KUSAPWILA mambo awama ke mwingilo wanema ye babena kwingila pano pa ntanda lelo jino. Byo muji kalume wa Yehoba, kwingilako uno mwingilo wa kufunjisha bantu kwikala baana ba bwanga mwikunemeka bingi. Nangwa byonkabyo, musakuswa’mba bapainiya ne basapwishi bimye bimo batalañana na makatazho pa kuba’mba batwajijile kwikala na mukoyo mu mwingilo.

Basapwishi bamo kibakatazha kutaana muntu wa kwisamba nanji mu mwingilo wa ku nzubo ku nzubo. Kabiji bantu bavula bekala mu yoyo mpunzha kechi batanwa pa mazubo ne. Inge mwataana bena mazubo, javula batemwa kukana mambo a Bufumu nangwa kuzhingila. Basapwishi bakwabo, baji na nyaunda ikatampe kabiji bantu batambwila mambo awama, pano bino bakamwa inge bakonsha kusapwila ku bantu bonse. Kabiji bamo ba mu kipwilo basapwila pa myaka yavula kukila ne po baketekejile kuleka, kabiji balefulwa.

Nanchi twafwainwa kukumya’mba bantu ba Yehoba bonse bekala na makatazho akonsha kupwisha mukoyo wabo mu mwingilo wa kusapwila nyi? Ine. Ñanyi mwi atweba wakonsha kuketekela’mba kyapela kusapwila mambo a Lesa a bukine apulusha bumi mu ino ntanda yasakanchilwa na “mubi,” aye Satana Diabola?—1 Yoa. 5:19.

Kechi na mambo a makatazho o mupitamo pa kusapwila mambo awama ne, yukai’mba Yehoba wakonsha kwimukwasha kwiashinda. Pano mwakonsha kuba byepi pa kuba’mba mutwajijile kwikala na mukoyo mu mwingilo wa bwina Kilishitu? Twayai twisambe pa mashinda amo.

Pa mwaka pa mwaka, bantu bavula babatizhiwa kwikala Bakamonyi ba kwa Yehoba. Inge po po mwamweshatu kwipana kwenu kwi Lesa kupichila mu lubatizhilo, kwa kubula nangwa kuzhinaukatu ne, mukamwenamo mu kupijilwa kwa boba basapwila pa myaka yavula kukila anweba. Kabiji inge mwi  basapwishi ba Bufumu baingila pa myaka yavula, nanchi kechi kyayilamo kabiji kyakonsha kwimuletela lusekelo kufunjishako ba katataka nenyi?

Yesu wayukile’mba baana banji ba bwanga bakebewenga lutangijilo pa kuba’mba bekale basapwishi bengila bulongo, kabiji wibamwesheshe bya kwingila uno mwingilo. (Luka 8:1) Ne lelo jino, kibena kukebewa kufunjisha bakwetu kwikala ba mingilo bengila bulongo.

Kechi twafwainwa kulanguluka’mba musapwishi wa katataka ukekala na busendwe bwa kufunjisha kupichila mu kuyatu mu mwingilo ne. Bakebewa kwibafunjisha ku mufunjishi uji na lusa kabiji uji na butemwe. Kufunjisha kwa uno mutundu kwakonsha kuvwangamo kumwesha musapwishi wabula kupijilwa (1) bya kunengezha ne kupitulukilamo jimo mu bya kuya na kwisamba, (2) bya kwisamba na mwina nzubo nangwa na muntu ubena kupitatu mu jishinda, (3) bya kusha mabuku, (4) bya kubwelako ku bantu bamwesheshe lusekelo, ne (5) bya kutendeka lufunjisho lwa Baibolo. Mwakonsha kufuma byawama awa ubena kufunda inge wamona ne kulondela mashinda a kwingijilamo mwingilo abena kwingijisha ubena kumukwasha. (Luka 6:40) Musapwishi wa katataka wakonsha kutemwa inge kya kuba uji na muntu wakonsha kumuteleka ne kumukwasha inge kekikebewe. Musapwishi wabula kupijilwa ukamwenamo ne mu kumusanchila ne mu mashinda akwabo a kumukwashishamo.—Sapwi. 4:9, 10.

Kechi na mambo a byo mwibikako kwisamba na bena mazubo ne, pa moba amo misambo yawama yo mwikala nayo mu mwingilo wa mu bujimi ke yoya yo mwisamba na muntu ye mubena kusapwila nanji. Vulukai’mba Yesu watumine baana banji ba bwanga kuya na kusapwila “babiji babiji.” (Luka 10:1) Byo baingijilanga pamo, bekwashanga ne kwitundaika bene na bene. Onkao mambo, kimye kyo mwingila mu bujimi na mukwenu wa mu lwitabilo ke kimye kyawama bingi kya ‘kwikosesha anweba bene na bene.’—Loma 1:12.

Ñanyi bintu byo mwakonsha kwisambapo? Nanchi umo pe anweba ujipo na kyamwekele kyamutundaikile nyi? Nanchi mwataanapo kishinka kyawama pa lufunjisho lwenu lwa pa bunke nangwa pa lufunjisho lwa kisemi nyi? Nanchi pajipo byo mwaumvwine pa kupwila bimutundaikile nyi? Bimye bimo, musapwishi ye mubena kwingila nanji, wakonsha kwikala ye mubula kusapwila nanji javula. Nanchi mwayuka byo aishile mu bukine nyi? Ñanyi kintu kyamulengejile kushiinwa’mba jino jo jibumba ja Yehoba? Ñanyi mingilo yo aingilapo ne bintu byo apitamo? Kampe mwakonsha kumubuulako bintu byo mwapitamo. Kechi na mambo a bibena kukumbula bantu mu bujimi ne, kwingijila pamo na muntu mu mwingilo, kwitupa kimye kya ‘kwikomesha atweba bene na bene.’—1 Tesa. 5:11.

Pa kuba’mba tutwajijile kwikala na mukoyo mu mwingilo kyanema kulondela mutanchi wawama wa kufunda. “Kalume wa kishinka kabiji wa maana” unemba byambo byavula pa mitwe yapusana pusana. (Mat. 24:45) Onkao mambo, mitwe yo mwakonsha kufundamo pa kuba’mba muje kajo ka ku mupashi yavula bingi. Twayai twisambe pa mutwe wakonsha kuwama kufunda pa lufunjisho lwa pa bunke: Mambo ka mwingilo wa kusapwila pa Bufumu kyo anemena? Kakitenguluzha kaji mu uno mutwe kaamba pa bishinka bimo.

Kulanguluka pa bishinka biji mu kakitenguluzha kwakonsha kwimutundaika kutwajijila kusapwila na mukoyo. Pa mutanchi wenu wa kufunda, esekai kubikapo bishinka bikwabo byakonsha kwimulengela kusapwila na mukoyo. Kepo mulangulukepo pa bishinka ne pa binembelo bibena kukosesha byobyo bishinka. Kuba bino kukemulengela kutwajijila kwikala na mukoyo mu mwingilo.

Kimye kyonse jibumba ja Yehoba jitupa mashinda etukwasha kwingila bulongo mwingilo wetu. Kununga pa mwingilo wetu wa ku nzubo ku nzubo, twakonsha kwingilako busapwishi bwa kunemba makalata, kusapwila pa foni, kusapwila mu mikwakwa nangwa mu mapunzha muji bantu bavula, ne kusapwila mambo awama ku bantu mu busapwishi bwa kushukilwa ne mu manyaunda a busulu. Kabiji twakonsha kwinengezha pa kuba’mba tusapwileko mu nyaunda yo babula kwingijilamo javula.

Nanchi muji na muchima wa kukeba kulondela ano mashinda nyi? Nanchi mwaesekapo kala kwingijishapo amo nyi? Bavula beengijishapo bajinga bingi na lusekelo na mambo a byafuminemo. Twayai twisambe pa bya kumwenako bisatu.

 Kya kumwenako kitanshi kyamwesha bintu byawama byafuminemo mu byaambiwe mu mutwe wajinga mu Mwingilo wa Bufumu pa bya kutendeka mafunjisho a Baibolo. Uno mutwe watundaikile nyenga wa jizhina ja April, kutendeka kufunda na bantu basatu bo aingilanga nabo. Wakuminye bingi ne kusangalala bonse basatu byo baswile ne kutendeka kutanwa ku kupwila kwa kipwilo.

Kya kumwenako kya bubiji kibena kwamba pa kusha magazini etu. Betutundaika kukebakeba bantu bakonsha kutemwa mitwe imo itanwa mu magazini etu. Kalama wa mwanzo mu United States waambile’mba wapaine Labainga! waambilenga pa matayila ku bakulumpe bonse ba nkito ba bishimikwa byonse mutanwa matayila mu mpunzha imo. Aye ne mukazhanji batwajile ne magazini yaambilenga’mba “Understanding Your Doctor” ku maofweshi a badokotala akila pa 100 mu mwanzo. Waambile’mba: “Kufwakasha kwa uno mutundu kwanema bingi pa kwiyukisha atweba bene ne mabuku etu. Panyuma ya kwiyuka na bantu mu ano mapunzha, twisamba nabo bimye byavula.”

Kya kumwenako kya busatu kyaamba pa bya kusapwila pa foni. Nyenga wa jizhina ja Judy wanembejile ofweshi mukatampe wa ntanda yonse kumwesha lusanchilo pa lutundaiko lwa kusapwila pa foni. Waambile’mba bainanji bajinga na myaka 86 bakolwa kolwanga, javula baingilangako uno mwingilo wazhila kabiji baikalanga na lusekelo lukatampe pa kufunjisha lufunjisho lwa Baibolo pa foni ku bainetu bajinga na myaka 92!

Mashinda a kusapwilamo aji mu mabuku etu engila bingi. Engijishainga! Akonsha kwimukwasha kutwajijila kwikala na lusekelo ne mukoyo mu mwingilo.

Kwingila bulongo mu mwingilo wetu javula kechi kuyukanyikilwa mu kuvula kwa mabuku o twapana, mafunjisho a Baibolo o tufunjisha nangwa kuvula kwa bantu bo twakwasha kwikala bakalume ba Yehoba ne. Nangwatu Nowa, bantu banga babujile ba mu kisemi kyanji bo akwashishe kwikala bapopweshi ba Yehoba? Pano bino, wajinga musapwishi waingijile bulongo. Kyanema ke kwingijila Yehoba mu bukishinka.—1 Ko. 4:2.

Basapwishi ba Bufumu bavula bataana’mba pa kuba’mba bekale na kizaku mu mwingilo wa kusapwila, bafwainwa kwibikila bikonkwanyi byo bakonsha kufikizha. Ñanyi bikonkwanyi byonkabye? Baambapo bimo mu kakitenguluzha kaji mu uno mutwe.

Na bukwasho bwa Yehoba, kebaipo mashinda akonsha kulengela mwingilo wenu kuwama ne kwingila bulongo. Inge mwafikizha bikonkwanyi byenu, mukekala na lusekelo lwa kuba’mba mwibifikizha ne kumvwa bulongo pa kuyuka’mba mubena kwingila papelela bulume bwenu kusapwila mambo awama.

Kya kine, kusapwila mambo awama kwakonsha kukatazha. Nangwa byonkabyo, kuji bintu byo mwakonsha kuba pa kuba’mba mwikale basapwishi ba Bufumu ba mukoyo. Iyowainga kwisamba na mukwenu ye mubena kusapwila nanji, ikalai na mutanchi wawama wa kufunda, ingijishainga mashinda afuma kwi kalume wa kishinka ne kwibikila bikonkwanyi byo mwakonsha kufikizha. Kyakila pa byonse, vulukai’mba Lesa wimupa mwingilo wanema wa kusapwila mambo awama byo muji Kamonyi wanji. (Isa. 43:10) Byo mukekalapo na lusekelo lukatampe inge mwatwajijila kwingila na mukoyo mwingilo!