Takorlooriaruk naalagaaffik silarsuarmut naalakkersuisoq inuiannut qanoq iluaqutaasinnaasoq. Ullumikkut inoqarpoq pisoorsuarnik, inuppassuilli allat piitsuungaaramik naalliupput. Naalagaaffilli silarsuarmut naalakkersuisoq inuit pisariaqartitaannik paasinnittoq inunnik tamanik isumassuisinnaavoq. Isumaqarpit inuit naalagaaffimmik taama ittumik pilersitsisinnaasut? — Tussiaat 146:3 atuaruk.

Inuit oqaluttuarisaanerannit erserpoq nunami naalakkersuisut innuttaminnik, ingammik piitsunik, isumassuinerminni assigiinngitsutigut iluatsinngitsoorsimasut. Naalakkersuisut ilaat naakkittaatsuupput. (Oqaluussisartup oqaasii 4:1; 8:9) Guutili Ajugaqanngitsoq neriorsuisimavoq naalagaaffimmik naalakkersuisunik allanik tamanik taarsiisussamik pilersitsiumaarluni. Naalagaaffimmi tamatumani naalakkersuisoq inunnik tamanik isumassuilluarumaarpoq. — Esaja 11:4; Danieli 2:44 atuakkit.

Jehovap Guutip nunarsuarmut naalakkersuisussatut piukkunnarluinnartoq — Erni Jiisusi — toqqarsimavaa. (Lukasi 1:31-33) Jiisusip nunamiikkallarami inuit soqutigalugit ikiortarpai. Kunngisut inuit inuiannit tamaneersut ataasiussuseqalersillugillu naalliuutaarutitissavai. — Tussiaat 72:8, 12-14 atuakkit.

Kikkut tamarmik Jiisusimit naalakkersorneqarumassappat? Naamik. Jehovali erinitsajuippoq. (2 Petrusi 3:9) Inuit Jiisusimik naalakkersuisoqarnissaminnik akuersinissaannut periarfissippai. Qanittukkut Jiisusip nunarsuaq tamaat inunnik ajortuerutitillugu eqqissineqartillugulu isumannaatsunngortissavaa. — Mika 4:3, 4 atuakkit.