MUTWE WA PA NKUPIKO | BYO MWAKONSHA KWINGILA NKITO NA LUSEKELO
Nanchi Kwingila na Ngovu
Alex ubena kupemashika byo abena kukanjizha kibokoshi mu motoka wa ku kampanyi ko engila. Ubena kwishikisha amba, ‘Nanchi ngingilangatu nkito ya uno mutundu nyi?’ ‘Nanchi nkengilapo nkito yapusanako na ino nyi? Bwikalo bwami bwakonsha kuwama umvwe ke ngikaletu!’
Byonkatu biji Alex ye tubena kwambapo, bantu bavula kechi bomvwa bulongo kwingila nkito yakosa ne. Aaron wingila nkito ya bu makanyika waambile’mba: “Bantu bavula balanguluka amba kwingila nkito ya panshi ibalengela kulengululwa.” Bamba’mba: “Mbena kwelaizhakotu, inge kwamweka nkito yawama nkeileka.”
Mambo ka bantu bavula o balangulukila amba kechi bakonsha kwingila nkito yakosa ne? Kampepo ke na mambo a bintu byo batamba pa televizhonyi bimwesha “bwikalo bwawama” kabiji bwa ntentente. Matthew wingila nkito ya bya kuwamisha wamisha waambile’mba: “Bantu balanguluka amba nangwa wingilepotu na ngovu byepi, kafwakotu ne byawama bifumamo ne.” Shane wingila mwingilo wa kupyanga pa sukulu naye byo ekitana. Waambile’mba: “Bantu kechi bakeba kuzhikisha juba na kwingila ne, bino bakebatu kutambula mali.”
Bino bantu bavula baikala bulongo bamwenamo mu kwingila na ngovu. Daniel wa myaka 25 wingila mwingilo wa buntungi waambile’mba: “Kwingila na ngovu mufuma byawama umvwe paji byo ukeba kuba.” Andre wa myaka 23 naye waswa kino. Waambile’mba: “Kubula kwingila kechi ko kwakonsha kulengela muntu kwikala na lusekelo ne, bino kulengelatu kumvwa mukose.”
Ki ka kyalengela Daniel ne Andre kwikala na muchima wa kwingila nkito na ngovu? Balondela byaamba mafunde a mu Baibolo mu bwikalo bwabo. Baibolo witutundaika kwingila na ngovu. Bino Baibolo kechi waambatu pa kwingila ne. Waamba ne pa byo twafwainwa kwikala balusekelo pa kwingila nkito.
Ñanyi mafunde a mu Baibolo akonsha kwimukwasha kwikala balusekelo pa kwingila nkito? Twayai twisambeko pa amo mu kibaaba kyalondelapo.
