KAN 1870 sa Pittsburgh (Allegheny), Pennsylvania, E.U.A., sarong sadit na grupo an nagpuon na magsiyasat kan Kasuratan. Sa panginginot ni Charles Taze Russell, pinag-adalan ninda an manungod sa pantubos ni Cristo asin dai nahaloy nasabutan ninda an mahalagang marhay na papel kaiyan sa katuyuhan nin Diyos. Ugmahon sindang maaraman na huli sa pantubos nabuksan an dalan pasiring sa kaligtasan, dawa para sa mga dai pa nadangog an manungod ki Jesus! Huli sa pasasalamat ninda, napahiro sindang iselebrar taon-taon an Memoryal kan kagadanan ni Jesus bilang paggirumdom sa saiya.—1 Cor. 11:23-26.

Dangan, ipinublikar ni Brother Russell an Zion’s Watch Tower, na nagsusuportar sa doktrina kan pantubos bilang an pinakadakulang kapahayagan kan pagkamuot nin Diyos. An Memoryal kan kagadanan ni Cristo inapod kan Watch Tower na “sarong mahalagang marhay na panahon,” asin dinagka an mga parabasa kan magasin na selebraron iyan sa Pittsburgh o sa iba pang lugar sa pribadong mga grupo. “Dawa may duwa sana o tulo na pararehong sinsero an pagtubod”—o maski saro—garo man sana “yaon sa tahaw [ninda] an Kagurangnan.”

Kada taon, padakul nin padakul an nagpapa-Pittsburgh para sa Memoryal. “Maugma kamong aakuon digdi,” an sabi sa imbitasyon. Iyo, gikan sa buot na pinaistar asin pinakakan kan mga Estudyante sa Bibliya duman an saindang mga tugang sa espirituwal. Kan 1886, nagkaigwa nin pirang aldaw na “Dakulang Pagtiripon” sa panahon kan Memoryal. “Madya kamo,” an dagka kan Watch Tower, “na may puso na pano-pano nin pagkamuot sa Kagurangnan asin sa saiyang mga tugang saka sa saiyang katotoohan.”

Sa laog nin dakul na taon, an mga Estudyante sa Bibliya sa Pittsburgh an nagho-host nin mga kumbensiyon para sa mga nagtutubod sa pantubos na nagduduman para sa Memoryal. Mantang nagdadakul an bilang kan Mga Estudyante sa Bibliya, nagdadakul man an ginigibong pagtiripon para sa Memoryal sa bilog na kinaban patin an bilang kan mga nag-aatender diyan. Nagirumduman ni Ray Bopp, miyembro kan Chicago ecclesia (kongregasyon), na kan dekada nin 1910, inaabot nin pirang oras an pagpasa kan mga emblema sa ginatos na nag-atender huling haros gabos nakikikabtang sa mga emblema.

Ano an ginamit na mga emblema? Maski ngani malinaw sa sainda na arak an ginamit ni Jesus sa Pamanggihan kan Kagurangnan, sa laog nin halipot na panahon, pigrekomendar kan Watch Tower na tagok nin bagong ubas o ginagang pasas na sana an gamiton tanganing dai makatentar sa mga “maluya sa laman.” Pero, igwa pa man giraray nin arak para duman sa mga naniniwala na “pinaalsom na arak an mas angay na gamiton.” Dai nahaloy, nasabutan kan Mga Estudyante sa Bibliya na purong pulang arak an angay na simbolo kan dugo ni Jesus.

An paggirumdom sa kagadanan ni Jesus nagtao nin pagkakataon tanganing seryosong makapaghurop-hurop.  Kaso, sa nagkapirang kongregasyon, mamundo an Memoryal, asin pagkatapos kan programa naghahali sinda na haros dai naggigirirungan. Pero, an librong Jehovah na ipinublikar kan 1934 nagsabi na an Memoryal dapat gibuhon bakong “sa kamunduan” huli sa pagkagadan ni Jesus, kundi “sa kaugmahan” huli sa pamamahala niya bilang Hadi puon 1914.

Kan 1935 nagkaigwa nin dakulang pagbabago na nakaapektar sa suminurunod na pagselebrar kan Memoryal, huling nagkaigwa nin paglilinaw sa kahulugan kan “dakulang kaburunyugan” (KJ), o “dakulang kadaklan,” sa Kapahayagan 7:9. Para sa mga lingkod ni Jehova kaidto, an grupong ini mga dusay na Kristiyano pero bakong gayong maigot. Ngunyan, an dakulang kaburunyugan na ini ipinamidbid bilang an maimbod na mga parasamba na may paglaom na mabuhay sa paraisong daga. Kasunod kan paglilinaw na ini asin pagkatapos nin maingat na pagsiyasat, inadmitir ni Russell Poggensee: “Dai sako pinukaw ni Jehova paagi kan saiyang banal na espiritu an paglaom na mabuhay sa langit.” Si Brother Poggensee—asin an dakul pang maimbod na arog niya—nagpundo na sa pakikikabtang sa mga emblema pero padagos pa man giraray na nag-aatender sa Memoryal.

Sa “mahalagang marhay na panahon” na ini, an espesyal na kampanya nin paghuhulit nagin marahay na paagi tanganing ipahiling kan gabos an pagpapahalaga sa pantubos. Dinagka kan 1932 na Bulletin an mga Kristiyano na dai magin “mga santo kan Memoryal,” idtong mga nakikikabtang sa mga emblema pero bakong “aktuwal na mga trabahador,” na naghuhulit kan mensahe kan katotoohan. Kan 1934, an Bulletin nangapudan nin mga “auxiliary,” na naghahapot: “Igwa daw nin 1,000 na maaplay sa panahon nin Memoryal?” An Informant nagkomento manungod sa mga linahidan: “Magigin lubos sana an kaugmahan ninda kun maiba sinda sa pagpapatotoo dapit sa Kahadian.” Pag-abot nin panahon, nagin totoo man ini sa mga igwa nin paglaom na mabuhay digdi sa daga. *

Para sa gabos na lingkod ni Jehova, an Memoryal an pinakasagradong banggi sa bilog na taon. Isineselebrar ninda iyan dawa nasa dipisil na mga kamugtakan. Kan 1930, si Pearl English asin an tugang niyang si Ora, naglakaw nin mga 80 kilometros tangani sanang makaatender sa Memoryal. Mantang nakabartolina sa Tsina, an misyonerong si Harold King nagsurat nin mga tula asin kanta dapit sa Memoryal asin naggibo nin mga emblema na gibo sa black currant asin bagas. Puon sa Sirangan na Europa sagkod sa Sentral Amerika asin sagkod sa Aprika, an makusog an buot na mga Kristiyano dai natakot na girumdumon an kagadanan ni Jesus dawa may giyera o pagbabawal sa gibuhon. Sain man kita o ano man an sitwasyon ta, nagtitiripon kita tanganing tawan nin onra an Diyos na Jehova asin si Jesu-Cristo sa mahalagang marhay na panahon nin Memoryal.