Ubona angani kungabanceda njani abantu emhlabeni ukubuswa nguhulumende oyedwa? Lamuhla abantu abanengi bathwele nzima ngenxa yokuthi bayadubeka kakhulu, kodwa abanye banothe okumangalisayo. Nxa kungenzakala ukuthi umhlaba wonke ubuswe nguhulumende othanda abantu bonke, abangeke babe khona abaswelayo. Kambe abantu bangenelisa yini ukubumba uhulumende onjalo?—Bala uJeremiya 10:23.

Kusukela kudala ohulumende bebelokhu besehluleka ukunakekela abantu abababusayo, ikakhulu abangabayanga. Abanye ohulumende balolunya. (UmTshumayeli 4:1) Kodwa uNkulunkulu uSomandla usithembisa ukuthi owakhe uhulumende uzasusa bonke ohulumende kubuse wona wodwa qekele. UMbusi wawo uzabanakekela sibili abantu.—Bala u-Isaya 11:4 loDanyeli 2:44.

UJehova uNkulunkulu ukhethe uMbusi ofaneleyo, iNdodana yakhe uJesu. (ULukha 1:31-33) UJesu esasemhlabeni wayekuthanda ukunceda abantu. Nxa esebusa uzakwenza ukuthi kube lomanyano ebantwini bezizwe zonke futhi uzakhipha konke okubahluphayo.—Bala iHubo 72:8, 12-14.

Kayisibo bonke abantu abazavuma ukubuswa nguJesu. Kodwa uJehova uyababekezelela. (2 UPhetro 3:9) Unika abantu ithuba lokuthi bamamukele uJesu ukuze abe nguMbusi wabo. Sekuseduze ukuthi uJesu asuse abantu ababi abesesenza ukuthi kube lokuthula lokuvikeleka emhlabeni jikelele.—Bala uMikha 4:3, 4.