LONG yia 1870, wanpela liklik grup long Pittsburgh (Allegheny), Pennsylvania long Amerika, i skelim ol tok bilong Baibel. Charles Taze Russell i go pas long ol. Ol i skelim ol skripsa i stori long ofa bilong Krais long baim bek man, na ol i luksave olsem dispela ofa i mekim bikpela wok long kamapim samting Jehova i tingting pinis long mekim. Ol i amamas tru long kisim save olsem dispela ofa i opim rot long God inap kisim bek olgeta man, na dispela i makim tu ol man i no kisim save yet long Jisas! Dispela i kirapim ol long mekim bung bilong tingim dai bilong Jisas long olgeta yia.​—1 Kor. 11:23-26.

Brata Russell i stretim rot long wokim Zion’s Watch Tower, na dispela nius i tokaut klia olsem ofa bilong Krais em nambawan bikpela samting i soim klia pasin laikim bilong God. Was Taua i kolim Memorial olsem “spesel taim tru,” na i kirapim ol man long i go long dispela bung long Pittsburgh o long ol narapela liklik grup. “Maski sapos 2-pela o 3-pela man i bung na ol i gat wankain bilip,” o wanpela man tasol i stap, “i olsem Bikpela bai stap wantaim ol.”

Long olgeta yia, planti man moa i go long Pittsburgh long bung bilong Memorial. Invatesen bilong Memorial i tok: “Ol manmeri bai amamas long welkamim yu.” Long dispela taim, ol Sumatin Bilong Baibel i lukautim gut ol bratasista. Long taim bilong Memorial long 1886, ol i mekim “Bikpela Kibung” inap sampela de. Was Taua i tok: “Yupela i mas kam, na yupela i mas laikim tru Bosman, lain bilong em, na tok i tru bilong em.”

Inap sampela yia, ol man i bilip long ofa bilong Krais long baim bek man i save go long Pittsburgh long bung bilong Memorial, olsem na ol Sumatin Bilong Baibel long Pittsburgh i save redim ol kibung. Namba bilong ol Sumatin Bilong Baibel i kamap bikpela, olsem na ol i mekim planti moa bung bilong Memorial na planti man moa i kam long olgeta hap. Ray Bopp i bilong Chicago kongrigesen na em i stori olsem, long ol yia bihain long 1910, ol i save lusim sampela aua long salim bret na wain long planti handret man i bung bikos klostu olgeta i kisim bret na wain.

Ol i yusim wanem ol samting long Memorial? Was Taua i tok, Jisas i yusim wain long Kaikai Bilong Bikpela, tasol inap sampela yia Was Taua i kirapim ol Sumatin Bilong Baibel long yusim jius bilong greip o greip ol i draim, na long dispela rot ol i no inap pundaunim ol man i gat hevi long dring alkohol. Tasol ol i givim wain long ol lain i pilim olsem “i stret long ol i yusim wain tru.” Bihain, ol Sumatin Bilong Baibel i luksave olsem wain tru i makim blut bilong Jisas.

Memorial i kirapim ol Kristen long skelim ol yet. Tasol long sampela kongrigesen, bikpela sore i save kamap, olsem na taim program i pinis, olgeta i save  pasim maus tasol na lusim ples bung. Long 1934, buk Jehovah i tok, Memorial i no taim bilong “sore” long indai bilong Jisas na pen em i bin kisim, nogat, ol i mas “amamas” long wok King bilong em kirap long 1914.

Bikpela senis i kamap long 1935 bikos ol i kisim stretpela save long mining bilong tok i stap long Revelesen 7:9 long “bikpela lain manmeri,” na dispela i stiaim pasin ol bai bihainim long mekim bung bilong Memorial long ol yia bihain. Paslain long 1935, lain bilong Jehova i holim tingting olsem “bikpela lain manmeri” em ol Kristen husat i no givim bel tumas long mekim wok bilong God. Dispela bikpela lain manmeri i bilip na wet long kisim laip long Paradais long graun. Taim ol i kisim stretpela save, Russell Poggensee i tok: “Jehova i no yusim holi spirit long kirapim laik bilong mi long i go long heven.” Brata Poggensee—​na planti narapela husat i stap gut long God​—ol i stop long kisim bret na wain, tasol ol i go yet long Memorial.

Long dispela “spesel taim tru,” ol i mekim bikpela wok autim tok, na dispela i opim rot long olgeta inap soim amamas bilong ol long ofa bilong baim bek man. Long 1932, nius Bulletin i kirapim ol Kristen long abrusim pasin bilong i stap olsem “ol santuman bilong Memorial,” em ol man i kisim nating bret na wain na ol i no i stap olsem ol “wokman tru” na autim tok i tru. Long 1934, nius Bulletin i kirapim ol bratasista long insait long wok “painia haptaim,” na i tok: “Olsem wanem? Bai i gat rot long 1,000 pablisa inap insait long wok painia haptaim?” Nius Informant i stori long lain God i makim, na i tok: “Amamas bilong ol bai kamap bikpela tru sapos ol i insait long wok bilong autim tok bilong Kingdom.” Wankain samting bai painim ol manmeri husat i bilip na wet long kisim laip oltaim long graun. Ol tu bai kisim bikpela amamas sapos ol i insait long wok bilong autim tok bilong Kingdom. a

Lain bilong Jehova i tingim Memorial olsem nait i holi tru winim olgeta narapela nait. Ol i mekim dispela bung maski bikpela hevi i painim ol. Long 1930, wanpela sista, Pearl English, na sista bilong em, Ora, i wokabaut 80 kilomita long i go long Memorial. Harold King em wanpela misineri husat i bin kalabus long Saina. Em i stap wanpis long rum kalabus, na raitim ol poem na ol singsing bilong Memorial na em i yusim blakpela greip na rais long wokim bret na wain. Long Isten Yurop, Sentral Amerika, na Afrika, ol Kristen i strongim bel na mekim bung bilong tingim dai bilong Jisas maski i gat woa na gavman i tambuim wok bilong ol. Maski yumi stap long wanem hap o sindaun bilong yumi i olsem wanem, yumi bung wantaim long givim biknem long God Jehova na Jisas Krais long spesel taim bilong Memorial.