ANG pagbantala sang maayong balita amo ang pinakaimportante nga hilikuton nga ginahimo subong sa duta. Subong Saksi ni Jehova, pat-od nga ginakabig mo nga kadungganan ang pagpakigbahin sa paghimo sing disipulo. Apang magaugyon ka gid, nga kon kaisa, ang mga payunir kag mga manugbantala nagaatubang sing mga kabudlayan para makapabilin nga makugi sa ministeryo.

Ang pila ka manugbantala nabudlayan makakita sing maistorya sa pamalaybalay nga hilikuton. Ang kalabanan nga tawo sa teritoryo mahimo nga wala sa ila balay. Kon yara gid man, mahimo nga indi sila interesado ukon akig pa gani sa mensahe parte sa Ginharian. Ang iban naman nga manugbantala nabalaka nga kalapad sang ila teritoryo kag kadamo sang interesado amo nga basi indi nila ini matuptupan. Kag ang pila ka miembro sang kongregasyon tinuig na nga nagabantala amo nga naluyahan sila sing buot kay mas madugay ini sangsa ila ginapaabot.

Matingala pa bala kita nga ang tanan nga alagad ni Jehova nagaatubang sing mga kabudlayan nga nagapaluya sang ila kakugi sa pagbantala? Indi. Kay man, may nagapaabot bala sa aton nga mangin mahapos ang pagbantala sang nagaluwas sing kabuhi nga mensahe sang kamatuoran halin sa Dios sa kalibutan nga ginagamhan sang “isa nga malauton,” si Satanas nga Yawa?—1 Juan 5:19.

Ano man ang imo mga kabudlayan sa pagbantala sang maayong balita, makasalig ka nga buligan ka ni Jehova nga malandas ini. Pero ano ang mahimo mo para madugangan ang imo kakugi sa ministeryo? Binagbinagon naton ang pila ka panugda.

Kada tuig, linibo ang ginabawtismuhan subong mga Saksi ni Jehova. Kon ginsimbuluhan mo sining karon lang ang imo dedikasyon kay Jehova paagi sa pagpabawtismo, makabenepisyo ka gid sa eksperiensia sang madugay na nga mga manugbantala. Kag kon madugay ka na nga manugbantala sang Ginharian, indi bala nagakaigo lamang kag makalilipay nga hanason mo ang mga bag-uhan?

 Nahibaluan ni Jesus nga kinahanglan sang iya mga disipulo ang panuytoy para mangin epektibo sila nga ebanghelisador, kag ginpakita niya kon paano ini dapat himuon. (Luc. 8:1) Kinahanglan man karon hanason ang iban agod mangin epektibo nga mga ministro.

Indi naton dapat paghunahunaon nga mangin hanas ang mga bag-uhan paagi lang sa ila pagpakigbahin sa ministeryo. Kinahanglan nila ang personal nga pagtudlo sang mainayuhon kag mahigugmaon nga manughanas. Ina nga paghanas nagalakip sa pagpakita sa mga bag-uhan nga manugbantala kon paano (1) maghanda kag magpraktis sing presentasyon, (2) makig-istorya sa tagbalay ukon sa nagalabay lang, (3) magtanyag sing mga literatura, (4) magtatap sang mga interesado, kag (5) mag-umpisa sing pagtuon sa Biblia. Mahimo gid nga mangin maayo ang resulta kon obserbahan sang ginahanas kag ilugon ang mga pamaagi nga gingamit sa ministeryo sang nagabulig sa iya. (Luc. 6:40) Ang bag-uhan magaapresyar gid kon may isa nga magapamati sa iya kag magabulig kon kinahanglan niya ini. Makabenepisyo man ang bag-uhan kon hatagan sia sing komendasyon kag mga panugda.—Man. 4:9, 10.

Walay sapayan sang imo mga panikasog sa pagpakig-istorya sa mga tagbalay, may mga tion nga ang imo kaupod sa pagbantala amo ang pinakamanami mo nga kaistorya. Dumduma nga ginpadala ni Jesus ang iya mga disipulo sing “tagduhaduha” para magbantala. (Luc. 10:1) Samtang nagabantala sila, mahimo sila magpalig-unay. Gani ang tion nga ginahinguyang upod sa masigkatumuluo sa latagon nagahatag sing kahigayunan para “makapalig-unay.”—Roma 1:12.

Ano ang pila ka butang nga mahimo ninyo istoryahan? Ang isa bala sa inyo may makapalig-on nga eksperiensia sining karon lang? May nakita ka bala nga makapainteres nga punto sa imo personal ukon pangpamilya nga pagtuon? Napalig-on ka bala sang imo nabatian sa miting? Kon kaisa, ang manugbantala nga imo partner mahimo nga indi mo pirme kaupod sa pagbantala. Nahibaluan mo bala kon paano sia nakasulod sa kamatuoran? Paano sia nakumbinsi nga amo ini ang organisasyon ni Jehova? Ano ang iya natigayon nga mga pribilehiyo ukon mga eksperiensia? Ayhan mapaambit mo man sa iya ang pila sang imo eksperiensia. Ano man ang resulta sang inyo pagbantala, kon may kaupod ka sa pagministeryo, may kahigayunan kamo nga ‘padayon nga mapabaskog ang isa kag isa.’—1 Tes. 5:11.

Para makapabilin nga makugi sa ministeryo dapat mo palambuon kag padayunon ang maayo nga kinabatasan sa pagtuon. Nagabalhag sing madamo kag lainlain nga topiko “ang matutom kag mainandamon nga ulipon.” (Mat. 24:45) Gani madamo gid kita sing espirituwal nga pagkaon nga mahimo matun-an. Binagbinagon naton ang isa ka maayo nga topiko para sa personal nga pagtuon: Ngaa importante ang pagbantala sang Ginharian? Ipakita sang kaupod nga kahon ang pila ka rason.

Ang pagbinagbinag sa mga punto nga nalista sa kahon magapalig-on sa imo nga padayon nga magbantala sing makugi. Mahimo mo bala ini ilakip sa imo ginaplano nga pagtuon para mahibaluan kon daw ano kadamo ang malista mo nga rason? Dayon pamalandungi ini kag ang mga kasulatan nga nagasakdag sini. Kon himuon mo ini, mangin makugi ka pa gid sa ministeryo.

Ang organisasyon ni Jehova regular nga nagahatag sing mga panugda agod buligan kita nga mag-uswag sa aton ministeryo. Halimbawa, magluwas sa aton pamalaybalay nga hilikuton, mahimo kita magpanaksi paagi sa sulat, sa telepono, sa dalan ukon sa publiko nga mga lugar. Ginapaambit man naton ang maayong balita sing di-pormal kag sa mga duog sang negosyo. Mahimo man naton planuhon ang aton mga hilikuton para makapanaksi sa teritoryo nga talagsa lang mabantalaan.

Handa mo bala batunon ini nga mga panugda? Natestingan mo na bala ang pila sa sini? Madamo ang nangin madinalag-on sa paghimo sini. Binagbinaga ang tatlo ka halimbawa.

Ang una may kaangtanan sa epekto sang ginsiling sang isa ka artikulo sa Ministeryo sa Ginharian kon paano magsugod sing mga pagtuon sa Biblia. Nagpalig-on ini sa utod nga si April nga magtanyag sing pagtuon sa iya tatlo ka kaupod sa trabaho. Nakibot sia kag nalipay sang ginbaton sang tatlo ang pagtuon kag nagtambong man sila sa mga miting sang kongregasyon.

 Ang ikaduha nga halimbawa may kaangtanan sa pagtanyag sang aton mga magasin. Ginpalig-on kita nga pangitaon ang mga tawo nga mahimo mangin interesado sa espesipiko nga mga artikulo sa aton mga magasin. Ang isa ka manugtatap sang sirkito sa Estados Unidos nagreport nga gintanyagan niya sang Magmata! nga may artikulo parte sa mga ruweda ang tanan nga manedyer sang balaligyaan sang ruweda sa isa ka lugar. Sia kag ang iya asawa nagdala man sang serye nga “Understanding Your Doctor” sa sobra sa 100 ka klinika sa iya sirkito. Sia nagsiling: “Ina nga mga pagbisita nakabulig gid para makilala kami kag ang aton mga literatura. Sang nagkilalahay na kami, pirme na namon sila ginabalikan.”

Ang ikatlo nga halimbawa may kaangtanan sa pagpanaksi sa telepono. Ang utod nga si Judy nagsulat sa ulong talatapan para ipabutyag ang iya pasalamat sa pagpalig-on nga magpanaksi sa telepono. Nagsiling sia nga ang iya 86 anyos nga iloy, nga madamo sing balatian, regular nga nagapakigbahin sa sini nga sahi sang sagrado nga pag-alagad kag nalipay gid sa pagdumala sing pagtuon sa Biblia paagi sa telepono sa 92 anyos nga tigulang!

Ang mga panugda parte sa pagpanaksi sa aton mga publikasyon epektibo gid. Gamita ini! Magabulig ini sa imo para makapabilin nga malipayon kag makugi sa ministeryo.

Ang kadalag-an sa aton pagbantala wala nabase sa kon daw ano kadamo nga publikasyon ang aton napanagtag, kon daw ano kadamo nga pagtuon sa Biblia ang aton nadumalahan, ukon kon daw ano kadamo nga tawo ang aton nabuligan nga mangin alagad ni Jehova. Kay man, pila bala ka tawo ang nabuligan ni Noe nga mangin mga sumilimba ni Jehova magluwas sa iya pamilya? Apang, madinalag-on gid sia nga manugbantala. Ang importante amo nga nagaalagad kita sing matutom kay Jehova.—1 Cor. 4:2.

Nasapwan sang madamo nga manugbantala nga para mapukaw ang ila kapagsik sa pagbantala, kinahanglan nila magpahamtang sing rasonable nga mga tulumuron. Ano ang pila sa sini? Ang pila ka panugda makita sa kaupod nga kahon.

Sa bulig ni Jehova, mangita sing mga paagi para mangin makalilipay kag mabungahon ang imo pag-alagad. Kon malab-ot mo ang imo mga tulumuron, malipay ka kay nahimo mo ang imo labing masarangan sa pagbantala sang maayong balita.

Matuod, indi mahapos magbantala sang maayong balita. Pero, may mga butang nga imo mahimo para mangin makugi ka nga manugbantala sang Ginharian. Magpalig-unay kamo sang imo kaupod sa pagbantala, palambua kag padayuna ang maayo nga mga kinabatasan sa pagtuon, iaplikar ang mga panugda sang matutom nga ulipon, kag magpahamtang sing rasonable nga mga tulumuron. Labaw sa tanan, dumduma nga ginhatagan ka sang Dios sing indi malabawan nga pribilehiyo sa pagbantala sang maayong balita subong isa sa iya mga Saksi. (Isa. 43:10) Mangin malipayon ka gid samtang nagapabilin ka nga makugi sa ministeryo!