AN PAGSANGYAW han maopay nga sumat an pinakaimportante nga buruhaton yana dinhi ha tuna. Sugad nga surugoon ni Jehova, sigurado nga gintatagad mo nga pribilehiyo an pakigbahin ha paghimo hin disipulo nga buruhaton. Pero usahay an mga payunir ngan mga magwarali nakukurian ha pagtipig han ira kadasig ha ministeryo. Kay ano?

An pipira nga magwarali nakukurian nga makabiling hin makakaistorya ha ira pagbalay-balay tungod kay kadam-an han mga tawo waray ha ira balay. Ngan kon aada man hira ha ira balay, bangin diri hira interesado ha mensahe han Ginhadian o bangin masina pa ngani. Ha luyo nga bahin, an iba nga magwarali may daku ngan mabungahon nga teritoryo, pero nababaraka hira nga bangin diri nira masangyawan an ngatanan dida hito. Ngan may mga magwarali nga damu ka tuig na nga nagsasangyaw pero nanluluya tungod kay waray pa aabot an kataposan.

Sadang ba kita mahipausa nga an katawohan ni Jehova usahay nakukurian pagtipig han ira kadasig ha ministeryo? Diri. Aw, makakalaom ba kita nga magigin masayon an pagpasamwak han nagtatalwas hin kinabuhi nga mensahe han kamatuoran ha kalibotan nga kontrolado han “usa nga maraot,” hi Satanas nga Yawa?—1 Juan 5:19.

Anoman nga kakurian an imo naieksperyensyahan ha ministeryo, sarig nga bubuligan ka ni Jehova nga malamposan ito. Pero ano an imo mahimo buhaton basi madugangan an imo kadasig ha ministeryo? Aton hisgotan an pipira nga suhestyon.

Kada tuig, yinukot an nababawtismohan sugad nga Saksi ni Jehova. Kon bag-o ka pa la nga bawtismado, sigurado nga damu an imo hibabaroan tikang ha eksperyensyado nga mga magwarali. Ngan kon maiha ka na nga magwarali han Ginhadian, diri ba angayan ngan mapulsanon an pagbulig ha mga bag-ohan?

Maaram hi Jesus nga an iya mga disipulo nagkikinahanglan hin giya basi magin epektibo hira ha  pagsangyaw, ngan iya iginpakita ha ira kon paonan-o magsasangyaw. (Luc. 8:1) Yana, kinahanglan liwat naton bansayon an mga bag-ohan basi magin epektibo hira nga mga ministro.

Diri kita sadang maghunahuna nga mahibabaro ha pagtutdo an bag-ohan pinaagi la ha pakigbahin ha ministeryo. Kinahanglan niya hin instruksyon tikang ha buotan ngan mahigugmaon nga parabansay. Kinahanglan tutdoan hiya han eksperyensyado nga magwarali kon paonan-o (1) mangangandam ngan magpapraktis hin presentasyon, (2) makakagtikang hin pakiistorya ha tagbalay o ha lumalabay, (3) magtatanyag hin literatura, (4) magbabalik-bisita, ngan (5) makakagtikang hin pag-aram ha Biblia. An bag-ohan mahimo magin epektibo nga ministro kon oobserbaran ngan susubaron niya an paagi ha pagtutdo han eksperyensyado nga magwarali. (Luc. 6:40) Ngan magkakaada hiya kompyansa tungod kay maaram hiya nga may andam bumulig ha iya kon kinahanglan niya ito. Magpapahimulos liwat hiya kon tatagan hiya hin mga kumendasyon ngan mga suhestyon.—Ekles. 4:9, 10.

Bisan pa han imo pangalimbasog nga magkaada maopay nga pakiistorya ha mga tagbalay, danay an pinakamaopay nga pakiistorya nga imo maieksperyensyahan ha ministeryo amo an imo pakiistorya ha imo padis ha pagsangyaw. Hinumdumi nga han ginsugo ni Jesus an iya mga disipulo nga magsangyaw “ginpadis-padis” niya hira. (Luc. 10:1) Samtang magkaupod ha ministeryo, mahimo nira dasigon ngan parig-unon an usa kag usa. Salit an pakig-upod ha kabugtoan ha ministeryo naghahatag ha aton hin maopay nga higayon nga “magdinasigay.”—Roma 1:12.

Ano an mahimo niyo pag-istoryahan? May-ada ba ha iyo nagkaada pa la hin makaparig-on nga eksperyensya? May hinbaroan ka ba nga makapainteres nga punto ha imo personal nga pag-aram o ha pag-aram han iyo pamilya? Naparig-on ka ba han usa nga punto nga imo hinbatian ha katirok? Usahay, nakakaupod mo ha pagsangyaw an magwarali nga diri mo pa gud kilala. Maaram ka ba kon paonan-o hiya nahibaro han kamatuoran? Ano an nakakombinse ha iya nga ini an organisasyon ni Jehova? Ano nga mga pribilehiyo an iya nakarawat o an iya mga eksperyensya? Bangin puydi mo isumat ha iya an imo mga eksperyensya. Karawaton man han mga tawo an aton mensahe o diri, an pagbuhat kaupod han usa nga bugto, naghahatag ha aton hin maopay nga higayon nga “padayon nga . . . magparig-onay.”—1 Tes. 5:11.

Basi magpabilin kita nga madasigon ha ministeryo, importante nga kultibaron ngan tipigan  naton an maopay nga rutina ha pag-aram. An “matinumanon ngan maaramon nga uripon” nagpupublikar hin mga impormasyon mahitungod ha iba-iba nga topiko. (Mat. 24:45) Salit damu gud an mahimo naton pag-adman. Tagdon naton an usa nga maopay nga topiko: Kay ano nga importante gud an pagsangyaw mahitungod han Ginhadian? An kahon nga “Kay Ano nga Sadang Mo Tipigan an Kadasig ha Ministeryo?” nag-uunabi hin pipira nga rason.

An pagpamalandong han mga punto nga makikita ha kahon mag-aaghat ha imo nga padayon nga magin madasigon ha pagsangyaw. Ha imo sunod nga pag-aram, ilista an iba pa nga Kasuratanhon nga hinungdan kon kay ano nga sadang kita magin madasigon ha pagsangyaw. Katapos, pamalandonga ito. Kon bubuhaton mo ini, sigurado nga magigin mas madasigon ka ha ministeryo.

An organisasyon ni Jehova regular nga nagtatagana hin mga suhestyon basi mapauswag naton an aton ministeryo. Pananglitan, labot la ha pagbalay-balay, mahimo kita magsangyaw pinaagi hin surat o telepono, magsangyaw ha kalsada o iba pa nga panpubliko nga lugar, ha mga lugar han negosyo, ngan ha diri-pormal nga paagi. Mahimo liwat naton organisaron an aton mga buruhaton basi makagsangyaw kita ha teritoryo nga talagsa la makobrehan.

Andam ka ba ha pagkarawat hini nga mga suhestyon? Nasarihan mo na ba an pipira hito? Damu han nagsari hito an nalipay gud ha mga resulta. Tagda an tulo nga ehemplo.

Usa nga bugto nga hi April, an nagdesisyon nga sarihan an suhestyon ha usa nga artikulo ha Ministeryo ha Ginhadian mahitungod ha kon paonan-o  makakagtikang hin pag-aram ha Biblia. Gintanyagan niya hin pag-aram an tulo niya nga katrabaho. Nahipausa ngan nalipay gud hiya han ginkarawat nira ito ngan nagtikang hira tumambong ha mga katirok.

Gin-aaghat liwat kita han organisasyon nga mamiling hin mga tawo nga posible mainteres ha espisipiko nga artikulo ha aton mga magasin. Usa nga paramangno han sirkito ha Estados Unidos an nagtanyag han artikulo ha Awake! mahitungod ha mga kaliding ha mga manidyer han ngatanan nga tindahan hin kaliding ha usa nga lugar. Igintanyag liwat niya ngan han iya asawa an serye nga “Understanding Your Doctor” ha sobra 100 nga klinika ha ira sirkito. Hiya nagsiring: “Ito nga mga pagbisita nakabulig gud basi magin pamilyar an mga tawo ha aton ngan ha aton literatura. Katapos hin makisangkayon nga pakiistorya ha mga indibiduwal hini nga mga lugar, nagkaada kami dugang nga higayon ha pagbisita ha ira.”

Usa nga bugto nga hi Judy an nagsurat ha headquarters basi magpasalamat ha suhestyon nga magsangyaw pinaagi ha telepono. Hiya nagsiring nga an iya 86 anyos nga nanay, nga may mga problema ha kahimsog, regular nga nakikigbahin hini nga klase han sagrado nga pag-alagad ngan nalilipay gud ha pagdumara hin pag-aram ha Biblia pinaagi ha telepono ha usa nga 92 anyos nga babaye!

Epektibo gud an mga suhestyon ha aton mga publikasyon. Sarihi ito! Mabulig ito ha imo nga matipigan an imo kalipay ngan kadasig ha ministeryo.

An kalamposan han aton pagsangyaw nga buruhaton diri nadepende ha kadamu han publikasyon nga aton naipapahamutang, ha kadamu han aton gindudumarahan hin pag-aram ha Biblia, o ha kadamu han aton nabuligan nga magin surugoon ni Jehova. Tagda hi Noe. Labot han iya pamilya, may iba pa ba hiya nga nabuligan nga magin magsiringba ni Jehova? Bisan pa hito, malampuson gud hiya nga magwarali. Oo, an importante, matinumanon kita ha pag-alagad kan Jehova.—1 Cor. 4:2.

Naobserbaran han damu nga magwarali nga basi magin madasigon ha pagsangyaw, kinahanglan nira maghimo hin makatadunganon nga mga tumong. Ano ito nga mga tumong? Makikita ha kahon nga “Paghimo hin mga Tumong nga Makatadunganon” an pipira nga ehemplo hito.

Pangaro kan Jehova hin bulig basi magin malampuson ngan mabungahon an imo ministeryo. Kon maabot mo an imo tumong, malilipay ka tungod kay maaram ka nga ginbubuhat mo an imo gimaopayi ha pagsangyaw han maopay nga sumat.

Oo, diri masayon an pagsangyaw han maopay nga sumat. Pero may mahihimo ka basi magin madasigon ka ha imo ministeryo. Magkaada makapadasig nga pakiistorya ha imo padis ha pagsangyaw, kultibara ngan tipigi an maopay nga rutina ha pag-aram, iaplikar an mga suhestyon han maaramon ngan matinumanon nga uripon, ngan paghimo hin makatadunganon nga mga tumong. Labaw ha ngatanan, hinumdumi nga gintagan ka han Dios hin waray kapariho nga pribilehiyo ha pagsangyaw han maopay nga sumat sugad nga usa han iya mga Saksi. (Isa. 43:10) Magigin malipayon ka gud samtang gintitipigan mo an imo kadasig ha ministeryo!