1. Биз нәме үчин Ехова шүкүр этмели?

ЕХОВА «әхли оңат, кәмил совгат» берйәндиги үчин, биз оңа миннетдар болмалы (Якуп 1:17). Ол сөййән чопан хөкмүнде бизиң мадды ве рухы зерурлыкларымызың аладасыны эдйәр (Зеб. 23:1—3). Ехова, эсасанам, кын гүнлеримизде «пена хем аркадаянҗымыздыр» (Зеб. 46:1). Мезмурчының: «Ехова шүкүр эдиң, чүнки ол говудыр, онуң мерхемети эбедидир» диен сөзлерине йүрекден гошулмага энчеме себәплер бар (Зеб. 106:1, ТД).

2, 3. a) Берекетлере болмалы зат ялы гарамак нәме үчин ховплы? б) Биз шу макалада хайсы сораглара середерис?

² Худая шүкүр этмек барадакы сорага серетмек нәме үчин ваҗып? Себәби пыгамберлиге гөрә, соңкы гүнлерде адамлар гадыр билмез болдулар (2 Тим. 3:2). Көп адамлар алян берекетлерине болмалы зат ялы гараярлар. Миллионларча адамлар дүнйәниң ве онуң хөдүрлейән затларының тәсирине дүшүп, бар задына кайыл болман, герегинден артык көп зат эдинҗек боляр. Бизем рухы затларың гадырыны билмейән адамларың  тәсирине дүшүп билерис. Гадымы дөвүрдәки ысрайыллылар ялы Ехова билен достлугымызың ве онуң берйән берекетлериниң гадырыны билмән башларыс (Зеб. 106:7, 11—13).

³ Шейле-де биз агыр сынаглара учранымызда нәхили ягдая дүшүп билҗекдигимизе середерис. Бу ягдайда биз гайгыланып, алян берекетлеримизи гөзден салмагымыз мүмкин (Зеб. 116:3). Шол себәпли биз нәдип хемише йүрекден миннетдар болуп билерис? Бизе агыр сынагларда догры гарайышда болмага нәме көмек эдер? Гелиң, бу барада билелиң.

4. Ехова шүкүр эдер ялы нәме этмели?

⁴ Биз Ехованың берйән берекетлерине ве сөйги билен эдйән ишлерине үнс берип, ойлансак, оңа шүкүр эдерис. Мезмурчы хем муны эдип, Ехованың эдйән аҗайып ишлерине алкыш айдыпды (Зебур 40:5; 107:43-нҗи аятлары окаң).

5. Биз Павлус ресулың мысалындан нәме өвренип билерис?

⁵ Биз Павлус ресулың Ехова миннетдар боландыгындан көп затлар өвренип билерис. Ол алан берекетлери барада ойланып, хемише Худая шүкүр эдйәрди. Павлус ресул бирвагт месихчилере «дил етирип, азар берип, зорлук эдипди». Муңа гарамаздан, ол Худайың ве Исаның гөркезен рехимдарлыгына ве гуллукда ынанылан ишлере миннетдарлык билдирди (1 Тимотеос 1:12—14-нҗи аятлары окаң). Шейле-де ол доган-уяларың гадырыны билип, говы хәсиетлери хем вепалылыгы үчин йыгы-йыгыдан Ехова миннетдарлык билдирйәрди (Флп. 1:3—5, 7; 1 Сел. 1:2, 3). Павлус ресул сынаглара учранда, доган-уяларың үсти билен вагтында көмек эдйәндигине Ехова шүкүр эдйәрди (Рес. иш. 28:15; 2 Кор. 7:5—7). Ол месихчилере язан хатында: «Бири-бириңизе... мезмурлар, өвгүли айдымлар, рухы нагмалар айдып, шүкүр билен йүрегиңизден Реббе нагма окаң» дийди (Кол. 3:15—17).

6. Сиз, эсасанам, нәмелер үчин Ехова шүкүр эдйәрсиңиз?

⁶ Биз Павлус ресулың гөрелдесине эерип, нәдип Ехова шүкүр эдип билерис? Павлус ресул ялы Ехованың бизиң үчин эдйән затлары барада ойланмалы (Зеб. 116:12). Сиз Ехованың хайсы берекетлерине шүкүр эдип билерсиңиз? Мысал үчин, сиз Ехова билен достлугың гадырыны билйәрсиңизми? Исаның төлег гурбаны аркалы гүнәңиз гечилйәрми? Доган-уялардан кимлер сизе кынчылыкларда голдав берди? Элбетде, сиз эзиз янёлдашыңызы ве эй гөрйән чагаларыңызы хем үнсден салмарсыңыз. Алян берекетлериңизиң сан-саҗагы ёкдур. Сөйгүден долы Ехованың берйән аҗайып берекетлери барада ойланмак үчин вагт тапсаңыз, Худая йүрекден миннетдар боларсыңыз ве хер гүн оңа алкыш айдарсыңыз (Зебур 92:1, 2-нҗи аятлары окаң).

7. a) Биз дога эденимизде нәме үчин Ехова шүкүр этмели? б) Догада Худая шүкүр этмегиң нәхили пейдасы бар?

⁷ Биз алян берекетлеримиз барада ойланып, йүрекден миннетдар болсак, Ехова дога эденимизде, оңа шүкүр эдерис (Зеб. 95:2; 100:4, 5). Адамларың көпүси Худая диңе бир  зат герек боланда дога эдйәрлер. Эмма биз Ехованың шүкүр эдилйән догалары халаяндыгыны билйәрис. Мукаддес Язгыларда Ханна ве Хизкия патыша ялы Худайың гадымы гуллукчыларының Худая йүрекден шүкүр эден догалары язылгы (1 Шам. 2:1—10; Иш. 38:9—20) Биз хем оларың гөрелдесине эерип, Ехованың берйән берекетлерине шүкүр эдип, миннетдарлыгымызы билдирип билерис (1 Сел. 5:17, 18). Мунуң бизе көп пейдасы бар: рухланярыс, Ехова болан сөйгимиз артяр ве оңа хас-да якынлашярыс (Якуп 4:8).

8. Биз Ехованың эдйән ягшылыгыны нәме үчин гөзден салып билерис?

⁸ Биз Ехованың эдйән ягшылыгыны нәме үчин гөзден салып билерис? Себәби бизде догабитди гадыр билмез эндиги бар. Меселем, Адам ата билен Хов эне Эрем багында әхли зерурлыкларыны канагатландырып, эбеди яшап билйәрди (Гел. чык. 1:28). Эмма олар алян берекетлериниң гадырыны билмән ачгөзлүк эдип, көп зат иследилер. Нетиҗеде, олар әхли затдан махрум болдулар (Гел. чык. 3:6, 7, 17—19). Биз хем гадыр билмез адамларың арасында яшаяндыгымыз үчин, Ехованың бизе берйән әхли затларыны гөзден салмагымыз мүмкин. Мысал үчин, биз Ехова билен достлугымызы болмалысы ялы кабул эдип билерис. Бүтиндүнйә доганлыгың агзасы болмагың улы хорматдыгыны унутмагымыз мүмкин. Шейле-де биз тизден ёк эдилҗек дүнйәде башагай болуп билерис (1 Яхя 2:15—17). Биз бу затлардан гача дуруп, алян берекетлеримиз барада ойланып, Ехованың халкының арасындадыгымыза хемише-де оңа алкыш айтмак ислейәрис (Зебур 27:4-и окаң).

9. Агыр сынаглара учранымызда нәме үчин алян берекетлеримиз барада ойланмалы?

⁹ Биз йүрекден миннетдар болсак, агыр сынаглара дөз гелип билерис. Янёлдашың икилик этмеги, доган-гарындашларың айрылмагы, агыр кеселлемек, тебигы бетбагтчылык ялы дурмушда болян дуйдансыз вакалар себәпли гам чекмегимиз мүмкин. Шейле ягдайларда алян берекетлеримиз барада ойлансак, теселли  тапарыс ве рухланарыс. Гелиң, бирнәче мысала середелиң.

10. Ирина уямызың алян берекетлерини санамагы оңа нәдип көмек этди?

¹⁰ Демиргазык Америкада пионер болуп гуллук эдйән Ирина * атлы уямызың янёлдашы өң йыгнак яшулусы болуп гуллук эдйәрди. Соңра ол уямыза икилик эдип, оны ве чагаларыны ташлап гидйәр. Ирина Худая вепалы галмага нәме көмек этди? Ол шейле диййәр: «Ехованың мениң үчин эден затларына өрән шүкүр эдйәрин. Мен гөкдәки Атамың хер гүнки берйән берекетлерини санап, онуң мени танаяндыгына ве сөййәндигине гөз етирдим. Мен онуң хич хачан терк этмеҗекдигини билйәрин». Ирина дурмушында көп кынчылыклары башдан гечирендигине гарамаздан, хемише шадыян ве доган-уялары рухландыряр.

11. Кйуң-сук атлы уямыза агыр кеселине дөз гелмәге нәме көмек этди?

¹¹ Азияда яшаян Кйуң-сук атлы уямыз янёлдашы билен 20 йылдан говрак пионер болуп гуллук этди. Онуң өйкенинде рак кеселини тапдылар ве бары-ёгы 3 я-да 6 ай яшаҗакдыгыны айтдылар. Ол ёлдашы билен хер хили кынчылыклара душ гелсе-де, саглык ягдайы олары хич хачан биынҗалык этмейәрди. Уямыз: «Кеселлемегим маңа гаты агыр дегди. Мен хемме задымы йитирен ялы болдум ве гаты алҗырадым» диййәр. Кйуң-сук уямыза кеселине чыдамага нәме көмек эдйәр? Ол шейле диййәр: «Мен хер гүн агшам ятмаздан өң җайымызың үчегине чыкып, Ехова дога эдип, онуң хер гүнки маңа берйән бәш задына алкыш айдярын. Шонда мен көшешйәрин ве Ехова болан сөйгими билдирйәрин». Кйуң-сук уямыза эден догалары нәдип көмек эдйәр? Ол шейле диййәр: «Ехованың кын гүнлеримде голдаяндыгына ве гөрйән гөргүлеримден онуң берйән берекетлериниң көпдүгине гөз етирдим».

12. Җейсон доган аялы айрылансоң нәдип гөвүнлик тапды?

¹² 30 йылдан говрак долы вагт гуллук эдйән Җейсон доган хәзир Африкадакы филиалда ишлейәр. Ол шейле гүррүң берйәр: «Еди йыл мундан өң мениң аялым айрылды ве бу йитги себәпли мен гөвнүчөкгүн болдум. Аялымың рак кеселинден эҗир чекендиги ядыма дүшенде хас-да рухдан дүшйәрдим». Җейсон догана нәме көмек этдикә? Ол шейле диййәр: «Мен аялым билен гечирен говы гүнлерими ятлап, Ехова дога эдип, мунуң үчин оңа шүкүр этдим. Шонда дердим еңләп, гечирен багтлы гүнлерим үчин Ехова миннетдарлык билдирйәрдим. Шейдип, мен гарайшымы үйтгетдим. Шу гүнлерем мен өзүми еке дуйян вагтым Ехова дога эдип, говы машгаламың боландыгына ве онуң билен Худая гуллук эдендигиме миннетдарлык билдиренимде, йүрегим гиңән ялы боляр».

13. Шерел уямыза хасраты чекмәге нәме көмек этди?

¹³ 2013-нҗи йылың ахырында Филиппинде болан гүйчли харасатда 13 яшлы Шерел уямыз әхли задыны йитирди. Ол: «Мен өйсүз ве машгаласыз диен ялы галдым» диййәр. Онуң эне-атасы ве үч доганы харасатда хеләк болды. Шереле лапыкеч болман, бу хасраты чекмәге нәме көмек этди? Ол Ехова йүрекден миннетдар болуп, онуң берйән берекетлерини унутмады. Шерел шейле гүррүң берйәр:  «Мен әхли доган-уяларың мәтәчлере гөвүнлик берип, көмек эдйәндигини гөрдүм. Шейле-де бүтин дүнйәдәки доган-уяларың мениң үчин дога эдйәндигини билйәрдим. Мен Ехова Худайыма өрән шүкүр эдйәрин. Ол бизе хемише герекли задымызы берйәр». Ченденаша хасрат чекмез ялы алян берекетлеримизе үнс бермек ваҗыпдыр. Биз нәхили кынчылыклара душ гелсек-де, Худая йүрекден миннетдар болсак, көмек эдер (Эфес. 5:20; Филипилилер 4:6, 7-нҗи аятлары окаң).

14. Биз нәхили гелеҗеге гарашярыс? (Макаланың башындакы сурата середиң).

¹⁴ Бүтин тарыхың довамында Ехованың халкы алян берекетлерине шатланярды. Меселем, ысрайыллылар Гызыл деңизде фыровндан ве онуң гошунындан азат боландыгына бегенип, Ехованы васп эдйән айдымы айдып, оңа шүкүр этдилер (Мүс. чык. 15:1—21). Биз тизден эҗир чекйән әхли затларымыздан гутуларыс. Бу болса алҗак берекетлеримизиң иң гымматлысыдыр (Зеб. 37:9—11; Иш. 25:8; 33:24). Ехова душманларымызы ёк эдип, бизе адалатлы тәзе дүнйәсини беренде өрән бегенерис. Шонда биз Ехова алкыш барыны айдарыс! (Ылх. 20:1—3; 21:3, 4).

15. Сиз 2015-нҗи йылда нәме этмеги берк йүрегиңизе дүвдүңиз?

¹⁵ Биз 2015-нҗи йылда Ехованың берҗек рухы тайдан энчеме аҗайып берекетлерине сабырсызлык билен гарашярыс. Элбетде, биз кәбир сынаглара душ гелсек-де, Ехованың хич хачан терк этмеҗекдигини билйәрис (Кан. таг. 31:8; Зеб. 9:9, 10). Ол вепалы гуллук этмегимиз үчин әхли затлар билен үпҗүн эдер. Шол себәпли биз Хабакук пыгамбер ялы Ребде шатланмагы берк йүрегимизе дүвүп билерис. Ол шейле дийди: «Инҗир агаҗы гүллемесе-де, үзүм агачлары миве гетирмесе-де, зейтун агачлары хасыл бермесе-де, экин мейданлары хасыл өндүрмесе-де, довар агыллары бош галып, ятаклар мал-гарасыз болса-да, мен Ребде шатланарын, Халасгәримде йүрегим җошар» (Хаб. 3:17, 18). Шу йыл биз алян берекетлеримизе шатланып, 2015-нҗи йылың аядындакы: «Ехова шүкүр эдиң, чүнки ол говудыр» диен маслахата эерерис (Зеб. 106:1, ТД).