1-3. Bõe yĩng tɩ ra pa na n yɩ nana ne a Zezi karen-biisã tɩ b moon koɛɛgã “dũniyã tɛk fãa”?

A ZEZI KIRIST sẽn kõ a karen-biisã tʋʋmd ningã pa tʋʋm-bil ye. A yeel-b-la woto: “Bɩ y kẽng n maan nebã buud fãa tɩ b yɩ mam karen-biisi.” B ra segd n tʋma tʋʋm-kãng hal tɩ Wẽnnaam soolem koe-noogã ‘moon dũniyã tɛk fãa tɩ yɩ kaset buud fãa yĩnga.’—Mat. 24:14; 28:19.

² Karen-biisã ra nonga a Zezi la koe-noogã me. La tõe tɩ b ra sokda b mens woto: ‘Tõnd na n maana wãn n tõog tʋʋmdã?’ Sɩd me, b sõorã ra paoodame. Sẽn paase, b ra moondame t’a Zezi yaa Wẽnnaam Biiga, tɩ nebã yaool n miẽ tɩ b kʋ-a lame. Neb wʋsg ra miime me tɩ karen-biisã yaa ‘nin-tals sẽn ka paam zãmsgo.’ (Tʋʋ. 4:13) La b ra segd n moona koɛɛg sẽn kɩɩsd tũudmã taoor dãmb sẽn da zãmsd nebã bũmb ninsã. Tũudmã taoor dãmb yaool n da zãmsa minimd nins zʋɩf-rãmbã sẽn sɩng n tũud hal daar zãrã, n mi-b sõma. B sẽn da pa nand karen-biisã Israyɛll  soolmẽ wã, tõe tɩ b ra maanda sãmb-sãmb ne tɩ moon Rom soolem a taabã. Bala, Israyɛll ra pa zem baa fʋɩ Rom soolmã pʋgẽ ye.

³ Sẽn paase, a Zezi reng n yeela a karen-biisã tɩ nebã na n kisg-b lame la b nams-ba, la tɩ b na n kʋʋ kẽer menga. (Luk 21:16, 17) B zo-rãmb la b roagdb ra na n zãmb-b lame. Neb me n da na n yetẽ tɩ b yaa kiris-neba, n yaool n zãmsd nebã sẽn pa sɩda. Karen-biisã ra segd n moona nin-wẽns sʋk me. (Mat. 24:10-12) La wãn to la b ra na n tõog n moon koɛɛgã “dũniyã tɛk fãa”? (Tʋʋ. 1:8) Yaa vẽeneg tɩ zu-loe-kãensã ra yɛɛsda karen-biisã.

4. Pipi kiris-nebã koe-moonegã woma bi-bʋse?

⁴ Baa karen-biisã sẽn da mi tɩ tʋʋmdã pa na n yɩ nana wã, b saka a Zezi noorã n moon koe-noogã Zerizalɛm, Zide, Samari la tẽns a taaba. Sẽn wa n na n ta yʋʋm 30 tɩ b toga soay n tɩ moon zĩis wʋsgo. Koe-noogã taa “dũniyã tɛk fãa,” tɩ buud toor-toor neb lebg kiris-neba. (Kol. 1:6, 23) Wala makre, a Poll sẽn moon koɛɛgã Sɩpr sẽn yaa ko-sʋk tẽngã, guvɛrneer a Sɛrzius Polus tẽeme. Bala, “Zu-soabã kareng yɛɛsa yẽnda.”—Karm-y Tʋʋm 13:6-12.

5. a) Bõe la a Zezi ra pʋlem a karen-biisã? b) Bõe la sebr a yembr yeel pipi kiris-nebã wakatã wɛɛngẽ?

⁵ A Zezi karen-biisã ra miime tɩ b pa tõe n tʋm tʋʋmdã ne b mens pãng ye. La b ra miime me t’a pʋlmame t’a na n zĩnda ne-ba, la tɩ vʋʋsem sõngã na n sõng-b lame. (Mat. 28:20) Yɛlã sẽn da yaa to-to wakat kãngã me sõngame tɩ Rĩungã koɛɛg mooneg yɩ nana. Sebr a yembr yeelame tɩ koɛɛgã mooneg sẽn sɩng pipi kiris-nebã wakatã zemsa kɛpɩ. A paasame tɩ kaoosg zugẽ, kiris-nebã wa n yetame tɩ yaa Wẽnnaam n maneg yɛlã sẽn na yɩl tɩ Kirist koɛɛgã ta dũniyã fãa.

6. a) Bõe yell la d na n gom sõs-kãngã pʋgẽ? b) Bõe yell la d na n gom sõsg ning sẽn pʋgdã pʋgẽ?

⁶ Sɩd yaa a Zeova n toeem yɛlã pipi kiris-nebã wakatẽ, sẽn na yɩl tɩ b tõog n moon koɛɛgã bɩ? Biiblã pa yeel rẽ ye. La d miime t’a Zeova ra ratame t’a nin-buiidã moon koe-noogã, la t’a Sʋɩtãan pa tõe n gɩdg tɩ koɛɛgã pa moon ye. Sõs-kãngã na n wilgame tɩ yɛl kẽer sẽn da yaa to-to pipi kiris-nebã wakatã sõngame, tɩ koɛɛgã mooneg yɩ nana. Sõsg ning sẽn pʋgdã na n goma tõnd wakatã yelle, n wilg bũmb kẽer sẽn sõngd tɩ koɛɛgã moond dũniyã gill zugu.

7. Pipi kiris-nebã wakatẽ, yɛlã ra yaa wãn Rom soolmẽ wã, la bõe n kɩt tɩ wakat kãng yɩ toore?

⁷ Rom soolmã yɛl kẽer sẽn da yaa to-to wã sõnga kiris-nebã. Wala makre, bãan da bee soolmã pʋgẽ. Wakat kãnga, Rom sodaasã ra bee soolmã tõre, tɩ nin-buiidã zĩ bãane. Yaa sɩd tɩ wakat-wakate, ‘zabr la zabr kibar’ zĩnda wa a Zezi sẽn deng n togsã. (Mat. 24:6) Makre, Rom sodaasã sãama Zerizalɛm yʋʋmd 70 soabã. B zaba zab-bõones Rom soolmã todsẽ wã me. La bãan da bee soolmã babs fãa la bal pʋsẽ, t’a Zezi karen-biisã ra tõe n tog soay nana-nana n tɩ moon koɛɛgã. Kell n yɩɩ woto n maan yʋʋm 200 la bala. Sebr a yembr  yeelame tɩ ninsaalbã sẽn be tẽng zug tɛka, bãan ra nan zɩ n zĩnd zĩis wʋsg n kaoos n ta woto, la t’a buud pa le zĩnd ye.

8. Wãn to la bãanã sẽn da be Rom soolmẽ wã sõng kiris-nebã koɛɛgã mooneg pʋgẽ?

⁸ Yʋʋm kobs-yi la zak a Zezi rogmã poore, bãngd a ye yʋʋr sẽn boond t’a Orizɛn gʋlsa sebr n gom bãan ning sẽn zĩnd pipi kiris-nebã wakatã yelle. A yeelame tɩ Rom soolmã sẽn da yalmã, karen-biisã ra tõe n moona tẽns wʋsg pʋsẽ. Nin-buiidã ra vɩɩ bãane, tɩ pa tɩlae tɩ ned kam fãa zab n kogl a tẽng ye. A Orizɛn ra tagsdame tɩ rẽ kɩtame tɩ neb wʋsg ra tõe n kelg karen-biisã sẽn moond n gomd nonglem la bãan yellã. Baa b sẽn da namsd karen-biisã, b tũnuga ne bãanã n moon koɛɛgã sõma zĩig fãa.—Karm-y Rom dãmb 12:18-21.

9, 10. Bõe n kɩt tɩ so-toak ra yaa nana ne a Zezi karen-biisã?

⁹ Rom nebã ra tugsa soay wʋsg b soolmã babs toɛy-toɛyã. B soayã woglem sã n naag taaba, yɩɩda kilo tus pis-nii. Woto kɩtame tɩ Rom sodaasã sẽn da kogend tẽngã la nin-buiidã tõe n ta soolmã babg ning fãa b sẽn dat tao-tao. Kiris-nebã me toga soay so-kãens zutu, n pasg weto, rasempʋɩɩs la b rʋʋg tãens n tɩ moon zĩis wʋsgo.

¹⁰ Rom nebã ra tara koom-kogend me n togd soaya. B ra kẽnda kʋɩls zut la mogrã zugu, tɩ zĩis wʋsg be koom-kogend sẽn tõe n yalse. Rẽ n so tɩ kiris-nebã ra tõe n kẽ koom-kogend n kẽng zĩis wʋsgo. B sã n da togd sore, ned pa sokd-b sɛb yell me ye. Sẽn paase, bi-bees ra pa waoog soayã zut ye. Bala, Rom sodaasã sã n da yõk bi-bɛɛga, b sɩbgd-a-la sõma. Sodaasã ra tara koom-kogend wʋsg me n kẽnd mogrã zugu. Kɩtame tɩ neb nins sẽn da togd soay mogrã zugã pa yɛɛsd bi-bees na n wa fã-b ye. Wala makre, baa Biiblã sẽn yeel t’a Poll kẽe koom-kogend tɩ sãam naoor wʋsgo, la t’a paama toog mogrã pʋgẽ la zĩis a taabã, a pa yeel tɩ bi-bees n fã-a mogrã zug ye.—2 Kor. 11:25, 26.

11. Bõe yĩng tɩ karen-biisã ra moond koɛɛgã ne gɛrk buud-gomdã, la b gʋls Biiblã sɛb a taabã ne buud-gom-kãnga?

¹¹ Gɛrk buud-gomdã sõngame tɩ kiris-nebã ra tõe n toond taab kibay tigims toɛy-toɛyã pʋsẽ, tɩ zems-n-taar be b sʋka. A Alɛgsãndr le Gãrã sẽn da zab n dees tẽns wʋsgã kɩtame tɩ neb wʋsg zãms gɛrk buud-gomdã. Woto kɩtame tɩ karen-biisã ra tõe n moon koɛɛgã ne buud-gom-kãnga. B ra tõe n karma Gʋlsg Sõamyã tɩ b kelg menga. Bala, zʋɩf-rãmb sẽn da vɩ Ezipt n lebg Gʋlsg Sõamyã sẽn da yaa ne hebre wã gɛrk buud-gomdã pʋgẽ, n bool-a tɩ Sɛptãnte. Neb wʋsg ra mii Sɛptãntã. Sẽn paase, kiris-nebã mikame tɩ gɛrk buud-gomdã tara gom-biis wʋsgo, n bilgd yɛlã takɩ me. Rẽ n so tɩ b gʋls Biiblã sɛb a taabã ne gɛrk buud-gomdã.

12. a) Kodɛgs yaa bõe, la bõe yĩng t’a tall n moon yaa nana n yɩɩd seb-pindem? b) Wakat bʋg la kiris-nebã sɩng kodɛgsã tall n moone?

¹² Bõe la pipi kiris-nebã ra tar n zãmsd nebã Biiblã? Sɩngrẽ wã, b ra tara seb-pindem n moondẽ. La seb-pindem zãab la a tall n moon pa nana  ye. F sã n da rat n karem vɛrse fãa, f segd n yidg-a lame, la f lebs n pili. B ra wae n gʋlsda seb-pindmã nen-yɛng bala. A Matɩe Evãnzillã yen-ye pita seb-pindem. La b wa n yiisa kodɛgsã sẽn wõnd tõnd rũndã-rũndã sɛbã. Kodɛgs ra yaa seb-vãad b sẽn rɩk n naag taab n sẽ. Ned sã n da rɩk kodɛgse, a tõe n lakame n yã zĩig ning a sẽn dat n karmã nana-nana. Kʋdemdã yel-mitb wilgame tɩ pa yã n kaoos la kiris-nebã sɩng kodɛgsã tall n moone, la tɩ wʋsg ra moonda ne kodɛgsã yʋʋm koabg la zak a Zezi rogmã poore.

13, 14. a) Wãn to la a Poll sẽn da yaa Rom nedã kogl-a? b) Wãn to la Rom laloa wã naf kiris-nebã?

¹³ Rom laloa wã me nafa pipi kiris-nebã. Wala makre, a Poll ra yaa Rom neda, tɩ laloa wã sẽn gãneg noy ninsã kogl-a naoor wʋsg a so-togsã sasa. Rom sodaasã sẽn wa n yõk-a Zerizalɛm n dat n pãbã, a soka sodaas koabg naabã woto: “A zemsa tõog tɩ yãmb pãb Rom ned ne kalwaas t’a bʋʋd nan ka kao bɩ?” Rom laloa wã ra gɩdga rẽ. Sodaas tusr naabã soka a Poll a sẽn maan to-to n lebg Rom neda, t’a leok tɩ yẽ roga ne. Woto, “neb nins sẽn da na n pãb a Pollã basa yẽnda. La rabeem yõka sodaas tusr naabã, yẽ sẽn bãng t’a Poll yaa Rom nedã, la yẽ sẽn da sẽb yẽnda wã yĩnga.”—Tʋʋ. 22:25-29.

¹⁴ A Poll sẽn da yaa Rom nedã, Rom laloa wã maasem yĩnga, a paama lohorem Filip tẽngã pʋgẽ. (Tʋʋ. 16:35-40) Efɛɛz me, neb kʋʋng n dãmb tẽngã, tɩ tẽngã gʋlsd kɩt tɩ b sĩndi, la a yeel tɩ b sẽn maanã pa zems ne Rom laloa wã ye. Woto kɩtame tɩ kʋʋngã sãeege. (Tʋʋ. 19:35-41) Kaoosg zugẽ, a Poll sẽn wa n be bãens roog Sezaare wã, a sẽn yaa Rom nedã kõ-a-la sor t’a yeel tɩ yẽ ratame tɩ yɩ a Sezaar n na n kao a bʋʋdã. Rẽ kɩtame t’a tõog n tɩ gom a tẽebã yell Rom naabã taoore. (Tʋʋ. 25:8-12) Dẽnd Rom laloa wã sõngame tɩ kiris-nebã gom bʋ-kaoodb taoore, n ‘wilg tɩ koe-noogã yaa sɩda.’—Fil. 1:7.

15. Pipi kiris-nebã wakat tɩ zʋɩf-rãmbã ra sãeeg n vɩɩ yɛ?

¹⁵ Bũmb a to n sõng tɩ pipi kiris-nebã  tõog n moon koɛɛgã dũniyã tɛk fãa. Wakat kãng tɩ zʋɩf-rãmbã ra pa be Israyɛll soolmẽ wã bal ye. B ra sãeeg n bee tẽns wʋsgo. Bõe n kɩt tɩ ra yaa woto? Yʋʋm kobs sẽn deng rẽ, Asiiri nebã yõga zʋɩf-rãmb n kẽng yembdo, tɩ Babilon nebã me wa yõg zʋɩf-rãmb a taab n kẽng yembdo. Pɛrs-rãmbã sẽn wa n zab n tõog Babilonnã poore, zʋɩf-rãmb n da be Pɛrs soolem koabg la pisi la a yopoe wã fãa pʋsẽ. (Ɛst. 9:30) A Zezi sẽn wa n moond koɛɛgã tɩ zʋɩf-rãmb n be Ezipt la Afirikdinoor tẽns a taaba, Gɛrse, Aazimineer la Mezopotami. Kʋdemdã yel-mitb kẽer yetame tɩ Rom soolmã neb ra taa milyõ pis-yoobe, tɩ zʋɩf-rãmbã yaa milyõ a naase. Baa zʋɩf-rãmbã sẽn da sãeeg n be zĩis wʋsgã, b ra ket n maanda b tũudmã yɛla.—Mat. 23:15.

16, 17. a) Wãn to la zʋɩf-rãmbã sẽn sãeegã naf sẽn pa-b zʋɩf-rãmbã? b) Bõe la zʋɩf-rãmbã ra maanda, tɩ kiris-nebã rɩk b togs-n-taare?

¹⁶ Zʋɩf-rãmbã sẽn da sãeeg n be tẽns wʋsg woto wã, kɩtame tɩ neb wʋsg sẽn pa zʋɩf-rãmb mi bũmb kẽer Gʋlsg Sõamyã zugu, la zʋɩf-rãmbã sẽn tẽed bũmb ninsã zugu. Wala makre, b ra miime tɩ Wẽnnaam sɩd-sɩdã yaa a ye, la tɩ neb nins sẽn tũud-a wã segd n saka a noyã fãa. B ra miime me tɩ Gʋlsg Sõamyã yita Wẽnnaam nengẽ, la tɩ bãngr-goam wʋsg n be be n gomd Mesi wã yelle. (Luk 24:44) Rẽ n so tɩ kiris-nebã sã n da moond koɛɛgã, zʋɩf-rãmbã la neb a taabã ra zoe n mi bũmb kẽer yell b sẽn gomdã. A Poll ra baooda neb sẽn na n sak n kelg koɛɛgã. A ra mi n kẽnda zʋɩf-rãmbã karen-dotẽ, n sõsd ne-b Gʋlsg Sõamyã zugu.—Karm-y Tʋʋm 17:1, 2.

¹⁷ Zʋɩf-rãmbã ra minim n tigimda taab b karen-dotẽ wã wall zĩis a taab n pʋʋsdẽ. Wakat kãnga, b yɩɩndame, b pʋʋsdame, la b zãmsd Gʋlsg Sõamyã. Pipi kiris-nebã rɩka b togs-n-taare. Rũndã-rũndã, tõnd me maanda woto d tigimsã pʋsẽ.

18, 19. a) Wãn to la yɛlã sẽn da yaa to-to pipi kiris-nebã wakatẽ wã sõng-ba? b) Sõs-kãngã wilga yãmb bõe a Zeova zugu?

¹⁸ Yaa vẽeneg tɩ yɛlã sẽn da yaa to-to pipi kiris-nebã wakatẽ wã sõngame tɩ koɛɛgã mooneg yɩ nana ne-ba. Wala makre, bãan da bee Rom soolmã pʋgẽ, neb wʋsg ra wʋmda gɛrk buud-gomdã, so-toak ra lebga nana, Rom laloa wã ra kogenda nin-buiidã, tẽns toor-toor neb ra mii bũmb kẽer Gʋlsg Sõamyã zug la zʋɩf-rãmbã sẽn tẽed bũmb ninsã zugu. Woto fãa sõnga kiris-nebã tɩ b tõog n tʋm tʋʋmd ning Wẽnnaam sẽn kõ-bã.

¹⁹ Na maan yʋʋm 400 sẽn deng a Zezi rogmã, Gɛrs bãngd a Platõ yeelame tɩ ninsaalbã pa tõe n bãng Naandã, la tɩ b pa tõe n gom Naandã yell ne dũniyã nebã fãa ye. La a Zezi yeelame tɩ “bũmb nins sẽn yaa toog ne nebã yaa naana ne Wẽnnaam.” (Luk 18:27) Vẽenega, yaa a Zeova n sõng pipi kiris-nebã tɩ b moon koɛɛgã. A ratame tɩ ‘nebã buud fãa’ wʋm koe-noogã la b bãng-a. (Mat. 28:19) Sõsg ning sẽn pʋgdã na n wilga d sẽn moond koe-noogã to-to dũniyã gill zug rũndã-rũndã.