1, 2. (a) Paonan-o kita magkakaada kinabuhi nga waray kataposan? (b) Paonan-o kita makakapabilin nga nakapokus ha aton pagbiyahe ngadto ha kinabuhi nga waray kataposan?

HAN nagin disipulo kita han Kristo, sugad hin nagtikang kita hin pagbiyahe. Ito nga pagbiyahe mahimo magtugway ha aton ngadto ha kinabuhi nga waray kataposan, ha langit man o ha tuna. Hi Jesus nagsiring: “An magpailob tubtob ha kataposan [an kataposan han iya presente nga kinabuhi o hinin maraot nga sistema] amo an matatalwas.” (Mat. 24:13) Oo, kon magpapabilin kita nga matinumanon, magkakaada kita kinabuhi nga waray kataposan. Pero kinahanglan magbantay kita nga diri mawara an aton pokus. (1 Juan 2:15-17) Paonan-o kita makakapabilin nga nakapokus ha aton pagbiyahe?

² Hi Jesus nagpakita hin hingpit nga susbaranan para ha aton. Pinaagi ha pag-aram han ginsisiring han Biblia mahitungod han iya pagbiyahe, o paagi han pagkinabuhi, mahibabaroan naton an iya personalidad ngan mga pamaagi. Hihigugmaon naton hiya ngan magkakaada  kita pagtoo ha iya. (Basaha an 1 Pedro 1:8, 9.) Hinumdumi nga hi apostol Pedro nagsiring nga hi Jesus nagbilin ha aton hin susbaranan basi masunod naton hin maopay an iya mga pitad. (1 Ped. 2:21) Kon susundon gud naton ito, makakapadayon kita tubtob ha kataposan. * Ha nahiuna nga artikulo, aton hinbaroan kon paonan-o naton masusubad an pagin mapainubsanon ngan pagin mapinairon ni Jesus. Hini nga artikulo, aton hihisgotan kon paonan-o naton masusubad an iya pagin maisugon ngan pagin masinabuton.

3. Ano an kaisog, ngan paonan-o kita nagkakaada hito?

³ An kaisog usa nga pagbati nga mahimo magparig-on ngan bumulig ha aton ha pag-atubang hin mga kakurian. An pagin maisugon iginhuhulagway sugad nga “pag-ilob ha mga kakurian,” “pagdepensa ha kon ano an husto,” ngan “pagpabilin nga kalmado o may pagtoo kon nakakaeksperyensya hin pag-antos.” An kaisog may-ada koneksyon ha kahadlok, paglaom, ngan gugma. Ha ano nga paagi? An kahadlok ha Dios naghahatag ha aton hin kaisog nga maatohan an kahadlok ha tawo. (1 Sam. 11:7; Prob. 29:25) An tinuod nga paglaom nabulig ha aton nga magpokus ha tidaraon, diri ha aton naieksperyensyahan nga mga pagsari. (Sal. 27:14) An diri makikalugaringon nga gugma nagpapagios ha aton nga magin maisugon bisan kon mameligro an aton kinabuhi. (Juan 15:13) Nagkakaada kita hin kaisog pinaagi ha pagsarig ha Dios ngan pagsubad ha iya Anak.—Sal. 28:7.

4. Paonan-o hi Jesus nagpakita hin kaisog ha “butnga han mga magturutdo” ha templo? (Kitaa an retrato ha tinikangan hini nga artikulo.)

⁴ Bisan han 12 anyos pa la hi Jesus, maisugon nga gindepensahan niya kon ano an husto. Tagda an nahitabo han nakadto hiya “ha templo nga nalingkod ha butnga han mga magturutdo.” (Basaha an Lucas 2:41-47.) Ito nga mga magturutdo maaram gud diri la han Mosaiko nga Balaud kondi pati han mga tradisyon nga nagpakuri ha mga Judio ha pagsunod han Balaud. Pero hi Jesus waray mahadlok ha pagyakan; ‘nagpinakiana hiya ha ira.’ Sigurado nga an iya mga pakiana diri an kasagaran nga iginpapakiana han usa nga bata. Lugod, mahuhunahuna naton nga nagbangon hiya hin higlarom nga pakiana nga nakakuha han atensyon han mga magturutdo ngan nakaaghat ha ira nga maghunahuna. Ngan kon ginbitik man nira hi Jesus pinaagi hin mga pakiana nga magigin hinungdan hin pagdebate, napakyas hira. An ngatanan nga namamati, pati na an mga magturutdo, “nahipausa gud ha kahilarom han iya pagsabot ngan ha iya mga baton.” Oo, maisugon nga gindepensahan ni Jesus an kamatuoran ha Pulong han Dios!

5. Paonan-o hi Jesus nagpakita hin kaisog durante han iya ministeryo?

⁵ Durante han ministeryo ni Jesus, nagpakita hiya hin kaisog ha iba-iba nga paagi. Pananglitan, waray kahadlok nga iginbuhayhag niya an panlimbong han mga lider han relihiyon pinaagi han ira buwa nga katutdoan. (Mat. 23:13-36) Waray hiya magpaimpluwensya ha kalibotan. (Juan 16:33) Padayon hiya nga nagsangyaw bisan pa han mga pagkontra. (Juan 5:15-18; 7:14) Duha ka beses nga ginlimpyohan niya an templo, ginpaiwas adton naghuhugaw han tinuod nga pagsingba didto.—Mat. 21:12, 13; Juan 2:14-17.

6. Paonan-o hi Jesus nagpakita hin kaisog durante han ultimo nga adlaw han iya kinabuhi dinhi ha tuna?

⁶ An paghibaro mahitungod han pagin maisugon ni Jesus bisan pa han mga kakurian nagpaparig-on han aton pagtoo. Tagda an iya iginpakita nga kaisog durante han ultimo nga adlaw han iya kinabuhi dinhi ha tuna. Maaram hiya han mga mahitatabo kon trayduron na hiya ni Judas. Pero ha panihapon ha Paskua, ginsidngan niya hi Judas: “Kon ano an imo ginbubuhat, durodagmita ito.” (Juan 13:21-27) Ha hardin han Getsemani, maisugon nga nagpakilala hi Jesus ha mga  sundalo nga kumadto basi arestuhon hiya. Bisan kon namimeligro an iya kinabuhi, ginpanalipdan niya an iya mga disipulo. Iya ginsidngan an mga sundalo: “Palakta hira.” (Juan 18:1-8) Han ginbista hiya han Sanhedrin, maisugon nga iginsumat niya nga hiya an Kristo ngan an Anak han Dios, bisan kon maaram hiya nga namimiling la an hitaas nga saserdote hin rason basi ipapatay hiya. (Mar. 14:60-65) Gintipigan ni Jesus an iya integridad tubtob han iya kamatayon ha pasakitan nga kahoy. Ha iya ultimo nga gininhawa, hiya nagsinggit: “Natuman na!”—Juan 19:28-30.

7. Mga batan-on, ano an iyo inaabat ha pagin Saksi ni Jehova, ngan paonan-o niyo maipapakita an pagin maisugon?

⁷ Paonan-o naton masusubad an pagin maisugon ni Jesus? Ha eskwelahan. Mga batan-on, nagpapakita kamo hin kaisog kon iginsusumat dayon niyo ha iyo mga kaklase o ha iba nga mga Saksi ni Jehova kamo, bisan pa kon tamayon nira kamo. Hito nga paagi, iginpapakita niyo nga nalilipay gud kamo nga tawagon ha ngaran ni Jehova. (Basaha an Salmo 86:12.) Bangin piriton kamo nga tumoo ha ebolusyon. Pero may-ada kamo marig-on nga basihan nga tumoo ha ginsisiring han Biblia mahitungod ha paglarang. Mahimo niyo gamiton an brosyur nga The Origin of Life—Five Questions Worth Asking ha paghatag hin makakombinse nga baton ha mga naruruyag mahibaro han “basihan han iyo paglaom.” (1 Ped. 3:15) Ha pagbuhat hito, malilipay kamo tungod kay maaram kamo nga maisugon nga gindepensahan niyo an kamatuoran ha Biblia!

8. Kay ano nga sadang kita magin maisugon ha pagsangyaw?

⁸ Ha aton ministeryo. Sugad nga tinuod nga mga Kristiano, kinahanglan magpadayon kita ha pagsangyaw nga waray kahadlok “pinaagi han awtoridad ni Jehova.” (Buh. 14:3) Kay ano nga sadang kita magin maisugon ha pagsangyaw? Siyahan, maaram kita nga kamatuoran an aton iginsasangyaw tungod kay tikang ito ha Biblia. (Juan 17:17) Ikaduha, “mga igkasi-magburuhat [kita] han Dios” ngan ginbubuligan kita niya pinaagi han iya baraan nga espiritu. (1 Cor. 3:9; Buh. 4:31) Ikatulo, pinaagi han madasigon nga pagsangyaw, iginpapakita naton an aton debosyon kan Jehova ngan an aton gugma ha aton igkasi-tawo. (Mat. 22:37-39) Tungod kay maisugon kita, diri kita maundang ha pagsangyaw. Lugod, determinado kita nga itutdo an kamatuoran ha mga ‘nabutahan,’ o nalimbongan han mga lider han relihiyon. (2 Cor. 4:4) Ngan padayon naton nga isasangyaw an maopay nga sumat bisan pa han kawaray-interes, pagtamay, o pagkontra.—1 Tes. 2:1, 2.

9. Paonan-o naton maipapakita an kaisog kon nakakaeksperyensya kita hin kakurian?

⁹ Kon nakakaeksperyensya hin kakurian. An pagsarig ha Dios nabulig ha aton nga magkaada pagtoo ngan kaisog nga aton ginkikinahanglan basi mailob an kakurian. Kon namatyan kita hin hinigugma, nasusubo kita, pero diri kita nanluluya. Nasarig kita nga “an Dios han ngatanan nga pagliaw” magpaparig-on ha aton. (2 Cor. 1:3, 4; 1 Tes. 4:13) Kon may-ada kita grabe nga sakit o kadaot ha lawas, bangin nag-aantos kita hin kaul-ol, pero diri kita nakarawat hin pagtambal nga supak ha mga prinsipyo ha Biblia. (Buh. 15:28, 29) Kon nadidepres kita, bangin “hukman kita han aton kasingkasing,” pero tungod kay nasarig kita ha Dios nga “hirani hadton may masinakitnon nga kasingkasing,” diri kita nawawad-an hin paglaom. *—1 Juan 3:19, 20; Sal. 34:18.

10. Ano an pagsabot, ngan paonan-o ito iginpapakita han usa nga Kristiano ha iya mga pulong ngan buhat?

¹⁰ An pagsabot amo an maopay nga pagturotimbang—an abilidad ha paghibaro kon ano an husto ngan an sayop, ngan katapos an pagpili  nga buhaton an husto. (Heb. 5:14) Gintagan ito hin kahulogan sugad nga “an abilidad ha paghimo hin husto nga mga desisyon may kalabotan ha espirituwal nga mga butang.” An Kristiano nga may pagsabot nagyayakan ngan nagios ha paagi nga nakakapalipay ha Dios. Ginpipili niya an iya mga pulong basi makaparig-on ito imbes nga makasakit. (Prob. 11:12, 13) Hiya “mahinay ha pagkasina.” (Prob. 14:29) “Nakakahimo [hiya] pagpatadong han iya paglakat,” karuyag sidngon, naghihimo hiya hin husto nga mga desisyon. (Prob. 15:21) Paonan-o kita magkakaada pagsabot? Kinahanglan pag-adman naton an Pulong han Dios ngan iaplikar an aton hinbabaroan. (Prob. 2:1-5, 10, 11) Makakabulig liwat kon pag-aadman ngan susubaron naton an hingpit nga susbaranan ni Jesus ha pagin masinabuton.

11. Paonan-o iginpakita ni Jesus an pagsabot pinaagi ha iya mga pulong?

¹¹ Iginpakita ni Jesus an pagin masinabuton ha iya mga pulong ngan buhat. Ha iya mga pulong. Ha iya pagsangyaw han maopay nga sumat, ginamit hiya hin “makaruruyag nga mga pulong,” ngan nahipausa gud hito an iya mamarati. (Mat. 7:28; Luc. 4:22) Agsob hiya magbasa o magkotar han Pulong han Dios. Maaram gud hiya kon ano nga teksto an angayan gamiton ha tagsa nga sitwasyon. (Mat. 4:4, 7, 10; 12:1-5; Luc. 4:16-21) Iginsaysay liwat niya an Kasuratan ha paagi nga nakakabantad han kasingkasing han iya mamarati. Han ginbanhaw hiya, nakiistorya hiya ha iya duha nga disipulo samtang nagbabaktas tipakadto ha Emaus. Iya “iginsaysay ha ira an mga butang mahitungod ha iya ha bug-os nga Kasuratan.” Ha urhi, an iya mga disipulo nagsiring: “Diri ba nabantad gud an aton kasingkasing . . . samtang iya iginsasaysay ha aton hin maopay an Kasuratan?”—Luc. 24:27, 32.

12, 13. Ano nga mga ehemplo an nagpapakita nga hi Jesus mahinay ha pagkasina ngan makatadunganon?

¹² Ha iya emosyon ngan disposisyon. An pagsabot nakabulig kan Jesus nga magin “mahinay ha pagkasina.” (Prob. 16:32) Nakukontrol niya an iya emosyon, ngan “malumo” hiya. (Mat. 11:29) Pasensyoso hiya ha iya mga disipulo bisan pa han ira mga sayop. (Mar. 14:34-38; Luc. 22:24-27) Ngan nagpabilin hiya nga kalmado bisan kon diri maopay an pagtratar ha iya.—1 Ped. 2:23.

¹³ An pagsabot nakabulig liwat kan Jesus nga magin makatadunganon. Nasabtan niya an katuyoan han Mosaiko nga Balaud, ngan nakaapekto ito han iya pagtratar ha mga tawo. Pananglitan, tagda an asoy ha Marcos 5:25-34. (Basaha.) An usa nga babaye nga gindidinugoan sinuksok ha mga tawo, kinapot ha bado ni Jesus, ngan natambal. Sumala ha Balaud, mahugaw hiya, salit diri niya sadang kaptan an bisan hin-o. (Leb. 15:25-27) Pero hi Jesus waray masina ha iya. Lugod, nagpakita hi Jesus hin “kalooy ngan pagkamatinumanon” tungod kay maaram hiya nga mas importante ito nga mga kalidad kay han istrikto nga pagsunod ha Balaud. (Mat. 23:23) Hi Jesus may pagkabuotan nga nagsiring ha babaye: “Anak, tungod han imo pagtoo nag-opay ka. Lakat nga mamurayawon, ngan mag-opay ka ha imo grabe nga sakit.” An pagin masinabuton ni Jesus nagpagios ha iya nga magpakita hin pagkabuotan. Makapabantad gud ito!

14. Ano an ginpili ni Jesus nga buhaton, ngan paonan-o hiya nagpabilin nga pokus ha iya ministeryo?

¹⁴ Ha paagi han iya pagkinabuhi. Iginpakita ni Jesus an pagsabot pinaagi ha pagpili hin husto nga paagi han pagkinabuhi. Nagpokus hiya ha pagsangyaw han maopay nga sumat, ginhimo niya ito nga karera. (Luc. 4:43) Naghimo liwat hiya hin mga desisyon nga nakabulig ha iya nga makapokus ha buruhaton ngan matapos an iya toka. Pananglitan, gintipigan niya nga simple an iya pagkinabuhi basi magamit niya an iya panahon ngan kusog ha ministeryo. (Luc. 9:58) Maaram hiya nga kinahanglan niya bansayon an iba basi maipadayon an pagsangyaw nga buruhaton kamatay niya. (Luc. 10:1-12; Juan 14:12) Ngan nagsaad hiya nga bubuligan niya an iya mga  sumurunod ha pagtuman hito nga buruhaton “tubtob ha ikatarapos hini nga sistema.”—Mat. 28:19, 20.

15. Paonan-o naton maipapakita an pagin masinabuton pinaagi han aton mga pulong?

¹⁵ Paonan-o naton masusubad an pagin masinabuton ni Jesus? Ha aton mga pulong. Kon nakikiistorya kita ha kabugtoan, nagamit kita hin mga pulong nga makaparig-on imbes nga makapaluya. (Efe. 4:29) Ngan kon nagsasangyaw kita mahitungod ha Ginhadian han Dios, aton ‘gintitimplahan hin asin’ an aton mga pulong. (Col. 4:6) Nangangalimbasog kita nga hibaroan an panginahanglan han tagbalay ngan an nakakapainteres ha iya, katapos aton iginpapahiuyon an aton mga pulong. Kon buotan kita makiistorya, mahimo mamati ha aton an mga tawo ngan mabantad an ira kasingkasing han aton mensahe. Dugang pa, kon iginsasaysay naton an aton gintotoohan, nagbabasa o nagkukotar kita tikang ha Biblia kon posible tungod kay pulong ito han Dios. Maaram kita nga an mensahe han Biblia mas gamhanan gud kay ha anoman nga mahimo naton isiring.—Heb. 4:12.

16, 17. (a) Paonan-o naton maipapakita nga diri dayon kita nasisina ngan makatadunganon kita? (b) Paonan-o kita makakapabilin nga nakapokus ha aton ministeryo?

¹⁶ Ha aton emosyon ngan disposisyon. An pagsabot nabulig ha aton nga makontrol an aton emosyon ngan “diri dayon masina.” (San. 1:19) Kon may nakakapasina ha aton, nangangalimbasog kita nga sabuton kon kay ano nga nakayakan o nakabuhat hiya hin sugad. Mabulig ini nga mawara an aton kasina ngan ‘pasayloon’ hiya. (Prob. 19:11) An pagsabot nabulig liwat ha aton nga magin makatadunganon. Diri naton ginlalaoman nga hingpit an aton kabugtoan. Lugod, ginhuhunahuna naton nga bangin may mga problema hira nga diri naton bug-os nga nasasabtan. Andam kita mamati ha ira mga opinyon, ngan kon angayan, ginkakarawat naton ito.—Fil. 4:5.

¹⁷ Ha paagi han aton pagkinabuhi. Sugad nga mga sumurunod ni Jesus, maaram kita nga waray na mas daku nga pribilehiyo nga aton makakarawat kay ha pagsangyaw han maopay nga sumat. Salit naghihimo kita hin mga desisyon nga mabulig ha aton nga magpabilin nga nakapokus ha aton ministeryo. Gin-uuna naton an espirituwal nga mga butang ngan gintitipigan nga simple an aton pagkinabuhi basi magamit an aton panahon ngan kusog ha pagsangyaw nga buruhaton antes umabot an kataposan.—Mat. 6:33; 24:14.

18. Paonan-o kita makakapabilin ha aton biyahe ngadto ha kinabuhi nga waray kataposan, ngan ano an imo determinasyon?

¹⁸ Makalilipay gud an paghibaro mahitungod han pipira han mag-opay nga kalidad ni Jesus! Hunahunaa la an aton mapapahimulosan kon pag-aadman naton an iba pa niya nga kalidad ngan kon susubaron gud naton hiya. Salit, hinaot magin determinado kita nga sundon hin maopay an iya mga pitad. Ha pagbuhat hito, makakapabilin kita ha aton biyahe ngadto ha kinabuhi nga waray kataposan ngan magigin mas duok kita kan Jehova, an Usa nga ginsubad ni Jesus hin bug-os.