Vakasamataka mada e dua na matanitu me liutaki vuravura taucoko qai vakacegui keda. Levu era rarawa tu nikua nira sa rui dravudravua, so tale era vutuniyau. Ia na matanitu ena liutaki vuravura qai kila na ka eda gadreva ena vakaceguya noda gagadre qori. O nanuma nida rawa ni tauyavutaka ga na tamata e dua na matanitu va qori?​—Wilika Jeremaia 10:23.

Laurai ena ivolatukutuku ni kawatamata nira guce na matanitu ena levu ni nodra sasaga mera qaravi ira na vakarurugi ena nodra veiliutaki, vakauasivi o ira na dravudravua. So na matanitu era dau veivakalolomataki. (Dauvunau 4:1; 8:9) Ia sa yalataka tu na Kalou Kaukaua Duadua ni na vakarautaka e dua na matanitu me sosomitaki ira kece na veimatanitu qori. Na kena iLiuliu ena kauaitaki keda vakalevu.​—Wilika Aisea 11:4; Taniela 2:44.

Sa lesia tu na Kalou o Jiova e dua e ganiti koya me veiliutaki e Vuravura, qo na Luvena, o Jisu. (Luke 1:​31-​33) Dau vukei ira na tamata ena gauna a bula tu kina e vuravura. Ni Tui, ena vakaduavatataki ira na veimatanitu, qai vakacegui ira kece na rarawa tu.​—Wilika Same 72:​8, 12-​14.

Era na taleitaka kece na tamata me nodra iLiuliu o Jisu? Sega. Ia e dau yalovosovoso o Jiova. (2 Pita 3:9) Se solia tiko na gauna meda digi Jisu me noda iLiuliu. Sa voleka sara qo ni vakawabokotaki ira na tamata ca o Jisu, qai tauyavutaka na bula sautu kei na nuidei e vuravura taucoko.​—Wilika Maika 4:​3, 4.