1. Ndi ngani ri tshi fanela u livhuha Yehova?

YEHOVA, Muṋei wa “tshifhiwa tshiṅwe na tshiṅwe tshavhuḓi na tsho fhelelaho,” vhukuma o fanelwa nga uri ri mu livhuhe. (Yak. 1:17) Sa Mulisa washu a re na lufuno, u ṱhogomela zwishaiwa zwashu zwa ṋama na zwa muya. (Ps. 23:1-3) O sumbedza uri u “vhudzumbamo hashu na maanḓa ashu”—zwihuluhulu musi ro khakhelwa! (Ps. 46:1) Vhukuma ri na zwiitisi zwinzhi zwa u tendelana na mupsalme zwi tshi bva mbiluni we a ṅwala uri: “Livhuhani Yehova, ngauri ndi wavhuḓi, ngauri vhuthu hawe ndi ha lini na lini.”—Ps. 106:1.

2, 3. (a) Ndi khombo dzifhio dzine dza nga vha hone nga u dzhiela fhasi phaṱhutshedzo dze ra dzi wana? (b) Ndi mbudziso dzifhio dzine ra ḓo dzi ṱolisisa kha ino thero?

² Ndi ngani zwi zwa ndeme uri ri ṱolisise enea mafhungo a u livhuha? Samusi zwo dzula zwo ambiwa, vhathu vha ano maḓuvha a vhufhelo a vha tsha livhuha nga ho kalulaho. (2 Tim. 3:2) Vhanzhi vha dzhiela fhasi phaṱhutshedzo dze vha dzi wana. Vhathu vhanzhi vha lwela u wana zwithu zwinzhi nṱhani ha uri vha fushee nga zwine vha vha nazwo, ngauri vha ṱuṱuwedzwa nga zwa vhuvhambadzi ha shango na khunguwedzo dzaḽo. Na riṋe ri nga vha  na wonoyu muya wa u sa livhuha. U fana na Vhaisiraele vha kale, na riṋe ri nga kundelwa u livhuha nahone ra si tsha dzhiela nṱha vhushaka hashu na Yehova na phaṱhutshedzo dze ra dzi wana khae.—Ps. 106:7, 11-13.

³ Ṱhogomelani zwine zwa nga itea musi ri tshi sedzana na zwiimo zwi konḓaho. Nga zwenezwo zwifhinga, ri nga ṱavhanya u kulea nungo nahone ri si tsha vhona phaṱhutshedzo dze ra dzi wana. (Ps. 116:3) Nga zwenezwo, ri nga ṱahulela hani u livhuha zwi tshi bva mbiluni na u dzula ri tshi ita nga u ralo? Nahone ndi mini zwine zwa ḓo ri thusa u dzula ri na mavhonele avhuḓi naho ro sedzana na milingo minzhi i konḓaho? Kha ri vhone.

4. Ri nga dzula hani ri tshi livhuha zwi tshi bva mbiluni?

⁴ Arali ri tshi ṱoḓa u ṱahulela u livhuha zwi tshi bva mbiluni na u dzula ri tshi zwi ita, ri fanela u dzhiela nṱha na u elekanya nga ha phaṱhutshedzo dzi bvaho ha Yehova na u ṱhogomela zwine a zwi ita nga lufuno lwa vhukuma. Musi mupsalme a tshi ita nga u ralo, o vha o mangadzwa nga zwithu zwavhuḓi zwe Yehova a zwi ita.—Vhalani Psalme ya 40:5; 107:43.

5. Ndi mini zwine ra nga zwi guda kha muapostola Paulo nga ha u ṱahulela u livhuha?

⁵ Ri nga guda zwinzhi kha muapostola Paulo nga ha u ṱahulela u livhuha. Zwi tou vha khagala uri o elekanya nga ha phaṱhutshedzo dze a dzi wana ngauri o vha a tshi livhuha tshifhinga tshoṱhe. Paulo o vha a tshi zwi ḓivha uri o vha a ‘tshi semana, e mutovholi nahone e na vhuhali.’ Naho zwo ralo, o livhuha nge Mudzimu na Kristo vha mu sumbedza tshilidzi na u mu ṋea vhuḓinḓa, hu sa londwi tshivhi tshe a tshi ita tshifhingani tsho fhiraho. (Vhalani 1 Timotheo 1:12-14.) Paulo o dovha a dzhiela nṱha Vhakriste ngae nahone kanzhi o vha a tshi livhuha Yehova nga pfaneleo dzavho dzavhuḓi na u shuma havho nga u fulufhedzea. (Vhafil. 1:3-5, 7; 1 Vhathes. 1:2, 3) Musi Paulo a tshi sedzana na vhuimo vhu konḓaho o vha a tshi ṱavhanya a livhuha Yehova nge a wana thikhedzo tshifhinga tshoṱhe kha vhahawe vha lwa muya. (Mish. 28:15; 2 Vhakor. 7:5-7) Nga zwenezwo, a zwi mangadzi uri ndi ngani Paulo o ṱuṱuwedza Vhakriste nga u vha ṅwalela uri: “Ni vhe vhane vha livhuha . . . , u ṱuṱuwedzana nga dzipsalme, ni tshi renda Mudzimu, na nga nyimbo dza lwa muya dzi imbiwaho nga [u livhuha].”—Vhakol. 3:15-17.

6. Ndi mini zwine zwihuluhulu na zwi livhuha kha Yehova?

⁶ Ri nga edzisa hani tsumbo ya Paulo yavhuḓi ya u ṱahulela na u sumbedza u livhuha? U fana na Paulo, ri fanela u elekanya nga zwe Yehova a ri itela zwone sa muthu nga eṱhe. (Ps. 116:12) Arali na nga vhudziswa uri ‘Ndi phaṱhutshedzo dzifhio dzi bvaho ha Yehova dzine na dzi livhuha?’ ni nga fhindula hani? Naa ni nga katela vhushaka haṋu ha ndeme na Yehova? Kana u hangwelwa haṋu nga nṱhani ha u vha na lutendo kha tshirengululi tsha tshiṱhavhelo tsha Kristo? Naa ni nga katela madzina a vhahashu vha tshinnani na vha tshisadzini vhe vha ima na inwi musi no sedzana na milingo minzhi i konḓaho? Vhukuma, ni nga si litshe u amba nga ha mufarisi waṋu wa mbingano kana vhana vhaṋu vhavhuḓi. U ḓiṋea tshifhinga tsha u elekanya nga ha dzenedzo phaṱhutshedzo dzavhuḓi dzi bvaho ha Khotsi aṋu wa lufuno, Yehova, zwi ḓo ita uri ni livhuhe zwi tshi bva mbiluni nahone zwi ḓo ni sudzulusela u livhuha ḓuvha ḽiṅwe na ḽiṅwe.—Vhalani Psalme ya 92:1, 2.

7. (a) Ndi ngani ri tshi fanela u livhuha Yehova musi ri tshi rabela? (b) Ni ḓo vhuyelwa hani nga u sumbedza u livhuha musi ni tshi rabela?

⁷ Arali phaṱhutshedzo dze ra dzi wana dzi tshi dzula dzi muhumbuloni na mbiluni dzashu,  ri ḓo kona u rabela na u livhuha Yehova. (Ps. 95:2; 100:4, 5) Vhanzhi vha vhona u nga thabelo i sokou vha nḓila ya u humbela Mudzimu zwiṅwe zwithu. Naho zwo ralo, ri a zwi ḓivha uri Yehova u a takala musi ri tshi mu livhuha nga zwine ra vha nazwo. Bivhilini hu na thabelo dzo vhalaho dzi bvaho mbiluni dza u livhuha, u katela na dza Hanna na Hesekiele. (1 Sam. 2:1-10; Yes. 38:9-20) Nga zwenezwo, edzisani vhenevho vhashumeli vha fulufhedzeaho vhe vha sumbedza muya wa u livhuha. Vhukuma, livhuhani phaṱhutshedzo dzine na vha nadzo kha Yehova nga thabelo. (1 Vhathes. 5:17, 18) Hu na mbuyelo nnzhi dza u ita nga u ralo. Ni ḓo khwaṱha nga lwa muya, u funa haṋu Yehova zwi ḓo engedzea, nahone ni ḓo sendela tsini-tsini nae.—Yak. 4:8.

8. Ndi mini zwine zwa nga ita uri ri si tsha dzhiela nṱha zwe Yehova a ri itela zwone?

⁸ Ndi ngani ri tshi fanela u dzula ro fhaṱuwa kha khombo ya u sa livhuha vhuḓi ha Yehova? Ngauri ro mamela nḓowelo ya u sa livhuha. Ṱhogomelani hezwi: Vhabebi vhashu vha u thoma, Adamu na Eva, vho vha vho vhewa tsimuni ya Edeni. Ho vha hu si na tshine vha tshi shaya, nahone vho vha vhe na tshilavhelelwa tsha u tshila tshoṱhe nga mulalo. (Gen. 1:28) Fhedzi a vho ngo dzhiela nṱha phaṱhutshedzo dzavho. Vho vha vha tshi ṱoḓa zwinzhi nga nṱhani ha tseḓa. Nga nṱhani ha zwenezwo vho xelelwa nga zwoṱhe. (Gen. 3:6, 7, 17-19) Ngauri ro tangwa nga vhathu vha sa livhuhi, na riṋe ri nga kundelwa u vhona zwe Yehova a ri itela zwone. Ri nga thoma u dzhiela fhasi vhushaka hashu nae. Ri nga dzhiela fhasi ndugelo yashu ya u vha tshipiḓa tsha vhahashu vha shango ḽoṱhe. Ri nga milwa nga zwithu zwa ḽino shango zwine zwa khou fhira hu si kale. (1 Yoh. 2:15-17) U itela u iledza uri zwenezwo zwi sa itee, ri ṱoḓa u elekanya nga ha phaṱhutshedzo dzashu na u livhuha Yehova tshifhinga tshoṱhe nga ndugelo ya u vha vhathu vhawe.—Vhalani Psalme ya 27:4.

9. Musi ro sedzana na milingo i konḓaho, ndi ngani ri tshi fanela u elekanya nga ha phaṱhutshedzo dzashu?

⁹ U livhuha zwi tshi bva mbiluni zwi nga ri thusa u sedzana na milingo i konḓaho. Ri nga pfa vhuṱungu vhukuma arali ra sedzana na tshanduko vhutshiloni hashu, dzi ngaho u sa fulufhedzea ha mufarisi wa mbingano, vhulwadze vhu shushaho, u felwa nga ane wa mu funa, kana mvelelo dzi si dzavhuḓi dzi vhangwaho nga khombo dza mupo. Nga zwenezwo zwifhinga, ri ḓo khuthadzwa na u khwaṱhiswa nga u elekanya nga ha phaṱhutshedzo dzashu. Ṱhogomelani zwe vhaṅwe vha vhuya vha sedzana nazwo.

10. Irina o vhuyelwa hani nga u elekanya nga ha phaṱhutshedzo dzawe?

 ¹⁰ Muṅwe muvulanḓila ane a pfi Irina * wa ngei Amerika Devhula, o vha o vhingana na muhulwane we a si fulufhedzee nahone onoyo muhulwane a mu sia na vhana vhawe. Ndi mini zwe zwa thusa Irina uri a bvele phanḓa a tshi shumela Yehova nga u fulufhedzea? O amba uri: “Ndi livhuha nge Yehova a nṱhogomela sa muthu nga eṱhe. Nga u elekanya nga ha phaṱhutshedzo dzanga ḓuvha ḽiṅwe na ḽiṅwe, ndi a kona u vhona uri ndi ndugelo khulwane vhukuma u ḓivhiwa na u funwa nga Khotsi ashu wa ṱaḓulu a tsireledzaho. Ndi a zwi ḓivha uri a nga si nndaṱe.” Naho Irina o sedzana na zwiimo zwi konḓaho vhutshiloni hawe, u dzula hawe o takala nga lwa muya zwo mu thusa nahone u ṱuṱuwedza vhaṅwe.

11. Ndi mini zwe zwa thusa Kyung-sook u sedzana na vhulwadze vhu shushaho?

¹¹ Kyung-sook ane a dzula ngei Asia, o vha e muvulanḓila na munna wawe lwa miṅwaha i fhiraho 20. Nga u ṱavhanya, o farwa nga khentsara ya mafhafhu nahone a vhudzwa uri o salelwa nga miṅwedzi miraru u ya kha ya rathi ya u tshila. Naho ene na munna wawe vho sedzana na milingo minzhi mihulwane na miṱuku, vho vha vha sa vhilaeli nga mutakalo wavho. O ri: “Enea mafhungo a mutakalo o mpfisa vhuṱungu vhukuma. Ndo pfa u nga ndo xelelwa nga tshiṅwe na tshiṅwe nahone ndo vha ndo tshuwa vhukuma.” Ndi mini zwe zwa thusa Kyung-sook u konḓelela? O ri: “Madekwana maṅwe na maṅwe ndi sa athu u eḓela, ndo vha ndi tshi gonya ṱhanga ya nnḓu yashu nahone nda rabelela nṱha nga ha zwithu zwiṱanu zwine nda zwi livhuha zwa ḽeneḽo ḓuvha. Nga zwenezwo, ndi ḓipfa ndo khwaṱhisedzwa na u sudzulusea u sumbedza Yehova lufuno.” Kyung-sook o vhuyelwa hani nga u rabela nga madekwana? O ri: “Ndi vho kona u zwi ṱhogomela uri Yehova u a ri tikedza musi ro sedzana na milingo i konḓaho nahone ri wana phaṱhutshedzo nnzhi u fhira milingo ine ra sedzana nayo.”

12. Jason o khuthadzwa hani nga murahu ha u felwa nga mufumakadzi wawe?

¹² Jason, ane a shuma ofisini ya davhi ngei Afurika, u tshumeloni ya tshifhinga tsho ḓalaho lwa miṅwaha i fhiraho 30. O ri: “Miṅwaha ya sumbe yo fhiraho, mufumakadzi wanga o fa nahone ndo pfa vhuṱungu vhuhulu. U dzula ndi tshi humbula nḓila ye mufumakadzi wanga a pfa ngayo vhuṱungu musi a tshi khou lwisana na khentsara, zwi a vhavha vhukuma.” Ndi mini zwe zwa thusa Jason u konḓelela? O ri: “Nga tshiṅwe tshifhinga, musi ndi tshi khou humbula nga ha tshifhinga tshavhuḓi tshe nda tshi fhedza na mufumakadzi wanga, ndi livhuha Yehova nga thabelo. Ndo ḓipfa ndo vhofholowa nahone nga zwenezwo nda thoma u livhuha Yehova tshifhinga tshoṱhe nga ha zwenezwo zwifhinga zwi takadzaho. U livhuha zwo ita uri hu vhe na tshanduko khulu kha mavhonele anga. Ndi kha ḓipfa vhuṱungu ha u felwa, fhedzi u livhuha Yehova nge nda vha na mbingano yavhuḓi na ndugelo ya u mu shumela na muthu we a vha a tshi mu funa vhukuma, zwo khwinisa mavhonele anga.”

13. Ndi mini zwe zwa thusa Sheryl u sedzana na u xelelwa nga vhunzhi ha miraḓo ya muṱa wa hawe?

¹³ Mafheloni a 2013, Ḓumbumazikule ḽi re na maanḓa ḽine ḽa pfi Haiyan ḽo rwa Philippines kati, Sheryl we a vha e na miṅwaha ya 13 nga tshenetsho tshifhinga o xelelwa nga zwithu zwoṱhe. O ri: “Ndo xelelwa nga haya na vhunzhi ha miraḓo ya muṱa wa hashu.” Khotsi awe, mme awe na vhana vha hawe vhararu, vho fa nga ḽeneḽo ḓumbu ḽi re na maanḓa. Ndi mini zwe zwa thusa Sheryl uri a kunde yeneyo milingo a songo sinyuwa? O vha a tshi dzula a tshi livhuha zwi tshi bva mbiluni nahone a tshi dzula a tshi humbula nga ha phaṱhutshedzo dze a vha a tshee nadzo. O dovha a ri: “Ndo vhona zwoṱhe zwe vhahashu  vha tshinnani na vha tshisadzini vha zwi ita u itela u ṱuṱuwedza vhahashu vhe vha vha vha tshi ṱoḓa thuso. Ndo vha ndi tshi zwi ḓivha uri vhahashu u mona na shango ḽoṱhe vho vha vha tshi khou nthabelela.” O dovha a ri: “Ndi a livhuha vhukuma ngauri Yehova ndi Mudzimu wanga. U dzula a tshi ri ṋea zwine ra zwi ṱoḓa.” Vhukuma, u elekanya nga ha phaṱhutshedzo dzashu ndi dzilafho ḽihulwane ḽa u sa dzula ri tshi vhilaela. U livhuha zwi tshi bva mbiluni zwi ri thusa uri ri bvele phanḓa hu sa londwi mitsiko ine ra sedzana nayo.—Vhaef. 5:20; vhalani Vhafilipi 4:6, 7.

14. Ndi tshilavhelelwa tshifhio tshi takadzaho tshe ra tshi lindela? (Sedzani tshifanyiso tsha u thoma.)

¹⁴ Kha ḓivhazwakale yoṱhe, vhathu vha Yehova vho takalela phaṱhutshedzo dze vha dzi wana. Sa tsumbo, nga murahu ha u phuluswa kha Farao na maswina awe Lwanzheni Lutswuku, Vhaisiraele vho sumbedza u takala nga u imba nyimbo dza khuliso na u livhuha. (Ek. 15:1-21) Ṋamusi, phaṱhutshedzo khulwane kha dzoṱhe dzine ra vha nadzo ndi fulufhelo ḽashu ḽa u phuluswa kha tshiṅwe na tshiṅwe tshine tsha ita uri ri pfe vhuṱungu na u tsikeledzea. (Ps. 37:9-11; Yes. 25:8; 33:24) Edzani u humbula nḓila ine ra ḓo ḓipfa ngayo musi Yehova a tshi fhelisa maswina ashu oṱhe na u ri ṱanganedza shangoni ḽiswa ḽo lugaho na ḽi re na mulalo. Ḽeneḽo ḽi ḓo vha ḓuvha ḽa u livhuha lungafhani!—Nzumb. 20:1-3; 21:3, 4.

15. No ḓiimisela u ita mini ṅwaha woṱhe wa 2015?

¹⁵ Ro lavhelela nga maṱo matswuku u wana phaṱhutshedzo nnzhi dza lwa muya dzi bvaho ha Yehova nga 2015. Vhukuma, ri nga sedzana na miṅwe milingo. Hu sa londwi zwine zwa nga itea, ri ḓivha uri Yehova a nga si vhuye a ri laṱa. (Doit. 31:8; Ps. 9:9, 10) U ḓo bvela phanḓa a tshi ri ṋea zwoṱhe zwine ra zwi ṱoḓa u itela u mu shumela nga u fulufhedzea. Nga zwenezwo, u nga ri ri nga ḓiimisela u dzula ri tshi ṱahulela muya u fanaho na wa muporofita Habakuku we a ri: “Hone, nahó muhuyu ú sa aṋwi, naho miṱokola í si ná mitshelo, naho muṱwari wó pfuvha, nahó mirangani zwifuwo zwó fhela, naho madangani kholomo dzi si tsheeho’, Á vha nṋe, ndi ḓo ḓi takalela Yehova, nda pembelela Mudzimu Mulamuleli wanga.” (Hab. 3:17, 18) Vhukuma, ṅwaha woṱhe u ḓaho, u nga ri ri nga elekanya nga ha phaṱhutshedzo dze ra dzi wana ro takala na u sudzuluselwa u tevhela ṱhuṱhuwedzo i wanalaho kha ndimana yashu ya ṅwaha wa 2015 ine ya ri: “Livhuhani Yehova, ngauri ndi wavhuḓi.”—Ps. 106:1.