1, 2. (a) Oñgeni tupondola okukala nomuenyo wahapu? (b) Oityi matyitukuatesako okutualako noungendi wetu?

 TUNDE etyi tuakala Ovakristau, tuehimbika oungendi. Inkha tutualako nekolelo mu Huku, oungendi wetu maweende nawa iya matukakalako apeho. Jesus wati: “Una ukoleleya alo konthyulilo, oe makayovolwa.” (Mateus 24:13) Opo tuvitule oungendi wetu, tuna okutualako nekolelo mu Huku alo “konthyulilo,” tyilinge onthyulilo yomuenyo wetu ine youye uno wovivi. Mahi tuesukisa okulunguka opo tuhatalukwe nouye uno. (1 João 2:15-17) Oñgeni tupondola okutualako noungendi wetu?

² Jesus wetuavela ongeleka ongwa. Tupondola okunoñgonoka Jesus tyina tulilongesa etyi Ombimbiliya ipopia konthele yonkhalelo yae yomuenyo. Iya otyo matyitukuatesako okukala nohole nae nekolelo. (Tanga 1 Pedro 1:8, 9.) Apostolu Petulu wapopia okuti Jesus wetusila ongeleka opo tumulandule. (1 Pedro 2:21) Inkha tulandulila popepi ongeleka ya Jesus, matutyivili okukoleleya alo konthyulilo. a (Tala onondaka pokatoi.) Monthele wokuatetekela, tuelilongesa  oñgeni tupondola okuliola omutima nokukala noluembia nga Jesus. Monthele ei, matulilongesa oñgeni tupondola okukola omutima nokupunga nawa ovipuka nga Jesus.

3. Okukola omutima oityi, iya oñgeni tupondola okukala nomutima wakola?

³ Okukola omutima otyituwa tyipondola okutupameka nokutukuatesako okukoleleya movitateka. Tupu okukola omutima tyitukuatesako okuyakulila etyi tyaviuka. Otyituwa otyo, tyipondola okutukuatesako okutualako tyahiliya, nokukala nekolelo mu Huku tyina tumoneswa ononkhumbi. Okukola omutima tyelikuata nowoma, nekevelelo, nohole. Ñgeni ngotyo? Inkha tukala nowoma wokunumanesa Huku, kamatukala nowoma novanthu. (1 Samuel 11:7; Provérbios 29:25) Ekevelelo mu Jeova litukuatesako okutala vala kovipuka matukapewa komutwe, atuhatale kovitateka. (Salmo 27:14) Ohole yotyotyili itulunda okukala nomutima wakola alo umwe tyina tumoneswa ononkhumbi. (João 15:13) Matukala vala nomutima wakola inkha tuyumba onthumbi mu Huku nokuhetekela Omona wae.—Salmo 28:7.

4. Mondyuo ya Huku oñgeni Jesus alekesile okuti wakola omutima? (Tala olutalatu pefo pahimbikila onthele.)

⁴ Puetyi Jesus ena omanima 12, walekesile okuti wakola omutima etyi ankho avasiwa “upumphi mondyuo ya Huku, pokati kovalongesi.” (Tanga Lucas 2:41-47.) Ovalongesi ovo, ankho vei nawa Ovitumino Viapelwe Moisesi, mahi tupu ankho vei oviso viova Judeu. Mokonda yoviso ovio, ankho tyipuiya okutavela Ovitumino. Mahi, Jesus katilile owoma wokupopia navo mokonda yenoñgonoko liavo. Watuaileko “okuvelinga omapulo.” Tyotyili, omapulo Jesus alingile ankho kaekahi ngo ovakuendye vakuavo. Mahi, tupondola okusoka Jesus ulinga omapulo omanene otyo ovalongesi vemutehelela nokusokolola komapulo oo. Inkha ovalongesi vasokele okulinga omapulo anguanguanesa Jesus, kavetyivilile. Ovanthu aveho, kumwe novalongesi ankho vekahi nokumutehelela, vahuvile “nenoñgonoko liae nonkhalelo ankho akumbulula.” Mahi, nomutima wakola Jesus ayakulila otyili tyivahiwa Mondaka ya Huku!

5. Movilinga viae viokuivisa omononkhalelo patyi Jesus alekesile okuti wakola omutima?

⁵ Mokueenda kuovilinga viae viokuivisa, Jesus walekesile okuti wakola omutima mononkhalelo ononyingi. Mongeleka, walekesile kovanthu okuti ononkhalamutwe mbonongeleya mbukahi nokuveyondya nomalongeso omatutu. (Mateus 23:13-36) Tupu, Jesus kayekele ouye umuyapule. (João 16:33) Watuaileko nokuivisa namphila ankho eyelwe. (João 5:15-18; 7:14) Movikando vivali, Jesus nomutima wakola wasukukisa ondyuo ya Huku etyi ataatela pondye vana ankho vekahi nokusilisa efendelo liotyotyili.—Mateus 21:12, 13; João 2:14-17.

6. Oñgeni Jesus alekesile omutima wakola monthiki yahulililako yomuenyo wae pano pohi?

⁶ Tutalei oñgeni Jesus alekesile omutima wakola monthiki yahulililako yomuenyo wae pano pohi. Jesus ankho utyii etyi matyimonekapo, tyina Juda amemupakula. Popasikwa, Jesus wapopilile Juda okuti: “Etyi uhanda okulinga, tyilinga liwa.” (João 13:21-27) Ngotyo, motyikunino tyo Getsemani, nokuakola omutima Jesus elihololola komafualali eya okumukuata. Namphila ankho omuenyo wae ukahi motyiponga, wayakulilile ovalongwa vae, etyi apopila omafualali okuti: “Yekei ovalume ava vaye.” (João 18:1-8) Konyima, etyi ombonge onene yova Judeu yemukoyesa, nokuakola omutima Jesus evepopila okuti ame Kristu Omona wa Huku. Jesus katilile owoma, namphila omunene-nakwa ankho ahanda okumuipaa. (Marcos 14:60-65) Jesus watuaileko nekolelo mu Huku iya ankhila momuti wemone. Etyi ankho ekahi nokunkhia apopi okuti: “Atyiho tyafuisuapo.”—João 19:28-30.

7. Vakuendye, oñgeni tyikukalesa tyina wihanua okuti Umbangi ya Jeova, iya oñgeni molekesa okuti wakola omutima?

⁷ Oñgeni tupondola okukola omutima nga Jesus? Kosikola. Vakuendye, mulekesa okuti muakola omutima tyina mupopila vana mulongeswa navo, novakuavo vali okuti mu Nombangi mba Jeova. Monkhalelo oyo, mulekesa okuti muhambukwa okuihanwa nenyina lia Jeova, namphila vakuenyi vapondola okumukuela. (Tanga Salmo 86:12.) Vamwe hamwe vahanda utavele okuti ovipuka vieyako vala avike. Mahi, ove utavela okuti etyi Ombimbiliya ipopia okuti ovipuka aviho viatungwa, otyili. Upondola okuundapesa ombrochula A Origem da Vida—Cinco Perguntas Que Merecem Resposta opo ukumbulule vana vahanda okunoñgonoka “omokonda yatyi una ekevelo olio.” (1 Pedro 3:15) Okulinga ngotyo, matyikuhambukiswa mokonda wayakulila otyili Tyombimbiliya nomutima wakola!

8. Omokonda yatyi tuivisila nomutima wakola?

⁸ Movilinga viokuivisa. Mokonda Tuvakristau votyotyili, tuesukisa okutualako “okupopia nomutima wakola konthele ya Jeova.” (Atos 14:3) Omokonda yatyi tuivisila nomutima wakola? Tete, tutyii okuti etyi tuivisa, otyili tyikahi Mombimbiliya. (João 17:17) Vali, “tuvaundapi kumwe na Huku,” iya utuavela ospilitu sandu opo itukuateseko. (1 Coríntios 3:9; Atos 4:31) Tatu, tuhole Jeova novanthu, otyo tyitulunda okulinga atyiho tuvila opo tupopile vakuetu onondaka onongwa. (Mateus 22:37-39) Mokonda tuakola omutima kamatuyekepo okuivisa. Tuatokola okulongesa otyili ku vana “vatuikiswa” ine vayondyua no nonkhalamutue mbonongeleya. (2 Coríntios 4:4) Iya matutualako nokuivisa onondaka onongwa namphila ovanthu vehetavela ine vetumonesa ononkhumbi.—1 Tessalonicenses 2:1, 2.

9. Oñgeni tupondola okukola omutima tyina tumona ononkhumbi?

⁹ Tyina tumoneswa ononkhumbi. Tyina tuyumba onthumbi mu Huku, metuavela ekolelo, nomutima wakola tuesukisa opo tukoleleye movitateka. Inkha tuankhisa umwe tuhole, namphila matyituihama, mahi matutualako nekevelelo lietu. Tuna onthumbi yokuti “Huku weungumaneso aliho” metupameka. (2 Coríntios 1:3, 4; 1 Tessalonicenses 4:13) Inkha tuavela ine tueliveta, namphila matyituihama, mahi matulityilika okuhakulwa monkhalelo Huku ahahande. (Atos 15:28, 29)  Inkha tuasoya “omutima wetu upondola okutuvela onombei,” mahi tutualeiko okulikuatehila. Tuyumbei onthumbi mu Jeova, “ukahi popepi na vana vaihamenwa komutima.” b (Tala pokatoi.)—1 João 3:19, 20; Salmo 34:18.

10. Okupunga nawa ovipuka oityi, iya oñgeni Omukristau una ounongo wokupunga apopia nokulinga ovipuka?

¹⁰ Okupunga nawa ovipuka, ounongo wokunoñgonoka okuti otyivi notyiwa vielikalela, iya atuholovona okulinga etyi tyaviuka. (Hebreus 5:14) Omukristau upunga nawa ovipuka, ulinga omatokolo apameka oupanga wae na Huku. Uliyunga opo ahapopie ovipuka vinumanesa vakuavo. Mahi, uhambukiswa Jeova mokonda uholovona onondaka mbupameka vakuavo. (Provérbios 11:12, 13) “Kanumana liwa.” (Provérbios 14:29) “Wenda no komutwe,” tyilekesa okuti ulinga omatokolo omawa. (Provérbios 15:21) Oñgeni tupondola okulilongesa okupunga nawa ovipuka? Tuna okulilongesa Ondaka ya Huku nokuendela muetyi tuelilongesa. (Provérbios 2:1-5, 10, 11) Tupu tupondola okulilongesa, nokuhetekela ongeleka ya Jesus yokupunga nawa ovipuka.

11. Oñgeni Jesus alekesile okuti upunga nawa ovipuka muetyi apopia?

¹¹ Jesus walekesile okuti upunga nawa ovipuka muetyi apopia netyi alinga. Muetyi apopia. Putyina aivisa onondaka onongwa, Jesus ankho upopia onondaka mbuhuvisa ovateheleli. (Mateus 7:28; Lucas 4:22) Ovikando ovinyingi, Jesus ankho utanga ine upopia etyi tyikahi Mondaka ya Huku. Ankho wi nawa ovihonekwa patyi mapopila omunthu. (Mateus 4:4, 7, 10; 12:1-5; Lucas 4:16-21) Tupu, ovanthu ankho vatehelela tyina Jesus ahangununa Ovihonekwa, vakuatesilueko unene nonondaka mbae. Etyi Jesus atutiliswa, wapopile novalongwa vae vevali ankho vaya noko Emaús. Evepopila etyi tyihangununa ovihonekwa vipopia konthele yae. Konyima, ovalongwa avapopi okuti: “Ankho katuahambukilwe unene etyi apopia nonthue metapalo, okutuhangununina nawa Ovihonekwa?”—Lucas 24:27, 32.

12, 13. Ongeleka patyi ilekesa okuti Jesus ankho kanumana liwa, iya wapola pokati?

¹² Etyi elitehelela, novituwa viae. Okupunga nawa ovipuka tyakuatesileko Jesus “okuhanumana liwa.” (Provérbios 16:32) Jesus ankho utyivila okulikondola, iya ankho “wapoleya.” (Mateus 11:29) Jesus ankho apeho wapua elundo novalongwa vae tyina vamapengesa. (Marcos 14:34-38; Lucas 22:24-27) Jesus ankho utualako tyapoleya alo umwe tyina ankho amoneswa ononkhumbi.—1 Pedro 2:23.

¹³ Okupunga nawa ovipuka tyakuatesileko Jesus okupola pokati. Onkhalelo ankho atekula ovanthu, yalekesa okuti ankho utyii nawa omokonda  yatyi kuapakelwa Ovitumino Viapelwe Moisesi. Mongeleka, soka komukai ankho una ouvela “wokutunda ohonde.” (Tanga Marcos 5:25-34.) Omukai wakuatele pokati kovanthu ovanyingi, ayame kotyikutu tya Jesus aveluka. Ngetyi ankho tyipopia Ovitumino Viapelwe Moisesi, omunthu ankho una ouvela ngoo kapondola okuyama kovanthu. (Levítico 15:25-27) Jesus kemupopile omapita. Omokonda yatyi? Omokonda ankho utyii okuti “okankhenda nekolelo” ovituwa viakolela vali tyipona okutavela Ovitumino. (Mateus 23:23) Jesus wapopia noluembia okuti: “Mona wange, ekolelo liove liekuvelukisa. Enda nombembwa veluka ouvela wove omuvi.” Ongeleka ei, ilekesa nawa okuti okupunga nawa ovipuka tyalundile Jesus okulekesa okankhenda.

14. Oityi Jesus aholovonene okulinga, iya oñgeni atuaileko okusuka vala novilinga viokuivisa?

¹⁴ Onkhalelo yae yomuenyo. Jesus walekesile okuti upunga nawa ovipuka monkhalelo atyindile omuenyo wae. Waholovonene okuundapa vala movilinga viokuivisa. (Lucas 4:43) Tupu, Jesus walingile omatokolo emukuatesileko okusuka vala novilinga ovio, alo evimana. Mongeleka, watuaileko nomuenyo wapola pokati opo etyivile okukala nomuvo, nononkhono mbokuundapa movilinga viokuivisa. (Lucas 9:58) Jesus ankho utyii okuti wesukisa okulongesa vakuavo opo vatualeko novilinga viokuivisa tyina amankhi. (Lucas 10:1-12; João 14:12) Iya walaele ovalongwa vae okuti mevekuatesako movilinga viokuivisa “alo konthyulilo youye uno.”—Mateus 28:19, 20.

15. Oñgeni tupondola okupunga nawa ovipuka muetyi tupopia?

¹⁵ Oñgeni tupondola okupunga nawa ovipuka nga Jesus? Muetyi tupopia. Tyina tutomphola novakuatate vetu nonomphange, tupopiei onondaka mbuvepameka atuhapopi ombu mbuvesoyesa. (Efésios 4:29) Tyina tupopila  vakuetu konthele Youhamba wa Huku, onondaka mbetu mbesukisa “okuhingwa nawa omongwa,” tyilekesa okuti tuesukisa okupopia monkhalelo ikahi nawa. (Colossenses 4:6) Tuovolei okunoñgonoka etyi ovanthu vesuka vali natyo, iya atuholovona onondaka mbukahi nawa. Inkha tupopia noluembia, ovanthu vapondola okututehelela, iya onondaka tuivisa mambuvehiki komutima. Tupu, tyina tuhangununa omatavelo etu, tutangei Mombimbiliya inkha tyitavela, mokonda Ondaka ya Huku ina epondolo. Tutyii okuti onondaka mbukahi Mombimbiliya mbuna vali epondolo tyipona mbetu.—Hebreus 4:12.

16, 17. (a) Oñgeni tupondola okulekesa okuti tuapola pokati iya katunumana liwa? (b) Oñgeni tupondola okutualako okusuka vala novilinga viokuivisa?

¹⁶ Etyi tulitehelela, novituwa vietu. Okupunga nawa ovipuka tyitukuatesako okulikondola tyina tumoneswa ononkhumbi, iya otyo tyitukuatesako opo “tuhanumane liwa.” (Tiago 1:19) Tyina ovanthu vetupopia omapita, tuovolei okunoñgonoka omokonda yatyi vapopila ine valingila ngotyo. Okulinga ngotyo, matyipepuka okuveevela nokuhevenumanena. (Provérbios 19:11) Tupu okupunga nawa ovipuka matyitukuatesako okupola pokati. Katukevelela ovakuatate vetu nonomphange valinge vala ovipuka viaviuka. Mahi, tuhinangela okuti hamwe vena ovitateka onthue tuhanoñgonokele nawa. Tukalei tyafuapo pala okutehelela nawa tyina vapopia etyi vasoka. Inkha etyi apopia katyapengele, tutyitavelei, atuhevekuluminya okutavela etyi onthue tusoka.—Filipenses 4:5.

¹⁷ Onkhalelo yetu yomuenyo. Tutyii okuti okuivisa onondaka onongwa elao limwe enene tuna. Ngotyo, tulingei omatokolo maetukuatesako okutualako okusuka vala novilinga viokuivisa. Tuaholovona okupaka tete Jeova momuenyo wetu. Tutyindei omuenyo wapola pokati opo tutyivile okukala nomuvo, nononkhono movilinga viokuivisa tyina nkhele onthyulilo yeheneye.—Mateus 6:33; 24:14.

18. Oñgeni matutualako noungendi wetu wokuenda komuenyo wahapu, iya oityi ove watokola okulinga?

¹⁸ Tyetukuatesako unene okulilongesa konthele yovituwa vimwe via Jesus! Soka kouwa matupoloko putyina tulilongesa ovituwa ovikuavo via Jesus nokukala ngae. Ngotyo, tutokolei okuhetekela Jesus. Inkha tulinga ngotyo, matutualako noungendi wetu wokuenda komuenyo wahapu, nokufuena vali ku Jeova.