1, 2. (a) Edena dala ai mauri hanaihanai ita abia diba? (b) Dahaka ese ita ia durua mauri hanaihanai ena dala ai ita raka noho totona?

KERISO ena hahediba taudia ai ita lao neganai, ita be laolao ta ita hamatamaia bamona. Bona unai laolao ena dokonai be mauri hanaihanai guba ai o tanobada ai. Iesu ia gwau: “To ia haheauka ela bona dokona tauna [ela bona ia mase o ela bona inai tanobada dokona] be do ia mauri.” (Mat. 24:13) Oibe, bema iseda mauri lalonai Dirava ita badinaia noho, mauri hanaihanai do ita abia. To, mauri hanaihanai dalanai ita raka noho totona, gau ta ese iseda dala ia koua lasi be namo. (1 Ioa. 2:15-17) Dahaka ese ita ia durua mauri hanaihanai ena dala ai ita raka noho totona?

² Iesu ese ita dekenai haheitalai namona ia hahedinaraia. Iena laolao be Baibel ese ia sivarailaia. Unai ita stadilaia neganai, Iesu ena kara ita dibaia diba. Ia do ita lalokau bona abidadama henia. (1 Petero 1:8, 9 duahia.) Aposetolo Petero ia gwau Iesu be haheitalai namona ita dekenai, unai amo ena aena gabudia ai do ita raka namonamo. (1 Pet. 2:21) Bema unai ita karaia eda “davana  namona,” mauri hanaihanai unai, do ita abia. * Vanegai stadi ai ita ese Iesu ena manau bona hebogahisi karana ita tohotohoa dalana ita herevalaia. Hari ita ese ena gari lasi bona laloa kehoa karana ita tohotohoa dalana do ita herevalaia.

3. Gari lasi karana ena anina be dahaka, bona dahaka ita karaia ita gari lasi totona?

³ Gari lasi karana dainai goada ita abia bona hekwakwanai ita haheaukalaia. Gari lasi tauna be “ena inai taudia edia hahetoho karadia ia haheaukalaia,” “kara maorona ia badinaia noho,” bona “mai abidadama ida ena hisihisi ia hanaia.” Ena anina ma ta be Dirava gari henia, helaro, bona lalokau. Edena dala ai unai ita diba? Dirava gari henia karana ese ita ia durua taunimanima ita gari henidia lasi totona. (1 Sam. 11:7; Aon. 29:25) Helaro korikorina ese ita ia durua hari ita davaria hahetoho ita laloa lasi, to vaira negana ita laloa bada. (Sal. 27:14) Sibona ena ura dadaraia lalokau karana ese ita ia durua mai gari lasi ida dagedage karadia ita haheaukalaia. (Ioa. 15:13) Ita gari lasi totona Dirava ita abidadama henia bona ena Natuna ena aena gabudiai ita raka be namo.—Sal. 28:7.

4. Iesu be Dubu helaga lalonai “hadibaia taudia huanai ia helai” neganai, edena dala ai gari lasi karana ia hahedinaraia? (Laulau ginigunana itaia.)

⁴ Iesu ena mauri lagani be 12 neganai, mai gari lasi ida kara maoromaoro ia badinaia. ‘Dubu helaga lalonai hadibaia taudia huanai ia helai’ neganai, ia vara gauna mani oi laloa. (Luka 2:41-47 duahia.) Unai hadibaia taudia be Mose ena Taravatu sibona lasi, to Iuda taudia edia kastom karadia idia diba. To Iesu be mai gari lasi ida “idia dekenai henanadai” ia henia. Oibe, Iesu be mero maragi ese idia henia henanadai ia henia lasi. Mani oi laloa Iesu ese ia henia henanadai ese unai hadibaia taudia edia lalona ia veria bona idia ura iena hereva idia kamonai. Bona unai hadibaia taudia be Iesu koia totona hepapahuahu idia havaraia henanadaidia idia henia neganai, idia kwalimu lasi. Iena hereva idia kamonaia taudia, unai hadibaia taudia danu, be “iena laloparara karana bona haere dekenai idia hoa.” Iesu ese ena hereva amo Baibel ena hereva momokani ia gimaia!

5. Haroro gaukara ai Iesu be edena dala idauidau ai gari lasi karana ia hahedinaraia?

⁵ Haroro gaukara ai Iesu be dala idauidau ai gari lasi karana ia hahedinaraia. Mai gari lasi ida tomadiho gunalaia taudia ese edia hahediba koikoi amo taunimanima idia hakaua kerere dalana ia hahedinaraia. (Mat. 23:13-36) Tanobada ena lalona veria karadia ia dadaraia. (Ioa. 16:33) Ena be ena inai taudia ese ia idia dagedage henia, to haroro gaukara ia hadokoa lasi. (Ioa. 5:15-18; 7:14) Nega rua mai gari lasi ida dubu lalonai tomadiho karana idia hadikaia taudia ia luludia.—Mat. 21:12, 13; Ioa. 2:14-17.

6. Edena dala ai Iesu ese ena tanobada maurina ena dina ginigabena ai gari lasi karana ia hahedinaraia?

⁶ Iesu ese mai gari lasi ida hisihisi ia haheaukalaia dalana ita badinaia neganai, iseda abidadama ia hagoadaia. Ena tanobada maurina ena dina ginigabena ai gari lasi karana ia hahedinaraia dalana mani oi laloa. Iesu ia diba iena mase dalana idia karaia murinai dahaka do ia vara. To, Pasova aria murinai, Iesu ese Iuda ia hamaoroa: “Oi ura karaia gauna oi karaia haraga” (Ioa. 13:21-27) Getesemane umana ai Iesu be mai gari lasi ida ia do idia guia tuari taudia dekenai sibona ia henia. Ena be do ia mase, to mai gari lasi ida ena hadibaia taudia ia gimaia. (Ioa. 18:1-8) Sanhedrin ai ia idia kota henia neganai, mai gari lasi ida ia hereva hedinarai  ia be Keriso bona Dirava ena Natuna, herevana hahelaga tauna badana be dala ia tahua ia do idia hamasea totona. (Mar. 14:60-65) Iesu be Dirava ia badinaia ela bona au ta dekenai ia mase. Iesu be ia mase gwauraia neganai, ia boiboi ia gwau: “Ia ore vadaeni!”—Ioa. 19:28-30.

7. Matamata taudia e, Iehova ena ladana umui abia dainai emui hemami be edena bamona, bona edena dala ai gari lasi karana oi hahedinaraia?

⁷ Edena dala ai Iesu ena gari lasi karana ita tohotohoa diba? Sikuli ai. Umui matamata taudia be gari lasi karana umui hahedinaraia, badina emui klas turadia o ma haida vairanai umui hahedinaraia umui be Iehova ena Witnes Taudia, herevana umui idia hevasehalaia. Unai umui karaia ese ia hahedinaraia umui moale Iehova ena ladana umui abia. (Salamo 86:12 duahia.) Reana haida ese umui idia doria evolusen lalohadaina umui abia dae totona. To, badina namodia haida dainai Baibel ese havaraia gaudia ia herevalaia karana umui abia dae. Buklet ladana, The Origin of Life—Five Questions Worth Asking umui gaukaralaia diba, “emui helaro” ena badina idia ura diba taudia umui haere henia totona. (1 Pet. 3:15) Baibel ena hereva momokani umui gimaia dainai, moale korikorina do umui abia.

8. Dahaka badina haida dainai mai gari lasi ida do ita haroro?

⁸ Iseda haroro gaukara ai. Namona be ita Keristani taudia momokanidia be ‘Iehova ena siahu amo mai gari lasi ida ita hereva’ (Kara 14:3) Dahaka badina haida dainai mai gari lasi ida do ita haroro? Ita diba ita harorolaia herevadia be momokani, badina idia be Baibel ena hereva. (Ioa. 17:17) Ita diba ita be “Dirava ida [ita] gaukara hebou taudia” bona lauma helaga ese ita ia durua. (1 Kor. 3:9; Kara 4:31) Ita laloparara eda haroro goadagoada karana ese ia hahedinaraia ita be Iehova ita badinaia bona iseda dekena taudia ita lalokau henia. (Mat. 22:37-39) Gari lasi karana ese ita ia doria ita haroro noho totona. Danu, ita ura tomadiho koikoi ese edia lalona idia hadiburaia taudia dekenai hereva momokani ita hahedinaraia. (2 Kor. 4:4) Bona ena be haida idia kamonai lasi, ita idia dagedage henia, o ita idia koua, to namona be sivarai namona harorolaia gaukarana ita hadokoa lasi.—1 Tes. 2:1, 2.

9. Hisihisi ita davaria neganai edena dala ia gari lasi karana ita hahedinaraia diba?

⁹ Hisihisi ita davaria neganai.Dirava abidadama henia karana ese ita ia durua mai gari lasi ida hekwakwanai ita haheaukalaia. Ena be iseda lalokau taudia idia mase neganai ita taitai, to toreisi lou helarona ita laloaboio lasi. Ita abia dae momokani “lalogoada ibounai ia henia Diravana” ese ita dekenai goada do ia henia. (2 Kor. 1:3, 4; 1 Tes. 4:13) Ena be gorere o aksiden badana ta ita davaria neganai hisihisi bada ita abia, to ita ura lasi Baibel ese ia taravatua karadia ita karaia. (Kara 15:28, 29) Ena be ita lalometau neganai “iseda kudouna ese ita idia kota henia,” to ita haheauka badina Dirava ita abidadama henia, badina “lalohisihisi taudia kahirakahira ia noho.” *—1 Ioa. 3:19, 20; Sal. 34:18.

10. Laloa kehoa karana ena anina be dahaka, bona edena dala ai laloa kehoa Keristani tauna ese ena hereva bona kara amo Dirava ia hamoalea?

¹⁰ Laloa kehoa tauna be ia laloa maoromaoro, bona dahaka be maoro bona dahaka be kerere ia diba bena dala maorona ia abia hidi. (Heb. 5:14) Diksenari ta ia gwau unai bamona tauna “ena hetura karana Dirava ida be ia namo bona abia hidi maorodia ia  karaia diba.” Laloa kehoa Keristani tauna be ena hereva bona kara amo Dirava ia hamoalea. Ia ese ma haida durua herevadia sibona ia gwauraia. (Aon. 11:12, 13) “Ia badu haraga” lasi. (Aon. 14:29) Mauri ia lao henia dalana dekenai ia “raka maoromaoro.” (Aon. 15:21, BHḡ ) Edena dala amo laloa kehoa karana ita abia diba? Namona be Dirava ena hereva ita stadilaia bona ita dibaia gaudia ita badinaia. (Aon. 2:1-5, 10, 11) Iesu sibona be laloa kehoa tauna hereadaena, unai dainai namona be iena haheitalai ita tohotohoa.

11. Edena dala ai Iesu ese ena hereva amo laloa kehoa karana ia hahedinaraia?

¹¹ Iesu be ena hereva bona kara amo laloa kehoa karana ia hahedinaraia. Iena hereva. Sivarai namona ia harorolaia neganai, laloa maoromaoro karana ia hahedinaraia, ia ese “hereva namodia” ia gaukaralaia dainai ia idia kamonai henia taudia idia hoa. (Luka 4:22; Mat. 7:28) Nega momo ia ese Baibel ia gaukaralaia—Baibel ena siri ia duahia, ia herevalaia sibona, o siri ta ia gwauraia ena hereva ena point badana ia hahedinaraia totona. (Mat. 4:4, 7, 10; 12:1-5; Luka 4:16-21) Danu, Iesu be kamonai taudia edia kudouna ia hamarerea dalanai Baibel ena siri edia anina ia herevalaia. Ia toreisi lou murinai, Emausa ai ena hahediba taudia rua ida ia herevahereva, unai neganai ia ese “Toretore Helagadia lalonai idia torea hereva edia anina be idia dekenai ia gwauraia.” Unai murinai, hahediba taudia be ta ta dekenai idia gwau: “Toretore Helagadia edia anina ia herevalaia goevagoeva neganai, iseda kudouna ia hamarerea momokani, ani?”—Luka 24:27, 32.

12, 13. Edena haheitalai ese ia hahedinaraia Iesu be ia badu haraga lasi bona ia laloa maoromaoro?

¹² Iena hemami bona kara. Laloa kehoa karana ese Iesu ia durua ena hemami ia biagua bona ia “badu haraga lasi” totona. (Aon. 16:32, BHḡ) Ia be “manau” tauna. (Mat. 11:29) Ena be ena hahediba taudia be nega momo idia kerere, to Iesu be idia dekenai ia haheauka. (Mar. 14:34-38; Luka 22:24-27) Danu ena be dagedage ia davaria, to ia haheauka.—1 Pet. 2:23.

¹³ Danu laloa kehoa karana ese Iesu ia durua lalohadai maorona ia abia totona. Ia ese Mose ena Taravatu ia lalopararalaia; unai Taravatu hegeregerena taunimanima ia kara henia. Hegeregere mani Mareko 5:25-34 ai ia noho sivaraina oi laloa. (Duahia.) Rara halusia gorerena ia abia hahine ta be taunimanima huana amo Iesu ena murinai ia lao bona ena dabua ia dogoatao, bena ena gorere ia ore. Taravatu henunai unai hahine be ia miro dainai ia ese ma ta ia dogoatao be maoro lasi. (Lev. 15:25-27) To Iesu be “taravatu ena hereva badadia” hegeregere, “bogahisihisi, bona abidadama” karana ia diba, unai dainai unai hahine ia gwau henia lasi. (Mat. 23:23) To, mai hebogahisi ida ia gwau: “Natugu e, emu abidadama ese oi ia hanamoa vadaeni. Mai maino ida oi lao bona inai gorere dikana ese oi do ia hahisia lou lasi.” Iesu ena laloa kehoa karana ese ia doria hebogahisi karana ia hahedinaraia totona. Unai be haheitalai namona!

14. Iesu be dahaka abia hidi ia karaia, bona edena dala ai unai ia badinaia?

¹⁴ Iena mauri dalana. Iesu be laloa kehoa karana ia hahedinaraia badina dala maorona ia abia hidi bona ia badinaia. Ia ese sivarai namona harorolaia gaukarana ia goadalaia. (Luka 4:43) Danu, ia karaia abia hidi ese ia durua haroro gaukara ia laloa bada bona ia hagugurua totona. Abia hidi ia karaia moni o kohu momo lasi maurina ia noholaia, unai amo ena goada bona nega bada do ia gaukaralaia haroro gaukara totona. (Luka 9:58) Ia diba ma haida ia treinini henia be namo, unai amo ia mase neganai unai gaukara do idia karaia noho. (Luka 10:1-12; Ioa. 14:12) Ena murinai idia raka taudia  ia gwauhamata henidia, ia be idia ida do ia noho “ela bona inai nega oromana ena dokona.”—Mat. 28:19, 20.

15. Edena dala ai iseda hereva amo laloa kehoa karana ita hahedinaraia?

¹⁵ Iesu ita tohotohoa dalana ma ta mani oi laloa. Iseda hereva. Tadikaka taihu ida ita herevahereva neganai, hagoadaia herevadia ita gaukaralaia, to hadikaia herevadia lasi. (Efe. 4:29) Ma haida dekenai Dirava ena Basileia ita herevalaia neganai, namona be iseda hereva be “damena” bamona. (Kol. 4:6) Ruma tauna ena ura bona ia laloa bada gaudia ita laloa namonamo guna, bena unai hegeregerena hereva ita abia hidi. Ita diba hereva namodia ita gwauraia neganai, ma haida ese eda hereva do idia kamonai bona edia kudouna do ia hamarerea. Danu, ita abia dae gaudia be ma haida dekenai ita herevalaia neganai, Baibel ita gaukaralaia. Ita hahedinaraia Baibel be mai ena siahu bona ita ura nega ibounai do ita duahia. Ita laloparara Baibel ena hereva ena siahu ese ita gwauraia herevadia ia hereaia.—Heb. 4:12.

16, 17. (a) Edena dala ai ita hahedinaraia ita badu haraga lasi bona ita laloa maoromaoro? (b) Dahaka ita karaia haroro gaukara ita laloa bada totona?

¹⁶ Iseda hemami bona kara. Laloa kehoa karana ese ita ia durua eda hemami ita biagua, unai amo ita “badu haraga lasi.” (Iam. 1:19) Haida ese ita idia habadua neganai, ita ura edia hereva o kara ena badina ita diba. Unai ese ita do ia durua ita badu lasi bona edia dika ita “laloaboio.” (Aon. 19:11) Danu, laloa kehoa karana ese ita ia durua ita laloa maoromaoro totona. Ita laloatao tadikaka taihu be goevadae lasi taudia danu, bona reana idia davaria hekwakwanai ita lalopararalaidia lasi. Ita ura edia lalohadai do ita kamonai bona bema hegeregere edia lalohadai ita abia dae.—Fili. 4:5.

¹⁷ Iseda mauri dalana. Ita be Iesu ena murinai ita raka taudia dainai, ita diba sivarai namona ita harorolaia be hahenamo badana. Unai dainai ita ura ita karaia abia hidi ese ita idia durua haroro gaukara ita laloa bada totona. Ita ese Dirava tomadiho henia karadia ita atoa guna. Bona kohu bona moni momo lasi maurina ita noholaia, unai amo mai eda lalona ibounai ida haroro gaukara ita karaia, gabeai nega dokona ia ginidae.—Mat. 6:33; 24:14.

18. Dahaka ita karaia diba mauri hanaihanai ena dala dekenai ita raka noho totona?

¹⁸ Ita moale badina Iesu ena kara namodia haida ita herevalaia. Laloatao, iena kara ma haida ita stadilaia bona ia ita tohotohoa daladia ita diba neganai, namo bada do ita davaria. Unai dainai, namona be iseda lalona ita hadaia Iesu ena aena gabudia ai ita raka totona. Unai ita karaia neganai, mauri hanaihanai ia lao dalana dekenai do ita raka noho bona Iesu ese ia tohotohoa Tauna, Iehova, kahirakahira do ita lao.