawh hi a mak lo ve.—Kol. 3:15-17.

6. Eng atân nge a bîk takin Jehova chunga i lâwm?

⁶ Engtin nge lâwm nachâng hriatna leh lâwmthu sawina kawngah Paula chu kan entawn theih? Paula ang bawkin, keini pawhin Jehova’n a mi mal taka thil min tihsakte chu kan chhût a ngai a. (Sâm 116:12) ‘Jehova hnên aṭanga i dawn eng malsâwmna avângin nge i lâwm?’ tia zawh ni ta la engtin nge i chhân ang? Malsâwmna i dawnte zîngah chuan Jehova nêna in inlaichînna hlu tak chu i telh ang em? A nih loh leh, Krista tlanna inthawina i rin avânga i dawn sual ngaihdamna chu i telh ang em? Fiahna khirh tak i tawh huna nangmah ṭanpuitu che unaupa leh unaunute hming chu i sawi chhuak ang em? I hmangaih tak i kawppui emaw, i ngaihhlut êm êm i fate emaw chu i sawi hmaih lo ngei ang. I hmangaih tak i Pa, Jehova hnên aṭanga i dawn chûng malsâwmna duhawm takte chhût ngunna chuan i thinlung chu lâwmnain a tikhat ang a, tichuan nî tina lâwmthu sawi tûrin a chêttîr ang che.—Sâm 92:1, 2 chhiar rawh.

7. (a) Engvângin nge lâwmthu sawi ṭawngṭaina kan neih ang? (b) Lâwmthu sawi ṭawngṭaina chu engtin nge i hlâwkpui ang?

⁷ Malsâwmna kan dawnte kan rilru leh thinlunga  kan vawn tlat hian, Jehova hnênah ṭawngṭaia lâwmthu hrilh kan inpeih ṭhîn a ni. (Sâm 95:2; 100:4, 5) Mi tam tak chuan ṭawngṭaina chu Pathian hnêna thil dîlna ang chauhvah an ngai a. Mahse, kan thil dawnte avânga lâwmthu kan sawi hian Jehova chu a lâwm tih kan hria a ni. Bible-ah hian lâwmthu sawi ṭawngṭaina duhawm tak takte a chuang a, chûng zîngah chuan Hani leh Hezekia ṭawngṭainate pawh a tel a ni. (1 Sam. 2:1-10; Is. 38:9-20) Chuvângin, lâwm nachâng hria chûng mi rinawmte chu entawn ang che. I dawn malsâwmnate avângin Jehova hnênah ṭawngṭaiin lâwmthu hrilh bawk ang che. (1 Thes. 5:17, 18) Chutiang tihna chuan hlâwkna tam tak a nei a. I rilru a hlimin, Jehova i hmangaihna a zual ang a, ani chu i hnaih lehzual bawk ang.—Jak. 4:8.

8. Jehova thil min tihsak zawng zawngte ngaihhlutna chu engin nge min hlohtîr thei?

⁸ Engvângin nge Jehova ṭhatnate ngaihhlutna hloh lo tûra kan harhvân reng ang? Lâwm nachâng hriat lohna kan ro chun vâng a ni. Han ngaihtuah teh: Kan nu leh pa hmasa ber Adama leh Evi chu paradis huanah dah an ni a. An mamawh zawng zawng an nei a, leiah hian inrem taka chatuana nun theih beiseina an nei bawk. (Gen. 1:28) Mahse, an dawn malsâwmnate chu an ngaihlu lo. Duhâm takin thil tam lehzual an duh a. Chuvângin, thil engkim an chân a ni. (Gen. 3:6, 7, 17-19) Lâwm nachâng hriat lohna khawvêlin min hual vêl avângin, keini pawhin Jehova thil min tihsakte chu kan hmuh hmaih ṭan thei a. Amah nêna kan inṭhianna chu a tûr rêngah ngaiin, kan ngaihlu lo ṭan thei a ni. Khawvêl pum huapa unaute zînga kan tel theihna chanvo chu kan ngaihlu lo thei a. Nakin lawka boral mai tûr he khawvêl thilahte hian kan inhmang nasa hle thei bawk. (1 Joh. 2:15-17) Chutiang thlarau lama tlâk hniamna pumpelh tûr chuan, malsâwmna kan dawnte chhût ngunin, a mite nih theihna chanvo kan neih avângin Jehova chungah lâwmthu sawi reng kan duh bawk a ni.—Sâm 27:4 chhiar rawh.

9. Fiahna khirh takte kan hmachhawn hunah, engvângin nge malsâwmna kan dawnte chu kan ngaihtuah ang?

⁹ Lâwm nachâng hriatna thinlung chuan fiahna khirh takte hmachhawn thei tûrin min ṭanpui a. Kawppuite rinawm lohna te, nunna tâna hlauhawm natna khirh tak te, kan hmangaih takte sûnna te, a nih loh leh leilung chhiatna nghawng râpthlâk takte  ang chi nun thlâk danglam thei thilte kan tawh hian a ngaihna hre lovin kan awm mai thei. Chutiang hunah chuan malsâwmna kan dawnte ngaihtuahna chuan min thlamuanin, min tichak dâwn a ni. Heta thilthleng tak takte hi han ngaihtuah teh.

10. Irina-i chuan a malsâwmna dawnte a chhiarna chu engtin nge a hlâwkpui?

¹⁰ North America-a regular pioneer thawk Irina-i * chu kohhran upa nên an innei a. A hnuah a pasal chu a rinawm lo va, a nupui leh a fate chu a chhuahsan a ni. Engin nge Irina-i chu Jehova rawng rinawm taka bâwl zêl tûrin ṭanpui? Ani chuan heti hian a sawi: “Jehova’n a mi mal taka min ngaihsak avângin ka lâwm hle a. Nî tina malsâwmna ka dawnte chu ka han chhiar chuan, kan Pa vâna mi min hmangaihna leh vênhimna dawn chu chanvo hlu tak a ni tih ka hre thei a ni. Ani chuan min kalsan ngai lo vang tih ka hria,” tiin. Irina-i chuan dinhmun lungchhiatthlâk takte tawng mah se, hlim taka a awm theihna chuan a ṭanpui a, mi dangte tichaktu a ni zâwk mah a ni.

11. Kyung-sook-i chu a natna khirh tak hmachhawn thei tûrin engin nge ṭanpui?

¹¹ Asia khawmuala awm Kyung-sook-i chuan a pasal nên kum 20 chuang pioneer an thawk a. Vawilehkhatah, chuap cancer upa tawh tak a neih thu a hria a, thla thum aṭanga thlaruk bâk a dam dâwn lo tih hriattîr a ni. An nupa chuan harsatna lian tham leh tê tham takte pawh an hmachhawn ṭeuh tawh a, hrisêl thawkhat nia lo inhre ṭhîn kha an ni a. Ani chuan heti hian a sawi a: “He hrisêl lohna hian mi ṭhâwng na hle. Engkim mai hi ka chân ta niin ka inhria a, ka thlabâr êm êm mai a ni,” tiin. Kyung-sook-i chu a harsatna hmachhawn tûrin engin nge ṭanpui? Ani chuan: “Zan tin ka mut hmain inchung zâwlah ka lâwn a, chu mi nî atâna ka lâwm chhan thil panga sawi chhuakin ring takin ka ṭawngṭai a ni. Tichuan ka zângkhai huai a, Jehova ka hmangaihna sawi chhuak tura chêttîrin ka awm ta ṭhîn a ni,” tiin a sawi. Kyung-sook-i’n zan tina chutianga a ṭawngṭaina chu engtin nge a hlâwkpui? Heti hian a sawi: “Dinhmun hrehawm tak hmachhawn thei tûrin Jehova’n min chhawmdâwl tih ka hre ta a, chu bâkah fiahna kan tawhte aiin malsâwmna kan dawnte hi a tam zâwk tih ka hre bawk a ni,” tiin.

12. Engtin nge Jason-a chuan a nupui a sûn hnuah thlamuanna a hmuh?

¹² Africa khawmual branch office pakhata rawngbawl Jason-a chuan kum 30 chuang hun bikimin rawng a bâwl tawh a. Ani chuan heti hian a sawi: “Kum sarih kalta khân ka nupui ka sûn a, ka tuar na hle. Cancer natna a vei lai ngaihtuahna chuan ka rilru a tibeidawng hle,” tiin. Jason-a chu engin nge ṭanpui? Heti hian a sawi a: “Ṭum khat chu ka nupui nêna hun nuam tak kan hman lai ka hre chhuak a, chu thil ka hriat chhuah avângin Jehova hnênah ṭawngtaiin lâwmthu ka sawi a ni. Ka hahdam huaiin ka inhria a, chu mi hnu chuan hun hlimawm tak ka hriat chhuahte avângin Jehova hnênah lâwmthu ka sawi ta ziah a ni. Chutianga lâwm nachhâng hriatna chuan ka thlîr dân nasa takin a thlâk danglam a. Tûn thlengin la tuar reng mah ila, chhûngkaw nun hlim tak ka neih leh amah hmangaih tlattu nêna a rawng ka bâwl theih avânga Jehova hnêna lâwmthu sawina chuan min chhâwk hle a ni,” tiin.

13. Sheryl-i chu a chhûngte a chân deuh vek avânga lungngaihna hmachhawn thei tûrin engin nge ṭanpui?

¹³ Kum 2013 tâwp lama Typhoon thlipui Haiyan-in Philippines a nuai khân, kum 13 mi Sheryl-i chuan engkim deuhthaw a chân a. Ani chuan heti hian a sawi a ni: “Ka in ka chân a, ka chhûngte ka chân deuh vek a,” tiin. A nu leh a pa bâkah, a pianpui unau pathum chu thlipui na tak avângin an thi a ni. Lung nih lohna nei reng lova he chhiatna râpthlâk tak pal tlang tûrin Sheryl-i chu engin nge ṭanpui? Ani chuan  lâwm nachâng hriatna thinlung a nei a, malsâwmna a dawnte chu a hre bawk a ni. “Ṭanpui ngaite ṭanpui tûr leh thlamuan tûra unau zawng zawngte thiltih chu ka hmu a. Khawvêl puma unaute hian min ṭawngṭaisak tih ka hria a ni,” tiin a sawi. Heti hian a sawi belh a ni: “Jehova ka Pathian a ni chu ka lâwm tak zet a ni. Kan mamawhte hi min pe reng si a,” tiin. Ni e, malsâwmna kan dawnte hriatna chu lungngaihna do lêtna ṭha tak a ni. Lâwm nachâng hriatna chuan kan hmachhawn tûr lungngaihna engpawh tuar thei tûrin min ṭanpui a ni.—Eph. 5:20; Philippi 4:6, 7 chhiar rawh.

14. Eng thil phûrawm takin nge min hmuak reng? (A thupui chunga milem en rawh.)

¹⁴ Mihring chanchin zawng zawngah hian, Jehova mite chu malsâwmna an dawnte avângin an lâwm reng ṭhîn a. Entîr nân, Tuipui Sena Pharaoa leh a sipaite kut ata chhan chhuah an nih khân, Israel mite chuan fakna hla sain, an lâwmzia an lantîr a ni. (Ex. 15:1-21) Tûn laiah, kan ngaihhlut ber malsâwmnate zînga pakhat chu natna leh hrehawm tawrhna min neihtîr thei thil engkim laka chhan chhuah nih beiseina a ni. (Sâm 37:9-11; Is. 25:8; 33:24) Jehova’n a hmêlmate a tihboral a, remna leh felna khawvêl thara min lawm luh huna kan hlim dân tûr hi han mitthla teh. Chu mi hun chu lâwmthu sawina hun a va ni dâwn êm!—Thup. 20:1-3; 21:3, 4.

15. Kum 2015 chhûng zawng hian eng nge tih i tum tlat ang?

¹⁵ Kum 2015 chhûng hian Jehova thlarau lam malsâwmna chhiarsên lohte dawn hlân chu kan nghâk hlel hle a. Mahse, fiahna ṭhenkhat pawh kan tâwk thei bawk. Engpawh lo thleng se, Jehova’n min kalsan ngai dâwn lo tih kan hria a ni. (Deut. 31:8; Sâm 9:9, 10) Ani chuan rinawm taka a rawngbâwl nâna kan mamawh engkim min pe zawm zêl ang. Chuvângin, zâwlnei Habakuka rilru put hmang ang hi neih reng i tum tlat ang u. Ani chuan: “Theipui thing pâr vul dâwn lovin, grêp hrui rah dâwn hek suh sêng, oliv thing pawh rah lovin, lovin ei tûr chhuah dâwn lo sêng, huang ata ran rual tibovin, ran inah ran awm lo mah sêng, ka lâwm zêl ang, LALPA-ah chuan, ka chhandamna Pathianah chuan ka lâwm cheu dâwn,” tiin a sawi. (Hab. 3:17, 18) Ni e, kum 2015 chhûng zawng hian, malsâwmna kan dawnte chu hlim takin i ngaihtuah ang u; kum 2015 kum châng: ‘Jehova hnênah lâwm thu hril rawh u, ani chu a ṭha si a,’ tih fuihna hi zawm i tum tlat bawk ang u.—Sâm 106:1. (w15-E 01/15)