TARĨKI 28, Ĩpuro, 2013, kwarĩ na mũcemanio wa mwanya Nagoya, Japan. Anthony Morris wa Kĩama Kĩrĩa Gĩtongoragia nĩ aathomire kĩmenyithia gĩteerĩgĩrĩirũo ĩndĩ kĩrĩa kĩahutirie andũ mũno—kũrutwo kwa ibuku rĩerũ na rũthiomi rwa Kĩjapani rĩrĩa rĩarĩ na kĩongo: Bibilia— Injiri ya Mathayo. Mũcemanio ũcio warĩ na andũ makĩria ma 210,000, no amwe ao matiarĩ kũrĩa wekagĩrũo, maathikagĩrĩria kũgerera video. Rĩrĩa maaiguire kĩmenyithia kĩu, nĩ moonanirie gĩkeno kĩao na njĩra ya kũhũũra hĩ ihinda iraya.

Ibuku rĩu rĩa tũratathi 128 rĩa Injiri ya Mathayo, rĩarĩ caba njerũ kuuma Tafsiri ya Ulimwengu Mpya ya Kĩjapani. O na kũrĩ ũguo nĩ ibuku rĩa mwanya. Mũrũ wa Ithe Witũ Morris oigire atĩ muoroto warĩo nĩ “gũteithia andũ arĩa maragia rũthiomi rwa Kĩjapani.” Mwandĩkĩre wa ibuku rĩu ũtariĩ atĩa? Rĩahaarĩirio nĩkĩ? Na andũ marĩiyũkagia atĩa?

Mwandĩkĩre wa ibuku rĩu rĩa Mathayo warĩ ũndũ ũteerĩgĩrĩirũo nĩ athikĩrĩria. Ciugo cia rũthiomi rwa Kĩjapani no ciandĩkwo cikũrũkĩte kana ikĩgamĩte. Mabuku mamwe—o hamwe na maitũ ma ica ikuhĩ—mandĩkĩtwo na mwandĩkĩre wa gũkĩĩgama. O na kũrĩ ũguo, ibuku rĩu rĩerũ rĩandĩkĩtwo na mwandĩkĩre wa ciugo ciikũrũkĩte. Rĩandĩkĩtwo na njĩra ta ĩrĩa ĩhũthagĩrũo mũno kwandĩka ngathĩti cia mohoro na mabuku marĩa marĩ igweta ma Kĩjapani. Athomi aingĩ a Kĩjapani monaga mwandĩkĩre ũcio ũrĩ mũhũthũ gũthoma. Makĩria ma ũguo, ciongo nene iria ikoragwo haarĩa igũrũ ciekĩrirũo thĩinĩ irĩ ciongo nini nĩguo mũthomi ahote kuona na ihenya maũndũ marĩa ma bata makĩria.

Aarĩ na ariũ a Ithe witũ a Japan maambĩrĩirie gũthoma ibuku rĩu rĩa Mathayo matekũrĩa marĩĩgu. Mwarĩ wa Ithe witũ ũmwe ũrĩa ũrĩ mĩaka-inĩ ya 80 oigire ũũ: “Nĩ thomete ibuku rĩa Mathayo maita maingĩ, no mwandĩkĩre ũyũ wa ciugo ciikũrũkĩte na ciongo nini nĩ wandeithirie gũtaũkĩrũo wega makĩria nĩ Mahunjio ma Kĩrĩma-inĩ.” Mwarĩ wa Ithe witũ ũmwe mwĩthĩ aandĩkire ũũ: “Ndaikarire thĩ ngĩthoma ibuku rĩu rĩa Mathayo nginya rĩgĩthira. Niĩ menyerete gũthoma mwandĩkĩre ũrĩa wa ciugo ikĩgamĩte no athomi aingĩ a Kĩjapani mendete mwandĩkire ũcio wa ciugo ciikũrũkĩte.”

Nĩkĩ ibuku rĩrĩ rĩa Bibilia nĩ ũteithio mũnene harĩ arĩa maragia Kĩjapani? O na gũtuĩka andũ aingĩ arĩa maragia Kĩjapani matiũĩ maũndũ maingĩ ma Bibilia, nĩ mendete kũmĩthoma. Ibuku rĩu rĩa Injiri ya Mathayo nĩ rĩgũteithia arĩa matarĩ mona Bibilia magĩe na gĩcunjĩ kĩayo na magĩthome.

Twathurire ibuku rĩa Mathayo nĩkĩ? Harĩ andũ arĩa maaragia Kĩjapani, ũngĩgweta “Bibilia” meciragia ũhoro wa Jesu Kristo. Nĩ ũndũ ũcio, twathurire ibuku rĩa Mathayo tondũ nĩ rĩkoragwo na ũhoro wa mũhĩrĩga na gũciarũo kwa Jesu, mahunjio make ma kĩrĩma-inĩ marĩa marĩ ngumo mũno, na ũrathi wake wĩgiĩ  matukũ ma kũrigĩrĩria. Maũndũ ta macio nĩ magucagĩrĩria andũ aingĩ arĩa maaragia Kĩjapani.

Ahunjia thĩinĩ wa Japan maambĩrĩirie na kĩyo kũheana ibuku rĩu rĩerũ nyũmba kwa nyũmba na rĩrĩa maracokera andũ. Mwarĩ wa Ithe witũ ũmwe aandĩkire ũũ: “Rĩu nĩ ngoragwo na mĩeke mĩingĩ makĩria ya gũteithia andũ gĩcigo-inĩ gitũ kũgĩa na Bibilia. Hwaĩ-inĩ wa mũthenya ũcio wa mũcemanio wa mwanya nĩ ndaahotire kũheana ibuku rĩmwe rĩa Mathayo.”

Ahunjia mambagĩrĩria na ciugo irĩkũ makĩheana ibuku rĩu rĩa Mathayo? Andũ aingĩ arĩa maragia Kĩjapani nĩ moĩ ciugo ta “mũromo ũrĩa mũceke,” “mũtigaitĩre ngũrũe ruru,” na “tigagai gwĩtanga nĩ ũndũ wa rũciũ.” (Mat. 6:34; 7:6, 13) Nĩ magegaga mamenya atĩ icio nĩ ciugo cia Jesu. Mona ciugo icio ibuku-inĩ rĩu rĩa Injiri ya Mathayo, aingĩ moigaga ũũ: “Ngoretwo ngĩenda gũthoma Bibilia o na akorũo no rita rĩmwe.”

Rĩrĩa ahunjia mathiĩ gũcokera arĩa maahunjĩirie na makĩmatigĩra ibuku rĩu rĩa Mathayo, kaingĩ andũ acio moigaga atĩ nĩ mathomete ibuku rĩu rĩothe kana icunjĩ imwe cia rĩo. Mũthuri ũmwe ũrĩ mĩaka-inĩ ya 60 eerire mũhunjia ũmwe ũũ: “Ndĩrĩthomete maita maingĩ na ngomĩrĩrio mũno. Nduta maũndũ mangĩ megiĩ Bibilia.”

Ibuku rĩu rĩa Mathayo nĩ rĩrahũthĩrũo kũhunjia kũndũ kwa mũingĩ. Mwarĩ wa Ithe witũ ũmwe arĩ ũtungata-inĩ ũcio nĩ aaheire mũtumia ũmwe andirethi ciake cia e-mail thutha wa kũmũhe ibuku rĩu rĩa Mathayo. Ithaa rĩmwe thutha ũcio, mũtumia ũcio aandĩkĩire mwarĩ wa Ithe witũ ũcio ndũmĩrĩri na akĩmwĩra atĩ nĩ arĩkia gũthoma gĩcunjĩ kĩa ibuku rĩu na no ende kũmenya makĩria. Kiumia kĩmwe thutha ũcio, akĩambĩrĩria kwĩruta Bibilia, na thutha wa kahinda gatarĩ coho akĩambĩrĩria gũthiĩ mĩcemanio.

Makĩria ma kobĩ 1,600,000 cia ibuku rĩa Bibilia— Injiri ya Mathayo nĩ itwarĩtwo ciũngano-inĩ thĩinĩ wa Japan, na o mweri, ahunjia nĩ maraheana kobĩ ngiri nyingĩ. Ũhoro wa gũtaarĩria ibuku rĩu nĩ wonanĩtie muoroto wa acabi a ibuku rĩu. Moigĩte ũũ: “Nĩ mwĩhoko witũ atĩ gũthoma ibuku rĩrĩ nĩ gũgũgũteithia wende Bibilia makĩria.”