SHIGHE u i nyôr mkombo u injaa ugen hen gar u Nagoya, ken tar u Japan, sha iyange i Aipor 28, 2013 la, Anmgbian Anthony Morris, u a lu môm ken Mbahemenev mba Shin Itine la yôô kwaghyôôn u doo mba ve lu ungwan a na la yô. Yange due a takarada u he ken zwa Japan, mba yer u ér The Bible—The Gospel According to Matthew. Ior mba hemban iorov 210,000, mba ve za mkombo ne shin ve lu nengen un sha Intanet la yange ve kure ave gbem.

Takerada u Ivangeli i Mateu, i i dugh ken Bibilo i New World Translation i ken zwa Japan, i i hidi i gber, u lu a upeeji 128 ne ngu kposo. Anmgbian Morris pase ér i er takerada ne sha er ua “kure mbamgbe mba ior i Japan yô.” Ka nyi ken takerada u Bibilo ne i kaha? I er u sha ci u nyi? Man ior nenge u nena?

Gbenda u i nger takerada u Matthew la doo ior kpishi. Ka i nger kwagh sha asangeabaacaa a ken zwa Japan la hii sha sen a sen shin inya, gayô hii ken imese yem a yem ken iyan; man i nger umagazin man ityakerada kpishi, kua ityakerada yase i se gber ken anyom a karen ken ijime la cii, hii ken imese yem a yem ken iyan. Nahan kpa, i nger takerada ne sha gbenda u i ngeren kwagh ken zwa Japan, u hiin sha senen a sen shin inya la, er i ngeren ken uipipambaabaver man ityakerada i ken zwa Japan igen kpishi nahan. Ior mba ken Japan kpishi nenge ér gbenda u i nger takerada ne taver u ôron ga. Heela tseegh ga, shi i gema ngeren mba sha ityou, mba sha hanma peeji mbara hingir atineakaa a kiriki sha er mbaôron vea fatyô u nengen a atineakaa a vesen la fele yô.

Anmgbianev mba nomso man mba kasev mba ken Japan hii u ôron takerada u Matthew ne a shighe u vihin shio. Anmgbian u kwase ugen u a hembe anyom 80 yô, kaa ér: “M vande ôron takerada u Mateu acin imôngo, kpa gbenda u i nger takerada ne, i hii sha i sen a sen shin inya la, man atineakaa la cii wasem u hemban kaven Ityesen i sha Uwo la tsembelee.” Anmgbian u kwase ugen u kuman anyom 30 di nger wener: “M tema icin i môm tseegh m ôr takerada u Matthew la m bee. Hemba hoghol mo u ôron takerada sha gbenda u ngeren kwagh, u ka i hii ken imese i yem a yem ken iyan la, kpa ior i Japan kpishi hemba soon gbenda u ngeren kwagh u ka i hii kwaghngeren sha i sen a sen shin inya la.”

A fatyô u kaan ér takerada u Bibilo ne tseegh kpa ua lu a iwasen kpishi ken tar u Japan sha ci u nyi? Shin er ior i Japan kpishi ve fe kwagh u Bibilo tsembelee ga nahan kpa, ve soo u ôron takerada ne. Ior kpishi mba i mar ve je ve lu a vande nengen a Bibilo ga kpa vea fatyô u kôron mgber u Ivangeli i Mateu ne ken uwegh shi ôron kpaa.

Yange i tsua takerada u Mateu sha ci u nyi? Ior i Japan kpishi ka vea ungwa iti i “Bibilo” yô, ka Yesu Kristu ka a va ve ken ishima ye. Nahan i tsua takerada u Mateu sha ci u ngu a ngeren u tsombor man mmar u Yesu, kua Ityesen na i sha Uwo i i ze gwa yum la kua kwaghôron u profeti u doon tsung u yange ôr sha kwagh u ayange a masejime la. Akaa ne cii aa doo ior i Japan kpishi.

 Mbapasenkwagh mba ken Japan kpishi tese gbashima ken tom u pasen kwagh la, gadia ve hii u nan ior takerada u he ne ken kwaghpasen u sha uya uya man shighe u ve hidi ve ze u za sôron or la. Anmgbian u kwase ugen kaa ér: “M hemba ngun a aan a nan ior Mkaanem ma Aôndo hen haregh wam hegen. Jighilii yô, sha iyange i i due a takerada u Matthew atetan sha mkombo u injaa la je, m na or takerada ne!”

Mbapasenkwagh ka ve na ior takerada u he ne nena? Mbayaav mba ken Japan kpishi fa anzaakaa a “hunda u hogholoo” man “de gbihin nen igyo utagbede . . . ga” kua “asema a̱ de nyian ne sha kwagh u kper ga” la. (Mat. 6:34; 7:6, 13) Nahan kpiligh ve iyol u fan ér, ka Yesu Kristu yange ôr mkaanem man ye. Ior kpishi ka vea nenge a mkaanem man ken Ivangeli i Mateu yô, ve kaa ér: “Ka i shi saren mo u ôron Bibilo, abunde kpa kwa môm tsô.”

Mbapasenkwagh ka vea hide vea za u za sôron mbayaav mba ve ne ve takerada u Matthew ne yô, ve kaa a mbapasenkwagh mban ér ve hii u ôron takerada la fele je, shin ve ôr u cii ve bee. Orgen u a hembe anyom 60 yô, kaa a orpasenkwagh ugen ér: “M ôr takerada ne kwa imôngo, man u surum ishima kpaa. Wea lumun yô, seer tesen mo Bibilo.”

Mba nan ior takerada u Matthew ne ken kwaghpasen u ken igbar la kpaa. Anmgbian u kwase ugen yange due kwaghpasen, nahan a na gumkwase ugen u na un takerada u Matthew yô adereshi na u sha Intanet. Ihwa i môm i karen yô, gumkwase la tindi anmgbian u kwase ne a loho kaa ér un ôr vegher u takerada u Bibilo la, nahan un soo u seer fan kwagh u Bibilo. Kasua karen môm yô, i hii Bibilo i henen a gumkwase ne shi ica i gba ga tsô hii u zan mbamkombo.

I tindi atôônanongo a ken tar u Japan a takerada u The Bible—The Gospel According to Matthew la hemba ukôpi miliôn môm, shi hanma uwer yô, Mbashiada mba Yehova ka ve na ior ukôpi udubu udubu. Kwaghngeren u a lu ken mhii u takerada ne la pase awashima u mbangeren u la ér: “Se mba veren ishima ser, takerada ne ua wase ne u seer lun a isharen i ôron Bibilo cii.”