1, 2. а) Биз нәдип гутулыш ёлундан йөрәп билерис? б) Гутулыш ёлундан йөремәге нәме көмек эдер?

БИЗ Исаның шәгирди боланымызда, гөкдәки я-да ердәки яшайша элтйән сыяхат ёлуна дүшйәрис. Иса: «(Бу залым дүнйәниң я-да өмрүниң) соңуна ченли чыдан халас болар» дийди (Мат. 24:13). Биз гутулыш ёлундан йөремек үчин Худая вепалы болмалы. Эмма бу ёлдан совулмазлык ве азашмазлык үчин тагалла этмели (1 Яхя 2:15—17). Бизе ёлумызы довам этмәге нәме көмек эдер?

² Иса ёл гөркезиҗи хөкмүнде бизе аҗайып гөрелде галдырды. Мукаддес Язгыларда онуң сыяхаты беян эдилйәр. Биз бу барада билсек, Иса болан сөйгимиз ве иманымыз артар (1 Петрус 1:8, 9-нҗы аятлары окаң). Петрус ресул бизе Исаның «өз ызыны алып гөтермегимиз үчин... бир нусга галдырандыгыны» айдяр (1 Пет. 2:21). Эгер биз Исадан гөрелде алсак, гутулыша эе боларыс *.  Биз гечен макалада Исаның песгөвүнлилиги ве мәхирлилиги барада өврендик. Инди болса, нәдип Иса ялы батыргай ве дүшгүр болуп билҗекдигимиз хакында гүррүң эдерис.

3. Батыргайлык нәме ве оны нәдип өсдүрип билерис?

³ Батыргай адам чыдамлы, берк ве өзүне ынамлы боляр. Батыргайлык «бетбагтчылыга дөз гелмеги», «догрулыгың тарапыны тутмагы» ве «хорлуклары иман аркалы еңип гечмеги» аңладяр. Бу хәсиет Худайдан горкы, умыт ве сөйги билен берк багланышыклы. Нәме үчин? Худайдан горкы адамдан горкыны еңмәге көмек эдйәр (1 Шам. 11:7; Сүл. тым. 29:25). Хакыкы умыт сынаглара тайяр болуп, гелеҗеге ынамлы болмага ярдам эдйәр (Зеб. 27:14). Җанаямаз сөйги болса, башгалар үчин өз җаныңы бермәге-де тайын болмага хөвеслендирйәр (Яхя 15:13). Биз Худая бил багласак ве Онуң Оглы Исаның гөрелдесине эерсек, батыргай болуп билерис (Зеб. 28:7).

4. Иса ыбадатханада нәдип батыргайлыгыны гөркезди? (Макаланың башындакы сурата середиң).

⁴ Иса 12 яшында болса-да, батыргайлык билен догрулыгың тарапыны тутды. Бу вака онуң «ыбадатханада мугаллымларың арасында отырка» болупды (Лука 2:41—47-нҗи аятлары окаң). Мугаллымлар Мусаның кануныны говы билселер-де, оны берҗай этмән, дәп-дессурлара эерйәрдилер. Эмма Иса чекинип отурман, «олара сораг берйәрди». Элбетде, Иса билесигелиҗи чага ялы йөнекей дәл-де, ойландырыҗы сораглары берйәрди. Мугаллымлар теҗрибели болсалар-да, онуң совалларына җогап берип билмедилер. Олар Исаны ялңышдырҗак болуп, җеделли сораглары берйәрдилер. Йөне бу баша бармады. Себәби Иса Худайың Сөзүндәки хакыкаты айдярды ве «диңлейәнлериң бары онуң пайхасына, берйән җогапларына хайран галярды».

5. Иса нәдип батыргайлык билен ер йүзүнде гуллук этди?

⁵ Иса батыргайлык ер йүзүнде билен гуллук этди. Ол ялан таглыматлары өвредйән дини ёлбашчылары мертлик билен язгарярды (Мат. 23:13—36). Ол бу дүнйәниң азгын тәсирине гаршы дурярды (Яхя 16:33). Иса гаршылыклара гарамаздан, вагыз ишини довам эдйәрди (Яхя 5:15—18; 7:14). Ол хакыкы сеждәни горамак үчин, батыргайлык билен эрбет адамлары ики гезек ыбадатханадан ковяр (Мат. 21:12, 13; Яхя 2:14—17).

6. Иса ердәки өмрүниң соңкы гиҗеси нәдип батыргай болды?

⁶ Исаның батыргайлык билен кынчылыга дөз гелмеги бизиң иманымызы беркидйәр. Иса ердәки өмрүниң соңкы гиҗеси өзүне хайынлык эдилҗекдигини билйәрди. Эмма ол Пасха нахарындан соң Иуда: «Нәме этҗек болсаң, тиз эт» диййәр (Яхя 13:21—27). Иса Гетсемани багында туссаг этмәге гелен эсгерлере өзүниң кимдигини мертлик билен айдып, җанына ховп абанса-да, шәгиртлерини гораяр (Яхя 18:1—8). Исаны Меҗлисде сораг эденлеринде, баш руханы оны өлдүртмек үчин бахана  гөзлейәр. Шонда Иса өзүниң Месихдигини ве Худайың Оглудыгыны мертлик билен боюн аляр (Мар. 14:60—65). Иса хатда сүтемли өлүме хөкүм эдилсе-де, айыпсызлыгыны саклаяр ве соңкы деминде: «Хеммеси берҗай болды!» дийип җан берйәр (Яхя 19:28—30).

7. Ехованың адыны гөтерйәндигиңизе нәхили гараярсыңыз? Сиз нәдип батыргай болуп билерсиңиз?

⁷ Биз Исаның батыргайлыгындан нәдип гөрелде алып билерис? Мекдепде. Яшлар, сизе сынпдашларыңыз я-да башга адамлар гыҗалат берсе-де, Ехованың Шаядыдыгыңызы батыргайлык билен айдың. Шейдип, сиз Ехованың адыны буйсанч билен гөтерйәндигиңизи гөркезерсиңиз (Зебур 86:12-ни окаң). Белки-де, сиз эволюция ялы ялан таглыматлара гаршы дурмалы болянсыңыз. Мукаддес Язгыларда ярадылыша ынанмага энчеме субутнамалар гетирилен. Сиз «Мукаддес Язгылар өвредйәр» китабы аркалы «ичиңиздәки умыт хакында өзүңизден хасабат соран хер кесе» җогап берип билерсиңиз (1 Пет. 3:15). Шейдип, сиз Худайың Сөзүндәки хакыкаты голдарсыңыз.

8. Хош хабары гайратлы вагыз этмәге нәхили себәплер бар?

⁸ Вагызда. Биз месихчилер хөкмүнде Ехова барада «гайратлы вагыз этмели» (Рес. иш. 14:3). Батыргайлык билен вагыз этмәге нәхили себәплер бар? Биз Мукаддес Язгылардакы хакыкаты вагыз эдйәрис (Яхя 17:17). Шейле-де «Худайың ишдешлеридигимизе» ве мукаддес рухуң бизи голдаяндыгына ынанярыс (1 Кор. 3:9; Рес. иш. 4:31). Биз хош хабары ыхласлы вагыз эдип, Ехова болан вепалылыгымызы ве гоңшымыза болан сөйгимизи гөркезйәрис (Мат. 22:37—39). Батыргайлык җошгунлы вагыз этмәге көмек эдйәр. Биз адамларың акылыны күтелдйән ялан дини таглыматлары паш эдйәрис (2 Кор. 4:4). Шейле-де биз адамларың бипервайлыгына, кемситмелерине я-да гаршылыкларына гараман, хош хабары ыхласлы вагыз эдйәрис (1 Сел. 2:1, 2).

9. Бетбагтчылыга учранымызда нәдип батыргай болуп билерис?

⁹ Бетбагтчылыга учранымызда. Ехова болан иман бизе бетбагтчылыга учранымызда-да, батыргай болмага көмек эдйәр. Меселем, доган-гарындашларымыздан бири арадан чыканда өрән гынанярыс, йөне «бүтин теселлилер Худайының» бизи голдаҗакдыгына ынанярыс (2 Кор. 1:3, 4; 1 Сел. 4:13). Биз кеселчиликден эҗир чексек-де, мертлик билен Мукаддес Язгыларың принциплерине гаршы гелйән беҗергини алмаярыс (Рес. иш. 15:28, 29). Гөвнүчөкгүнлиге дүшенимизде «йүрегимиз бизи язгарса-да», Худайың «гөвни сыныклара» теселли берйәндиги рухландыряр * (1 Яхя 3:19, 20; Зеб. 34:18).

10. Дүшгүрлик нәме ве биз нәдип дүшгүр болуп билерис?

¹⁰ Дүшгүрлик ягшыны-яманы сайгармагы, пайхаслы болмагы ве догры  карара гелмеги аңладяр (Евр. 5:14). Дүшгүр адам Худая яраян ишлери этмәге чалышяр. Ол адамларың йүрегине яра салян дәл-де, рухландырыҗы сөзлери айтмага җан эдйәр (Сүл. тым. 11:12, 13). Дүшгүр адамың «гахары гич гелйәндир» (Сүл. тым. 14:29). Ол догры ишлери эдйәндир ве яшайыш ёлундан совулян дәлдир (Сүл. тым. 15:21). Биз нәдип дүшгүр болуп билерис? Мунуң үчин Худайың Сөзүни өвренмели ве шоңа гөрә яшамалы (Сүл. тым. 2:1—5, 10, 11). Бу бабатда дүнйәде иң дүшгүр адам болан Исаның гөрелдеси көмек эдер.

11. Иса дүшгүрлигини нәдип гөркезди?

¹¹ Исаның дүшгүрлилигини сөзде ве иш йүзүнде гөркезйәр. Онуң сөзлери. Иса «мәхирли сөзлер» билен хош хабары вагыз эденде, оны диңлейән адамлар хайран галярды (Лука 4:22; Мат. 7:28). Ол диңе Худайың Сөзүне салгыланып җогап берйәрди (Мат. 4:4, 7, 10; 12:1—5; Лука 4:16—21). Иса аятлары дүшүндиренде диңлейҗилериң йүрегине тәсир эдйәрди. Иса диреленден соңра ики саны шәгирдине душяр ве олара «Мукаддес Язгыларда өзи хакда айдыланлары дүшүндирйәр». Шонда шәгиртлер бири-бирине: «Ёлда бизиң билен геплешип гелйәркә, бизе Язгылары дүшүндирйәркә, ичимизде йүрегимиз янмаярмыды?» дийишйәлер (Лука 24:27, 32).

12, 13. Исаның «гахары гич гелйән» ве догры гарайышлы адам боландыгыны нәме гөркезйәр?

¹² Исаның гарайшы. Ол дүшгүр боланы үчин өзүне эрк эдйәрди, «гахары гич гелйәрди» (Сүл. тым. 16:32). Ол «мылайым ве песгөвүнлиди» (Мат. 11:29). Шәгиртлер көп ялңышсалар-да, Иса хемише сабырлы болярды (Мар. 14:34—38; Лука 22:24—27). Ол адалатсызлыга дучар болса-да, рахатлыгыны саклаярды (1 Пет. 2:23).

¹³ Исаның дүшгүрлиги догры гарайышда болмага көмек эдйәрди. Иса диңе бир Мусаның канунына дәл-де, Канундан ёкары болан руха эерйәрди. Гелиң, Маркус 5:25—34-нҗи аятлара (окаң) середелиң. Бир дул аял ган акма кеселинден эҗир чекйәр. Ол мәрекәниң арасы билен гелип, Исаның гейимине элини дегирйәр ве шол бада сагаляр. Эмма Мусаның канунына гөрә, ол хапа хасапланярды ве хич киме эл дегирмели дәлди (Лев. 15:25—27). Иса болса «Кануның ваҗып ишлерине», ягны рехимдар болмалыдыгына дүшүнйәрди. Шол себәпли ол гейимине элини дегрени аялы язгармаяр (Мат. 23:23). Гайтам, ол мәхир билен: «Гызым, иманың саңа шыпа берди. Саг-аман гит-де, дердиңден ачыл» дийди. Исаның дүшгүрлик хәсиети мәхирли болмага көмек эдйәр.

14. Иса нәмәни сайлады ве оны нәдип ерине етирди?

¹⁴ Исаның яшайшы. Ол дүшгүрлик билен догры ёлдан йөрейәр. Иса Патышалык ишлерини биринҗи орунда гойяр (Лука 4:43). Ол пайхаслылык билен вагыз ишини долы ерине етирер ялы, бар вагтыны ве гүйҗүни сарп эдип, сада яшаярды (Лука 9:58). Иса шәгиртлериниң вагыз ишини довам эдер ялы, олара өвредйәрди (Лука 10:1—12; Яхя 14:12). Шейле-де ол шәгиртлерине  «дүнйәниң соңуна ченли» көмек этҗекдигини вада берйәр (Мат. 28:19, 20).

15. Биз нәдип дүшгүр болуп билерис?

¹⁵ Гелиң, Исаның дүшгүрлигинден нәдип гөрелде алып боляндыгына середелиң. Айдян сөзлеримиз. Бизиң сөзлеримиз гөвне дегиҗи дәл-де, абатлайҗы болмалы (Эфес. 4:29). Адамлара Худайың Патышалыгыны вагыз эденимизде «сөзүмиз дуз билен тагамлы эдилип, якымлы болмалы» (Кол. 4:6). Биз вагызда адамларың зерурлыкларыны ве гарайшыны гөз өңүнде тутуп, айтҗак сөзлеримизе үнсли болмалы. Шонда бизиң мәхирли сөзлеримиз адамларың йүрегине гүйчли тәсир эдер. Шейле-де Худайың Сөзүне хормат гоюп, хемише Мукаддес Язгылара салгыланып вагыз этмели. Себәби йүреге ынсан сөзи дәл-де, Мукаддес Язгылар хас гүйчли тәсир эдйәр (Евр. 4:12).

16, 17. a) Биз нәдип «гахарланмакда асса» ве догры гарайышда болуп билерис? б) Вагыз ишини долы ерине етирмәге нәме көмек эдер?

¹⁶ Бизиң гарайшымыз. Дүшгүрлик өзүмизе эрк этмәге ве «гахарланмакда асса болмага» ярдам эдйәр (Якуп 1:19). Кимдир бири гөвнүмизе дегенде, гахарланмагың дерегине, онуң нәме үчин шейле эдендигине дүшүнмәге чалышмалы. Шонда биз өзүмизе эрк эдип, башгаларың «языгыны гечирип» билерис (Сүл. тым. 19:11). Шейле-де дүшгүрлик бизе догры гарайышда болмага көмек эдйәр. Себәби биз имандашларымызың душ гелен кынчылыкларына дүшүнйән дәлдирис, шонуң үчин олардан көп зада гарашмалы дәл. Гайтам, олары үнсли диңлемели, пикирини ве гарайшыны гөз өңүнде тутмалы (Флп. 4:5).

¹⁷ Бизиң яшайшымыз. Биз хош хабары вагыз этмегиң хорматлы ишдигине дүшүнйәрис. Шонуң үчин биз вагыз ишини долы ерине етирер ялы пайхаслы карара гелмели. Биз соңкы гүнлерде сада яшап, рухы затлары биринҗи орунда гоймалы ве өзүмизи иң ваҗып ише багыш этмели (Мат. 6:33; 24:14).

18. Гутулыш ёлундан йөремек үчин нәме этмели ве нәмәни йүрегимизе дүвмели?

¹⁸ Исаның аҗайып хәсиетлерини билип, ондан гөрелде алмагың нәхили шатлык ве берекет гетирйәндиги барада ойланың. Гелиң, онуң ызына эермеги берк йүрегимизе дүвелиң! Шонда биз гутулыш ёлундан йөрәп билерис ве Ехова билен достлугымыз хас-да беркидерис.