MELIONGIYO limwe liakolela lialingilwe ko Nagoya, mo Japão, mu 28 ya Tyikukutu yo 2013, Anthony Morris umwe Pononkhalamutwe mbo Nombangi mba Jeova, walingile eiviso limwe lihambukiswa: walekesa omukanda omupe melaka lio Japão una osapi yati, Ombimbiliya—O Evandyeliu ya Mateus. Ovanthu veile peliongiyo olio, kumwe naava vatalela mo tela, valamba po 210.000. Etyi veiva eiviso olio, ovateheleli avahambukwa unene avahakela ehimbwe.

Omukanda oo, Evandyeliu ya Mateus wapolua mo Tradução do Novo Mundo. Mahi, omukanda oo womafo 128 welikalela unene. Omukuatate Morris wahangununa okuti omukanda oo walingua pala okukuatesako ovanthu vakala mo Japão. Oityi tyelikalela momukanda oo? Omokonda yatyi ankho wesukisila? Iya oñgeni ovanthu vakalele?

Ovanthu ovanyingi vahuvile nonkhalelo omukanda wa Mateus wahonekua. Elaka lio Japão lipondola okuhonekwa okupolelela peulu okulauka no pombuelo ine okupolelela kokumbili okuenda no kokulio, iya omikanda ominyingi vio ko Japão okukutikinyamo omikanda vietu, viahonekwa okupolelela kokumbili okuenda no kokulio. Mahi, omukanda omupe wahonekua okupolelela peulu okulauka no pombuelo, ngetyi tyahonekwa ono jornale ononyingi mbo ko Japão, nomikanda omikuavo. Ovanthu ovanyingi mo Japão vehole vali onkhalelo oyo yokuhoneka mokonda yapepuka vali okuitanga. Tupu ousapi ankho ukala pombanda yefo, pahe ukahi pokati pala okukuatesako ovatangi okunoñgonoka liwa ononthele mbakolela.

Ovakuatate no nomphange mo Japão vahimbikale okutanga omukanda wa Mateus. Omphange umwe una omanima 80, wati: “Natangale omukanda wa Mateus ovikando ovinyingi, mahi ousapi, nonkhalelo wahonekua, tyankhuatesako okunoñgonoka vali nawa Elongomona lio Komphunda.” Omphange umwe, wahoneka okuti: “Natanga omukanda auho wa Mateus monthiki ike. Ankho netyiliya okutanga okupolelela kokumbili okuenda no kokulio, mahi ovanyingi mo Japão vahanda vali okutanga okupolelela peulu okulauka no pombuelo.”

Omokonda yatyi omukanda oo Wombimbiliya wakolela unene pala ovanthu vomo Japão? Namphila ovanthu ovanyingi mo Japão kavei ovipuka ovinyingi konthele Yombimbiliya, mahi vahanda okuitanga. Ovanyingi vehenemone Ombimbiliya, pahe vena omphitilo yokutambula onthele imwe Yombimbiliya nokuitanga.

Omokonda yatyi vaholovonena omukanda wa Mateus? Tyina ovanthu vomo Japão veiva ondaka “Ombimbiliya,” vasoka ku Jesus Kristu. Ngotyo, omukanda wa Mateus waholovonua mokonda upopia ombunga ya Jesus no puetyi atyitwa, Nelongomona liae Liokomphunda, nomaulo ae apopia konthele  yononthiki mbonthyulilo. Ovanthu ovanyingi mo Japão vesuka unene novipuka ovio.

Ovaivisi mo Japão avahimbika okuava nombili omukanda oo omupe umbo na umbo nokukatalelapo ava vesuka. Omphange umwe wahoneka okuti: “Pahe ndyina onomphitilo ononyingi mbokulongesa Ondaka ya Huku kovanthu vakala potyilongo tyetu. Ngotyo, kekumbi monthiki yeliongiyo olio liakolela, netyivilile okuava omukanda wike wa Mateus!”

Oñgeni ovaivisi vaava omukanda oo omupe? Ovanthu ovanyingi vomo Japão vei onondaka mbokuati “ombundi yahita,” ‘okuyumba omalumono kovingulu,’ no mbokuati “okuhakala notyiho nonthiki onkhuavo.” (Mateus 6:34; 7:6, 13) Vahuvile etyi vanoñgonoka okuti onondaka ombo omba Jesus Kristu. Etyi vamona onondaka ombo mu Mateus ovanyingi avati: “Apeho ankho nahanda okutanga Ombimbiliya namphila otyikando tyike vala.”

Tyina ovaivisi vakatalelapo ava vetavelele omukanda wa Mateus, ovanthu vapopia okuti vatangale omafo amwe ine veutangale auho. Omulume umwe una omanima 60, wapopila omuivisi umwe okuti: “Neutangale ovikando ovinyingi, iya wamphameka. Mbambavo ndongese vali konthele Yombimbiliya.”

Tupu tuava omukanda wa Mateus pokuivisa mounyingi. Pokuivisa, Ombangi imwe wasila o e-mail yae omuhikuena umwe wetavela okusala nomukanda. Etyi palamba oola ike, omukai oo ahonekela omphange okuti watangale onthele imwe yomukanda, iya uhanda okunoñgonoka vali. Etyi palamba osimanu, omukai oo ahimbika okulongeswa Ombimbiliya, apakala vala katutu ahimbika okuenda komaliongiyo.

Omikanda vilamba po 1.600.000 via Mateus, viatualwa no nowato komawaneno omanyingi omo Japão. Kese ohanyi Onombangi mba Jeova vaava kovanthu omikanda ominyingi-nyingi. Konthyimbi yomukanda oo, tuvasako omalusoke ovahoneki womukanda ou, vapopia okuti: “Tukevelela omukanda ou ukuateseko ovatangi okusuka vali Nombimbiliya.”