APRIL 28, 2013 Nagoya, Japan ai, hebouhebou badana ta ai Hakaua Oreana ena memba ta, Anthony Morris ese Japan gado buka matamata ta ia halasia, ena ladana be The Bible—The Gospel According to Matthew. Unai hebouhebou ai idia noho taudia bona Intanet amo idia itaia taudia ibounai be 210,000 mai kahana bona idia ibounai idia moale bada.

Mataio ena Evanelia bukana be Japan gado New World Translation amo idia printaia lou. Ena rau ibounai be 128 bona ia be buka namona. Tadikaka Morris ia gwau: “Unai buka idia karaia badina idia ura Japan taudia do idia durua.” Unai Baibel buka be edena bamona idia torea? Dahaka dainai idia karaia? Bona taunimanima be dahaka idia laloa?

Momo be Mataio bukana idia torea dalana dekenai idia hoa. Japan taudia be toretore daladia rua idia badinaia. Ginigunana be: Atai amo idia torea diho. Iharuana be: Laurina amo idia torea lao idibana kahana. Idia printaia vadaeni gaudia haida—iseda pablikeisen danu—idia torea neganai, toretore dalana iharuana idia badinaia. To Mataio bukana idia torea neganai, toretore dalana ginigunana idia badinaia. Japan ena niuspepa bona buka momo be unai toretore dalana idia badinaia danu. Bona Japan taudia momo idia laloa unai toretore dalana be auka lasi duahia totona. Ma danu, paragraf ena badinai hereva kwarana maragidia idia torea, unai amo duahia taudia ese paragraf edia point badana do idia diba.

Japan ai, tadikaka bona taihu be unai Mataio bukana idia abia neganai, maoromaoro idia duahia. Mauri lagani 80 taihu ta ia gwau: “Mataio bukana be nega momo lau duahia vadaeni, to toretore dalana ginigunana bona hereva kwarana maragidia ese lau ia durua, Iesu ena Ororo Harorona lau lalopararalaia totona.” Matamata taihu ta ia gwau: “Lau ese Mataio bukana be nega tamona lau duahia haorea. Lau be toretore dalana iharuana duahia karana lau manada, to Japan taudia momo be toretore dalana ginigunana idia ura.”

Dahaka dainai Mataio bukana ese Japan taudia ia durua diba? Ena be Japan taudia momo be Baibel idia diba lasi, to idia ura Baibel idia duahia. Unai Mataio ena Evanelia bukana ese dala ia kehoa, Baibel idia diba lasi taudia ese unai mai anina buka ta idia abia bona idia duahia totona.

Dahaka dainai Baibel bukana Mataio idia abia hidi? Japan taudia momo dekenai inai hereva “Baibel” idia kamonai neganai, idia be Iesu Keriso idia laloa. Unai dainai Baibel bukana Mataio idia abia hidi, badina ia lalonai Iesu ena bese ena lista, ena vara negana, ena Ororo Harorona, bona dina ginigabedia ena peroveta herevadia idia noho. Japan taudia do idia ura unai idia duahia.

Japan ai Basileia harorolaia taudia be mai moale ida ruma-ta-ruma-ta haroro gaukara bona lou henia  dekenai unai buka matamatana idia hariharilaia matamaia. Taihu ta ia gwau: “Hari, emai teritori ai lau be taunimanima dekenai Baibel lau hariharilaia diba. Momokani, unai hebouhebou ena adorahi ai lau ese Mataio bukana be ta dekenai lau hariharilaia!”

Pablisa ese Mataio bukana be taunimanima dekenai edena bamona idia herevalaia? Japan taudia momo be hereva haida hegeregere, “geiti maragina,” “pel nadi be boroma dekenai,” bona “kerukeru totona umui lalohekwarahi lasi” idia diba. (Mat. 6:34; 7:6, 13) Idia diba unai hereva be Iesu Keriso ese ia gwauraia herevadia neganai, idia hoa. Momo be Mataio ena Evanelia bukana ai unai hereva idia itaia neganai, idia gwau: “Lau ura nega ta Baibel do lau duahia.”

Pablisa be Mataio bukana idia abia taudia idia lou henia neganai, idia davaria haida be unai buka ibounai idia duahia vadaeni, to ma haida be kahana haida sibona idia duahia. Mauri lagani 60 tauna ta be pablisa ta ia hamaoroa: “Lau be unai buka lau duahia loulou bona lau ia hagoadaia. Mani emu kara Baibel amo lau oi hadibaia.”

Mataio bukana be pablik haroro ai idia gaukaralaia danu. Taihu ta be pablik haroro ai Mataio bukana ia abia kekeni ta dekenai ena e-mail adres ia henia. Hora ta murinai, unai kekeni ese e-mail amo taihu ia hadibaia ia ese unai Baibel buka ena kahana ta ia duahia vadaeni bona ia ura diba ma haida ia abia. Wiki ta murinai, unai kekeni ese Baibel stadi ginigunana ia karaia, bona hebou dekenai ia lao matamaia.

Japan ena kongrigeisen idauidau dekenai The Bible—The Gospel According to Matthew bukana ena kopi 1,600,000 mai kahana idia siaia, bona hua ta ta ai Witnes taudia ese unai buka tausen momo idia hariharilaia. Unai buka ena hamatamaia herevana ese buka idia halasia taudia edia hemami ia hahedinaraia, ia gwau: “Ai ura inai buka umui duahia neganai, emui ura Baibel dekenai do ia habadaia.”