1. Duzu ati a yɛyɛ Gyihova mo ɛ?

ƐLOLƐDEƐ “kpalɛ biala nee ahyɛlɛdeɛ biala mɔɔ di munli la” vi Gyihova ɛkɛ. (Gyemise 1:17) Ɔle Neavolɛ mɔɔ lɛ ɛlɔlɛ yemɔti ɔfa mɔɔ yɛhyia nwo la kɔsɔɔti ɔmaa yɛ. (Edwɛndolɛ 23:1-3) Nɔhalɛ nu, Gyihova fɛta nganvolɛ nee moyɛlɛ. Wɔ yɛ amaneɛnwunlɛ nu, “Nyamenle le yɛ ɛvealeka nee yɛ anwosesebɛ.” (Edwɛndolɛ 46:1) Yɛ nee edwɛndolɛnli ne mɔɔ ɔhanle edwɛkɛ ɛhye la yɛ adwenle: ‘O bɛyɛ Gyihova mo, ɔluakɛ ɔle kpalɛ; ye ɛhulolɛ kpundii ne wɔ ɛkɛ ne dahuu.’—Edwɛndolɛ 106:1.

2, 3. (a) Duzu ati a ɔnle kɛ yɛyɛ boniayɛma ɛ? (b) Kpuyia boni mɔ a yɛbazuzu nwo wɔ edwɛkɛ ɛhye anu a?

² Duzu ati a ɔwɔ kɛ yɛyɛ Gyihova mo a? Kɛmɔ bɛhanle bɛdole ɛkɛ la, wɔ awieleɛ mekɛ ye anu menli dɔɔnwo ɛyɛ boniayɛma. (2 Temɔte 3:2) Bɛngile mɔɔ  Gyihova ɛyɛ ɛmaa bɛ la anwo anyezɔlɛ. Yɛde ewiade mɔɔ menli dɔɔnwo totɔ ninyɛne mɔɔ bɛngyia nwo la anu. Ɔlua ɛhye ati, menli akunlu ɛndwo mɔɔ bɛlɛ la anwo. Kɛmɔ tete Yizilayɛma yɛle la, saa yɛannea boɛ a, yɛbayɛ boniayɛma, yɛnrɛhile anyezɔlɛ wɔ nyilalɛ mɔɔ yɛnyia nee agɔnwolɛvalɛ mɔɔ yɛ nee Gyihova lɛ la anwo.—Edwɛndolɛ 106:7, 11-13.

³ Eza dwenle mɔɔ bahola azi wɔ mekɛ mɔɔ yɛkɛhɔ sɔnea nu la anwo nea. Yɛ ngyegyelɛ ne bahola ali yɛ adwenle somaa mɔɔ akee yɛngakye nyilalɛ mɔɔ yɛlɛ la bɔbɔ a. (Edwɛndolɛ 116:3) Kɛ ɔkɛyɛ na yɛahile anyezɔlɛ dahuu ɛ? Kɛ ɔkɛyɛ na yɛava adwenle kpalɛ yɛagyinla sɔnea mɔɔ anu yɛ se la anloa ɛ? Bɛmaa yɛnlea.

4. Kɛ ɔkɛyɛ na yɛahile mɔɔ Gyihova ɛyɛ la anwo anyezɔlɛ ɛ?

⁴ Ɔhyia mɔdenlebɔlɛ na yɛahola yɛahile mɔɔ Gyihova ɛyɛ la anwo anyezɔlɛ. Mɔɔ lumua, ɔwɔ kɛ yɛnwu kɛzi Gyihova ɛyila yɛ la. Akee ɔwɔ kɛ yɛsuzu kɛzi nyilalɛ zɛhae kile ɛlɔlɛ kpole mɔɔ Nyamenle lɛ maa yɛ la anwo kpalɛ. Mɔɔ Edwɛndolɛnli ne yɛle zɔ la, ninyɛne dɔɔnwo mɔɔ Gyihova ɛyɛ ɛmaa ye la zinle ɔ nwo.—Kenga Edwɛndolɛ 40:5; 107:43.

5. Duzu a yɛkola yɛsukoa yɛfi ɛzoanvolɛ Pɔɔlo ɛkɛ wɔ anyezɔlɛ nwo a?

⁵ Ɛzoanvolɛ Pɔɔlo neazo ne bahola aboa yɛ yeamaa yɛahile mɔɔ Gyihova ɛyɛ la anwo anyezɔlɛ. Ɔdwenledwenlenle ye nyilalɛ nwo yemɔti ɔyɛle Nyamenle mo dahuu wɔ asɔneyɛlɛ nu. Pɔɔlo liele dole nu kɛ mekɛ bie, ‘ɔhanle munzule edwɛkɛ, ɔyɛle menli kpɔdekpɔde na ɔguale bɛ nyunlu aze.’ Noko, ɔhilele anyezɔlɛ kpole ɔluakɛ ɔnva nwo ɛhye mɔ amuala, Nyamenle nee Kelaese zele ye anwunvɔne na bɛmanle ɔbɔle edwɛkpa ne nolo. (Kenga 1 Temɔte 1:12-14.) Pɔɔlo eza hilele subane kpalɛ mɔɔ ɔ mediema Keleseɛnema  lale ye ali la anwo anyezɔlɛ na ɛnee ɔta ɔyɛ Gyihova mo wɔ bɛ nɔhalɛlilɛ ne anwo. (Felepaema 1:3-5, 7; 1 Tɛsalonaekama 1:2, 3) Ɔyɛle Gyihova mo kɛ ɔluale ɔ mediema nwo zo ɔboale ye ɔmanle ɔgyinlanle ye sɔnea ngakyile nloa la. (Gyima ne 28:15; 2 Kɔlentema 7:5-7) Ɔnyɛ nwanwane kɛ Pɔɔlo dule Keleseɛnema folɛ ɛhye la: “[Bɛhile anyezɔlɛ] . . . , Bɛdo edwɛne, anyelielɛ edwɛne, na bɛdo sunsum nu edwɛne bɛboka moyɛlɛ mɔɔ vi ahonle nu la bɛmaa Nyamenle.”—Kɔlɔsaema 3:15-17.

6. Duzu ati a ɔwɔ kɛ yɛkile ninyɛne mɔɔ Gyihova ɛyɛ ɛmaa yɛ la anwo anyezɔlɛ a?

⁶ Kɛ ɔkɛyɛ na yɛazukoa Pɔɔlo neazo ne ɛ? Ɔwɔ kɛ yɛdwenledwenle mɔɔ Gyihova ɛyɛ ɛmaa yɛ la anwo. (Edwɛndolɛ 116:12) Saa awie biza wɔ kɛ: “Gyihova ɛkɛ nyilalɛ boni a la wɔ ahonle nwo kpalɛ a?” anrɛɛ kɛzi ɛbabua ye ɛ? Anrɛɛ ɛbaha kɛ yemɔ a le ɛ nee Gyihova agɔnwolɛvalɛ ne ɔ? Anzɛɛ wɔ ɛtane mɔɔ Kelaese ɛkpɔnenlɛ afɔlebɔlɛ ne ati bɛva bɛhyɛ wɔ la? Anzɛɛ mediema mɔɔ boa wɔ wɔ ngyegyelɛ nu la? Wɔ bokavolɛ anzɛɛ ɛ mra ɔ? Nyia mekɛ dwenledwenle nyilalɛ mɔɔ Nyamenle ɛmaa wɔnyia la anwo. Ɛyɛ zɔ a, ɔbamaa wɔayɛ ye mo alehyenlɛ biala.—Kenga Edwɛndolɛ 92:1, 2.

7. (a) Kɛmɔti a ɔwɔ kɛ yɛyɛ Gyihova mo wɔ yɛ asɔneyɛlɛ nu ɛ? (b) Saa ɛda Gyihova ase wɔ asɔneyɛlɛ nu a kɛzi ɔbaboa wɔ ɛ?

⁷ Saa yɛdwenledwenle yɛ nyilalɛ kɔsɔɔti anwo a, yɛbayɛ Gyihova mo wɔ asɔneyɛlɛ nu. (Edwɛndolɛ 95:2; 100:4, 5) Bie mɔ hyia debie a yɛɛ bɛyɛ asɔne a. Noko saa yɛyɛ Gyihova mo wɔ mɔɔ yɛlɛ la anwo a, ɔ nye sɔ ye kpalɛ. Hana, Hɛzikaya, nee Nyamenle azonvolɛ dɔɔnwo mɔɔ bɛyɛle Gyihova mo wɔ bɛ asɔneyɛlɛ nu la anwo edwɛkɛ wɔ Baebolo ne anu. (1 Samoɛle 2:1-10; Ayezaya 38:9-20) Sukoa anyezɔlɛ mɔɔ bɛnyianle ye la na yɛ Gyihova mo wɔ mɔɔ yeyɛ yemaa wɔ la anwo. (1 Tɛsalonaekama 5:17, 18) Saa ɛyɛ zɔ a, ɛ nye balie, ɛbanyia Nyamenle anwo ɛlɔlɛ kpole, na wɔayɛ ɔ gɔnwo dahuu.—Gyemise 4:8.

8. Duzu a bahola amaa yɛayɛ boniayɛ a?

⁸ Saa yɛannea boɛ a, yɛbayɛ boniayɛma wɔ ahyɛlɛdeɛ ngakyile mɔɔ Gyihova ɛva ɛmaa yɛ la anwo. Kɛmɔti ɛ? Yɛnli munli yɛɛ yɛnyia boniayɛ subane yɛvi yɛ awovolɛ mɔɔ bɛlumua la ɛkɛ. Gyihova bɔle Adam nee Yive guale paladaese na ɔmanle bɛ debie biala mɔɔ bɛhyia nwo la. Anrɛɛ bɛbahola bɛadɛnla aze dahuu wɔ anzondwolɛ nu. (Mɔlebɛbo 1:28)  Noko bɛangile nwolɛ anyezɔlɛ. Bɛyɛle anyebolo. Yemɔti mɔɔ bɛlɛ la kɔsɔɔti vile bɛ sa. (Mɔlebɛbo 3:6, 7, 17-19) Yɛde boniayɛma ewiade nu, yemɔti yɛdayɛ noko yɛkola yɛyɛ boniayɛ wɔ mɔɔ Gyihova ɛyɛ ɛmaa yɛ la anwo. Bie a yɛnrɛhile agɔnwolɛvalɛ kɛnlɛma mɔɔ yɛ nee Nyamenle lɛ anzɛɛ yɛ ewiade amuala mediemayɛlɛ ne anwo anyezɔlɛ. Ewiade ne anu ninyɛne noko kola twehwe yɛ adwenle. (1 Dwɔn 2:15-17) Saa yɛdwenledwenle yɛ nyilalɛ nwo dahuu na yɛyɛ Nyamenle mo kɛ yɛboka ye menli nwo a, yɛbahoati ɛhane ɛhye.—Kenga Edwɛndolɛ 27:4.

9. Duzu ati a ɔwɔ kɛ yɛdwenledwenle yɛ nyilalɛ nwo wɔ sɔnea mekɛ nu ɛ?

⁹ Anyezɔlɛ subane boa yɛ maa yɛgyinla sɔnea mɔɔ anu yɛ se la anloa. Ninyɛne le kɛ bokavolɛ mɔɔ ɔnli nɔhalɛ, anwodolɛ, dɔvolɛ bie ewule, anzɛɛ esiane mɔɔ maa yɛ tɛnlabelɛ kakyi arɛlevilɛ nu la kola maa yɛ sa nu to. Saa yɛsuzu kɛzi Gyihova ɛyila yɛ la anwo a, ɔkyekye yɛ rɛle na ɔmaa yɛnyia anwosesebɛ yɛgyinla ɔ nloa. Suzu anwubielɛ ɛhye mɔ anwo.

10. Kɛzi Irina nyilalɛ mɔɔ ɔdwenledwenlenle nwo la boale ye ɛ?

¹⁰ Irina le adekpakyelɛnli wɔ America Sɔlɔ. Asafo nu kpanyinli bie mɔɔ ɔgyale ye la anli nɔhalɛ, ɔgyakyile ye nee ɔ mra ɛkɛ ɔhɔle. * Duzu a boale Irina manle ɔvale nɔhalɛlilɛ ɔzonlenle Gyihova a? Ɔka kɛ: “Me nye sɔ kɛzi Gyihova anye wɔ me nwo la. Saa medwenle me nyilalɛ nwo alehyenlɛ biala a, menwu kɛ yɛ anwuma Selɛ ne ze me na ɔkulo me edwɛkɛ. Meze kɛ ɔnrɛkpo me ɛlɛ.” Ɔnva nwo kɛ Irina ɛyia tɛnlabelɛ ngakyile mɔɔ anu yɛ se wɔ ɛbɛlabɔlɛ nu la, adwenle kpalɛ mɔɔ ɔnyianle la boale ye manle ɔgyinlanle nu na ɔboale awie mɔ.

11. Duzu a boale Kyung-sook manle ɔgyinlanle anwondolɛ mɔɔ anu yɛ se la anloa a?

¹¹ Kyung-sook nee ɔ hu ɛva ɛvolɛ mɔɔ bo 20 ɛyɛ adekpakyelɛ gyima ne wɔ Asia. Arɛlevilɛ nu ala, bɛnwunle kɛ kansa wɔ ye ɛvovoa nwo na bɛhanle kɛ ɔbahola yeadɛnla aze siane nsa anzɛɛ nsia. Ɔnva nwo kɛ ɔ nee ɔ hu vale sɔnea ngakyile nu la, ɛnee bɛte kpɔkɛ. Ɔka kɛ: “Anwondolɛ ɛhye hanle me kpalɛ. Me ahonle dule na mendele nganeɛ kɛ mewie bɔkɔɔ.” Duzu a boale Kyung-sook manle ɔgyinlanle tɛnlabelɛ ɛhye anloa a? Ɔka kɛ: “Nɔsolɛ biala, kolaa na meala la, mekɔ yɛ sua ne anwuma na meka nyilalɛ nnu mɔɔ menyianle ye kenle ko zɔhane  la wɔ me asɔneyɛlɛ nu. Ɛhye maa menyia anwosesebɛ nee ɛhulolɛ kɛ mebayɛ mɔɔ Gyihova kulo la.” Kɛzi asɔneyɛlɛ boale Kyung-sook ɛ? Ɔka kɛ: “Menwu kɛ Gyihova maa yɛ anwosesebɛ wɔ tɛnlabelɛ mɔɔ anu yɛ se la anu yɛɛ yɛnyia nyilalɛ dɔɔnwo wɔ yɛ ɛbɛlabɔlɛ nu yɛtɛla sɔnea.”

12. Kɛzi Jason nyianle arɛlekyekyelɛ wɔ ɔ ye ewule nzi ɛ?

¹² Jason, mɔɔ yeva ɛvolɛ mɔɔ bo 30 yeyɛ dahuu ɛzonlenlɛ gyima wɔ Bɛtɛle la ka kɛ: “Me ye wule la ye ɛvolɛ nsuu ɛne, ɔmaa medi nyane kpole. Saa medwenle kɛzi ɔvɛle wɔ mekɛ mɔɔ ɔ nee kansa ne ɛlɛko la a ɔmaa me rɛle bɔ kpalɛ.” Duzu a boale Jason a? Ɔka kɛ: “Kenle ko bie mengakyele kɛzi ɛnee me nee me ye yɛ ninyɛne bɔ nu wɔ anyelielɛ nu la, na menyɛle Gyihova mo. Menyianle ahomeka na ɔvi zɔhane mekɛ ne menyɛle Gyihova mo dahuu kɛ mengakyele zɔhane edwɛkɛ ne la. Anyezɔlɛ maa me nye die kpole. Ɔyɛ me nyane kɛ ɔnle ɛkɛ bieko, noko ɔyɛ me fɛ kɛ menyianle agyalɛ kpalɛ, nee yelɛ mɔɔ ɔkulo Gyihova la me nee ye zonlenle a, meyɛ Gyihova mo.”

13. Duzu a boale Sheryl manle ɔgyinlanle ye abusua ne anu amra dɔɔnwo mɔɔ wule la anloa a?

¹³ Ahumu kpole bie mɔɔ dule wɔ Philippines, ɛvolɛ 2013 awieleɛ la manle Sheryl, mɔɔ ɛnee yenyia ɛvolɛ 13 la minlinle ninyɛne dɔɔnwo. Ɔka kɛ: “Me sua zɛkyele yɛɛ me abusua ne anu amra dɔɔnwo wule.” Ye mame, ye papa nee ɔ mediema nsa wule wɔ ahumu kpole zɔhane anu. Duzu a boale Sheryl mɔɔ nyanelilɛ anvo ɔ nwo zo a? Sheryl anye sɔ mɔɔ Gyihova ɛyɛ ɛmaa ye la ɔluakɛ ɔdwenledwenle nyilalɛ mɔɔ yenyia la amuala anwo. Ɔka kɛ: “Menwunle mɔɔ mediema yɛle mɔɔ ɔmanle  yɛnyianle anwosesebɛ nee anwondɔlɛ la amuala. Ɛnee meze kɛ mediema mɔɔ bɛwɔ ewiade amuala la kakye me wɔ asɔneyɛlɛ nu.” Ɔtoa zo kɛ: “Me nye die kɛ Gyihova le me Nyamenle la. Ɔmaa yɛnyia mɔɔ yɛhyia nwo la.” Nɔhalɛ nu, saa yɛ nye sɔ nyilalɛ mɔɔ yɛnyia la a, ɔmmaa nyanelilɛ ɛngomo yɛ nwo zo. Ɛhye boa yɛ maa yɛkola yɛgyinla ngyegyelɛ biala anloa.—Ɛfɛsɛsema 5:20; kenga Felepaema 4:6, 7.

14. Anyelazo kɛnlɛma boni a yɛlɛ a? (Nea mɔlebɛbo nvoninli ne.)

¹⁴ Tete ne amuala, ɛnee Gyihova menli anye sɔ nyilalɛ mɔɔ bɛkɛnyia la. Mɔɔ bɛliele Yizilayɛma bɛvile Falo nee ye ɛlɔnema asa nu wɔ Nyevile Kɔkɔlɛ ne anu la, bɛvale anyelielɛ bɛdole edwɛne bɛyele Gyihova ayɛlɛ na bɛyɛle ye mo. (Adendulɛ 15:1-21) Ɛnɛ, nyilalɛ ko mɔɔ la yɛ ahonle nwo kpalɛ la a le nyanelilɛ mɔɔ ɔnrɛhyɛ biala ɔbavi ɛkɛ bɔkɔɔ la. (Edwɛndolɛ 37:9-11; Ayezaya 25:8; 33:24) Suzu anyelielɛ mɔɔ yɛbanyia wɔ mekɛ mɔɔ Gyihova bazɛkye ye agbɔvolɛ kɔsɔɔti na yealie yɛ yeahɔ ewiade fofolɛ ne mɔɔ anzondwolɛ nee tenleneyɛlɛ wɔ nu la anwo nea. Nea kɛzi yɛbayɛ Gyihova mo wɔ kenle zɔhane a!—Yekile 20:1-3; 21:3, 4.

15. Duzu a wɔbɔ kpɔkɛ kɛ ɛbayɛ wɔ 2015 anu a?

¹⁵ Yɛ nye la kɛ Gyihova bayila yɛ dɔɔnwo wɔ ɛvolɛ 2015 anu. Yɛze kɛ yɛbayia sɔnea ɛdeɛ. Noko ɔnva nwo mɔɔ bazi biala la, yɛze kɛ Gyihova ɛnrɛkpo yɛ ɛlɛ. (Mɛla ne 31:8; Edwɛndolɛ 9:9, 10) Ɔbamaa yɛanyia debie biala mɔɔ yɛhyia nwo la amaa yɛazonle ye nɔhalɛ nu. Bɛmaa yɛzukoa ngapezonli Habakɛke mɔɔ ɔhanle edwɛkɛ ɛhye la: “Feege mbaka ɛnrɛzo bɔbɔ ɛdeɛ, yɛɛ ma ɛnrɛra vanye mbaka zo, ɔlivi mbaka ɛnrɛzo bɔbɔ ɛdeɛ, yɛɛ aleɛ ɛnrɛvinde kpɔkɛ nu, mboane ne mɔ amuala bawu bɔbɔ ɛdeɛ, yɛɛ nlankɛ adunli ne mɔ badɔ mgbane, noko [Gyihova] ati, mebali fɛlɛko, me ngoanelielɛ Nyamenle ne ati, me nye balie.” (Habakɛke 3:17, 18) Ɔrɛla ye kɛ yɛbahɔ zo yɛadwenledwenle yɛ nyilalɛ kɔsɔɔti anwo amaa yɛahola yɛali yɛ ɛvolɛ 2015 edwɛkɛ ne azo: ‘Bɛyɛ Gyihova mo, ɔluakɛ ɔle kpalɛ.’—Edwɛndolɛ 106:1.