FARE thin nib fel’ ni gad be machibnag e aram e re maruwel nth’abi ga’ fan ni gad be rin’ u fayleng e ngiyal’ ney. Bochan ni gur reb e tapigpig rok Jehovah, ma dabisiy ni ga ma tay nre maruwel ney ni ga be un i rin’ e aram reb e tow’ath. Machane, ku dabisiy ni ga ma guy ni boor e piin pioneer nge ku boch e walag u lan e ulung ni bay yu ngiyal’ nib mo’maw’ ni ngar pared ni yad ba pasig ko machib.

Bay boch e walag nib mo’maw’ ni ngar pirieged be’ nrayog ni ngar nonad ngak u nap’an ni yad be un ko machib u mit e tabinaw i yan. Bin riyul’ riy, e bay yu ngiyal’ ni yira yan ko machib ma yooren e girdi’ e dar moyed u tabinaw rorad. Maku bay yu ngiyal’ ni gad ma yan nga tafen boch e girdi’ ndariy fan e tin riyul’ u wan’rad ara yad ma togopuluw ngodad. Ku bay boch e walag ni ma mulan’rad yu ngiyal’ ni bochan e ba ga’ yang e binaw nthingar ra machibgad riy. Ere, bayi n’en mar lemnaged ndabiyog ni ngar mu’naged e yungi n’en nib t’uf ni ngar machibgad riy. Maku reb, e bay boch e walag u lan e ulung ni ke mulan’rad ni bochan e ke yoor e duw ni kar machibgad ma dawori yib e tomur.

Boor e magawon ni gad ma mada’nag nrayog ni nge k’aringdad ni nge dab kud pasiggad ko machib. Bin riyul’ riy, e gad be par u ba fayleng ni be gagiyegnag “Faanem nib Kireb,” ara Satan ni Moonyan’. Ere, gad manang nde mom ni ngad machibnaged fare thin nib fel’ ko girdi’.​—1 John 5:19.

Machane, demtrug e miti magawon ni ga be mada’nag, ma dab mu pagtalin nrayog ni nge ayuwegem Jehovah ni ngam gel ngay. Ere, mang e rayog ni ngam rin’ me gel boch e pasig rom ko machib? Baaray boch ban’en nrayog ni nge ayuwegdad.

Gubin e duw ni bokum biyu’ e girdi’ ni yima taufenagrad mar manged boch e Pi Mich Rok Jehovah. Faanra ka fin mu un ko taufe, ma dariy e maruwar riy ni ga baadag ni nge ayuwegem e piin ni ke n’uw nap’an ni kar uned i rin’ e re maruwel ney ni machib. Ma faanra ke n’uw nap’an ni kam un ko machib, ma gur, rayog ni ngam ayuweg e piin ni ka fin ra tababgad ko re maruwel ney?

Manang Jesus nib t’uf ni ngan fonownag pi gachalpen ya nge yag nra manged boch e tamachib ni yad ba salap ko machib. Ere, aram fan ni dag ngorad rogon ni ngan rin’ e re maruwel ney. (Luke 8:1) Ku arrogon e  ngiyal’ ney nib t’uf ni ngan ayuweg boch e walag ni ngar salapgad ko machib.

Dab ud lemnaged ni faanra i un be’ ni kab beech ko machib, ma aram e rayog ni nge salap i rin’ e re maruwel ney. Ya ba t’uf be’ nib salap ko machib ni nge ayuweg u fithik’ e sumunguy nge t’ufeg. Re walag nem e ba t’uf ni nge dag ngak (1) rogon ni nge fal’eg rogon u m’on ko machib miki lemnag e n’en ni nge yog ngak be’ ni ke mada’nag, (2) rogon ni nge tababnag e numon ko girdi’, (3) rogon ni nge pi’ boch e babyor, (4) rogon ni nge sul ngki guy be’ ni baadag e machib, nge (5) rogon ni nge tabab i fil e Bible ngak be’. Faanra i fal’eg i yaliy ma be folwok u rogon ni ma fil fare walag ban’en ko girdi’ u nap’an e machib, ma rayog ni nge salap ko machib. (Luke 6:40) Re n’ey e ku rayog ni nge ayuweg fare walag ni kab beech ni nge pagan’ ni bochan e manang nnap’an nra t’uf e ayuw rok ma bay be’ nrayog ni nge ayuweg. Ma faen ni be ayuweg fare walag ni kab beech e ba fel’ ni nga i yog boch ban’en nib fel’ ni be rin’ fare walag miki yog boch ban’en ngak ni ku rayog ni nge ayuweg. Ya ku ireray reb e ban’en nrayog ni nge ayuweg ni nge salap.​—Ekl. 4:9, 10.

Yugu aram rogon ni gad ma athamgil ni ngad nonad ko girdi’ u nap’an e machib, machane, bay boch e rran ni ma yan i aw ni en ni gad be yan u taabang ko machib e aram e cha’ ni kar da weliyed ban’en u taabang nrib manigil. Dab mu pagtalin ni l’og Jesus pi gachalpen ni nga ranod ko machib ni “yad lal’agruw.” (Luke 10:1) Manang ni yad ra rin’ e re maruwel nem u taabang, ma rayog ni nge bagayad me pi’ e athamgil nga laniyan’ bagayad. Ere, nap’an ni gad ra yan pi walagdad ko machib u taabang, maku aram e ngiyal’ nrayog ni nge ‘fel’ rogorad ko michan’ rodad, me fel’ rogodad ko michan’ rorad.’​—Rom. 1:12.

Mang boch ban’en nrayog ni ngam weliyew murung’agen? Bay ban’en ni ke buch rok bigimew nrayog ni nge pi’ e athamgil nga lanin’uy, fa? Bay ban’en ni kam fil u nap’an ni ga be fil e Bible ni yigoo gur ara nap’an e fol Bible ni tabinaw nib manigil ni gimew ra weliy, fa? Bay ban’en ni kan weliy u nap’an e muulung ni ke pi’ e athamgil nga lanin’um, fa? Bay yu ngiyal’ ni facha’ ni gimew be yan ko machib u taabang e be’ ni gathi ri gimew ma yan ko machib u taabang. Ere, ga manang rogon ni ke nang e tin riyul’, fa? Mang e ke ayuweg ni nge mich u wan’ ni ireray e ulung rok Jehovah? Mang boch e tow’ath ni ke yag ngak ni fan ko tirok Got ban’en ara boch ban’en ni ke buch rok? Maku reb e rayog ni ngkum weliy boch ban’en ni ke buch rom nrayog ni nge ayuweg. Demtrug ko ke motoyil e girdi’ ngomew u nap’an e machib fa danga’, ma bin nib ga’ fan riy e ke yag ni nge ‘bigimew me pi’ e athamgil nga laniyan’ bigimew.’​—1 Thess. 5:11.

Rib ga’ fan ni ngaud tedan’dad ko fol Bible ni gad ma tay ni yigoo gadad, ya ku ireray reb e ban’en nrayog ni nge ayuwegdad ni ngad pared ni gad ba pasig ko machib. Boor e babyor ni ma ngongliy “fare tapigpig nib yul’yul’ ma ba gonop” ni boor ban’en ni be weliy  murung’agen. (Matt. 24:45) Ere, boor ban’en nrayog ni ngam fil nra ayuwegem ko tirok Got ban’en. Chiney e ngad weliyed reb e ban’en nrayog ni ngam fil u nap’an ni ga be fil e Bible ni yigoo gur. Re n’em e aram e: Mang nrib ga’ fan fare maruwel ni ngan machibnag murung’agen Gil’ilungun Got? Bay boch i fan ko fare kahol ko page 28.

Ga ra fal’eg i fil e thin ni bay ko re kahol ney, ma rayog ni nge ayuwegem ni ngam ulul ko machib ni gab pasig. Nap’an ni ga be fil e Bible ni goo gur, mu kum lemnag boch i fan nib t’uf ni ngam machib u fithik’ e pasig. Ngemu’, mag fal’eg i lemnag e pi n’ey nge boch e thin nu Bible nib puluw ngay. Faan ga ra rin’ ni aray rogon ma dariy e maruwar riy nrayog ni nge gel e pasig rom ko machib.

Gubin ngiyal’ ni ma pi’ e ulung rok Jehovah boch e fonow nra ayuwegdad u rogon ni ngad m’onoggad ko machib. Bod ni gathi kemus ni yima yog ngodad ni ngaud machibgad u mit e tabinaw, ya ku yima pi’ e athamgil nga lanin’dad ni ngad yoloyed e babyor ngak boch e girdi’, ara ngad machibgad u telefon, ara ngad machibgad u kanawo’ ara yungi n’en ni ma muulung e girdi’ ni yoor ngay, ara ngaud machibgad u fithik’ e sabethin ara yungi n’en ni yima siyobay riy. Maku reb e, ku rayog ni ngad guyed rogon ni ngkud machibgad ko tin baaray e binaw ni gathi ri gad ma yan ngay ko machib.

Ga ma guy rogon ni ngam fol ko pi fonow ney ni yima pi’, fa? Bay boch ni kam gay rogon ni ngam rin’, fa? Boor e walag ni kar folgad ko pi fonow ney, ma kar guyed ni ke yib angin. Baaray murung’agen dalip i yad.

Bay reb e walag ni ka nog April ngak ni guy rogon ni nge fol u boch e fonow nni tay nga lan reb e article ko fare Machib ko Gil’ilungun ni be weliy rogon ni ngan tabab i fil e Bible ko girdi’. I ognag e fol Bible ngak  dalip e girdi’ ni yad ma maruwel u taabang. Kari gin ni bochan e yad dalip ni m’agan’rad ngay ni ngar uned ko fol Bible, ma aram mu kur tababgad ni ngaur uned ko muulung.

Ku yima pi’ e athamgil nga lanin’dad ni ngad gayed boch e girdi’ ni yad baadag ni ngar beeged boch e article ko pi magazine rodad. Bay reb e walag u Meriken ni ma lekag e ulung ni ke yog ni bay bayay ni pi’ yu ken fare babyor ni Awake! ni be weliy murung’agen e tayya ngak e piin ni yad ba ga’ ko pi yungi n’en ni yima pi’ e tayya riy ni chuway’ u reb e binaw ni i machib riy. Kur weregew e ppin rok yu ken e Awake! ni kenggin e “Ngam Nang Rarogon e Togta Rom” u boor ko 100 e ofis ko togta ko gin ni ma machib e pi ulung riy ni yow ma lekag. I yog ni gaar: “Pi n’ey e ke ayuweg e girdi’ ni ngar nanged ko gad chon mini’ mu kur nanged e pi n’en ni bay ko pi babyor rodad. Tomuren ni ke yag ni nggu nonow ko girdi’ ko yungi n’em, ma ke yag ni nggu yarmiyew e ngiyal’ ni ngkug sulow ngorad.”

Bin dalip e bay rogon ko machib ni gad ma tay u telefon. Immoy reb e walag ni ka nog Judy ngak ni yoloy bangi babyor nge pi’ ko tochuch rodad ni be pining e magar ni kan pi’ e athamgil nga laniyan’ e pi walag ni ngar uned ko machib u telefon. I yog ni chitiningin e ke gaman 86 e duw rok, ma boor mit e m’ar ni ke yib ngak, machane ba ga’ ni ma un ko machib u telefon. Ma angin ni ke yib riy ngak e ke yag ni nge tabab i fil e Bible ngak reb e pilibthir ni 92 e duw rok u telefon!

Rib ga’ angin e pi fonow ni yima tay ko pi babyor rodad u rogon ni ngad machibgad. Ere, mu fol ko pi fonow ney, ya rayog ni nge ayuwegem ni ngam par ni gab felfelan’ ma gab pasig ko machib.

Angin e machib ni gad ma tay e der yan u rogon urngin e babyor ni gad be wereg, ara urngin e girdi’ ni gad ma fil e Bible ngorad, ara urngin e girdi’ ni kad ayuweged ke yag ni ngar manged tapigpig rok Jehovah. Am lemnag Noah, uw urngin e girdi’ u wuru’ e tabinaw rok e yag ni nge ayuwegrad ni ngar manged boch e tapigpig rok Jehovah? Yugu aram rogon, mab fel’ rogon e machib ni i tay. Ere, n’en nib ga’ fan e aram e ngad pigpiggad ngak Jehovah u fithik’ e yul’yul’.​—1 Kor. 4:2.

Bay boch e walag ni kar pirieged ni faan yad ra nameg boch ban’en ni fan ko fare maruwel ni machib ni yad manang nrayog ni ngar rin’ed, ma aram reb e ban’en ni ma ayuwegrad ni ngar pasiggad ko machib. Mang boch e pi n’ey nrayog ni ngad nameged? Bay boch e pi n’ey ko re kahol ni baaray.

Mog ngak Jehovah ni nge ayuwegem ni nge yib angin e machib ni ga ma tay. Nap’an ni ga ra rin’ e pi n’en ni ga be nameg, ma ga ra felfelan’ ni bochan e ga manang ni ga be rin’ e tin nrayog rom ni ngam machibnag fare thin nib fel’.

Riyul’ ni bay yu ngiyal’ nib mo’maw’ ni ngad machibnaged fare thin nib fel’. Machane, bay boch ban’en nrayog ni ngam rin’ nra ayuwegem ni ngam mang reb e tamachib ni gab pasig i machibnag murung’agen Gil’ilungun Got. Mu weliyew e en ni gimew be yan ko machib u taabang boch ban’en nra pi’ e athamgil nga lanin’mew, ma ga tiyan’um ko fol Bible, ma ga fol ko pi fonow ni ma pi’ fare tapigpig nib yul’yul’ ma ba gonop, ma ga nameg boch ban’en ni ga manang nrayog ni ngam rin’. Ma bin th’abi ga’ fan riy e dab mu pagtalin ni ke pi’ Got e re tow’ath ney ngom ni ngam machibnag fare thin nib fel’ ni gur reb e Mich rok. (Isa. 43:10) Rib gel e felfelan’ ni ga ra tay ni faanra um par ni gab pasig ko machib!