Alex-a ang bawkin, tûn laiah mi tam tak chuan hna thawhrim chu nuam an ti lo. Motor siamnaa thawk Aaron-a chuan: “Mi tam takin hna ‘hnuaihnung tak’ thawh chu an hreh a. An rilru put hmang chu: ‘Hna ṭha dang thawh tûr ka neih hmaa thawk ve mai mai ka ni,’ tih hi a ni,” tiin a sawi.

Engvângin nge mi tam takte chuan hna thawhrim chu an kuang ni lova an ngaih? Anni chu nuamsa tak leh hahdam taka nun chu nun “duhthusâm” anga lantîr ṭhîn chanchin puanchhuahte’n a hneh vâng a ni thei ang. Thuam ṭhatna lam thawktu Matthew-a chuan: “Mi tam tak chuan ei zawn nâna hna thawhrim hi hlawhtlin loh vângah an ngai a ni,” tiin a sawi. Kawngkhâr vêngtu Shane-a chuan chutiang bawk chu a sawi a ni: “Ni khat hlawh a puma hmu tûra nilênga hnathawh chu mi tam takte tih dân a ni tawh lo,” tiin a sawi bawk.

Kawng leh lamah chuan, hlawhtlinna nei mi tam tak chuan hna thawhrim chu nuam an ti a. In satu kum 25 mi Daniel-a chuan: “Hna thawhrim hi a manhla a, thiltum ṭha tak atâna thawh rim a nih hian a manhla lehzual,” tiin a sawi. Kum 23 mi Andre-a chuan chu chu a pawm a. “Hlimna leh lâwmna hi hna thawh nên a inzawm tlat ka ring. Hna thawh tlêm leh thiltih tlêm hi hlimna dik tak min neihtîrtu a ni lo—ning hluah hluaha min awmtîr rengtu a ni zâwk!” tiin a sawi.

Engtin nge Daniel-a leh Andre-a te ang mite chuan hna thawhrim chu thil ṭha nia an thlîr theih? A awlsam zâwnga sawi chuan, Bible thu bulte an nunpui vâng a ni a. Bible chuan hna thawkrim lo tûra min ti lo mai ni lovin, taima tak leh chhel taka thawk tûrin min fuih zâwk mah a ni. Mahse, Bible chuan hna thawk tûrin min ti mai lo. Hlim taka thawh theih dân pawh min kawhhmuh bawk a ni.

Eng Bible thu bulte hian nge i hnaa lungâwina hmu tûrin ṭanpui thei che? A dawta thuziak chuan a ṭanpui theih dân che ṭhenkhat chu a târ lang a, chu chu ngaihtuah tûrin kan sâwm a che. (w15-E 02/01)