1, 2. (1) Ta eo jej aikuj kõm̦m̦ane bwe jen maroñ bõk mour indeeo? (2) Ta eo emaroñ jipañ kõj bwe jen pãdwõt ilo ial̦ eo ad im jab m̦ad?

 ÑE JEJ erom Kũrjin, ej ãinwõt ñe jej jino etetal ilo juon ial̦. Im ñe jej tiljek wõt ñan Anij, ial̦ in jej etal iel̦o̦k enaaj tõll̦o̦k kõj bwe jen bõk mour indeeo. Jijej ear ba: “Eo enaaj kijenmej ñan jem̦l̦o̦kin, e in enaaj mour.” (Matu 24:13) Men in ej kaalikkar bwe ñan ad maroñ bõk mour indeeo, jej aikuj tiljek wõt ñan Anij “ñan jem̦l̦o̦kin.” Jenaaj aikuj tiljek wõt ñane m̦ae iien jemej ak m̦ae iien ejem̦l̦o̦k jukjukun pãd in enana. Kõn men in, elukkuun aorõk bwe jen jab m̦ad kõn men ko ilo jukjukun pãd in. (1 Jon 2:15-17) Ta eo emaroñ jipañ kõj bwe jen pãdwõt ilo ial̦ in ad im jab m̦ad?

² Jijej ear likũt juon joñak elukkuun em̦m̦an ñan kõj. Ñe jenãj katak men ko Baibõl̦ ej ba kõn ial̦ eo an Jijej ak wãween an kar mour, men in enaaj jipañ kõj ñan jel̦ã kain armej rot kar e. Im men in enaaj kõm̦m̦an bwe jen yokwe e im tõmak ilo e. (Riit 1 Piter 1:8, 9, UBS.) Rijjilõk Piter ear ba bwe Jijej ear likũt juon joñak ñan kõj bwe jen l̦oore. (1 Piter 2:21) Im ñe jenaaj lukkuun kate kõj ñan anõke joñak  eo an Jijej, jenaaj maroñ kijenmej ñan jem̦l̦o̦kin. * (Lale kõmel̦el̦e eo itulal̦.) Ilo katak eo m̦oktal̦o̦k, jaar katak kõn wãween ad maroñ anõke joñak eo an Jijej kõn ettã bõro im tũriam̦o. Ilo katak in, jenaaj katak kõn wãween ad maroñ anõke joñak eo an Jijej kõn peran im lol̦o̦kjen̦.

3. Ta in peran, im ewi wãween bwe en wõr peran ippãd?

³ Peran ej juon eñjake ippãd me ej kakajoor im jipañ kõj ñan kijenmej ilo men ko reppen jej iiooni. Peran emaroñ bar jipañ kõj bwe jen jojomare men ko rejim̦we. Emaroñ jipañ kõj ñan ineem̦m̦an im tiljek wõt ñan Anij ilo iien ko jej iioon apañ ak wãween ko reppen. Peran ej ekkejell̦o̦k ippãn mijak, kõjatdikdik, im yokwe. Ewi wãween? Ñe jej mijak in kõm̦m̦ani men ko rejjab kabuñbũruon Anij, men in enaaj jipañ kõj bwe jen jab mijak armej. (1 Samuel 11:7, UBS; Jabõn Kõnnaan 29:25) Ñe jej likũt ad kõjatdikdik ilo Jeova, jeban l̦õmn̦ak kõn apañ ko jej iiooni, ak jenaaj l̦õmn̦ak wõt kõn ilju im jekl̦aj eo ad. (Sam 62:5, UBS) Im ñe ewõr yokwe ippãd im jejjab l̦õmn̦ak kõn kõj make, jenaaj kwal̦o̦k wõt peran meñe armej ro rej jum̦aik kõj. (Jon 15:13) Peran ej itok jãn ad lõke Anij im anõke joñak eo an Nejin.​—Sam 28:7.

4. Ke Jijej ear pãd ilo tampel̦ eo, ewi wãween an kar kwal̦o̦k peran? (Lale pija eo ilo jinoin katak in.)

⁴ Ke ear 12 an Jijej iiõ, ear kwal̦o̦k an peran ke ear pãd ilo tampel̦ eo “ippãn rũkaki ro an RiJu ro.” (Riit Luk 2:41-47, UBS.) Rũkaki in kabuñ rein rar lukkuun jel̦ã kõn Kien Moses, im rar bar jel̦ã kõn m̦anit im imminene ko an RiJu ro. M̦anit im imminene kein aer rar kõm̦m̦an bwe en lukkuun pen ñan pokake kien ko. Bõtab, Jijej ear jab mijak rein im kõtl̦o̦k bwe jel̦ã eo aer en kabõjrake jãn an kwal̦o̦k naan ñan er. Ak ear wõnm̦aanl̦o̦k wõt im “kajitũkin” rein kõn elõñ kajjitõk ko. Jejel̦ã bwe Jijej ear jab kwal̦o̦k kajjitõk ko me ekkã an ajri ro kwal̦o̦ki. Jemaroñ pijaikl̦o̦k an kwal̦o̦k kajjitõk ko reppen im m̦wilal̦ me rar kõm̦m̦an an rũkaki rein lukkuun roñjake im kõl̦mãnl̦o̦kjen̦. El̦aññe rar kajjioñ m̦on̦e Jijej kõn kajjitõk ko me ekkã an armej ro akwããl kaki, jejel̦ã kadede bwe rar jab lo tõprak. Aolep ro rar roñjake, ekoba rũkaki ro, rar lukkuun bwilõñ kõn “uwaak ko an rekapeel” im an mãlõtlõt. Ealikkar bwe Jijej ear peran ilo an jojomare katak ko rem̦ool me rej pãd ilo Naanin Anij!

5. Ewi wãween an kar Jijej kwal̦o̦k peran ke ear kõm̦m̦ane jerbalin kwal̦o̦k naan eo an?

⁵ Ke Jijej ear kõm̦m̦ane jerbalin kwal̦o̦k naan eo an, ear kwal̦o̦k peran ilo elõñ wãween ko. Ñan waanjoñak, ear peran in kwal̦o̦k ñan armej ro bwe rũtõl in kabuñ ro aer rar m̦on̦e er kõn katak ko aer reriab. (Matu 23:13-36) Bareinwõt, Jijej ear peran kõnke ear lukkuun kate bwe en jab po ilo menin kapo ko ilo lal̦ in. (Jon 16:33, UBS) Ear kwal̦o̦k naan wõt meñe ear iioon jum̦ae. (Jon 5:15-18; 7:14) Im ruo alen an kar karreoik tampel̦ eo ilo an peran in kadiwõjl̦o̦k armej ro rar kõm̦m̦ani men ko rejjab jim̦we.​—Matu 21:12, 13, UBS; Jon 2:14-17, UBS.

6. Ewi wãween an kar Jijej kwal̦o̦k peran ilo raan eo ãliktata ke ear mour ilo lal̦ in?

⁶ Jen lale joñak eo an Jijej kõn peran ilo raan eo ãliktata ke ear mour ilo lal̦ in. Jijej ear jel̦ã ta eo enaaj kar wal̦o̦k ñe Judas enaaj liaakel̦o̦k. Meñe ãindein, ak ke rar kõm̦m̦ane Kwõjkwõj in Kijoone eo, Jijej ear ba ñan Judas im ba: “Kwõn m̦õkaj im kõm̦m̦ane men eo kwõj ilen kõm̦m̦ane.” (Jon 13:21-27, UBS) Innem, ke Jijej im rũkal̦oor ro an rar pãd ilo jikin kallib in Getsemane, ear peran in kwal̦o̦k e make ñan rũttarin̦ae ro me rar pukote bwe ren bõke. Meñe mour eo an Jijej ear pãd ilo kauwõtata, ak ear kõjparok rũkal̦oor ro an. Ear ba ñan rũttarin̦ae ro bwe ren  ‘kõtl̦o̦k er bwe ren ilo̦k.’ (Jon 18:1-8) Tokãlik, ke kar kajitũkini ilo im̦õn ekajet eo el̦ap an RiJu ro, Jijej ear peran in kwal̦o̦k bwe e Messaia eo im Nejin Anij. Ear jab mijak in ba men in, meñe ear jel̦ã bwe bũrij eo el̦ap ear kõn̦aan kappok ruõn bwe ren m̦ane. (Mark 14:60-65, UBS) Jijej ear tiljek wõt ñan Anij im ear mej ioon al̦al̦ in eñtaan eo. Ke ear bõk kũtuon bwe en mej, ear lam̦õj im ba: “Em̦õj!”​—Jon 19:28-30.

7. (1) Jo̦dikdik ro, ta l̦õmn̦ak ko ami ke kom̦ij Ri Kõnnaan ro an Jeova? (2) Im ta ko kom̦ maroñ kõm̦m̦ani ñan kwal̦o̦k peran?

⁷ Ewi wãween ad maroñ anõke joñak eo an Jijej kõn peran? Ilo jikin jikuul̦. Jo̦dikdik ro, kom̦ij kwal̦o̦k peran ñe kom̦ij ba ñan rijikuul̦ ro im ro jet bwe kom̦ij Ri Kõnnaan ro an Jeova. Ilo ami ba men in ñan er, ej kaalikkar ami m̦õn̦õn̦õ in jutak kõn etan Jeova, jekdo̦o̦n ñe ro jet rej kajjirere kake kom̦. (Riit Sam 86:12.) Jet remaroñ kõn̦aan bwe kom̦win tõmak ilo katak eo bwe aolep men rar jide im wal̦o̦k (evolution). Bõtab, keememej wõt bwe em̦ool aolep men ko Baibõl̦ ej ba kõn menin kõm̦anm̦an ko. Kom̦ maroñ kõjerbal bok ko ad me rej kwal̦o̦k kõn menin kõm̦anm̦an ko ñan uwaake ro rekõn̦aan jel̦ã kõn “unin kõjatdikdik eo” ad. (1 Piter 3:15) Ilo ami kõm̦m̦ane men in, enaaj em̦m̦an ami mour kõnke kom̦ jel̦ã bwe kom̦ij peran ilo ami jojomare katak ko rem̦ool jãn Baibõl̦!

8. Ta ko rej kõm̦m̦an bwe jen peran in kwal̦o̦k naan?

⁸ Ilo ad kwal̦o̦k naan. Kõnke jej Kũrjin ro rem̦ool, jej aikuj wõnm̦aanl̦o̦k wõt im peran ilo ad kwal̦o̦k naan kõn Jeova. (Jerbal 14:3) Etke jemaroñ kwal̦o̦k naan ilo peran? M̦oktata, jejel̦ã bwe men ko jej kwal̦o̦k naan kaki rem̦ool kõnke rej pedped ilo Baibõl̦. (Jon 17:17) Kein karuo, jej “rijerbal ippãn Anij,” im ej letok kajoor eo an ñan jipañ kõj. (1 Korint 3:9; Jerbal 4:31) Kein kajilu, yokwe eo ad ñan Jeova im armej ro ej kõm̦akũt kõj bwe jen kate kõj joñan wõt ad maroñ ñan kwal̦o̦k kõn ennaan eo em̦m̦an ñan armej ro. (Matu 22:37-39) Kõn ad peran, jeban bõjrak in kwal̦o̦k naan. Jej lukkuun kate kõj ñan kwal̦o̦k kõn m̦ool eo ñan armej ro me ‘repilo’ ilo kõkkar, ak em̦õj an rũkaki in kabuñ ro m̦on̦e er. (2 Korint 4:4) Bareinwõt, jenaaj wõnm̦aanl̦o̦k wõt im kwal̦o̦k naan kõn ennaan eo em̦m̦an meñe ro jet rejjab kõn̦aan roñjake ak rej jum̦ae im matõrtõre kõj.​—1 Tessalonika 2:1, 2.

9. Ewi wãween ad kwal̦o̦k peran ñe jej iioon apañ im wãween ko reppen?

⁹ Ñe jej iioon apañ im wãween ko reppen. Ñe jej lõke Anij, enaaj letok tõmak im peran eo jej aikuji ñan kijenmej ilo wãween ko reppen jej iiooni. Ñe emej juon eo ejitõnbõro ippãd, jej bũrom̦õj bõtab ejjab jako ad kõjatdikdik. Jej lõke “Anij in aenõm̦m̦an otemjej” bwe enaaj jipañ im kakajoor kõj. (2 Korint 1:3, 4; 1 Tessalonika 4:13) Ñe jenañinmej ak ewal̦o̦k juon jorrããn ñan kõj, jemaroñ metak im eñtaan. Bõtab, jej kõjparok kõj jãn jabdewõt kein taktõ ak kilen kõm̦adm̦õd ko me renaaj kõm̦m̦an an Anij jab buñbũruon ippãd. (Jerbal 15:28, 29) Ñe jej bũrom̦õj, “bũruod ej liaakl̦o̦k kõj,” bõtab jejjab ebbeer. Jej lõke wõt Jeova, eo “ej epaak ñan ro erup bũrueer.” * (Lale kõmel̦el̦e eo itulal̦.)​—1 Jon 3:19, 20; Sam 34:18.

10. (1) Ta in lol̦o̦kjen̦? (2) Ewi wãween an juon Kũrjin eo elol̦o̦kjen̦ kõnnaan im kõm̦m̦an?

¹⁰ Lol̦o̦kjen̦ ej maroñ eo ippãd ñan jel̦ã oktak eo ikõtaan men ko rem̦m̦an im men ko renana. Im ejjab baj ñan jel̦ã wõt, ak ebar kitibuj ad kããlõt ñan kõm̦m̦ani men ko rem̦m̦an. (Hibru 5:14) Juon Kũrjin eo elol̦o̦kjen̦ ej kõm̦m̦ani pepe ko me rej kõm̦m̦an bwe en epaakl̦o̦k jem̦jerã eo an ippãn Anij. Ej lukkuun kõjparok bwe en jab kõmetak  ro jet kõn wãween an kõnnaan. Ej kam̦õn̦õn̦õik bũruon Jeova kõnke ej kõjerbal naan ko me rej jipañ im kakajoor ro jet. (Jabõn Kõnnaan 11:12, 13, UBS) Ej bar juon eo me “erum̦wij an illu.” (Jabõn Kõnnaan 14:29) Bareinwõt, ej “kajim̦we an etetal.” Mel̦el̦ein bwe ej kõm̦m̦ani pepe ko rejim̦we ilo mour eo an. (Jabõn Kõnnaan 15:21) Ta eo emaroñ jipañ kõj bwe jen lol̦o̦kjen̦? Jej aikuj katak Naanin Anij im l̦oori men ko jej katak kaki. (Jabõn Kõnnaan 2:1-5, 10, 11) Jemaroñ bareinwõt katak im anõke joñak eo em̦m̦an an Jijej kõn lol̦o̦kjen̦.

11. Ewi wãween an kar Jijej kwal̦o̦k lol̦o̦kjen̦ ilo wãween an kõnnaan?

¹¹ Jijej ear kwal̦o̦k lol̦o̦kjen̦ ilo wãween an kõnnaan im kõm̦m̦an. Wãween an kõnnaan. Ke Jijej ear kwal̦o̦k naan kõn ennaan eo em̦m̦an, ear kõjerbal naan ko rejouj me rar kõm̦m̦an an ro rar roñjake bwilõñ. (Matu 7:28, UBS; Luk 4:22) Elõñ alen an riitil̦o̦k ak kwal̦o̦kl̦o̦k kobban eoon ko ñan armej ro. Ear jel̦ã eoon ta ko rejejjet ñan an kõjerbali ekkar ñan iien eo. (Matu 4:4, 7, 10; 12:1-5; Luk 4:16-21, UBS) Bareinwõt, ke Jijej ear kõmel̦el̦eik kobban Jeje ko ak eoon ko ñan armej ro, men in ear lukkuun kõm̦akũt bũrueer. Ñan waanjoñak, ãlikin an kar Jijej jerkakpeje, ear kõnnaan ippãn ruo iaan rũkal̦oor ro an ilo ial̦ eo aer l̦o̦k ñan Emmeõs. Jijej ear kõmel̦el̦eik erro kõn mel̦el̦ein eoon ko me kar je kõn e. Tokãlik, rũkal̦oor ro an rar ba: “Bũruod ejjab bwil ilowaad ke Ear kõnono ñan kõj ilo ial̦ eo, im ke Ear kõmel̦el̦eik Jeje ko ñan kõjro ke?”​—Luk 24:27, 32.

12, 13. Ta waanjoñak ko rej kwal̦o̦k bwe ear rum̦wij an Jijej illu im ear juon eo emel̦el̦e kõn joñan maroñ ko an armej ro?

¹² Wãween an enjake im kõm̦m̦an. Lol̦o̦kjen̦ ear jipañ Jijej bwe en “rum̦wij an illu.” (Jabõn Kõnnaan 16:32) Ear jel̦ã irooj ioon eñjake ko an make, im ear juon eo el̦ap an “ineem̦m̦an.” (Matu 11:29) Aolep iien Jijej ear jel̦ã kijenmej ippãn rũkal̦oor ro an meñe elõñ iien rar kõm̦m̦an bõd. (Mark 14:34-38; Luk 22:24-27) Im ear aenõm̦m̦an wõt ke ear nana an armej ro kõm̦m̦an ñane.​—1 Piter 2:23.

¹³ Lol̦o̦kjen̦ ear jipañ Jijej bwe en jel̦ã l̦õmn̦ak kõn joñan maroñ ko an armej ro. Kõnke ear mel̦el̦e kõn unin Kien Moses, men in ear jelõt wãween an kõm̦m̦an ñan armej ro. Ñan waanjoñak, l̦õmn̦ak m̦õk kõn kõrã eo me ear bõk nañinmej in “to̦o̦rl̦o̦k.” (Riit Mark 5:25-34, UBS.) Kõrã in ear etal bul̦õn armej ro, jibwe nuknuk eo an Jijej, im ear mour jãn nañinmej eo an. Ekkar ñan Kien eo, kõrã in ear ettoon. Kõn men in, ear mo̦ an jibwe ak uñũr jabdewõt armej. (Livitikõs 15:25-27, UBS) Bõtab, Jijej ear jab nana an kõnnaan ñan kõrã in. Ear kwal̦o̦k tũriam̦o ñane. Ear mel̦el̦e bwe eaorõkl̦o̦k ñan kwal̦o̦k ‘tũriam̦o im m̦ool’ jãn pokake Kien Moses. (Matu 23:23, UBS) Jijej ear kõnnaan ñan kõrã eo ilo jouj, ilo an ba: “Nejũ, am̦ tõmak ear kõmour eok. Ilo̦k ilo aenõm̦m̦an, im kwõn mour jãn nañinmej eo am̦.” Ej juon waanjoñak em̦m̦an kõn wãween an kar lol̦o̦kjen̦ kõm̦akũt Jijej bwe en kwal̦o̦k jouj!

14. (1) Ta eo Jijej ear kããlõt in kõm̦m̦ane ilo mour eo an? (2) Im ewi wãween an kar poub wõt ilo jerbal eo an?

¹⁴ Wãween an mour. Wãween kar mour eo an Jijej ear kaalikkar bwe ear juon eo elol̦o̦kjen̦. Ear kããlõt jerbalin kwal̦o̦k naan bwe en jerbal eo eaorõktata ilo mour eo an. (Luk 4:43, UBS) Bareinwõt, Jijej ear kõm̦m̦ani pepe ko me rar jipañe bwe en poub wõt ilo jerbal eo an im kajejjete. Ñan waanjoñak, ear jokwane wõt kõn men ko ewõr ippãn im ear jab kõttõpar bwe en m̦weiie kõnke en maroñ kamaat aolep iien im maroñ ko an ñan jerbalin kwal̦o̦k naan. (Luk 9:58, UBS) Ear jel̦ã bwe eaorõk ñan an katakin im kammineneik ro jet kilen kwal̦o̦k naan bwe ren maroñ wõnm̦aanl̦o̦k wõt kake jerbal in ãlikin an mej. (Luk 10:1-12; Jon 14:12, UBS) Im ear kallim̦uri rũkal̦oor ro an bwe enaaj jipañ er ilo jerbalin kwal̦o̦k naan “ñan jem̦l̦o̦kin” jukjukun pãd in enana.​—Matu 28:19, 20.

15. Ewi wãween ad kwal̦o̦k lol̦o̦kjen̦ ñe jej kõnnaan?

¹⁵ Ewi wãween ad maroñ anõke joñak eo an Jijej kõn lol̦o̦kjen̦? Wãween ad kõnnaan. Ñe jej kõnnaan ñan rũttõmak ro jeid im jatid, jej kõjerbal naan ko me rej jipañ im kakajoor er, ijello̦kun ad kõjerbal naan ko rej kabbeer er. (Epesõs 4:29, UBS) Ñe jej kõnnaan ñan ro jet kõn Aelõñ eo an Anij, naan ko ad rej aikuj ãinwõt ñe ‘em̦õj jo̦o̦l̦i.’ Mel̦el̦ein bwe jej aikuj kõnnaan ilo juon wãween me enaaj kõm̦m̦an aer kõn̦aan roñjake kõj. (Kolosse 4:6) Jej kate kõj ñan mel̦el̦e kõn ta ko rej iiooni ilo mour ko aer im kõn ta ko rej itoklimo kaki. Innem, jej kããlõt naan ko rejejjet ñan ad kõjerbali ilo ad kõnnaan ippãer. Ñe jej kwal̦o̦k naan ko rejouj, armej ro renaaj kõn̦aan roñjake kõj, im ennaan eo jej kwal̦o̦ke ñan er enaaj kõm̦akũt bũrueer. Bareinwõt, ñe jej kwal̦o̦k kõn tõmak ko ad ñan armej ro, jej kate kõj ñan riiti eoon ko jãn Baibõl̦ kõnke ren kile bwe katak ko ad rej pedped ioon Naanin Anij. Jejel̦ã bwe el̦apl̦o̦k an naan ko ilo Baibõl̦ kajoor jãn naan ko ad make.​—Hibru 4:12.

16, 17. (1) Ewi wãween ad kwal̦o̦k bwe jejel̦ã dãpij ad illu, im jemel̦el̦e kõn joñan maroñ ko an ro jet? (2) Ta ko jej kõm̦m̦ani bwe jen maroñ poub wõt ilo jerbalin kwal̦o̦k naan?

¹⁶ Wãween ad eñjake im kõm̦m̦an. Ñe ewõr lol̦o̦kjen̦ ippãd, men in enaaj jipañ kõj bwe jen jel̦ã irooj ioon eñjake ko ad ñe jej inepata, im ej jipañ kõj bwe en ‘rum̦wij ad illu.’ (Jemes 1:19) Ñe armej ro rej kal̦õkatip kõj kõn naan im kõm̦m̦an ko aer, jej kate kõj ñan mel̦el̦e taunin aer kar kõnnaan rot eo im kõm̦m̦ane men eo. Men in ej kõm̦m̦an bwe en pidodol̦o̦k ad jol̦o̦k aer bõd im jab illu ippãer. (Jabõn Kõnnaan 19:11) Lol̦o̦kjen̦ ej bar jipañ kõj bwe jen mel̦el̦e kõn joñan maroñ ko an armej ro. Jejjab kõtmãne bwe aolep iien en em̦m̦an im jim̦we wõt aolep men ko rũttõmak ro m̦õttad rej kõm̦m̦ani. Bõtab, jej keememej bwe emaroñ wõr apañ ko rej wal̦o̦k ñan er me jejjab lukkuun jel̦ã kaki. Ñe rej kwal̦o̦k l̦õmn̦ak ko aer, jem̦õn̦õn̦õ in roñjake. Im ñe ekkar, jen kõttãik kõj im l̦oor l̦õmn̦ak ko aer, ijello̦kun ad kapen bũruod bwe ren l̦oori l̦õmn̦ak ko ad.​—Pilippai 4:5.

¹⁷ Wãween ad mour. Jejel̦ã bwe kwal̦o̦k naan kõn ennaan eo em̦m̦an ej jeraam̦m̦an eo el̦aptata ewõr ippãd. Eñin unin ad kõn̦aan kõm̦m̦ani pepe ko me renaaj jipañ kõj bwe jen poub wõt ilo jerbal in. Jej kããlõt ñan likũt Jeova m̦oktata ilo mour ko ad. Jej jokwane wõt kõn men ko ewõr ippãd im jejjab kõttõpar bwe jen m̦weiie. Etke? Kõnke jen maroñ kõjerbal iien im maroñ ko ad ñan kwal̦o̦k kõn ennaan eo em̦m̦aan m̦okta jãn an itok jem̦l̦o̦kin.​—Matu 6:33; 24:14.

18. Ta eo emaroñ jipañ kõj bwe jen wõnm̦aanl̦o̦k wõt ilo ial̦ eo ad me ej tõll̦o̦k kõj ñan mour indeeo, im ta eo kwõj peek ilo bũruom̦ ñan kõm̦m̦ane?

¹⁸ El̦ap ad m̦õn̦õn̦õ bwe jaar katak kõn jet iaan men ko rem̦m̦an kõn Jijej! Elõñ tokjãn ko jemaroñ bũki ñe jenãj katak kõn men ko jet rem̦m̦an kõn e im katak ñan ãinwõt e. Kõn men in, jen peek ilo bũruod ñan anõke joñak eo an Jijej. Ad kõm̦m̦ane men in, enaaj jipañ kõj bwe jen wõnm̦aanl̦o̦k wõt ilo ial̦ in ad me ej tõll̦o̦k kõj ñan mour indeeo. Im enaaj bar jipañ kõj bwe jen epaakel̦o̦k wõt Jeova.