KHÄ 1870 maranjja, mä qawqhaniw Pittsburgh, jan ukajj Allegheny (Pensilvania, Estados Unidos) markan Charles Taze Russell jilatan pʼeqtʼatajja Bibliat yatjjatañ qalltapjjäna. Criston jiwas layku loqtasitapat yatjjatasajja, kunjamsa ukajj Jehová Diosan amtap phoqasiñapatak yanaptʼi ukwa amuyapjjäna. Jesusat parlir istʼirinakasa, jan istʼirinakasa uka toqe qhespiyatäñ yatisajja, ¡wal kusisipjjäna! Ukaw jupanakar Criston jiwatap sapa mara amtañatak chʼamañchtʼäna (1 Cor. 11:23-26).

Russell jilatajj Zionʼs Watch Tower (La Torre del Vigía de Sión) revistwa apsuñ qalltäna. Uka revistan sänwa: ‘Criston jiwatap toqew Diosajj munasirïtap uñachtʼayistu’ sasa. Jesusan jiwäwip amtaski uka urunakat parlkasajja, “wali kusiskañ urunakawa” sasaw revistajj säna. Uka revista liytʼirinakajja, Pittsburgh markansa yaqha cheqanakansa mä qawqhanis tantachasipjjañapänwa. Revistajj sarakïnwa: ‘Maynikisa, paninisa jan ukajj kimsanisa mä pachpa iyawsäwinïpjjstajja, Tatitojj jumanakampïskaniwa’ sasa.

Jesusan jiwäwip amtañatakejja, sapa maraw walja jaqenakajj Pittsburgh markar sarapjjäna. Ukar sarañataki invitacionajj sänwa: “Akanwa suma chuyman jaqenak jikjjatäta, sum katoqtʼapjjätam” sasa. Bibliat Yatjjatirinakajj munasiñampiw jutirinakar katoqapjjäna, manqʼsa churapjjarakïna. 1886 maran Jesusan jiwäwip amtaskäna ukhajja, mä “Jachʼa Tantachäwiw” walja urunak apasïna. Ukatakiw Watch Tower revistan akham qellqasïna: “Uywirisampiru jilat kullakanakasampiru cheqa yatichäwimpiru munasitas layku jutapjjam” sasa.

Jesusan jiwäwip amtirinakatakejja, Pittsburgh markan walja kutiw Bibliat Yatjjatirinakajj jachʼa tantachäwinak apapjjäna. Bibliat Yatjjatirinakajj jukʼampiw jiljjattapjjäna, Jesusan jiwäwip amtañatak tantachäwinakas Oraqpachan walja cheqanakanwa apasjjäna. Ray Bopp jilatajj Chicago markanwa eclesiar (ukhamwa tamanakar uñtʼasïna) saräna. Jupajj sänwa: ‘1910 maranakanjja, Jesusan jiwäwip amtañatakejj walja horanakaw munasïna, kunattejj niya taqeniw tʼantʼa manqʼapjjäna vinsa umtʼapjjarakïna’ sasa.

¿Kunanakas Jesusan jiwäwip amtañatakejj apnaqasïna? Santa Cena amtañatakejj Jesusajj vino apnaqäna. Ukampis Watch Tower revistajja, mä qawqha tiempojj uvasata jan ukajj wañtʼat uvasat lurat jugompi amtañatakiw chʼamañchtʼäna. Ukhamat “jañchi toqen tʼukhäpki” ukanakar jan lanktʼayañataki. Ukhamäkchïna ukasa, ‘vinow apnaqasiñapa’ sasin sapkäna ukanakatakejja, vinojj utjänwa. Qhepatjja, Bibliat Yatjjatirinakajj ‘Jesusan wilapawa’ sañatakejj jan alcoholani vino apnaqañ wakisitapwa amuyapjjäna.

Jesusan jiwataparu askit uñjañatakiw uka tantachäwejj taqenir yanaptʼäna. Ukampis yaqhep  tamanakanjja, llakisiñaw utjäna. Arstʼäwi tukuyarojj jan kun sasakiw sarjjapjjerïna. Ukatwa Jehová sat librojj akham säna: ‘Jesusan jiwäwipat janiw “llakisiñasäkiti”, jan ukasti, 1914 marat Reyjam apnaqjjatap yatisajj “kusisiñasawa”’ sasa, uka librojj 1934 maran apsusïna.

‘Walja jaqenakatwa’ Apocalipsis 7:9 qellqatan parli, jupanakajj khitinakäpjjesa ukaw 1935 maran qhanañchasïna. Uka marakamajja, Diosar katuyatäkasin jan taqe chuyma loqtirinakaruw ‘walja jaqenaka’ sasin uñtʼasïna. Ukampis uka maranjja “walja jaqenakjam” uñtʼatäpki ukanakajja, Oraqen jakañatak suytʼäwini Diosar taqe chuyma servipki ukanakawa sasaw amuyasjjäna. Mä qawqha tiempotjja, wali sum amuytʼasaw Russell Poggensee jilatajj akham säna: “Jehová Diosajj janiw qollan ajayupampejj alajjpachar sarañ munañ chuymajar uchkituti” sasa. Uka jilatasa mayni jilat kullakanakasa, tʼantʼa manqʼañsa, vino umtʼañsa jaytjjapjjänwa, ukampis Jesusan jiwäwip amtirejj sarasipkakïnwa.

Jesusan jiwäwip amtaskäna uka urunakajja, yatiyiriw sarapjjäna. Ukaw Jesusan jiwäwip wali askit uñjañatakejj jilat kullakanakar yanaptʼäna. 1932 maranjja Bulletin qellqatajj sänwa: ‘Cristianonakajj “Jesusan jiwäwip amtañatakejj janiw ukhamak sarapjjañapäkiti”, jan ukasti, “cheqpach irnaqtʼirïpjjañapawa”, mä arunjja, Bibliatwa yatiyapjjañapa’ sasa. 1934 maranjja Informant (Informador) qellqatajj akham sasaw precursor auxiliarjam irnaqtʼapjjañapatak chʼamañchtʼäna: “¿Jesusan jiwäwip amtkañäni uka urunakajj waranqanir puriñäniti?” sasa. Ajllitanakat parlkasajj saskakïnwa: “Diosan Reinopat yatiyir sarasakiw kusisitäpjjäta” sasa. Qhepatjja, aka Oraqen jakañatak suytʼäwinïpkäna ukanakas ukham kusisitäpjjañaparakïnwa. *

Jehová Diosan Qhanañchirinakapatakejja, Criston jiwäwip sapa mara amtañajj wali askiwa. Ukatwa jan walinakan jikjjataskasas uka tantachäwir sarapjje. Amuytʼañataki, 1930 maranjja, Pearl English sat kullakajj Ora sat kullakapampiw 80 kilometronak kayuk sarapjjäna. Harold King misionero jilatarojj China markanwa carcelar jistʼantapjjäna. Ukanwa Jesusan jiwäwip amtañ toqet chuymar purtʼkir arunaka, qʼochunaka qellqäna, ukat arrosatwa tʼantʼa luräna, vinjja grosella sat achutwa lurarakïna. Ukhamarakiw Europa del Este, Centroamérica, África uksa toqenakankir jilat kullakanakajj guerranakana ukat uñisiñat arknaqatas Jesusan jiwäwip amtapjjarakïna. Ukhamajj Criston jiwäwip amtaski uka urunakajja, kawkinkkasasa kunjamäskchiñäni ukasa, taqeniw Jehová Diosarusa, Jesusarus jachʼañchañ muntanjja.