1, 2. (a) Etẹwẹ mí sọgan wà nado yin dopo to mẹhe na yin whinwhlẹngán lẹ mẹ? (b) Etẹwẹ sọgan gọalọna mí nado gbọṣi aliho whlẹngán tọn lọ ji?

TO WHENUE mí lẹzun devi Klisti tọn, mí bẹ gbejizọnlin de jẹeji. Gbejizọnlin enẹ sọgan gọalọna mí nado nọgbẹ̀ kakadoi, vlavo to olọn mẹ kavi to aigba ji. Jesu dọmọ: “Mẹhe doakọnna kakajẹ opodo, [enẹ wẹ opodo gbẹzan etọn tọn to aihọn ehe mẹ kavi opodo aihọn ylankan ehe tọn] omẹ enẹ wẹ na yin whinwhlẹngán.” (Mat. 24:13) Na nugbo tọn, eyin mí hẹn nugbonọ-yinyin mítọn go dile mí to gbejizọnlin lọ zìn, mí sọgan yin dopo to mẹhe na mọ whlẹngán lẹ mẹ. Ṣigba, dile ojlẹ lẹ to yìyì mí dona tin to aṣeji ma nado buali kavi yin ayihafẹsẹna. (1 Joh. 2:15-17) Etẹwẹ mí sọgan wà nado gbọṣi aliho whlẹngán tọn lọ ji?

² Jesu ze apajlẹ pipé lọ dai na mí. Otàn gbẹzan etọn tọn yin kinkandai to Biblu mẹ. Eyin mí plọn kandai enẹ, mí na yọ́n mẹhe nkọ Jesu yin. Mí na penugo nado yiwanna ẹn bo nasọ do yise hia to ewọ mẹ. (Hia 1 Pita 1:8, 9.) Flindọ apọsteli Pita dọ dọ Jesu ze apajlẹ de dai na mí, na mí nido nọ hodo afọdòmẹ etọn lẹ pẹkipẹki. (1 Pita 2:21) Eyin mí yí sọwhiwhe do hodo apajlẹ etọn, mí na mọ “opodo”  kavi kọdetọn yise mítọn tọn yí, yèdọ whlẹngán. * To hosọ he jẹnukọn mẹ, mí dọhodo lehe mí sọgan hodo apajlẹ Jesu tọn nado nọ do whiwhẹ po awuvẹmẹ po hia do ji. Todin, mì gbọ mí ni gbadopọnna lehe mí sọgan hodo apajlẹ etọn nado nọ do adọgbigbo po wuntuntun po hia do.

3. Etẹwẹ adọgbigbo yin, podọ nawẹ mí sọgan wleawuna ẹn gbọn?

³ Adọgbigbo yin jidide de he sọgan na mí huhlọn bo gọalọna mí nado doakọnnanu. Adọgbigbo zẹẹmẹdo “nado nọ sinyẹnlin to nuhahun de whenu,” “nado nọ yiavùnlọna nuhe sọgbe,” podọ “nado nọ yí jintli po yise po do doakọnna yajiji.” Adọgbigbo tindo kanṣiṣa hẹ obu, todido po owanyi po. Gbọnna? Budisi Jiwheyẹwhe nọ na mí adọgbigbo nado duto obu gbẹtọ tọn ji. (1 Sam. 11:7; Howh. 29:25) Todido nujọnu tọn nọ gọalọna mí nado mọnú zẹ̀ whlepọn he mí to pipehẹ to alọnu lẹ go, podọ nado pọ́n sọgodo hlan po jide po. (Ps. 27:14) Owanyi mẹde-yido-sanvọ́ tọn nọ whàn mí nado do adọgbigbo hia, etlẹ yin to whenue ogbẹ̀ mítọn tin to owù mẹ. (Joh. 15:13) Mí nọ wleawuna adọgbigbo gbọn jidide do Jiwheyẹwhe go po afọdòmẹ Visunnu etọn tọn lẹ hihodo po dali.—Ps. 28:7.

4. Nawẹ Jesu do adọgbigbo hia “to mẹplọntọ lẹ ṣẹnṣẹn” to tẹmpli mẹ gbọn? (Pọ́n yẹdide he tin to bẹjẹeji hosọ ehe tọn.)

⁴ Jesu yí adọgbigbo do yiavùnlọna nuhe sọgbe etlẹ yin to whenue e yin owhe 12 mẹvi. Doayi nuhe jọ go to jọja whenu Jesu tọn, dile ewọ tin “to tẹmpli mẹ, [bo] to aisinsin to mẹplọntọ lẹ ṣẹnṣẹn.” (Hia Luku 2:41-47.) Mẹplọntọ enẹlẹ plọn Osẹ́n Mose tọn ganji bosọ yọ́n aṣa Ju lẹ tọn he nọ zọ́n bọ gbẹtọ lẹ ma nọ yí nukun nujọnu tọn do pọ́n Osẹ́n lọ. Ṣigba, Jesu ma dibu bo gbọṣi abọẹ gba; ewọ “to ohó kanse yé.” E họnwun dọ kanbiọ Jesu tọn lẹ ma taidi yọpọvu he to tlintlindo dín de tọn gba. Mí sọgan yí nukun homẹ tọn do pọ́n Jesu dile e to kanbiọ mẹhẹnlẹnnupọn tọn lẹ kanse, ehe hẹn mẹplọntọ enẹlẹ nado gbọṣi aisinsin bo vò do dotoaina ẹn. Podọ eyin mẹplọntọ enẹlẹ kàn kanbiọ he sọgan hẹnmẹ biọ bẹwlu mẹ lẹ sè Jesu nado tafu i, ewọ nọ duto yé ji. Na nugbo tọn, “nukunnumọjẹnumẹ etọn po gblọndo etọn lẹ po nọ jiawu na mẹhe to todoaina ẹn lẹ” po mẹplọntọ lọ lẹ po. Matin ayihaawe, gblọndo etọn lẹ yiavùnlọna nugbo Ohó Jiwheyẹwhe tọn!

5. Aliho tẹlẹ mẹ wẹ Jesu do adọgbigbo hia to lizọnyizọn etọn mẹ te?

⁵ Jesu do adọgbigbo hia to aliho susu mẹ to lizọnyizọn etọn mẹ. E yí adọgbigbo do de nukọntọ sinsẹ̀n tọn lẹ gbà, na yé ko yí nuplọnmẹ lalo lẹ zan nado hẹn gbẹtọ lẹ buali. (Mat. 23:13-36) E nọavùnte sọta nuyiwadomẹji aihọn tọn he nọ hẹnmẹ flu lẹ. (Joh. 16:33) E zindonukọn nado to yẹwhehodọ mahopọnna avùnnukundiọsọmẹ agọjẹdomẹtọ lẹ tọn. (Joh. 5:15-18; 7:14) Podọ whla awe wẹ e yí adọgbigbo do klọ́ tẹmpli lọ wé bo yàn mẹhe to sinsẹ̀n-bibasi hẹnflu to finẹ lẹ tọ́n.—Mat. 21:12, 13; Joh. 2:14-17.

6. To azán godo tọn he Jesu yizan to aigba ji gbè, nawẹ e do adọgbigbo hia gbọn?

⁶ Nulinlẹnpọn do apajlẹ adọgbigbo tọn he Jesu zedai to whenue e to yaji lẹ ji sọgan hẹn yise mítọn lodo. Lẹnnupọndo adọgbigbo he e dohia ji to azán godo tọn he e yizan to aigba ji gbè. E yọ́n nujijọ he na wá aimẹ lẹ tlolo to whenue mẹdehiatọ etọn na de e hia. Etomọṣo, to núdùdù Juwayi tọn whenu, Jesu dọna Juda dọmọ: “Nuhe hiẹ to bibasi, basi i po awuyiya po dogọ.” (Joh. 13:21-27) To jipa Gẹtsemani tọn mẹ, Jesu yí adọgbigbo do dó ede hia ponọ he wá nado wle e lẹ. Dile etlẹ yindọ ogbẹ̀ etọn tin to owù mẹ, e dọho nado basi hihọ́na devi etọn lẹ. (Joh. 18:1-8) To whenue yẹwhenọ daho lọ kanhose e to Whẹdatẹn Daho Ju lẹ tọn, e yí adọgbigbo do dohia dọ emi wẹ Klisti lọ podọ Visunnu Jiwheyẹwhe tọn, dile ewọ tlẹ yọnẹn dọ whẹwhinwhẹ́n dín wẹ yẹwhenọ  daho lọ te, na emi nido yin hùhù. (Malku 14:60-65) Jesu hẹn tenọgligo gligli kakajẹ whenue e kú to yatin ji. To whenue e jlo na gbọ gbigbọ godo tọn to yatin ji, e dawhá awhàngbigba tọn dọmọ: “E ko yin wiwadotana!”—Joh. 19:28-30.

7. Jọja lẹ emi, nukun tẹwẹ mì nọ yí do pọ́n yinkọ Jehovah tọn he mì tindo to ota, podọ nawẹ mì sọgan do mìde hia taidi adọgbotọ gbọn?

⁷ Nawẹ a sọgan hodo apajlẹ Jesu tọn nado nọ do adọgbigbo hia gbọn? To wehọmẹ. Jọja lẹ emi, eyin mì nọ do mìde hia taidi Kunnudetọ Jehovah tọn lẹ, etlẹ yin to whenue mọwiwà na zọ́n bọ wehọmẹvigbẹ́ mìtọn lẹ na ṣàn mì kò, enẹ nọ dohia dọ mì yin adọgbotọ. Gbọnmọ dali, mì nọ dohia dọ homẹ mìtọn hùn nado tindo yinkọ Jehovah tọn to ota. (Eks. 6:3; hia Psalm 86:12.) Mì sọgan yin kọgbidina nado kẹalọyi nuplọnmẹ nulẹ tin yededenu tọn. Ṣigba, mì tindo whẹwhinwhẹ́n nujọnu tọn lẹ nado kudeji dọ nuhe mì plọn sọn Biblu mẹ gando nudida lẹ go wẹ yin nugbo. Mì sọgan yí alọnuwe lọ Cinq questions à se poser sur l’origine de la vie zan nado na gblọndo mẹhe jlo na yọ́n “whẹwhinwhẹ́n todido he tin to mì mẹ lọ tọn” lẹ to aliho he dutomẹji mẹ. (1 Pita 3:15) To whenẹnu, homẹ mìtọn na hùn, na mì yọnẹn dọ mì yiavùnlọna nugbo Ohó Jiwheyẹwhe tọn wutu.

8. Whẹwhinwhẹ́n tẹlẹ wẹ mí tindo nado nọ dọyẹwheho po adọgbigbo po?

⁸ To lizọnyizọn mítọn mẹ. Taidi Klistiani nugbo lẹ, mí dona nọ “yí adọgbigbo do to hodọ gbọn huhlọn Jehovah tọn dali.” (Owalọ 14:3) Whẹwhinwhẹ́n tẹlẹ wẹ mí tindo nado nọ dọyẹwheho po adọgbigbo po? Mí yọnẹn dọ nuhe mí nọ dọ to yẹwhehodidọ mítọn mẹ lẹ yin nugbo, na e nọ sinai do Biblu ji wutu. (Joh. 17:17) Mí sọ kẹalọyi dọ “azọ́nwatọ hatọ Jiwheyẹwhe tọn lẹ wẹ mí yin,” podọ gbigbọ wiwe etọn to godonọna mí. (1 Kọl. 3:9; Owalọ 4:31) Mí mọnukunnujẹemẹ dọ mí nọ do mẹdezejo mítọn na Jehovah po owanyi he mí tindo na kọmẹnu mítọn lẹ po hia, dile mí to yẹwhehodọ po zohunhun po. (Mat. 22:37-39) Adọgbigbo na whàn mí ma nado gbọṣi abọẹ. Kakatimọ, mí na magbe nado hùngona lalo sinsẹ̀n lẹ tọn he ko tọ́nnukunna gbẹtọ lẹ bo glọnalina yé nado mọ nugbo. (2 Kọl. 4:4) Podọ, mí na yí linsinsinyẹn do dọyẹwheho wẹndagbe lọ tọn, mahopọnna ojlo matindo gbẹtọ lẹ tọn, mẹṣanko, po nukundiọsọmẹ po.—1 Tẹs. 2:1, 2.

9. Nawẹ mí sọgan do adọgbigbo hia to whenue mí to pipehẹ whlepọn lẹ gbọn?

⁹ To whenue mí to pipehẹ whlepọn lẹ. Jidide he mí tindo to Jiwheyẹwhe mẹ nọ zọ́n bọ mí nọ yí yise po adọgbigbo po do pehẹ whlepọn lẹ. To whenue mẹyiwanna mítọn de kú, mí nọ blawu, ṣigba mí ma nọ hẹn todido bu. Mí nọ lẹhlan “Jiwheyẹwhe homẹmimiọn lẹpo tọn” po jidide lọ po dọ e na na mí huhlọn. (2 Kọl. 1:3, 4; 1 Tẹs. 4:13) To whenue mí to azọ̀n sinsinyẹn de jẹ kavi to pipehẹ nugbajẹmẹji de, mí sọgan mọ awufiẹsa, amọ́ mí ma nọ jogbe. Mọdopolọ, mí nọ gbẹ́ nukunpedomẹgo depope he jẹagọdo nunọwhinnusẹ́n Biblu tọn lẹ dai. (Owalọ 15:28, 29) Eyin mí jẹflumẹ, “ahun mítọn sọgan gblewhẹdo mí,” ṣigba na mí dejido Jiwheyẹwhe he “sẹpọ yé he yin ayiha gbigbànọ de tọn lẹ” go wutu, mí ma nọ jogbe. *—1 Joh. 3:19, 20; Ps. 34:18.

10. Etẹwẹ wuntuntun yin, podọ nawẹ Klistiani de nọ do wuntuntun hia to hodidọ po walọ etọn po mẹ gbọn?

¹⁰ Wuntuntun tintindo wẹ nado tindo linlẹn he sọgbe, yèdọ nugopipe lọ nado yọ́n dagbe gbọnvona oylan bo basi dide to enẹgodo nado wà nuhe sọgbe. (Heb. 5:14) E yin zẹẹmẹ basina taidi “nugopipe lọ nado basi nudide he sọgbe to whẹho gbigbọmẹ tọn lẹ mẹ.” Klistiani he tindo wuntuntun nọ dọho  bo nọ yinuwa to aliho he nọ hẹn homẹ Jiwheyẹwhe tọn hùn mẹ. Klistiani mọnkọtọn ma nọ yí hogbe whánsọmẹ tọn lẹ zan, kakatimọ hogbe etọn lẹ nọ jlọ mẹdevo lẹ dote. (Howh. 11:12, 13) Ewọ nọ “whleawu nado gblehomẹ.” (Howh. 14:29) E “nọ to zọnlinzin to dodo mẹ,” bo nọ zindonukọn to nuhe sọgbe wiwà mẹ dile e to gbejizọnlin ogbẹ̀ tọn lọ zìn. (Howh. 15:21) Etẹwẹ sọgan gọalọna mí nado tindo wuntuntun? Mí dona nọ plọn Ohó Jiwheyẹwhe tọn bo nọ yí nuhe mí plọn do yizan mẹ. (Howh. 2:1-5, 10, 11) Humọ, dogbigbapọnna apajlẹ Jesu tọn na gọalọna mí, yèdọ mẹhe tindo wuntuntun hugan gbẹtọvi depope to aigba ji.

11. Nawẹ Jesu do wuntuntun hia to hodidọ etọn mẹ gbọn?

¹¹ Jesu do wuntuntun hia to hodidọ po nuyiwa etọn lẹpo po mẹ. To hodidọ etọn mẹ. E nọ yí wuntuntun zan to whenue e to yẹwheho wẹndagbe lọ tọn dọ, podọ “ohó ojọmiọn tọn” etọn lẹ nọ hẹn awuji hosetọ etọn lẹ. (Luku 4:22; Mat. 7:28) To hodidọ etọn lẹ whenu, e nọ yí Ohó Jiwheyẹwhe tọn zan gbọzangbọzan. E nọ hia ẹ, nọ yihodọ sọn e mẹ, kavi dlẹnalọdo wefọ tangan lẹ nado zinnudo nuagokun hodidọ etọn tọn ji. (Mat. 4:4, 7, 10; 12:1-5; Luku 4:16-21) Aliho he mẹ Jesu sọ nọ basi zẹẹmẹ Owe-wiwe lẹ tọn te nọ whàn ahun hosetọ etọn lẹ tọn. To whenue e to hodọ hẹ awe to devi etọn lẹ mẹ he to gbejizọnlin ji jei Emausi to fọnsọnku etọn godo, e “detana onú he gando ewọ lọsu go lẹ to Owe-wiwe lẹpo mẹ na yé.” Devi lọ lẹ dọ to godo mẹ dọmọ: “Be ahun mítọn ma yin whinwhàn sinsinyẹn dile ewọ to . . . zẹẹmẹ Owe-wiwe lẹ tọn basi na mí ya?”—Luku 24:27, 32

12, 13. Apajlẹ tẹlẹ wẹ dohia dọ Jesu nọ whleawu nado gblehomẹ bosọ tindo pọndohlan dagbe?

¹² To numọtolanmẹ po pọndohlan etọn po mẹ. Wuntuntun gọalọna Jesu nado nọ duto numọtolanmẹ etọn ji, ehe zọ́n bọ e nọ “whleawu nado gblehomẹ.” (Howh. 16:32) Ewọ yin “homẹmimiọnnọ.” (Mat. 11:29) E nọ fahomẹ hẹ devi etọn lẹ to whelẹponu mahopọnna awugbopo yetọn lẹ. (Malku 14:34-38; Luku 22:24-27) E nọ gbọṣi abọẹ etlẹ yin to whenue yè yinuwa hẹ ẹ to aliho agọ̀ mẹ.—1 Pita 2:23.

¹³ Wuntuntun sọ gọalọna Jesu nado tindo pọndohlan dagbe. E mọnukunnujẹ Osẹ́n Mose tọn mẹ to gigọ́ mẹ; e yọ́n lẹndai he wutu Osẹ́n lọ do yin awuwlena bosọ nọ yinuwa sọgbe hẹ ẹ. Di apajlẹ, lẹnnupọndo kandai he tin to Malku 5:25-34 mẹ ji. (Hia.) Nawe de he to azọ̀n hùndidi tọn jẹ dovivẹnu nado biọ gbẹtọgun de mẹ, bo doalọ awugbó Jesu tọn go bọ azọ̀n etọn gbọ. Sọgbe hẹ Osẹ́n lọ, nawe lọ yin mawé, enẹwutu e ma dona ko doalọ mẹdepope go. (Lev. 15:25-27) Ṣigba, na Jesu yọnẹn dọ “nuhe yin nujọnu hugan to Osẹ́n lọ mẹ lẹ” bẹ “lẹblanu po nugbonọ-yinyin po” hẹn wutu, ewọ ma gblewhẹdo nawe he doalọ awugbó etọn go lọ. (Mat. 23:23) Kakatimọ, e gbọn awuvẹmẹ dali dọna ẹn dọmọ: “Viyọnnu ṣie, yise towe ko hẹn we jẹgangan. Yì to jijọho mẹ, bo tindo agbasalilo sọn azọ̀n sinsinyẹn towe mẹ.” Wuntuntun wẹ whàn Jesu nado do lẹblanu mọnkọtọn hia. Lehe ehe yin apajlẹ dagbe de na mí do sọ!

14. Etẹwẹ Jesu de nado wà, podọ nawẹ e hẹn gbemima etọn go gbọn?

¹⁴ To gbẹzan etọn mẹ. Jesu do wuntuntun hia gbọn dide nado zan gbẹzan he sọgbe de dali, podọ e tẹdo nudide etọn go. E ze ede jo na azọ́n yẹwhehodidọ wẹndagbe lọ tọn bo yí gbẹzan etọn blebu zan nado wà azọ́n enẹ. (Luku 4:43) Jesu sọ hẹn gbemima etọn go gbọn nudide he na gọalọna ẹn nado na ayidonugo azọ́n lọ to gigọ́ mẹ bo dotana ẹn po kọdetọn dagbe po lẹ bibasi dali. Gbọn nuyọnẹn dali, e de nado zan gbẹzan jlẹkaji tọn, na e nido sọgan yí whenu po huhlọn etọn lẹpo po zan to lizọnyizọn lọ mẹ. (Luku 9:58) Wuntuntun zọ́n bọ e mọdọ emi dona plọnazọ́n mẹdevo lẹ na yé nido zindonukọn to azọ́n lọ mẹ to okú etọn godo. (Luku 10:1-12; Joh. 14:12) E dopà na hodotọ etọn lẹ dọ emi na tin po yé po to azọ́n lọ mẹ “kakajẹ vivọnu titonu lọ tọn.”—Mat. 28:19, 20.

15. Nawẹ mí sọgan do wuntuntun hia to hodidọ mítọn mẹ gbọn?

¹⁵ Lẹnnupọndo aliho devo he mẹ mí sọgan hodo apajlẹ Jesu tọn te ji. To hodidọ mítọn mẹ. To whenue mí to hodọdopọ hẹ yisenọ hatọ mítọn lẹ, mí nọ yí hogbe he nọ jlọmẹdote lẹ zan kakati nido yin dehe nọ hẹnmẹ gbọjọ lẹ. (Efe. 4:29) To whenue mí to hodọna mẹdevo lẹ gando Ahọluduta Jiwheyẹwhe tọn go, mí nọ dike ‘ojẹ̀ ni pé’ hogbe mítọn lẹ. (Kọl. 4:6) Mí nọ tẹnpọn nado tunwun nuhudo po ahunmẹdunamẹnu whétọ lẹ tọn po go, podọ enẹgodo mí nọ de hogbe he sọgbe hẹ ninọmẹ yetọn lẹ. Mí nọ flindọ ohó he gọ́ na ojọmiọn lẹ sọgan yinuwado gbẹtọ lẹ ji bo jẹ ahun yetọn mẹ. Humọ, to whenue mí to zẹẹmẹ basi do nuyise mítọn lẹ ji, mí nọ tẹnpọn nado yí Biblu zan kakati nado dọ linlẹn mítọn titi lẹ. Enẹ wẹ zọ́n bọ mí nọ donù e go taidi kandai dejidego de bo nọ hia ẹ na gbẹtọ lẹ to whedepopenu he e yọnbasi. Mí yọnẹn dọ owẹ̀n Biblu tọn tindo huhlọn taun hugan nudepope he mílọsu sọgan dọ sọn linlẹn mítọn titi mẹ.—Heb. 4:12.

16, 17. (a) Nawẹ mí sọgan dohia dọ mí nọ whleawu nado gblehomẹ bosọ yin lẹnpọn dagbenọ gbọn? (b) Etẹwẹ mí sọgan wà nado na ayidonugo lizọnyizọn mítọn to gigọ́ mẹ?

¹⁶ To numọtolanmẹ po pọndohlan mítọn po mẹ. Wuntuntun nọ gọalọna mí nado duto numọtolanmẹ mítọn lẹ ji bo nọ zọ́n bọ mí nọ “whleawu nado gblehomẹ.” (Jak. 1:19) To whenue mẹdevo lẹ ṣinuwa do mí, mí nọ tẹnpọn nado mọnukunnujẹ nuhewutu yé do dọho kavi yinuwa to aliho mọnkọtọn mẹ. Nukunnumọjẹnumẹ mọnkọtọn sọgan zọ́n bọ mí na duto homẹgble ji bo nasọ gọalọna mí nado nọ “dekọ sọn ylanwa go.” (Howh. 19:11) Wuntuntun sọ nọ gọalọna mí nado yin lẹnpọn dagbenọ. Gbọnmọ dali, mí nọ tẹnpọn ma nado donukun onú susu sọn yisenọ hatọ mítọn lẹ si, bo nọ flindọ yé sọgan to pipehẹ nuhahun delẹ he mí ma mọnukunnujẹemẹ to gigọ́ mẹ. Mí nọ desọn ojlo mẹ nado dotoaina linlẹn yetọn, podọ eyin e sọgbe, mí nọ yinuwa to kọndopọ mẹ hẹ nuhe yé dọ.—Flp. 4:5.

¹⁷ To gbẹzan mítọn mẹ. Taidi hodotọ Jesu tọn lẹ, mí yọnẹn dọ lẹblanulọkẹyi daho hugan he mí tindo wẹ nado tindo mahẹ to azọ́n yẹwhehodidọ wẹndagbe tọn lọ mẹ. Mí nọ zindonukọn to azọ́n lọ mẹ gbọn nudide he na gọalọna mí nado na ayidonugo lizọnyizọn mítọn to gigọ́ mẹ lẹ bibasi dali. Mí nọ basi nudide nado ze onú gbigbọmẹ tọn lẹ do otẹn tintan mẹ bo nọ zan gbẹzan jlẹkaji tọn na mí nido sọgan ze míde jo na azọ́n yẹwhehodidọ tọn lọ, yèdọ azọ́n titengbe hugan he mí dona wà whẹpo opodo lọ nido wá.—Mat. 6:33; 24:14.

18. Nawẹ mí sọgan gbọṣi aliho whlẹngán tọn lọ ji gbọn, podọ etẹwẹ yin gbemima towe?

¹⁸ Be homẹ mítọn ma hùn nado gbadopọnna delẹ to jẹhẹnu ayidego tọn Jesu tọn lẹ mẹ ya? Todin, yí nukun homẹ tọn do pọ́n ale he mí na mọyi eyin mí plọnnu gando jẹhẹnu etọn devo lẹ go, bo plọn lehe mí sọgan hodo apajlẹ etọn lẹ do. Enẹwutu, mì gbọ mí ni magbe nado hodo afọdòmẹ etọn lẹ pẹkipẹki. Gbọnmọ dali, mí na gbọṣi aliho whlẹngán tọn lọ ji bo na dọnsẹpọ Jehovah, yèdọ apajlẹ Mẹhe tọn Jesu hodo to pipé mẹ.