LI ABTELAL mas tsots skʼoplal jtaojtik avie jaʼ ti ta jcholbetik skʼoplal li Ajvalilal yuʼun Dios ta spʼejel Balumile. Kʼalal ta jcholtik mantale jtaojtik jun mukʼta matanal, yuʼun xkoʼolaj chijbat ta xkʼexol li Jeovae. Pe oy bateltike xuʼ mu xa masuk xijmuyubaj li ta cholmantale. ¿Kʼu yuʼun?

Oy jlom ermanoetik ta xchibajik kʼalal muʼyuk buchʼu mas tstaik ta chiʼinel ta loʼil ta skoj ti ep chʼabal te ta snaik li krixchanoetike. Pe mi oy buchʼu la staik ta sna xtoke, ep buchʼutik chopol chaʼiik o bateltike ch-ilinik. Jlom xtoke ep tajek ti bu chcholik mantale xchiʼuk ep tajek buchʼutik lek chaʼiik li Skʼop Diose, pe chchibajik, yuʼun mu xa xkʼel yuʼun skotol chaʼiik. Yan xtoke chchibajik ta skoj ti jal xa tajek la xcholik tal mantale pe muʼyuk to vulem li slajebal kʼakʼale.

Skotol li kʼusitik taje xuʼ mu xa xijmuyubaj yuʼun li ta cholmantale. Jech, lek jnaʼojtik ti mu kʼunuk chkaʼitik li cholmantale yuʼun jaʼ oy ta skʼob Satanás li balumil liʼe (1 Juan 5:19).

Xuʼ van oy kʼusitik vokol chanuptan li ta cholmantal eke. Pe pato avoʼonton, yuʼun xuʼ skoltaot li Jeovae. ¿Kʼusitik xuʼ xapas sventa mas xamuyubaj li ta cholmantale? Jkʼeltikik.

Ta smilal noʼox krixchanoetik chichʼik voʼ jujun jabil sventa ch-ochik ta stestigotak Jeova. Mi achʼ to la avichʼ voʼe, ¿mi mu jechuk ti chatojbe ta vokol ti tskoltaot li buchʼu voʼne xa laj yichʼ voʼ sventa mas lek xatojob ta cholmantale? O mi voʼne xa la avichʼ voʼe, ¿kʼu yuʼun mu xakolta li buchʼutik achʼik toe? Taje jaʼ tskoltaot sventa xamuyubaj-o tajek.

Li Jesuse snaʼoj ti skʼanik koltael sventa xuʼ lek xchanubtasvanik li yajtsʼaklomtake. Jech oxal la xchanubtasan kʼu yelan xuʼ xcholik mantal (Lucas 8:1). Li buchʼutik achʼik to li avi eke, skʼan xichʼik chanubtasel sventa lek xchanubtasvanik.

 ¿Kʼuxi xuʼ jkoltatik li buchʼutik achʼik toe? Mu me jnoptik ti chkʼot ta lekil jchanubtasvanej ta skoj noʼox ti chlokʼ ta cholmantale. Jaʼ yuʼun skʼan oyuk jun ermano ti mas xa chanem sventa ta slekil yoʼonton xchanubtas xchiʼuk ti oyuk smalael yuʼune. Jaʼ yuʼun mi oy xa kʼu sjalil ochemot ta jcholmantale, ¿kʼuxi xuʼ xakolta li buchʼu achʼ toe? 1) Chanubtaso sventa xchapan sba lek xchiʼuk ti akʼo xchanilan li kʼusi chbat yalbe yajval nae, 2) chanubtaso kʼu yelan xuʼ xchiʼin ta loʼil li krixchanoetike, 3) chanubtaso kʼu yelan xuʼ xakʼ li vunetike, 4) chanubtaso kʼu yelan xuʼ sut xchaʼvulaʼan li buchʼutik kʼot ta yoʼontonik mantale xchiʼuk 5) chanubtaso kʼu yelan xuʼ slikes chanubtaseletik ta Vivlia. Jech xtok jtunel yuʼun ti xalekil kʼopta xchiʼuk ti xapʼijubtas kʼu yelan xuʼ spas batele (Eclesiastés 4:9, 10). Li buchʼu achʼe xuʼ xakʼ venta kʼu yelan tspas li buchʼu mas xa xtojobe xchiʼuk xuʼ xchanbe, vaʼun jaʼ jech chkʼot ta jun lekil jchanubtasvanej (Lucas 6:40). Jech xtok ta skoj ti snaʼoj ti oy buchʼu xuʼ xkoltaat kʼalal chtun yuʼune, xuʼ mas jun yoʼonton.

Bateltike, akʼo mi chkakʼtik tajek persa ta jchiʼintik ta loʼil li krixchanoetike, muʼyuk buchʼu chchʼamutik. Jech oxal jaʼ noʼox xuʼ jchiʼintik ta loʼil li buchʼu lijlokʼ jchiʼuktik ta cholmantale. ¿Mi oy jech anupoj taje? Vuleso ta ajol ti «ta chabchab la stacan batel» yajtsʼaklomtak li Jesuse (Lucas 10:1). Kʼalal jech taje xuʼ jkolta jbatik xchiʼuk xuʼ «coʼol ta jtsatsubtasbe jba coʼntontic» (Romanos 1:12, Ch).

¿Kʼusi xuʼ xaloʼilta xchiʼuk li achiʼil ta cholmantale? Xuʼ xavalbe li kʼusi lek kʼotem ta pasel avuʼun li ta cholmantale, ti oy kʼusi la achan atuk o xchiʼuk avutsʼ avalal li ta Vivlia o li ta vunetik yuʼun slumal Diose. Jech xtok xuʼ jaʼ xaloʼiltabe li kʼusi la spatbot avoʼonton ta junuk tsobajele. ¿Kʼusi xuʼ xapas mi jaʼo lalokʼ xchiʼuk junuk ermano o ermana ti mu masuk xavojtikine? Xuʼ xajakʼbe kʼuxi och ta stestigo Jeova, kʼu yuʼun lek xchʼunoj ti oy ta melel relijione o ti butik tunem talele. Jech xtok xuʼ xaloʼiltabe jutuk li kʼusitik kʼotem ta pasel ta akuxlejale. Kʼalal jech chichʼ pasel taje, xuʼ xapatbe aba avoʼontonik akʼo mi mu xchʼamvanik li krixchanoetike (1 Tesalonicenses 5:11).

Sventa xamuyubaj-o li ta cholmantale skotol xemana skʼan xamakʼlin aba lek ta mantal.  Li «jʼabtel ti jun [«tukʼ», TNM] yoʼnton [...], ti lec bije» ep tajek kʼusi slokʼesoj ti xuʼ xatunes kʼalal chachanunaj atuke (Mateo 24:45). Jech kʼuchaʼal liʼe: xuʼ xasabe srasonaltak kʼu yuʼun tsots tajek skʼoplal li cholmantale. Te chatabe jayibuk srasonaltak li ta rekuadro ti bu chal: «¿Kʼu yuʼun tsots tajek skʼoplal ti ta jcholtik mantale?».

Kʼelo li rekuadroe xchiʼuk nopbo skʼoplal. Taje jaʼ tskoltaot sventa mas oyuk ta avoʼonton xachol-o mantal. Jech xtok, sabo yan srasonal ta Vivlia ti kʼu yuʼun skʼan jcholtik mantale. Mi la asabe lek yorail sventa chanopbe skʼoplal taje mas me xamuyubaj-o li ta cholmantale.

Li steklumal Jeovae tstij koʼontontik sventa maʼuk noʼox jcholtik mantal li ta naetike, yuʼun chalbutik xtok ti akʼo jsaʼtik yan kʼuxitik xuʼ jcholtik mantale. Oy yalojbutik ti akʼo jcholtik mantal ta karta, ta telefono, ta kaye, ti bu oy krixchanoetike xchiʼuk ti bu ch-abtejike. Jech xtok xuʼ jnoptik chbat jcholtik mantal ta parajeetik ti bu jutuk tajek o chʼabal stestigotak Jeova tee.

¿Mi oy ta avoʼonton jech chachol mantal? Oy xa ep ermanoetik jech spasojik xchiʼuk ep tajek sbalil staojbeik. Jkʼeltik oxibuk skʼelobil.

Oy jun kermanatik ti la skʼan la spas li kʼusi lokʼ ta Kabteltik sventa Dios ti bu chal kʼuxi xuʼ xkalbetik mi tskʼanik jun chanubtasel ta Vivlia li krixchanoetike. Jech oxal laj yalbe oxvoʼ xchiʼiltak ta abtel mi tskʼan xchanik Vivlia. Labal to laj yil ti la xchʼam yoxvoʼalike xchiʼuk ti lik batikuk ta tsobajeletike.

Li s-organisasion Jeovae yalojbutik ek ti akʼo jnoptik buchʼutik xuʼ xbat kakʼbetik junuk  mantal ti chlokʼ ta jrevistatike. Jun jkʼelvanej ta sirkuito ti chtun ta Estados Unidose la sta jun mantal ta revista ¡Despertad! ti chalbe skʼoplal sventa yantaetike. Ta skoj taje kʼot ta nopel yuʼun ti chbat yakʼbe li buchʼutik oy ta sbaik skʼelel ti butik chchonik yantaetike. Ta yan velta xtoke bat skʼel xchiʼuk yajnil mas ta sien butik ch-abtejik li doktoretik sventa chakʼbeik li mantaletik lokʼ ta revista ti chalbe skʼoplal «Los retos del médico de hoy» (Li kʼusitik vokol tsnuptan ta yabtelik li doktoretik avie). Xi chal li ermanoe: «Ta skoj ti jech ta jpaskutike ep krixchanoetik chojtikinik li kabteltik xchiʼuk li jvuntike». Chal xtok ti mas xa xojtikinik li krixchanoetike xchiʼuk ti mas xa lek xuʼ xloʼilajike, ta skoj taje mu vokoluk chbat xchaʼvulaʼanik li buchʼutik chkʼot ta yoʼontonik mantale.

Oy jun ermana xtok ti la stojbe ta vokol ta jun karta li smeʼ nail abtelal ti la slokʼes jun mantal ti chal ti stakʼ jcholtik mantal ta telefonoe. Li ermana taje laj yal ti akʼo mi oy xa ta 86 sjabilal li smeʼe xchiʼuk ti toj ipe ta xchol mantal ta telefono. Koliyal taje la xchanubtas ta Vivlia jun ants ti 92 xa sjabilale.

Ta melel chkoltavan onoʼox li kʼusitik chlokʼ ta jvuntike. ¡Akʼo persa spasel! Mi jech la apase, mas me xamuyubaj xchiʼuk mas chakʼupin li cholmantale.

¿Kʼusi ti mas tsots skʼoplal li ta cholmantale? Jlome chalik ti skʼan la ep xa tajek jpuktik vunetike, ti xkakʼtik ep chanubtaseletik ta Vivliae o ti jkoltatik epal krixchanoetik sventa spasik ta stestigo Jeovae. Pe taje maʼuk jech. Nopo ta sventa li Noee, ¿mi ep buchʼutik la xchikintaik li kʼusi laj yale? Muʼyuk. Jaʼ noʼox li yutsʼ yale. ¿Mi jaʼ van skʼan xal ti muʼyuk lek abteje? Moʼoj. ¿Kʼusi chakʼ jchantik taje? Ti kʼusi mas tsots skʼoplale jaʼ ti tukʼuk oyutik ta stojolal Jeovae (1 Corintios 4:2).

Epal ermanoetike snaʼojik ti sventa mas xmuyubajik li ta cholmantale skʼan spasik li kʼusitik stakʼ noʼox staike. ¿Kʼusitik taje? Te chal jayibuk li ta rekuadro ti bu chal: «Paso li kʼusi stakʼ noʼox taele».

Sventa mas xakʼupin li cholmantale kʼanbo ta orasion li Jeovae. Kʼalal mi kʼot ta pasel avuʼun li kʼusitik oy ta avoʼonton staele, mas xa xamuyubaj ta skoj ti chapas bu kʼalal xuʼ avuʼune.

Melel onoʼox ti oy kʼusitik xuʼ vokol chkaʼitik li ta cholmantale. Pe oy kʼusitik xuʼ skoltaot sventa xamuyubaj-o. Jech kʼuchaʼal laj xa jkʼeltik tale, xuʼ xaloʼilaj xchiʼuk li achiʼil ta cholmantale, oyuk me lek yorail avuʼun sventa chamakʼlin aba ta mantal jujun xemana, saʼo yan kʼuxitik xuʼ xachol mantal ti jech chal li j-abtel ti tukʼ yoʼontone xchiʼuk paso li kʼusi stakʼ noʼox taele. Jech xtok, mu me xchʼay xavaʼi ti jmotontik mas tsots skʼoplal yakʼojbutik Jeovae jaʼ ti xuʼ jcholtik mantale xchiʼuk ti jaʼutik stestigoe (Isaías 43:10). Jaʼ yuʼun, ¡muyubajan-o li ta cholmantale!