USIUWOMA ota na họ iruo nọ e mai wuzou evaọ otọakpọ nẹnẹ. Nọ whọ rrọ Osẹri Jihova na, u muẹro nọ who rri rie nọ uvẹ-ọghọ o rrọ nọ who bi ro wobọ evaọ iruo usiuwoma ota na. Dede na, ẹsejọhọ who ti muẹrohọ nọ o rẹ jọ use-abọ kẹ ekobaro gbe iwhowho-uvie re a ruabọhọ usiuwoma ota na avọ ajọwha.

O be hae jọ bẹbẹ kẹ iwhowho-uvie jọ re a ruẹ ahwo nọ a rẹ gaviezọ kẹ ae evaọ etoke usiuwoma ota nuwou ruọ uwou. Ẹsibuobu dede, a re di ahwo họ iwou hu. Nọ a tẹ rọ udugaga di ahwo họ iwou dede, a rẹ rọwo gaviezọ kẹ ovuẹ Uvie na ha, yọ ejọ i re tube dhuaro ku ae. Iwhowho-uvie efa e riẹ nọ ẹkwotọ usiuwoma ota rai ọ rrọ ruaro yọ ahwo a be gaviezọ kẹ ae ziezi, u te ru nọ a be rọ ruawa nọ a te sai ru ẹkwotọ rai re vievie he. U te je wo inievo efa jọ evaọ ukoko na nọ a ru iruo usiuwoma ota na te ikpe buobu no, tubẹ vrẹ epanọ a rẹro nọ u ti lehie te re urere na o tẹ te ze, onọ o soriẹ nọ udu u ro whrehe ai no.

Idibo Jihova kpobi a be rẹriẹ ovao dhe ebẹbẹ sa-sa nọ e rẹ sai ru ajọwha nọ a wo kẹ iruo usiuwoma ota na kiekpo. Kọ onana u bi gbe omai unu? Ijo, keme ma riẹ nọ o te lọhọ kẹ omai tere he re ma jọ akpọ nana nọ Setan “omuomu na” o bi su na whowho ovuẹ uzẹme nọ o te wha esiwo se ahwo.—1 Jọn 5:19.

Ghelọ use-abọ nọ whọ rẹriẹ ovao dhe kẹhẹ nọ who bi ru iruo usiuwoma ota na, jọ u mu owhẹ ẹro nọ Jihova o ti fiobọhọ kẹ owhẹ fi ei kparobọ. Rekọ eme whọ rẹ sai ru nọ u ti fiobọhọ tua ajọwha nọ who wo kẹ iruo Uvie na? Joma ta kpahe eware jọ nọ e rẹ sai fiobọhọ.

Idu ahwo buobu a bi kurẹriẹ ziọ ukoko na kukpe kukpe. Otẹrọnọ u ri ti kri nọ whọ rọ roma mudhe jẹ họ-ame no ho, whọ rẹ sai wuhrẹ mi inievo nọ e ta usiuwoma kri vrẹ owhẹ no evaọ ukoko na nọ i wo onaa ziezi. Yọ otẹrọnọ whọ rrọ owhowho-uvie te ikpe buobu no, kọ u gbe ti woma re who fiobọhọ wuhrẹ iwhowho-uvie ekpokpọ nọ e rrọ ukoko na?

 Jesu ọ riẹ nọ ilele riẹ a gwọlọ ekpọvio re a sai wo onaa nọ a rẹ rọ ta usiuwoma na ziezi, yọ o dhesẹ epanọ a re ru iruo na kẹ ae. (Luk 8:1) Epọvo na o gwọlọ nọ a re wuhrẹ amọfa nẹnẹ re a sai wo onaa ziezi evaọ iruo usiuwoma ota na.

Ma du roro nọ usiuwoma ota nọ owhowho-uvie ọkpokpọ ọ rẹ hai kpohọ ọvo o ti ro wo onaa usiuwoma ota ha. O gwọlọ nọ oniọvo jọ ọ rẹ rọ edhere owowou wuhrẹ iẹe onaa usiuwoma ota. Eware jọ nọ a rẹ sai wuhrẹ owhowho-uvie otiọye na họ, epanọ (1) ọ sae rọ ruẹrẹ ẹme nọ ọ te ta họ, (2) ọ sae rọ ruabọhọ ẹme kugbe ohwo nọ ọ rrọ uwou hayo nọ ọ nyaku, (3) ọ sai ro fi obe họ ada, (4) ọ sai ro zihe bru ohwo nọ o dhesẹ isiuru, gbe (5) epanọ ọ sai ro mu obe uwuhrẹ Ebaibol họ. Ẹsejọhọ ewoma o ti noi ze nọ owhowho-uvie nọ a bi wuhrẹ na ọ tẹ be hai muẹrohọ onaa sa-sa nọ oniọvo nọ o bi wuhrẹ iẹe na ọ be hae rọ ta usiuwoma. (Luk 6:40) Avro ọ riẹ hẹ, eva e te were owhowho-uvie ọkpokpọ na inọ ohwo jọ ọ rrọ kugbei nọ ọ rẹ sae gaviezọ kẹe je fiobọhọ kẹe nọ o tẹ gwọlọ ere. Owhowho-uvie ọkpokpọ na ọ rẹ sai je wo erere no iroro-ejẹ gbe ujiro ohwo nọ o bi wuhrẹ iẹe na ze.—Ọtausi. 4:9, 10.

Ghelọ epanọ whọ ta usiuwoma kẹ ahwo te kẹhẹ, ẹsejọ ẹme nọ who lele oniọvo nọ wha gbẹ rrọ usiuwoma ta họ ẹmeọta-kugbe nọ ọ rẹ mai woma kpaobọ. Kareghẹhọ nọ okenọ Jesu o vi ilele riẹ nyae ta usiuwoma, “imimava” o vi rai. (Luk 10:1) Nọ aimava a rrọ usiuwoma na, a rẹ sae bọ ohwohwo ga jẹ sasa ohwohwo oma. Fikiere imava nọ e rrọ usiuwoma ota a wo obọdẹ uvẹ nọ a rẹ rọ “tuduhọ ohwohwo awọ.”—Rom 1:12.

Eware jọ vẹ wha rẹ sae ta kpahe? Kọ whẹ hayo oniọvo nọ wha gbẹ rrọ usiuwoma ota na wha rọ ẹro ruẹ oware jọ nọ o kẹ owhai uduotahawọ kẹle na? Kọ who muẹrohọ oware jọ nọ o were owhẹ gaga evaọ etoke egagọ uviuwou hayo uwuhrẹ omobọ ra? Kọ who yo ẹme jọ evaọ obọ ewuhrẹ nọ ọ bọ owhẹ ga? O sae jọnọ owhowho-uvie nọ wha gbẹ rrọ usu na ọ nwane rrọ oniọvo nọ wha gbẹ be hai kpohọ usiuwoma ẹsikpobi hi. Kọ whọ riẹ epanọ o ro kurẹriẹ ziọ ukoko na? Eme ọ kẹ riẹ imuẹro nọ ginọ ukoko Jihova ona? Eware jọ vẹ ọ rọ ẹro ruẹ no, kọ uvẹ-iruo sa-sa vẹ o wo no evaọ ukoko na? Whọ sai gbiku kpahe eware itiena jọ nọ whẹ omara whọ rọ ẹro ruẹ no. Te ahwo a gaviezọ kẹ usiuwoma ota mai hayo a gaviezọ họ, ma tẹ rrọ kugbe oniọvo ọfa evaọ usiuwoma ota na, ma re wo obọdẹ uvẹ nọ ma rẹ rọ “bọ ohwohwo ga.”—1 Tẹs. 5:11.

Uwuhrẹ omobọ mai nọ ma re ru ẹsikpobi yọ oware jọ nọ u wuzou gaga nọ u re fiobọhọ kẹ omai  nọ ma gbẹ sai ro wo ajọwha kẹ usiuwoma ota na. “Ọrigbo nọ a re fievahọ nọ o wo areghẹ na” o bi kere ebe buobu kpahe eware hayo izoẹme sa-sa nẹnẹ. (Mat. 24:45) Fikiere, u wo izoẹme sa-sa nọ whọ rẹ sai wuhrẹ kpahe nọ i re fiobọhọ kẹ owhẹ wo otoriẹ Ẹme Ọghẹnẹ ziezi. Uzoẹme jọ nọ whọ rẹ sae kiẹriwi evaọ etoke uwuhrẹ omobọ ra họ: Fikieme iruo usiuwoma ota Uvie na i ro wuzou gaga? Ẹkpẹti nọ ọ rrọ uzoẹme nana ọ fodẹ eware jọ nọ o rọ rrọ ere.

Who te roro kpahe eware nọ a fodẹ evaọ ẹkpẹti na u ti fiobọhọ kẹ owhẹ ruabọhọ iruo usiuwoma ota na avọ ajọwha. Kọ whọ gbẹ jọ uwuhrẹ omobọ ra ru ekiakiẹ sọ whọ te ruẹ eware efa nọ e lẹliẹ iruo usiuwoma ota Uvie na wuzou? Daoma ru ere, re who je roro didi kpahe eware nana gbe eria ikere nọ e ta kpahe ae. Onana u ti ru nọ ajọwha ra kẹ iruo usiuwoma ota na o te rọ ga ziezi.

Noke toke, ukoko na o be hae jiroro kẹ omai kpahe idhere sa-sa nọ ma sai ro ru usiuwoma ota mai woma ziezi. Wọhọ oriruo, u te no usiuwoma ota nuwou ruọ uwou na no, ma rẹ sae ta usiuwoma evaọ oke gheghe, evaọ eria nọ i re zurie gbe oria ekiọthuọ. Ma rẹ jẹ sae rọ ifonu hayo ileta ikere ta usiuwoma na. Ofariẹ, ma rẹ sae ruẹrẹ iruẹru mai họ re ma sae ta usiuwoma evaọ ekwotọ nọ a rẹ kaki kpohọ kẹ usiuwoma ota ha.

Kọ who bi ru lele iroro-ejẹ nana? Kọ whọ daoma rọ edhere jọ evaọ usu enọ ma fodẹ na ta usiuwoma no? Inievo buobu nọ i ru ere no a be wereva fiki emamọ iyẹrẹ nọ i no rie ze no. Joma ta kpahe iriruo esa jọ.

Oriruo ọsosuọ nọ ma te ta kpahe na yọ ọrọ oniọvo-ọmọtẹ mai jọ nọ a re se April, ọnọ o ru lele iroro-ejẹ jọ nọ e romavia evaọ Odibọgba Uvie Mai  kpahe epanọ a re ro mu obe uwuhrẹ Ebaibol họ. Iroro-ejẹ nana i ru nọ oniọvo-ọmọtẹ na ọ rọ vuẹ ibe-iruiruo esa riẹ jọ inọ ọ gwọlọ wuhrẹ Ebaibol na kugbe ai. U gbe rie unu nọ aimasa na a rọwo inọ o wuhrẹ Ebaibol kugbe ai, a te je mu iwuhrẹ họ ẹnya, yọ onana o lẹliẹ eva were iẹe gaga.

Oriruo avivẹ o kiekpahe emagazini ifihọ ada. Ukoko o be hae vuẹ omai nọ ma gwọlọ ahwo nọ igogo izoẹme jọ evaọ emagazini mai e te mai siuru. Ọsẹro okogho jọ evaọ obọ America ọ niyẹrẹ nọ ọ rehọ Awake! nọ ọ ta kpahe etaya se ahwo nọ a be zẹ etaya evaọ iwou-eki sa-sa nọ e rrọ okegbe jọ. Ọyomariẹ avọ aye riẹ a tẹ jẹ rehọ Awake! jọ se edọkita nọ i bu vrẹ udhusoi (100) evaọ okogho na, onọ uzoẹme riẹ o ta nọ: “Understanding Your Doctor” (Wo Otoriẹ Edọkita Ra). Ọsẹro okogho na ọ ta nọ: “Iweze itienana i bi fiobọhọ kẹ omai mu usiuwoma họ kugbe ahwo na jẹ kẹ ae ebe mai lọlọhọ. Fikinọ mai avọ ahwo nana ma riẹ oma no, u ru nọ ma be hai ro zihe bru ae noke toke.”

Oriruo avesa o kiekpahe usiuwoma ota evaọ ifonu. Oniọvo-ọmọtẹ jọ nọ a re se Judy o kere ileta kpohọ obọ ehri ukoko bi ro yere ai kẹ iroro-ejẹ rai kpahe isẹri-ise evaọ ifonu na. Ọ ta nọ oni riẹ nọ ọ kpako te ikpe 86 no ọ be hae rọ ifonu ta usiuwoma noke toke, yọ uwuhrẹ Ebaibol nọ ọ be hai ru kugbe aye jọ nọ ọ rrọ ikpe 92 evaọ ifonu o be kẹe evawere gaga.

Iroro-ejẹ ukoko na sa-sa nọ e be hae romavia evaọ ebe mai kpahe usiuwoma na i bi gine fiobọhọ gaga. Hae daoma fi ae họ iruo. E rẹ sai fiobọhọ kẹ owhẹ gbe wo ajọwha kẹ usiuwoma ota na je wo evawere ẹsikpobi evaọ iruo na.

Orọnikọ unu ebe nọ ma fihọ ada, unu ebe iwuhrẹ Ebaibol nọ ma wo, hayo unu ahwo nọ ma fiobọhọ kẹ kurẹriẹ ziọ ukoko na u re dhesẹ nọ ma bi ru iruo na ziezi hi. Wọhọ oriruo, u te no ahwo uviuwou riẹ no, amọfa vẹ Noa o fiobọhọ kẹ zihe ruọ idibo Jihova? Amọfa a kurẹriẹ hẹ. Ghele na, ọ jọ ohwo nọ o ru iruo usiuwoma ota riẹ ziezi. Oware nọ o mai wuzou họ, eva mai kpobi nọ ma rẹ rọ gọ Jihova.—1 Kọr. 4:2.

Iwhowho-uvie buobu a ruẹ nọ re u fiobọhọ kẹ ai wo ajọwha kẹ iruo usiuwoma ota na, o gwọlọ nọ a re fi itee nọ a rẹ sai le tobọ họ. Itee vẹ jọ ohwo ọ rẹ sai fihọ? A fodẹ ejọ rai evaọ ẹkpẹti nọ ọ rrọ uzoẹme nana.

Daoma gwọlọ idhere sa-sa nọ who re ro ru iruo usiuwoma ota ra evaọ oghẹrẹ nọ emamọ iyẹrẹ i re ro noi ze. Jẹ obufihọ Jihova rehọ nọ who bi ru ere na. Whọ tẹ sai le itee nọ who fihọ tobọ, eva e te were owhẹ inọ whọ be ginẹ daoma ra kpobi evaọ iruo usiuwoma ota na.

Avro ọ riẹ hẹ, whọ rẹ sae ginẹ nyaku ebẹbẹ sa-sa evaọ iruo usiuwoma ota na. Ghele na, u wo eware nọ whọ rẹ sai ru nọ i re fiobọhọ kẹ owhẹ wo ajọwha kẹ iruo na. Hae ta ẹme kugbe oniọvo nọ wha gbẹ rrọ usiuwoma re wha rọ ere bọ ohwohwo ga, hai ru uwuhrẹ omobọ ra ẹsikpobi, hai ru lele iroro-ejẹ nọ i bi no obọ ọrigbo nọ a re fievahọ na ze, hai fi itee nọ whọ rẹ sai le tobọ họ. Mai wuzou na, hae kareghẹhọ nọ uvẹ-ọghọ nọ a rẹ ruẹ obọ riẹ hẹ Ọghẹnẹ ọ kẹ owhẹ na, onọ whọ rọ rrọ Osẹri riẹ nọ o bi whowho usiuwoma Uvie na. (Aiz. 43:10) A rẹ ruẹ obọ evawere nọ who ti wo ho nọ whọ tẹ be ruabọhọ usiuwoma ota na avọ ajọwha.