Imahinara kun paano makikinabang an katawuhan kun may sarong gobyerno na mamamahala sa bilog na kinaban. Dakul na tawo ngunyan an nagsasakit huling sinda pobrehon, mantang an iba naman mayamanon. Pero sisiguraduhon kan sarong mapagmalasakit na gobyerno na maitao sa gabos an saindang pangangaipo. Sa hiling mo, makakagibo daw an tawo nin arog kaiyan na gobyerno?—Basahon an Jeremias 10:23.

Sa bilog na kasaysayan, sa dakul na aspekto, dai naitao kan mga gobyerno an mga pangangaipo kan saindang nasasakupan, lalo na sa mga pobre. May mga gobyerno na daing hirak. (Parahulit 4:1; 8:9) Pero an Diyos na Makakamhan sa Gabos nanunuga nin sarong gobyerno na masalida sa gabos na gobyerno nin tawo. Dai nanggad papabayaan kan Tagapamahala kaiyan an mga tawo.—Basahon an Isaias 11:4; Daniel 2:44.

Nagpili an Diyos na Jehova nin pinakamarahay na magin Tagapamahala sa kinaban—an saiyang Aki na si Jesus. (Lucas 1:31-33) Kan si Jesus yaon digdi sa daga bilang tawo, gustuhon niyang tabangan an mga tawo. Bilang Hadi, pagkakasararuon niya an mga tawo kan gabos na nasyon asin hahalion an gabos na klase nin pagsakit.—Basahon an Salmo 72:8, 12-14.

Inaako daw si Jesus kan gabos bilang Tagapamahala? Dai. Pero mapasensiya si Jehova. (2 Pedro 3:9) Tinatawan niya nin pagkakataon an mga tawo na akuon si Jesus bilang Tagapamahala. Dai na mahahaloy, hahalion na ni Jesus digdi sa daga an maraot na mga tawo asin tatawan niya nin nagdadanay na katuninungan asin katiwasayan an bilog na daga.—Basahon an Miqueas 4:3, 4.