1, 2. (a) Mushindo kinyi watudi balombene kupeta muwa wa ikalaika? (b) Nkinyi kilombene kwitukwasha bwa kutungunuka na lwendo lwetu lwa ku kipandjilo?

NSAA yatufiki balongi ba Kidishitu, bi nka bu’twe abatwele mu lwendo. Lwalwa lwendo alwitutwala ku muwa wa mwiyilu sunga wa pa nsenga. Yesu bambile shi: ‘Yawa akashaala munyingye nyaa na ku nfudiilo, [ku nfudiilo kwa uno muwa sunga kwa uno ndumbulwilo e bubi] akapashibwa.’ (Mat. 24:13) Oolo, su tubashala na lulamato mu uno nshalelo, atukyebe kwikala munkatshi mwa baaba abakapashibwa. Anka, munkatshi mwa lwendo lwetu abitungu tushaale bapasukye bwa kupela kulubishiibwa sunga kushimina. (1 Yo. 2:15-17) Mushindo kinyi watudi blombene kutungunuka na lwendo lwetu?

² Yesu kileshesho kyetu mmwitulukyele eshinda dya kulonda. Lwendo lwaye mbelufunde mu Bible. P’atwe kulonga Bifundwe, atukyebe kuuka bibaadi Yesu. Atukyebe kumufula na kwikala na lukumino mwadi. (Badika 1 Mpyeele 1:8, 9.) Nka bu bibambile Mpyeele mutumibwa, Yesu mmwitulekyele kileshesho kyatudya kulonda mu matabula  aaye. (1 Mp. 2:21) Su tubalondo kalolo matabula aaye, atukyebe kulombasha “katupwito” ka lukumiino lwetu ka​—kupashiibwa. * Mu mwisambo ushaale, twikeele besambile mushindo watudi balombene kwambula kileshesho kya Yesu mu kwikala na kwiyisha na kalolo. Bwa binobino, tutaluuleyi mushindo watudi balombene kulonda matabula a Yesu mu kulesha kw’eshimba dinyingye na kushinguula kwa myanda.

3. Kwikala n’eshimba dingyingye akulesha kinyi, na mushindo kinyi watudya kwikala nadyo?

³ Kwikala n’eshimba dinyingye nkulombene kwitukankamika na kwitukwasha bwa kukambila bitompwanga. Kwikala n’eshimba dinyingye abekulesha bu “kunyingiila nsaa yatufumankana na bulwishi” “kushaala nka banyingye bwa myanda ilulame” na “kulama kineemo kyetu na lukumiino nsaa yatufumankana na makyenga.” Kunyinga eshimba akutambuka pamune na kutshina, lukulupilo, na kifulo. Mu mushindo kinyi? Kutshina kw’Efile Mukulu akwitunyingisha bwa kupela kutshina muntu. (1 Sam. 11:7; Mye. 29:25) Kwikala na lukulupilo akwitukwasha bwa kupela kumona penda nkalakasho yetu, kadi kutuma binangu byetu ku myanda i kumpala. (Mis. 27:14) Kifulo kya binyibinyi akitutakula bwatudya kulesha kunyingiila sunga twekala mu masaku akata. (Yo. 15:13) Atukyebe kwikala n’eshimba dinyingye p’atwe kukulupila Efile Mukulu na kulonda mu matabula a Mwana’ye.​—Mis. 28:7.

4. Mushindo kinyi ubaadi Yesu muleshe eshimba dinyingye “munkatshi mwa balambukishi” mu ntempelo? (Tala kifwatulo ki kumbangilo kwa mwisambo.)

⁴ Sunga pabaadi na bipwa 12, Yesu baadi akalwila bya binyibinyi n’eshimba dinyigye. Banda kutala kibaadi kikitshikye nsaa ibaadi Yesu ‘mu ntempelo munkatshi mwa balambukishi.’ (Badika Luuka 2:41-47.) Baaba balambukishi tababaadi nka penda bepaane mu mwiya wa Moyiise nya, kadi babaadi dingi bepaane mu bipikwa bya beena Yuuda. Anka, Yesu tabaadi mushale muwumiine nya, baadi “mwipushe nkonko.” Tabaadi mwele nkonko bu ya mwana mukinga nya. Twi balombene kunangushena Yesu eele nkonko ayelesha baaba balambukishi balongye binangu na kwiyifunda. Na su balambukishi abaadya kwikala bakimbe bya kutompa Yesu pa kumwipusha nkonko ibukopo, tababaadya koobesha nya. Nyi bwakinyi muntu eese baadi atemeesha​—mpa na balambukishi—​babaadi “abakeme mushindo waye wa kupusha na wa kwaluula”​—myaluulo ibaadi ayikwatshishena bya binyibinyi bya mu Eyi dy’Efile Mukulu!

5. Yesu baadi muleshe eshimba dinyingye mu mudimo waye mu mishindo kinyi?

⁵ Mu mudimo waye wa bulungudi, Yesu baadi muleshe eshimba dinyingye mu mishindo ilekeene. Baadi mwakule kushi kutshina beena bipwilo abaadi abadimbi bantu na malambukishi a madimi. (Mat. 23:13-36) Baadi mushale munyingye ku bukitshishi bwibubi bwa uno ndumbulwilo. (Yo. 16:33) Baadi mutungunukye na kulungula mukandu wibuwa sunga munkatshi mwa balwishi. (Yo. 5:15-18; 7:14) Baadi musuule ntempelo misango ibidi kushi kutshina, p’aye kutusha baaba booso abaadi abalwisha lulangwilo lwa mwanka.​—Mat. 21:12, 13; Yo. 2:14-17.

6. Mushindo kinyi ubaadi Yesu muleshe kunyinga kw’eshimba mu mafuku a ku nfudiilo kwa muwa waye pa nsenga?

⁶ Lukumiino lwetu alunyingishibwa patutaluula kunyinga kw’eshimba dya Yesu pabaadi akyengye. Tubande kutala kunyinga kw’eshimba kubaadi muleshe mu mafuku a fundiilo a muwa waye. Baadi auku myanda yooso ibaadi na kya kukitshika kumpala kwa’shi Yuudase amupane. Oolo, mu Kidiibwa kya lukilo, Yesu baadi mulungule Yuudase shi: “Kyootungu kukita, ekikite bukidi.” (Yo. 13:21-27) Mwifuba dya Getesemane, Yesu baadi mwileshe kushi kutshina kwi basalayi babaadi abafiki mu kumukwata. Sunga nsaa ibaadi muwa waye mu masaku, baadi mwakule  bwa kukalwila balongi baaye. (Yo. 18:1-8) Pababaadi abamwele nkonko kumpala kwa sanedrine, bashinkamiishe kushi kutshina shi, baadi Kidishitu na Mwana a Efile Mukulu, sunga mbibaadi auku shi tshiite-mwakwidi mukata kwete kukimba mushindo wa kumwipasha. (Mak. 14:60-65) Yesu baadi mushaale mululame pepoo mpa na pabaabadi bamwipee ku mutshi wa malwa. Pa kutuula kwaye kweshimba, baadi mwele musaase na kwakula shi: “Byooso bibaalombana!”​—Yo. 19:28-30.

7. Ba nsongwa, mushindo kinyi wanupusha pabitale kutwala eshina dya Yehowa, na mushindo kinyi wanudi balombeene kulesha mashimba anyingye?

⁷ Mushindo kinyi watudi balombene kwambula Yesu mu kunyinga kw’eshimba? Ku kalasa. Bansongwa, nwibalombwene kulesha kunyinga kw’eshimba p’anwe kwilesha bu Batemwe ba Yehowa, sunga benusepa kwi beena kalasa sunga kwi bangi. Nsaa yanukitshi byabya, anulesha shi nwi na muloo wa kutwala eshina dya Yehowa. (Badika Misambo 86:12.) Mbalombene kwinutakula bwa kukumiina dilongyesha dya shi bintu mbituukile. Kadi, nwi na kya kukumiina na kushinkamisha kooso shi akyamba Bible pabitale kupanga nkya binyibinyi. Nwi balombene kutumika na broshire a Cinq questions à se poser sur l’origine de la vie bwa kwaluula kalolo kwi baaba abakyebe kuuka pa “bitale mwanda wa lukulupilo lwanudi n’alo.” (1 Mp. 3:15, EEM) Paapa anukapusha muloo wa kuuka shi nubakwatshisheena bya binyibinyi bya mu Eyi dy’Efile Mukulu.

8. Nkinyi kilombene kwitutuma bwa kulungula mukandu wibuwa na kishima?

⁸ Mu bulungudi. Bu byatudi bena Kidishitu, twi na lukalo lwa kutungunuka na ‘kwakula na kishima, beemene pe Yehowa.’ (Bik. 14:3, Kilombeeno kipya 2009) Nkinyi kilombene kwitutuma bwa kulambukisha na kishima, sunga n’eshimba dinyingye? Atuuku shi myanda yatulambukisha ngya binyibinyi mwanda ayituukila mu Bible. (Yo. 17:17) Atushinguula shi “tukwete kufuba pamune n’Efile Mukulu” na shi twi na bukwashi bwa kikudi kiselele. (1 Kod. 3:9; Bik. 4:31) Atupusha kalolo shi nsaa yatulungula mukandu wibuwa na katshintshi, atulesha kwilambula kwetu kwi Yehowa na kifulo kyetu bwa muntu netu. (Mat. 22:37-39) Su twi na eshimba dinyingye, tatukashaala baumiine nya. Mu kwilekeena na byabya, atwikala na kitshibilo kya kuleesha patoka madimi e mu bipwilo akwete kushikiila bantu ku bya binyibinyi. (2 Kod. 4:4) Akupu, atunyingiila mu mudimo wa kulungula mukandu wibuwa sunga betubinga, betubepuula, sunga kwitulwisha.​—1 Tes. 2:1, 2.

9. Mushindo kinyi watudi balombeene kulesha eshimba dinyingye nsaa yatudi mu makyenga?

⁹ Nsaa yatudi mu makyenga. Kukulupila mwi Efile Mukulu akwitupa lukumino n’eshimba dinyingye kumpala kwa bitompwanga. Su muntu atudi bafule baafu, atudidi, anka taatushimisha lukulupilo nya. Atutuulu lukulupilo lwetu looso mwi “Efile Mukulu sha kusambana mu byooso” bwadya kwitukankamika. (2 Kod. 1:3, 4; 1 Tes. 4:13) Su tukwete kukyenga na mukumbo wibukopo, twi bya kupusha busungu, kadi taatushimisha lukulupilo nya. Atupele kubukibwa kooso kwikutwene na mayi a kulonda a mu Bible. (Bik. 15:28, 29) Su twi na kinyongwa, “mashimba eetu aetutopeka” kadi bu byatudi bakulupile mwi Efile Mukulu aye “ee peepi naa bee na mashimba eenyongole,” taatubofula nya. *​—1 Yo. 3:19, 20; Mis. 34:19.

10. Kushinguula kwa myanda akupushisha kinyi, na mulangwidi a Yehowa e na kushinguula kwa myanda akulaa na kukita myanda mu mushindo kinyi?

¹⁰ Kushinguula kwa myanda nyi kwikala na mweneno ebuwa​—ngobesha ya kushinguula kibuwa na kibubi akupu nkusangula mwanda wa kinangu. (Eb. 5: 14) Mbekupushishe bu “ngobesha  ya kwata kitshibilo kibuwa mu myanda ya mu kikudi.” Mulangwidi e na kushinguula kwa myanda akulaa na kukita myanda mu mushindo ausangasha Efile Mukulu. Muntu e byabya asangula bishima bilombebene kukwasha bangi pamutwe pa abibatapa ku mashimba. (Mye. 11:12, 13) Nyi “muntu shyakwatâ sungu bukidi.” (Mye. 14:29, EEM) Mmuntu “Alondâ eshinda dilulame,” mulamate ku myanda ilulame mu lwendo lwa mu nshalelo aaye. (Mye. 15:21, EEM) Mushindo kinyi watudi balombeene kwikala na kushinguula kwa myada? Abitungu tulongye Eyi dy’Efile Mukulu na kutumikila myanda yatulongo mwanka. (Mye. 2:1-5, 10, 11) Na dingi atukapete bukwashi su tubalondo kileshesho kya Yesu, aye mukile bantu booso mu kushinguula kwa myanda.

11. Mushindo kinyi ubaadi Yesu muleshe kushinguula kwa myanda mu ngakwilo aaye?

¹¹ Yesu baadi muleeshe kushinguula kwa myanda mu ngakwilo na mu bikitshino byaye byooso. Mu ngakwilo aye. Baadi na binangu bibuwa nsaa ibaadi alungula mukandu wibuwa, pa kusangula ‘bishima bya kalolo’ bibaadi bikemeshe bantu abaadi abamuteemesha. (Luk. 4:22, Kilombeeno kipya 2009; Mat. 7:28) Misusa ibungi baadi atadiila bwashi Eyi dy’Efile Mukulu dyakule pa mbalo yaye​—pa kwidibadika, kuteemuna bishima bi mwanka, sunga kubadika angi maverse bwa kupushisha kalolo mwanda wabakula mu bifundwe. (Mat. 4:4, 7, 10; 12:1-5; Luk. 4:16-21) Yesu baadi dingi apushisha Bifundwe, mu mushindo ubaadi aukumu bantu abamuteemesha ku mashimba. Kunyima kw’aye kusanguka, nsaa ibaadi akula na balongi baye babidi babaadi abende ku Emause, “aye nkwibapatulwila byooso bibambilwe pa mwanda waye mu Bifundwe.” Kunyima balongi baaye babambile shi “Mashimba eetu taekalanga bu aatembe kaalo munda mwetu . . . peetupushishanga Bifundwe su?”​—Luk. 24:27, 32.

12, 13. Mbileshesho kinyi abilesha shi Yesu tabaadi akwata nsungu bukidi na baadi na binangu bibuwa?

¹² Mu binangu na mu mwikeelo waye. Kushinguula kwa myanda kubaadi kukwashe Yesu bwa kulama binangu byaye bwa kupela ‘kukwata nsungu bukidi.’ (Mye. 16:32, EEM) Baadi “mupopeele.” (Mat. 11:29) Baadi na lwishinko misusa yooso kwi balongi baaye sunga mu kubofula kwabo. (Mak. 14:34-38; Luk. 22:24-27) Baadi ashaala muwumiine sunga pabaabadi abamukitshina myanda na kukutwa kululama.​—1 Mp. 2:23.

¹³ Kushinguula kwa myanda kubaadi dingi kukwashe Yesu bwa kwikala na binangu bibuwa. Baadi apusha bi binangu bi mu miiya ya Moyiise na kwibitumikila. Bu kileshesho, tubande kutala mwanda wi mu Maako 5:25-34. (Badika.) Ungi mwana mukashi baadi na mukumbo wa mase abaadi aamutuuku baatwelele munkatshi mwa kisaka kya bantu, akuma ku lwembe lwa kilamba kya Yesu, aye nkupanda. Muyiile mwiya yawa mwana mukashi baadi butete, byabya tabaadi mulombeene kukuma muntu su ngumune. (Lv. 15:25-27) Kadi Yesu​—baadi mushinguule “kikile bukata ku miiya” bu “lusa na bulamate”—​tabaadi mumusashile pa mwanda wa kukuma ku lwembe lwa kilamba kyaye nya. (Mat. 23:23) Anka, baadi mumulungule na kalolo kooso shi: “Mwan’ande mukashi lukumiino lwobe lubakupaasha; nda mu butaale, bopanda ku busungu bwobe.” Abitusangasha ngofu pa kumona shi kushinguula kwa myanda kwa Yesu kubaadi kumutakule bwa kumukitshina kalolo!

14. Yesu basangwile bwa kukita kinyi, na nkinyi kibaadi mushinguule bwashi mudimo waye ushaale autungunuka?

¹⁴ Mu nshaleelo aaye. Yesu baadi muleshe kushiguula kwa myanda mu kusangula na kulonda nshalelo ebuwa. Baadi mwipaane mu mudimo wa kulungula mukandu wibuwa, aye nkwiwikasha bu mudimo wa mu nshalelo aye. (Luk. 4:43) Na dingi, Yesu baadi mwate bitshibilo bibaadi bimukwashe bwa kwimeena pa mudimo waye na kwiulombasha. Baadi mukumiine kwikala na nshalelo mupelepele bwa kwikala na nsaa na bukome bwa kulungula mukandu wibuwa. (Luk. 9:58) Baadi mushinguule lukalo lwa kulongyesha bangi bwabadya kutungunuka na mudimo kunyima kwa lufu lwaye. (Luk. 10:1-12;  Yo. 14:12) Baadi mulee balongi baaye shi ekala mukwatshishene uno mudimo “nyaa na ku nfudiilo a byaa-pano.”​—Mat. 28:19, 20.

15. Mushindo kinyi watudi balombene kulesha kushinguula kwa myanda mu ngakwilo eetu?

¹⁵ Tutaluule ungi mushindo watudi balombene kwambula Yesu. Mu ngakwilo etu. Mu miisambo yeetu na bakwetu beena Kidishitu, twikale na ngakwilo a kwibaka kushi a kwibabofosha. (Ef. 4:29) Patukwete kwisamba na bangi pabitale Bufumu bw’Efile Mukulu, twikale na “bishima bi mwenyi”. (Kol. 4:6) Abitungu tushinguule nkalo na myanda ayisangasha bantu abetuteemesha na kusangula bishima bilombene kwibakwasha. Tutentekyeshe shi bishima bibuwa mbilombene kufungula mashimba a bantu bwabadya kwitutemeesha. Na dingi, nsaa yatukwete kupatuula bi lukumiino lwetu, atutadiila Bible bwashi akule pa mbalo yetu. Bu byabidi na bukome, atwibitemuna na kwibibadila bantu su kwi mushindo. Twikale bashinkamishe shi Bifundwe bi na bukome kukila byoso byatudi balombene kwakula m’utwe banabene.​—Eb. 4:12.

16, 17. (a) Mushino kinyi watudi balombene kulesha shi tatukwete kukwata nsungu bukidi, n’ashi twi na binangu bibuwa? (b) Mushindo kinyi watudi balombene kushala bepaane mu mudimo wetu?

¹⁶ Mu binangu na mu mwikeelo wetu. Kushinguula kwa myanda akwitukwasha bwa kutaluula binangu byetu bwa kupela “kufiita munda.” (Ja. 1:19) Nsa ayitulwishisha bangi, atukimbi bwa kushinguula kibuwa mu bishima byabo na mu bikitshino byabo. Byabya binangu mbilombene kwitula nsungu na kwitukwasha bwa ‘kulekyela muntu mwanda waye.’ (Mye. 19:11, EEM) Kushinguula kwa myanda akwitukwasha dingi bwatudya kwikala na binangu bibuwa. Tatukimbi kuteka bakwetu bwabadya kwikala bapwidikye nya, atutentekyesha shi be na nkalakasho yatushi balombene kupusha byaidi. Atwikala na bukidi bwa kutemeesha bi mweneno aabo na su kwi mushindo nkukimba bya kumulonda.​—Fid. 4:5.

¹⁷ Mu nshalelo eetu. Bu byatudi balondji ba Yesu, atushinguula shi tatwi balombene kupeta kingi kinemo kikata kikile kya kwipaana mu mudimo wa kulungula mukandu wibuwa. Atutungunuka na kukita byabya p’atwe kwata bitshibilo bilombene kwitukwsha bwatudya kushala bepaane mu mudimo wetu. Atusangula bwa kutungunuka na kutuula myanda ya mu kikudi pa mbalo ya kumpala na kupelepeesha nshalelo eetu mu mushindo watudi balombene kwipaana mu mudimo ukile yooso ku muulo wa kulungula mukandu wibuwa kumpala kwashi nfudiilo ifikye.​—Mat. 6:33; 24:14.

18. Mushindo kinyi watudi balombene kushala mu lwendo lwetu lwa kipandjilo, na nkitshibilo kinyi kyodi nakyo?

¹⁸ Mmuloo kinyi watudi nao wa kulonga ingi myanda ya ku ngikashi ya Yesu! Banda kunangushena efuto dyatudi balombene kupeta pa kuuka ingi ngikashi ya Yesu na kulonga mushindo watudi balombene kumwambula. Byabya, twikaleyi na kitshibilo kya kulonda kalolo mu matabula aaye. P’atwe kukita byabya, atukyebe kushala mu lwendo lwetu lwa kipandjilo na atukyebe kwifubwila pepi ngofu na Yehowa, Muntu abadi bambule mu kupwidika kwi Yesu.