1, 2. 1) ¿Imatataj ruwananchej tiyan salvakunanchejpaj? 2) Wiñaypaj kausayta munanchej chay, ¿pi jinataj ruwananchej tiyan?

CRISTIANOMAN tukoyqa, viajayta qallariy jina. Diosman cheqa sonqollapuni kasunchej chayqa, maymanchus viajashanchej chayman chayasunchej, wiñaypajtaj kausayta atisunchej. Jesús nerqa: “Pichus tukukuykama sinchʼita sayajrí, chaymá salvasqa kanqa”, nispa (Mat. 24:13). Maymanchus rishanchej chayman chayanapajqa, “tukukuykama” Diosman cheqa sonqollapuni kananchej tiyan, nisunman kay pachaj tukukuyninkama chayri wañupunanchejkama. Chaywanpis sumajta qhawarikunanchej tiyan, kay pachaj imasninwan mana chʼaukiyachikunanchejpaj (1 Juan 2:15-17). ¿Imaynatá chayta ruwasunman?

² Noqanchejqa Jesús jinapuni ruwananchej tiyan. Bibliata ukhunchaspaqa imaynachus Jesús kasqanta yachakunchej, payta munakunchej, paypi creeyninchejpis kallpachakun (1 Pedro 1:8, 9 leey). Apóstol Pedroqa, Cristo jina ruwanapaj  tukuy atisqanchejta ruwananchejta nerqa (1 Ped. 2:21). Ajinamantataj wiñaypaj kausayta atisunchej. * Ñaupaj yachaqanapi yachakorqanchej, imaynatachus Jesús jina llampʼu sonqo, khuyakuyniyoj ima kananchejta. Kunantaj yachakusunchej imaynatachus Jesús jina mana manchachikoj, allin yuyayniyojtaj kananchejta.

3. 1) ¿Imaynatá mana manchachikuyniyoj kay yanapawanchej? 2) ¿Imataj mana manchachikunapaj yanapawasunchej?

³ Mana manchachikuyniyoj kayqa kallpachasqa kanapaj, chʼampaykunata atipanapaj ima yanapawanchej. Mana manchachikuyniyoj runaqa, mana manchachikuyninwan atipachikunchu, cheqan kajmanta parlan, nitaj anchata llakikunchu. Mana manchachikuyniyoj kanapajqa, Diospa sonqonta nanachiyta manchachikuna, suyakuyniyoj, munakuyniyoj ima kana. Diospa sonqonta nanachiyta manchachikoyqa runasta mana manchachikunapaj kallpachawanchej (1 Sam. 11:7; Pro. 29:25). Suyakuyniyoj kayqa llakiykunapi rikukojtinchej, ima bendicionestachus aswan qhepaman japʼinanchejpi yuyanapaj yanapawanchej (Sal. 27:14). Munakuyniyoj kaytaj, wajkunaj allinninkuta maskʼanapaj yanapawanchej, kausayninchejta wañuy pataman churana kajtinpis (Juan 15:13). ¿Imataj yanapawasunchej mana manchachikunapaj? Diospi atienekuy, Churin Jesús jina ruway ima yanapawasunchej (Sal. 28:7).

4. ¿Imaynatá Jesús 12 watayoj kashaspa mana manchachikoj kasqanta rikucherqa? (10 paginapi dibujota qhawariy.)

⁴ Jesusqa wawamantapacha mana manchachikuspa cheqan kajmanta parlarqa. Uj kuti, 12 watayoj kashaspa ‘templopi yachachejkunawan khuska tiyasharqa’ (Lucas 2:41-47 leey). Chay yachachejkunaqa Moisesman qosqa Leyta, judiospa yachachiyninkuta ima sumajta rejserqanku. Judiospa yachachiyninkutaj, Moisesman qosqa Leyta llasa qʼepita jina qhawacherqa. Jesustajrí mana paykunata manchachikorqachu, nitaj chʼinllachu qhepakorqa. Astawanpis paykunata tapurej, tapuykunasnintaj mana uj wawitaj tapuykunasnin jinachu karqa, manaqa tʼukurinankupaj jina karqa. Chay yachachejkunataj, Jesusta pantachiyta munaspapis, mana pantachiyta aterqankuchu. ¿Imaynatá chayta yachanchej? Biblia nin: “Uyarejkunaqa anchatataj tʼukusharqanku yachayninmanta, kutichisqasninmanta ima”, nispa. Jesusqa Diospa Palabranmanta parlaspa mana manchachikoj kasqanta rikucherqa.

5. ¿Imaynasmantá Jesús rikucherqa mana manchachikoj kasqanta?

⁵ Jesusqa kay Jallpʼapi kashaspa, mana manchachikoj kasqanta ashkha imaynasmanta rikucherqa. Sutʼincharinapaj, religionta kamachejkunata uyankupi nerqa llulleriosta yachachisqankuta (Mat. 23:13-36). Chantapis mana kay pachaj sajra kayninwan chimpachikorqachu (Juan 16:33). Nitaj willayta saqerqachu enemigosnin churanakojtinkupis (Juan 5:15-18; 7:14). Iskay kutispitaj Diosta yupaychayta pisipaj qhawajkunata templomanta qharqorqa (Mat. 21:12, 13; Juan 2:14-17).

6. ¿Imaynatá Jesús wañupunan pʼunchaypi mana manchachikoj kasqanta rikucherqa?

⁶ Jesús mana manchachikoj kasqanpi tʼukureyqa, creeyninchejta kallpachan. Qhawarina imatachus wañupunan pʼunchay ruwasqanta. Payqa yacharqa Judas wasanchasqantawan imachus paymanta kananta. Jinapis Pascuata ruwashaspa Judasman nerqa: “Ruwanayashanki, chaytaqa usqhayta  ruwamuy”, nispa (Juan 13:21-27). Chantá Getsemaní huertaman soldados payta japʼej jamojtinku mana manchachikuspa pay kasqanta nerqa. Kausaynin wañuy patapi kashasqanta yachaspapis yachachisqasninta jarkʼarqa (Juan 18:1-8). Jatun juntaj ñaupaqenpipis mana manchachikuspa Cristo kasqanta, Diospa Churin kasqanta ima nerqa, kuraj kaj sacerdote wañuchiyta munaspalla tapushasqanta yachaspapis (Mar. 14:60-65). Jesusqa wañupunankama cheqa sonqollapuni karqa. Chayrayku niraj wañupushaspa nerqa: “Tukuy ima tukuychasqaña”, nispa (Juan 19:28-30).

7. 1) ¿Qan, sonqo juntʼasqachu kashanki Jehovaj testigon kasqaykimanta? 2) ¿Imaynatá mana manchachikoj kasqaykita rikuchiwaj?

⁷ ¿Imaynatá Jesús jina mana manchachikoj kasunman? Escuelapi. Wayna, compañerosniyki chayri waj runas asipayasojtinkupis ama manchachikuychu Jehovaj testigon kasqaykita niyta. Diospa sutinwan rejsisqa kasqaykimanta kusikuy (Salmo 86:12, 13 leey). Ichapis wajkuna tanqasonqanku kausay jinallamanta rikhurisqanpi creenaykipaj. Chaywanpis kausay mana jinallamantachu rikhurisqanta Biblia nisqan, cheqapuni kasqanpi atienekuyta atinki. “Imatachus suyakusqayki[manta] sutʼita kutichinayki[pajtaj]”, El origen de la vida. Cinco cuestiones dignas de análisis nisqa folletowan yanapachikuwaj (1 Ped. 3:15). Ajinata Bibliaj yachachiyninta sutʼinchaspaqa sonqo juntʼasqa kanki.

8. ¿Imastaj mana manchachikuspa willamunapaj yanapawanchej?

⁸ Willaypi. Cheqa cristianosqa Jehová kamachisqanman jina “mana manchachikuspa” willamunallanchejpuni tiyan (Hech. 14:3). ¿Imaraykutaj? Kinsa imasrayku. Uj kaj, imatachus yachachisqanchej cheqapuni kasqanta yachanchej, imaraykuchus Bibliamanta yachachinchej (Juan 17:17). Iskay kaj, “Dioswan khuska trabaja[nchej]”, chantapis Dios espíritu santonwan yanapawanchej (1 Cor. 3:9; Hech. 4:31). Kinsa kaj, Jehovata, runa masinchejta ima munakusqanchejrayku Diosmanta willamunchej (Mat. 22:37-39). Mana manchachikuyniyoj kasunchej chayqa, willamullasunpuni. Chantapis runasta yanapasunchej llulla yachachiykunamanta kacharichikunankupaj, cheqa kajmantataj yachakunankupaj (2 Cor. 4:3, 4). Runas willayninchejta mana uyarejtinkupis, qhatiykachawajtinchejpis, asipayawajtinchejpis willamullasunpuni (1 Tes. 2:1, 2).

9. ¿Imaynatá mana manchachikoj kasqanchejta rikuchinchej llakiykunapi kaspa?

⁹ Llakiykunapi kaspa. Jehovapi atienekusunchej chayqa, llakiykunata atipanapaj kallpata qowasunchej. Munasqa familianchej wañupusqanrayku waqajtinchejpis, kausarimunankuta yachanchej. Atienekunchejtaj “tukuy imapi sonqochaj Dios[...]” kallpachanawanchejpi (2 Cor. 1:3, 4; 1 Tes. 4:13). Ichá sinchʼi onqosqa kasqanchejrayku chayri accidentakusqanchejrayku mayta ñakʼarishanchej, jinapis Diospa kamachiykunasninwan churanakoj tratamientosta qhesachanchej (Hech. 15:28, 29). Sinchʼi llakisqa kashanchej chayqa, ichapis “sonqonchej[...] imallamantapis juchachawasunman”, chaywanpis llakiyninchejwan mana atipachikunachu, imaraykuchus “Diosqa qayllallapi kashan salvanampaj [...] sonqonkuta nanachikojkunata” (1 Juan 3:19, 20; Sal. 34:18). *

10. 1) ¿Imaynataj allin yuyayniyoj runa? 2) ¿Imaynatá uj cristiano allin yuyayniyoj kasqanta rikuchin?

¹⁰ Allin yuyayniyoj runaqa imachus allin, imatajchus mana allinchu kasqanta reparan, ajllantaj allin kajta ruwayta (Heb. 5:14). Allin yuyayniyoj cristianoqa, Dioswan allinpi kasqanta kallpachananpaj jina imatapis ajllan. Kallpachakuntaj parlasqanwan, ruwasqanwan ima, wajkunaj sonqonkuta mana nanachinanpaj, astawanpis kallpachananpaj jina parlan, ruwan ima (Pro. 11:12, 13). Chantapis “mana usqhayta phiñarparik[unchu]” (Pro. 14:29). Ruwasqanqa, kausayman pusaj ñanpi, mana pañaman, nitaj lloqʼeman tʼaqakuspa kanallanpajpuni yanapan (Pro. 15:21). Allin yuyayniyoj kanapajqa, Bibliata estudiana, chayman jinataj kausakuna (Pro. 2:1-5, 10, 11). Chantapis Jesús jina ruwananchej tiyan, allin yuyaywanpuni tukuy imata ruwasqanrayku.

11. ¿Imaynatá Jesús parlasqanwan allin yuyayniyoj kasqanta rikucherqa?

¹¹ Jesusqa, parlasqanpi, ruwasqanpi ima allin yuyayniyoj kasqanta rikucherqa. Parlasqanpi. Jesusqa sumaj willaykunata kʼacha parlaykunawan willarqa, chayraykutaj payta uyarejkunaqa tʼukulla qhepakorqanku (Luc. 4:22; Mat. 7:28). Chantapis mana yuyaynillanmantachu parlaj, manaqa Diospa Palabranmantapuni. Ima versiculotachus maykʼajpis leerinanta sumajta yachaj (Mat. 4:4, 7, 10; 12:1-5; Luc. 4:16-21). Sutʼinchasqantaj, runaj sonqonman chayaj. Wañuymanta kausarimuspataj, iskay yachachisqasninwan Emaús sutiyoj ranchoman parlaspa rishajtinku “paymanta chay tukuy imatachus Diosmanta Qhelqasqapi nisqanta” sutʼincharqa. ¿Imatá paykuna chaymanta nerqanku? “Manachu sonqonchej kʼajarerqa [...], Diospa Palabranta[...] sutʼinchashawajtinchej?”, nispa nerqanku (Luc. 24:27, 32).

12, 13. ¿Imaynatá Jesús mana chay rato phiñakoj kasqanta rikucherqa? ¿Imaynatá Jesús kʼacha kasqanta rikucherqa?

¹² Ruwasqasnin. Jesustaqa allin yuyayniyoj kasqan “mana rato phiña[kunanpaj]” yanaparqa (Pro. 16:32, Quechua de Cuzce). Chantapis “llampʼu sonqo[...]” karqa (Mat. 11:29). Yachachisqasnin pantaj runas kajtinkupis, paykunawan pacienciakoj (Mar. 14:34-38; Luc. 22:24-27). Qhasimanta ñakʼarichejtinkupis, mana kikillanwantaj kuticherqachu (1 Ped. 2:23).

¹³ Jesusqa allin yuyayniyoj kasqanrayku kʼacha karqa. Imaspajchus Moisesman Leyta qokusqantataj sumajta entienderqa. Chaytaj sutʼi rikukoj runaswan kʼacha kasqanpi. Qhawarinachej imatachus Marcos 5:25-34 (leey) nisqanta. Yawar apaywan onqosqa warmeqa, runaspa chaupinta rishaspa “Jesuspa pʼachanta[...] llankhaykorqa”, chantá sanoyaporqa. Chay warmeqa Ley nisqanman jina onqoyninrayku “chʼichipaj qhawasqa” karqa, chayrayku waj runasmanta karunchakunan karqa (Lev. 15:25-27). Jina kajtinpis Jesusqa mana pʼenqaypichu chay warmita rikhuricherqa, imaraykuchus yacharqa Leyman jina ‘khuyakuy, Diosta mana wasanchay’ ima “aswan allin” kasqanta (Mat. 23:23). Chayrayku kʼachamanta nerqa: “Wawáy, creesqaykirayku salvasqa kanki. Kunanqa sonqo tiyaykusqa ripuy; onqoyniykimanta sanoyasqaña kanki”, nispa. Chay ruwasqanqa, ¡may sumajpuni!

14. 1) ¿Imataj Jesuspaj aswan sumaj karqa? 2) ¿Imatá ruwarqa ruwayninta juntʼananpaj?

¹⁴ Imastachus ñaupajman churasqan. Jesusqa imastachus kausayninpi ñaupajman churayta yacharqa. Paypajqa Jehová Diosmanta willay aswan sumaj karqa (Luc. 4:43). Chayrayku sumaj willaykunata  willamunanpaj jarkʼaj imasta qhesacharqa. Tukuy tiemponta, kallpanta imataj churarqa wajkunaman Diosmanta yachachinanpaj (Luc. 9:58). Yachachisqasnintapis wakicherqa, wañupojtin runasman willanallankupajpuni (Luc. 10:1-12; Juan 14:12). “Kay pacha tukukunankama[taj]” chay llankʼaypi yanapananta nerqa (Mat. 28:19, 20).

15. ¿Imaynataj parlayninchej kanan tiyan, allin yuyayniyoj kasqanchejta rikuchinapaj?

¹⁵ ¿Imaynatá Jesús jina allin yuyayniyoj kasunman? Parlayninchej. Hermanosninchejwan parlarishaspaqa, kallpachanapaj jina parlanchej, nitaj sonqonkuta nanachinapaj jinachu (Efe. 4:29). Reinomanta willashajtinchejqa, parlayninchej “kachiwan kachinchasqa[...] jina” kanan tiyan (Col. 4:6). Niraj willashaspa, imastachus runas necesitasqankupi, imaschus llakichisqanpi ima tʼukurinanchej tiyan. Kʼachamanta parlajtinchejqa, runas willayninchejta uyarenqanku, sonqonkumantaj chayanqa. Imapichus creesqanchejmanta sutʼinchashaspataj, Bibliamantapuni leerinanchej tiyan. Imaraykuchus Diospa Palabranqa parlayninchejmanta nisqaqa aswan atiyniyoj (Heb. 4:12).

16, 17. 1) ¿Imaynatá yanapawanchej allin yuyayniyoj kay mana usqhayllata phiñarparikunapaj? 2) ¿Imatá uj kʼacha runa ruwan? 3) ¿Imatá ruwasunman sumaj willaykunata ñaupajman churanapaj?

¹⁶ Ruwasqasninchej. Allin yuyayniyoj kayqa, mana usqhayllata phiñakunapaj yanapawanchej (Sant. 1:19, 20). Pillapis sonqonchejta nanachiwajtinchej, imaraykuchus imatapis parlarparisqanta, imatapis ruwarparisqanta ima entiendenanchejpaj kallpachakunchej. Ajinamanta mana phiñakusunchu, pantasqantapis “qonqayman chura[sunchej]” (Pro. 19:11). Chantapis allin yuyayniyoj kayqa, kʼachas kanapaj yanapawanchej. Nitaj suyananchejchu tiyan hermanosninchej mana pantanankuta. Imaraykuchus ichá chʼampaykunapi kashanku. Chayrayku sumajta uyarina imatachus nisqankuta, nitaj munasqanchejman jina ruwanankuta suyanachu (Fili. 4:5).

¹⁷ Imastachus ñaupajman churasqanchej. Sumaj willaykunata willayqa ni imawan kikinchakunchu. Chayrayku kausayninchejpi ñaupajman churana tiyan. ¿Imaynatá chayta ruwasunman? Jehovata yupaychayta ñaupajman churaspa, kapuwasqallanchejwan kusisqa kausakuspa ima. Ajinamanta tiemponchejta, kallpanchejta ima churayta atillasun sumaj willaykunata willamunapaj niraj kay pachaj tukukuynin chayamushajtin (Mat. 6:33; 24:14).

18. ¿Imatataj wiñay kausayta japʼinapaj ruwananchej tiyan?

¹⁸ Jesuspa kʼacha kaykunasninpi tʼukureyqa mayta yanapawanchej. Waj kʼacha kaykunasninmanta yachakullasunpuni chayqa, pay jina ruwasunchej. Ajinamantataj Jehovaman astawan qayllaykusunchej, wiñaypajtaj kausakuyta atisunchej.