Diladila ashike nghee epangelo lomounyuni aushe tali dulu okweetela ovanhu ouwa. Nonande kunena ovanhu vamwe ova punapala, vahapu ohava mono oixuna molwaashi va hepa neenghono. Ndele epangelo lomounyuni aushe olo hali udile ovanhu oukwao wananghali, otali ka wanifa po eemhumbwe dovanhu aveshe. Mbela oto diladila kutya ovanhu otava dulu okutota po epangelo la tya ngaho? — Lesha Jeremia 10:23.

Ondjokonona aishe otai ulike kutya omapangelo opanhu okwa dopa okufila oshisho ovapangelwa vavo meenghedi dihapu, unene tuu eehepele. Omapangelo amwe omakwanyanya. (Omuudifi 4:1; 8:9) Ashike Kalunga Omunaenghono adishe okwa udaneka kutya ota ka eta epangelo olo tali ka pingena po omapangelo aeshe. Omupangeli walo ota ka fila oshisho ovanhu aveshe. — Lesha Jesaja 11:4; Daniel 2:44.

Jehova Kalunga okwa hoolola oo a wana okuninga Omupangeli wounyuni, Omona waye, Jesus. (Lukas 1:31-33) Eshi Jesus a li kombada yedu okwa li a halelela okukwafela ovanhu. E li Ohamba, ota ka hanganifa ovanhu vomoiwana aishe nokuxulifa po okumona oixuna akushe. — Lesha Epsalme 72:8, 12-14.

Mbela ovanhu aveshe otava ka tambula ko ngoo Jesus e li Omupangeli wavo? Ahowe. Ashike Jehova ohe va tale onheni. (2 Petrus 3:9) Ota pe ovanhu omhito opo va tambule ko Jesus e li Omupangeli wavo. Mafiku Jesus ota ka hanauna po ovakolokoshi nokweeta ombili neameno mounyuni aushe. — Lesha Mika 4:3, 4.