Juk gobiernullana karnin, nunakunapaq ima allikunata ruramunampaq kaqman pensari. Kanan witsanqa, mëtsikaq nunakunam sufriyan waktsa karnin, y wallkaqllam kapoqyoqqa kayan. Entëru Patsachö juk gobiernullana karqa, nunakuna wanayanqanta rasumpa musyarmi llapanta yanapanman. ¿Juk nunapa gobiernun tsë rurëta puëdinmantsuraq? (Leyi Jeremïas 10:23.)

Unë witsampita patsëmi, gobiernukunaqa nunakunata tukïnöpa llakitsiyashqa, y masqa waktsa kaqkunatam. Wakin gobiernukunaqa alläpa rumi shonqum kayan (Eclesiastes 4:1; 8:9). Peru Llapanta Puëdeq Diosqa änikushqa juk gobiernutam, tsëmi llapan mana alli gobiernukunata trukanqa, jina juk mandakoqtam churashqa nunakunata cuidanampaq. (Leyi Isaïas 11:4 y Daniel 2:44.)

Gobiernunchö mandakunampaq Jehovä akranqan Mandakoqqa Tsurin Jesucristum. Pëmi alli mandakoqqa (Lücas 1:31-33). Kë Patsachö këkarninmi yarpachakurqan wakinkunapaq. Mandakoq këninwanmi llapan nacionkunapita nunakunata juntanqa y sufrimientunkunata ushakätsinqa. (Leyi Salmu 72:8, 12-14.)

¿Llapankunatsuraq Mandakoqninkunatanö Jesusta chaskiyanqa? Manam, peru Jehoväqa pacienciakoqmi (2 Pëdru 3:9). Tsëmi llapankunata tiemputa qoykan cambiayänampaq. Ichikllachönam Jesusqa mana allikunata ushakätsinqa y entëru Patsapaq yamë y següru kawakïta apamunqa. (Leyi Miquëas 4:3, 4.)