JEHOVÁ DIOSAN Reinopat yatiyañaw jichhürunakan wali wakiskirejja. Cheqas Jehová Diosan arunakapwa yatiytanjja, ukajj mä jachʼa bendicionawa. Ukampis awisajja, kusisit chuymampi yatiyaskakiñajj chʼamakëjjaspawa. ¿Kunatsa ukham sistanjja?

Awisajja, utat uta yatiykasajj janiw khitirus jikjjataskiti. Yaqhep horasasti jaqenakajj utankasipkchi ukasa, janiw istʼañ munapkiti, toqesjjapjjakiwa, ukaw yaqhep jilat kullakanakarojj aynachtʼayi. Maysa toqetjja, yaqhepajj wali jachʼa territorionïpjjewa, ukanjj waljaniruw Bibliat yatjjatañ munirinakar jikjjatapjje, ukampis jan taqenir yatiyirjamäsaw aynachtʼapjje. Yaqhep jilat kullakanakajja, walja maranakaw yatiyjjapjje ukat akapachan jan jankʼak tukusitapatwa aynachtʼapjjaraki.

Taqe ukanakaw maynirojj aynachtʼayaspa, ukatwa kusisit chuymamp jan yatiyjjaspati. Cheqas Supayan apnaqat akapachanjja, yatiyañajj chʼamakipunïniwa, uk sumwa yattanjja (1 Juan 5:19).

Yatiykasajja, inas jumajj aynachtʼata jikjjatasiraksta. Ukampis jan llakisimti, Jehová Diosaw yanaptʼaskätam. ¿Kunas kusisit chuymampi yatiyañatakejj yanaptʼiristamjja? Uk jichhajj mä qawqha uñjañäni.

Sapa marajja, waljaniw Jehová Diosan Qhanañchiripäñatak bautisasipjje. Jumatï jichhak bautisasta ukhajja, experienciani jilat kullakanakatwa yateqasisma. Ukampis walja maranak bautisatäjjsta ukhajja, jichhak bautisasipki ukanakaruw yanaptʼarakisma. Ukham lurasajj wali kusisitaw jikjjatasïta.

Jesusajja, suma yatichirïpjjañapatakiw discipulonakapar yanaptʼäna (Luc. 8:1). Jichhürunakanjja, jichhak bautisatäpki uka jilat kullakanakajj  ukhamarakiw suma yatichirïñatakejj yanaptʼatäña munapjje.

¿Kunjamsa jichhak bautisatanakarojj yanaptʼsna? Maynejj janiw yatiyir mistusakejj suma yatichiriru tukkaspati, jan ukasti mä experienciani jilat kullakaw munasiñampi, pacienciampi yanaptʼañapa. Jumatï experiencianïsta ukhajja, akanak lurasaw yanaptʼasma: maya, wakichtʼasiñapatakiw yanaptʼañama, ukat kunsa jaqer parlkasajj sani uk yatsuñapatakiw yanaptʼañamaraki. Paya, jaqemp parlañapatakiw yanaptʼañama. Kimsa, kunjamsa qellqatanak churaspa uk yateqañapatakiw yanaptʼañama. Pusi, jukʼampi Bibliat yatiñ munapki ukar kuttʼañatakiw yanaptʼañama. Phesqa, Bibliat yatichañ qalltañapatakiw yanaptʼañamaraki. Ukatjja, “walik ukham lurtajja” sasaw chʼamañchtʼañama, kunanakampsa luraspa uksa, sañamarakiwa (Ecl. 4:9, 10). Jichhak yatiyir mistki uka jilatasa jan ukajj kullakasa, experienciani jilat kullakanakat yateqasipjjani ukhajja, suma yatichirïpjjaniwa (Luc. 6:40). Janiw ukakïkiti, uka jilat kullakar jukʼampi confiyasajj jupanakan yanapapwa thaqhapjjani.

Walsa chʼamachaskstanjja, yatiykasajj janiw awisajj khitirus jikjjatktanti. Ukampis jiwasamp chik yatiyir mistki ukampiw sum parltʼassna. Amtañäni, Jesusajj ‘panin paninwa’ arkirinakaparojj yatiyir khitäna (Luc. 10:1). Ukhamatwa purapat ‘yanaptʼasipjjäna’, mä arunjja, purapat chʼamañchtʼasipjjäna (Rom. 1:12).

Yatiykta uka jilatampi jan ukajj kullakampejja, ¿kuna toqetsa parltʼasma? Kuna askinaksa yatiykasasa, Bibliat sapaki yatjjatkasasa, jan ukajj familjam yatjjatkasasa jikjjatawayta uka toqenakatwa parltʼasma, jan ukajj tantachäwin kuna arstʼäwis chuymar purtʼawaytam uksa, parltʼarakismawa. Khitimpitï yatiykta uka jilatarusa jan ukajj kullakarusa jan sum uñtʼksta ukhajja, ¿kuna toqetsa parltʼarakisma? Inas akham jisktʼchisma: “¿Kunjamatsa Jehová Diosan Qhanañchiriparu tukuwayta? ¿Kunatsa cheqa religionankatamat jan pächaskta? ¿Kawkïr tamankayätas nayrajja?” sasa. Ukatjja, kuna experiencianaksa yatiykasajj jikjjatawayapjjta uksa parltʼapjjarakismawa. Jaqenakajj istʼchistanisa janisa, purapat parltʼasisaw chʼamañchtʼassna (1 Tes. 5:11).

Kusisit chuymampi yatiyaskakiñatakejja, sapa semanaw Bibliat sapaki yatjjatañama. ‘Amuyasiri cheqap uywatasti’, walja qellqatanakwa  churistu, ukanakatwa Bibliat sapaki yatjjatasma (Mat. 24:45, MT). Amuytʼañataki, kunatsa Diosan arunakapat parlañajj wali wakiskirejja uka toqetwa yatjjatasma. “¿Kunatsa yatiyañajj wali wakiskirejja?” siski uka recuadrow ukatakejj yanaptʼiristam.

Recuadro liytʼasajja, kuntï ukan siski uka toqenakat amuytʼam. Ukaw yatiyaskakiñatakejj yanaptʼätam. Ukhamarusa, kunatsa yatiyañajj wakisi uk jukʼamp yatiñatakejja, Bibliatwa yatjjataskakiñama. Ukhamtï lurätajja, kusisit chuymampiw yatiyaskakïta.

Janiw utat uta mayakejj yatiyañasäkiti, jan ukasti, Jehová Diosan markapajj kunayman toqet yatiyañatakiw chʼamañchistu. Sañäni, carta qellqasa, teléfono toqe, callenakana, walja jaqenakajj utjki uka cheqanakana, trabajonakan yatiyañatakiw chʼamañchistu. Kawkhantï jukʼa yatiyirinakak utjki ukhanakansa, jan ukajj jan ni mä yatiyiris utjki uka cheqanakan yatiyiris sararakismawa.

¿Janit ukham yatiyañ yantʼkasma? Walja jilat kullakanakaw ukham yatiyasajj kusisita jikjjatasipjje. Uka toqet kimsa experiencianak uñjañäni.

April sat mä kullakajja, kunjamsa Bibliat yatichañ qalltasispa ukwa Diosan Apnaqäwipat Yatiyañataki qellqatan liytʼatayna, ukat ukarjam lurañatakiw chʼamachasitayna. Ukham lurasajja, jichhajj kimsa irnaqer masinakaparuw Bibliat yatichaski, jupanakasti tantachäwinakarojj sarapjjarakiwa.

 Jehová Diosan markapajja, kunjamsa jaqenakan chuymaparojj revistanakan yatichäwinakapampejj purtʼsna, uk amuytʼañatakis chʼamañchtʼarakistuwa. Estados Unidos markankir tamanak tumptʼir mä jilatajja, ¡Despertad! revistanwa neumático toqet parlir liytʼatayna. Ukampiw neumático aljirinakarojj yatiyatayna. Ukatjja, jilatampi esposapampejja, “Los retos del médico de hoy”, uka toqet parlir qellqatampiw 100 jila qollayasiñ utanakar sarapjjarakitayna. Jilatasti siwa: “Ukham yatiyasaw jaqenakajj luratanakas yatipjje, ukhamatarakwa qellqatanakassa uñtʼapjje. Esposajampejja, yatiyapkta uka cheqan jakasirinakarojj sumwa jichhajj uñtʼjjapta, Bibliat yateqañ munirinakarus kuttʼapjjaraktwa” sasa.

Mä kullakajja, Brooklyn Betelarojj akhamwa qellqatayna: ‘Teléfono toqe yatiyasiñapatak chʼamañchtʼapjjatamat walpun yuspärapsma. Mamajajj 86 maranëjjewa, walja usunakanirakiwa, ukatwa teléfono toqek yatiyi’ sasa. Ukham lurasajja, 92 marani mä warmiruw kullakan mamapajj Bibliat yatichaski.

Qellqatanakan mistki uka yanaptʼanakajj wali askiwa. Ukarjam lurañataki chʼamachasim. Ukhamtï lurätajja, kusisit chuymampiw yatiyaskakïta.

Khititï waljanir Bibliat yatichki, walja qellqatanak jaytki, jan ukajj waljaniru Jehová Diosan Qhanañchiriparu tukuyki ukas suma yatiyirïkaspa ukhamwa waljanejj amuyapjje. Ukampis ukajj janiw ukhamäkiti. Noé chachat amuytʼañäni, jupajj yatiykasajj ¿askinak jikjjatänti? Jïsa. ¿Qawqhanirus Jehová Diosan serviriparu tukupjjañapatak yanaptʼäna? Familiaparukiw yanaptʼäna. ¿Kunsa ukajj yatichistu? Taqe kunat sipansa, Jehová Diosat jan jitheqtas serviñaw wali wakiskirejja (1 Cor. 4:2).

Walja jilat kullakanakajja, kusisit chuymampi yatiyaskakiñatakejj kuntï phoqherjamäpki uk lurañwa amtapjje. ¿Kunanak lurañsa amtapjjpacha? Uk yatiñatakejja, aka janankir recuadro uñjjattʼam.

Kusisita yatiyañatakejja, Jehová Diosaruw yanaptʼa mayisiñama. Taqenir yatiyañataki chʼamachasïta, ukat kun lurañtï amtkta uk phoqäta ukhajja, kusisitaw jikjjatasïta.

Yatiyañajj chʼamakipunïniwa. Ukampis kusisit chuymampi yatiyaskakiñatakejj kunayman lurañanakaw yanaptʼiristam. Yatiykäta uka jilatampi, jan ukajj kullakampiw parltʼasiñama. Sapa semanaw Bibliat sapaki yatjjatañama. Amuyasiri Cheqapa Uywatajj kuna yanapanaktï churkistu uk lurañatakiw chʼamachasirakisma. Ukatjja, kuntï phoqerjamäkta ukwa lurarakisma. Ukampis ak janipun armasimti, Jehová Diosaw arunakap yatiyañamatakisa, Qhanañchiripäñamatakis ajllistamjja (Isa. 43:10). Ukhamasti yatiyaskakiñamawa, ukhamatwa kusisita jikjjatasïta.