GUIRÁʼ ca xpinni Dios nápanu ti dxiiñaʼ nabé risaca ni cayaca lu guidubi Guidxilayú: gucheechenu ca diidxaʼ nacubi ne galán stiʼ Dios. Peru nuu tiru ridxaagalunu stale cosa ni ribee gana laanu gúninu dxiiñaʼ ca, neca nácanu precursor o ti ni rucheeche diidxaʼ.

Nuu tu laa ora maʼ zigucheeche diidxaʼ de yoo pur yoo raca nagana para laa guidxela tuuxa ni güiné diidxaʼ. Dxandíʼ, stale binni qué guinni ra lidxi ora maʼ zigucheechenu diidxaʼ ne ora guidxélanu laacaʼ qué riuuláʼdxicaʼ gucaadiágacaʼ laanu ne nuu tu laa ridxiichiné laanu. Xcaadxi Testigu raca nagana para laacaʼ guni tendercaʼ guiráʼ binni riuulaʼdxiʼ guiziidiʼ neza ra rucheechecaʼ diidxaʼ, purtiʼ xiroobaʼ ra raca caber laacaʼ. Ne xcaadxi maʼ bireecaʼ gana de gucheechecaʼ diidxaʼ purtiʼ maʼ stale iza huayúnicaʼ ni ne caʼruʼ guiluxe modo nabáninu riʼ.

Ñee naquiiñeʼ guidxagayaanu pa málasi chuʼ xiixa ni cuee gana laanu de gucheechenu diidxaʼ la? Coʼ. Purtiʼ ndaaniʼ guidxilayú ra nabáninu riʼ naaze dxiichiʼ Binidxabaʼ ni. Nga runi, nuu tiru raca nagana para laanu chuunu ra nuu binni para güínenu laacaʼ ni rusiidiʼ Stiidxaʼ Dios (1 Juan 5:19).

Intiica guendanagana guidxaagalunu ora maʼ zigucheechenu diidxaʼ, nanna dxíchinu zacané Jiobá laanu gudxiilunu cani. Peru, xi zanda gúninu para cadi guireʼnu gana de gucheechenu diidxaʼ yaʼ. Guidúʼyanu caadxi cosa ni zanda gacané laanu.

Guiráʼ iza riuunisa mil de binni. Pa cadi tan xadxí de guyuunísaluʼ, cadi dxandíʼ ñuuláʼdxiluʼ ñacané ti Testigu ni maʼ xadxí de rucheeche diidxaʼ lii la? Ne pa maʼ xadxí rucheecheluʼ  diidxaʼ, ñee ñuuláʼdxiluʼ ñacaneluʼ tuuxa ni nacubi cuzulú la? Pa gúniluʼ nga laaca zacaneni lii.

Dxi guyuu Jesús lu Guidxilayú biiyaʼ caquiiñeʼ gusiidiʼ ca discípulo stiʼ ximodo gucheechecaʼ diidxaʼ, ngue runi guleebe tiempu para guluiʼbe laacaʼ modo gúnicaʼ ni (Lucas 8:1). Ca dxi stinu riʼ, laaca caquiiñeʼ cani nacubi tu gacané laacaʼ ti gánnacaʼ modo gusiidicaʼ.

Tobi ni nacubi rucheeche diidxaʼ qué zanda gaca ti maestru purtiʼ si rucheeche diidxaʼ. Caquiiñeʼ chuʼ tu gacané laabe né diidxaʼ nadóʼ para 1) gúnibe ti presentación ne guni ensayarbe ni, 2) güínebe tuuxa diidxaʼ de yoo pur yoo o lu calle, 3) gusaananebe binni libru o revista, 4) guibiguétabe chigánnabe tuuxa ni riuulaʼdxiʼ guiziidiʼ ne 5) guzulú gúʼndanebe binni Biblia. Pa ni nacubi cuzulú gucheeche diidxaʼ guni casi runi maestru stiʼ nin qué zandaa zusiidiʼ casi laabe (Lucas 6:40). Qué zadxibi ni nacubi cucheeche diidxaʼ pa chuʼ tuuxa gucaadiaga laa ne gacané laa ora iquiiñeʼ ni. Ne cani zacané laabe nga chinándabe ni gabi maestru stibe laabe ne uguu gana laabe (Eclesiastés 4:9, 10).

Neca guʼnuʼ stipa pur güíneluʼ binni diidxaʼ ora maʼ zigucheecheluʼ diidxaʼ, nuu tiru ni jma zacané lii nga güíneluʼ xcompañéruluʼ diidxaʼ. Bietenalaʼdxiʼ «chupa chupa» biseendaʼ Jesús ca discípulo stiʼ chigucheechecaʼ diidxaʼ (Lucas 10:1). Bíʼnibe ni zaqué ti cúʼsaacaʼ gana laacaʼ. Nga runi, racanesaanu ora rucheechenenu sti xpinni Cristu diidxaʼ (Romanos 1:12).

Xi zanda güíneluʼ xcompañéruluʼ yaʼ. Zanda güíneluʼ laabe xiixa ni bizaacaluʼ ni gacané laabe o xiixa ni guyuuláʼdxiluʼ ora bíʼndaluʼ Biblia stúbiluʼ o né binnilídxiluʼ. Ñee binadiágaluʼ xiixa ni gucané lii ora bidagulisaatu la? Guníʼ de laani. Ne pa guireeneluʼ tuuxa ni huaxiéʼ rucheeche diidxaʼ, galán guinabadiidxaluʼ laabe ximodo binibiaʼbe Dios, xi bicaa laabe guni crebe ndiʼ nga xquidxi Dios, xi guenda huayápabe ndaaniʼ neza binni ridagulisaa ne xi huadxaagalube. Laaca zanda güíneluʼ laabe xi huadíʼdiluʼ. Ora chigucheechenenu sti xpinni Cristu diidxaʼ riuʼnu gana, neca cadi gucaadiaga binni laanu (1 Tesalonicenses 5:11).

Para cadi guireʼnu gana ora gucheechenu diidxaʼ, galán quíxhenu ti dxi guidúʼndanu ne chinándanu  ni. Ribee «mozo ni nuu xpiaani ne ni runi jneza» stale guiʼchiʼ ni zanda gacané laanu (Mateo 24:45). Nabé risaca para ca xpinni Cristu gucheechecaʼ diidxaʼ. Lu yaza 16 zeeda ti recuadru ni láʼ: « Xiñee nabé risaca gucheechenu diidxaʼ», luni cayeeteʼ caadxi razón ni nápanu para gúninu dxiiñaʼ riʼ.

Ra guidúʼyanu xiná recuadru ca zacané ni laanu gucheechenu diidxaʼ né gana. Xiñee qué iquiiñeluʼ ti dxi naguíxheluʼ gúʼndaluʼ Biblia para guiníʼ íqueluʼ xi xcaadxi razón nuu para gucheecheluʼ diidxaʼ. Óraca guníʼ ique cani ne biyubi xi textu caníʼ de laacani. Pa guʼnuʼ zacá, zudiiluʼ cuenta jma ziuuláʼdxiluʼ gucheecheluʼ diidxaʼ.

Xquidxi Jiobá rudii laanu stale conseju ni zanda gacané laanu gucheechenu diidxaʼ jma jneza ti gacanenu jma binni. Zanda gucheechenu diidxaʼ de yoo pur yoo, peru laaca zanda gúninu ni pur carta, pur teléfono, ndaaniʼ calle ne xcaadxi lugar ra jma nuu binni, ra tiica nuunu o ra nuu negocio. Laaca zanda guidúʼyanu pa zanda chuunu ca lugar ra huaxiéʼ rucheechecabe diidxaʼ.

Ñee zanda quixhe íqueluʼ chinándaluʼ xcaadxi modo nacubi gucheecheluʼ diidxaʼ la? Ñee maʼ huayúniluʼ cani la? Stale xpinni Cristu huayuni cani ne galán ni huabeenducaʼ. Guzéʼtenu caadxi ejemplu.

Ti hermana ni láʼ April gudixhe ique iquiiñeʼ tobi de ca modo nexheʼ para guzulú guʼndané binni Biblia ni biree lu ti Xhiiñaʼ Reinu ni Rúninu. Gúdxibe chonna gunaa ni runinebe dxiiñaʼ pa zanda gúʼndanebe laacaʼ Biblia. Nabé  bidxagayaabe ora bíʼyabe guná ca binni que gúʼndacaʼ ne bizulú guyecaʼ guendaridagulisaa.

Sti cosa ni huayabi xquidxi Dios laanu nga guyúbinu binni ni ziuulaʼdxiʼ xiixa tema ni riree lu ca revista stinu. Ti superintendente de circuito de Estados Unidos biluíʼ ti tema ni caníʼ de llanta ni zeeda lu revista ¡Despertad! tobi de ca gerente ni rutoo llanta carru. Ne dxi biree ti revista ni caníʼ xi ridxaagalú ca doctor, laabe ne xheelabe, bisaananécabe cani jma de ti gayuaa doctor ra consultorio sticaʼ. Hermanu que guníʼ: «Ni bínidu que nabé gucané ni binni gunibiáʼ laadu ne gánnacaʼ xi guiʼchiʼ rusaananedu binni. Cumu maʼ gunda guninedu laacabe diidxaʼ la? maʼ randa ribiguétadu ra nuucabe».

Ti hermana láʼ Judy bicaa ra nuu Betel ni nuu Nueva York para gudii xquíxepeʼ pur huasiidiʼ xquidxi Dios laanu modo gucheechenu diidxaʼ pur teléfono. Guniʼbe nabé maʼ huará jñaabe ne maʼ napa 86 iza, ngue runi zaqué si nga randa rucheeche jñaa diidxaʼ ne na guizáʼ rusiécheni laa. Ne yanna maʼ ruundané ti gunaa de 92 iza.

Dxandipeʼ huayacané ca modo ni huaree lu ca guiʼchiʼ ni rudii xquidxi Dios laanu gucheechenu diidxaʼ. Galán chinándanu cani. Zacanécani laanu chuʼnu nayecheʼ ne cadi guireʼnu gana de gúninu dxiiñaʼ ca.

Qué zanda diʼ guininu cabeendunu ni galán nga ora si rusaananenu binni stale libru ne revista, cayuundanenu chupa chonna binni o purtiʼ maʼ gucanenu caadxi binni chuʼ ndaaniʼ xquidxi Dios. Rietenalaʼdxuʼ Noé la? Panda binni gucanebe guilá aparte de binnilídxibe. Nin tobi. Peru qué riníʼ diʼ nga cadi jneza bíʼnibe xhiiñabe. Ni jma risaca nga cadi gusaananu Jiobá ne gúninu dxiiñaʼ bisaanané laanu (1 Corintios 4:2).

Stale de ca xpinni Cristu huaguixhe íquecaʼ gúnicaʼ ni zanda ugaandacaʼ ti cadi gusaanacaʼ de chuʼcaʼ nayecheʼ ora rucheechecaʼ diidxaʼ. Xi zanda quixhe íquenu ugaandanu yaʼ. Biiyaʼ caadxi de laacani lu yaza riʼ ra zeeda ti recuadru ni láʼ: « Cani zanda quixhe íquenu ugaandanu».

Gunabaʼ Jiobá gacané lii chuʼluʼ nayecheʼ ora gucheecheluʼ diidxaʼ ne gúniluʼ ni jma jneza. Cadi galán si zuni sentirluʼ ora ugaandaluʼ cani quixhe íqueluʼ, sínuque laaca ziuuluʼ nayecheʼ purtiʼ nannuʼ cayúniluʼ biaʼ gándatiʼ para gusiidiluʼ xcaadxi binni ni na Stiidxaʼ Dios.

Dxandíʼ, nagana nga gucheechenu diidxaʼ. Peru casi maʼ bidúʼyanu ca, nuu caadxi cosa ni zanda gúniluʼ para cadi guireeluʼ gana de gucheecheluʼ diidxaʼ. Caadxi de laacani nga zanda güíneluʼ xcompañéruluʼ diidxaʼ, quíxheluʼ xi dxi gúʼndaluʼ, chinándaluʼ ca conseju ni rudii mozo ni nuu xpiaaniʼ laanu ne quixhe íqueluʼ cani zanda ugaandaluʼ. Ne ni jma risaca nga cadi guiaandaʼ lii caquiiñeʼ Jiobá lii casi Testigu stiʼ para gucheecheluʼ ca diidxaʼ nacubi ne galán ca ra nuu xcaadxi binni (Isaías 43:10). Nga runi, ¡zanda gúniluʼ dxiiñaʼ ca né stale gana!