1. Anto ran subok ed panagpulong so dinalan na saray Kristiano ed sayan modernon panaon?

NEN inggapon ipulong na Saray Estudyante na Biblia * so maong a balita masulok ya 130 taon lay apalabas, dakel so dinadalan dan subok. Singa saray Kristiano nen inmunan siglo, say mensahen impulong da et aglabay na dakel a totoo. Dagdaiset ira, tan diad pakanengneng na totoo et abebay aral da. Sakey ni, nen imbantak si Satanas diad dalin, naeksperiensya day graben panamasegsegang. (Apo. 12:12) Tan kaukolan dan ituloy so panagpulong a kimey ed sayan “nikadkaduma tan mair-irap” ya “kaunoran iran agew.”—2 Tim. 3:1.

2. Antoy gagawaen nen Jehova pian natulongan itayod panagpulong natan?

² Anggaman ontan, gagala nen Jehova ya diad panaon tayo et nipulong na saray lingkor to so maong a balita diad interon mundo, tan anggapon balot so makaamper ed pakasumpal na satan.  No panon ya imbulos toy nasyon na Israel nensaman ed Babilonia, imbulos to met iray lingkor to ed sayan panaon ed “Makapanyarin Babilonia,” say empiryo na palson relihyon. (Apo. 18:1-4) Ibabangat to itayo parad pankaabigan tayo, bebendisyonan to itayo na deen, tan tutulongan to itayo pian ninabang tayod arum iray bangat to. (Basaen so Isaias 48:16-18.) Balet aglabay ya ibaga na satan ya imamaneobra nen Jehova iray nagagawad mundo pian nasumpal so panagpulong a kimey. Tua, wala ray agawad mundo ya lapud saratan et nagmaliw ya mainomay so panagpulong. Balet dia labat ed tulong nen Jehova kanian nitutultuloy tayoy panagpulong anggano wala ni ray naeeksperiensya tayon panamasegsegang tan kairapan ed sayan mundo ya uuleyan nen Satanas.—Isa. 41:13; 1 Juan 5:19.

3. Panon ya dinmaak so tuan pikakabat?

³ Pinuyanan nen Jehova si propetan Daniel pian ipasakbay ya say tuan pikakabat et ondaak ed panaon na anggaan. (Basaen so Daniel 12:4.) Tinulongan nen Jehova iray Estudyante na Biblia pian natalosan day manuna iran katuaan ed Kasulatan ya abayag ya niyamot lapud saray doktrina na Kakristianoan. Uusaren to natan iray lingkor to pian ipaamta so tuan pikakabat ed interon mundo. Nanenengneng tayo la natan so kasumpalan na propesiya nen Daniel. Ngalngali 8,000,000 lay angawat ed katuaan ed Biblia tan ipupulong da itan ed interon mundo. Anto ray rason no akin ya nagmaliw itan ya posible?

4. Panon kalaknab so panagpatalos na Biblia nen 1800’s?

⁴ Diad panaon tayo, dakel so walaan na Biblia tan akatulong itan ed pangipupulong tayod maong a balita. Pigaran siglo ya sinebelan na saray lider na Kakristianoan iray totoo ya manbasa na Biblia. Pinasegsegang da ni ra ingen tan pinatey da so arum ya angipatalos ed satan. Balet nen 1800’s, wala la ray organisasyon ya angipatalos odino angimprinta ed interon Biblia odino kabiangan na satan ed manga 400 ya lenguahe. Nen taon 1900, dakel lan totoo so walaan na Biblia balet agda nin siansia natatalosan itan.

5. Antoy ginawa na Saray Tasi nen Jehova ed panangipatalos na Biblia?

⁵ Amta na Saray Estudyante na Biblia ya kaukolan day manpulong, tan ginawa day anggaay nayarian dan ibangat so Biblia ed arum. Angusar tan angibunog iray lingkor nen Jehova na nanduruman bersion na Biblia. Manlapu nen 1950, im-publish da so intero odino kabiangan na New World Translation of the Holy Scriptures diad masulok ya 120 a lenguahe. Nen 2013, im-publish da so revised English edition na New World Translation. Lapud mainomay itan ya talosan, mainomay met ya ipatalos ed arum a lenguahe. No mas malinew so Biblia ya usaren tayo, mas mainomay ya ipulong so katuaan.

6, 7. (a) Anto ran guerra so agawa diad apalabas a 100 taon? (b) Panon ya akatulong ed panagpulong a kimey so mareen iran panaon diad arum a bansa?

⁶ Nayarin nitepet mo, ‘Wala tay panaon ya nagmaliw a mareen so mundo?’ Diad tua, minilyon so inatey diad apalabas ya 100 taon lapud guerra, lalo lad samay duaran sankamundoan a guerra. Balet kaleganay Sankamundoan a Guerra II nen 1942, diad sakey a kombension et impaliwawa nen Nathan Knorr, say mangidadaulo ed kimey na Saray Tasi nen Jehova ed saman, so teman “Kareenan—Kasin Mansiansia Itan?” Impaliwawa to ray ebidensya base ed Apocalipsis kapitulo 17 ya satan a guerra et  agmansumpal ed Armagedon, noagta tumbokan itan na panaoy kareenan.—Apo. 17:3, 11.

⁷ Siempre agto labay ya ibagan kayari Sankamundoan a Guerra II et walay kareenan ed amin a pasen. Manlapud 1946 anggad 2013 et walay 331 ya nanduruman guerra, tan minilyon so inatey. Balet diad saratan a taon, dakel met so bansa ya nibagan mareen, kanian mas mainomay ya nipulong na saray lingkor nen Jehova so maong a balita. Antoy resulta? Nen 1944, anggapo nid 110,000 so Tasi nen Jehova ed interon mundo. Natan et ngalngali la 8,000,000! (Basaen so Isaias 60:22.) Agta misalsalamat tayo sano nipupulong tayoy maong a balita diad mareen iran panaon?

8, 9. Panon ya inmaligwas so transportasyon, tan panon itan ya akatulong ed kimey tayo?

⁸ Lapud inyaligwas na transportasyon, pinmeles so panagpulong a kimey. Nen 1900—manga 21 taon manlapud impangimprinta ed sankaunaan a Watch Tower—8,000 labat a kotse so nirehistro ed interon United States, tan pigpigara ni labat so balibalin karsada ed satan a bansa. Balet natan, diad interon mundo et wala lay sakey tan kapalduan bilyon ya nirehistron luluganan tan minilyon la so balibalin karsada. Akatulong iray luluganan tan karsada pian nipulong tayoy maong a balita ed saray totoon manaayam ed nisulinek iran lugar. Balet anggano anggapoy kombenientin transportasyon ed lugar tayo tan kaukolan tayoy manakar na arawi, gagawaen tayoy anggaay nayarian tayon ipulong tan ibangat so maong a balita ed anggan iner.—Mat. 28:19, 20.

⁹ Akatulong met ed kimey tayo so arum nin klase na transportasyon. Nidi-deliver iray literaturan base ed Biblia ed ararawin lugar diad loob labat na pigaran simba panamegley na saray trak, barko, tan tren. Saray manangasikaso na sirkito, membro na Branch Committee, misionero, tan arum ni et maples ya makakapambiahe paonlad saray kombension tan arum nin teokratikon asainmin panamegley na eroplano. Ontan met, saray membro na Mananguley ya Ulop tan arum ya brother ed world headquarters et oonlad nanduruman bansa pian mangiter na panamaseseg tan instruksion ed saray agagi. On, akatulong iray modernon transportasyon pian mankakasakey iray lingkor nen Jehova.—Sal. 133:1-3.

10. Akin et nibagan internasyonal a lenguahe so English?

¹⁰ Nen inmunan siglo, dakel ya totoo so mansasalita na Griegon lenguahe ya Koine diad Empiryo na Roma. Diad panaon tayo, dakel so makapansalita na English diad interon mundo. Ibabaga na libron English as a Global Language: “Manga kakapat na populasyon na mundo so marlas ya makapansalita tan makatalos na English.” Dakel so manaaral na English ta nausar da itan pian makapitalosan anggan iner diad negosyo, politika, science, tan teknolohiya.

11. Antoy nitulong na lenguahen English pian onlaknab so dugan panagdayew?

¹¹ Lapud dakel so makapansalita na English, akatulong itan pian onlaknab so dugan panagdayew. Diad dakel a taon, say The Watchtower tan arum nin publikasyon ya base ed Biblia et niimprinta ni labat ed English. Atan ya lenguahe so uusaren ed world headquarters na Saray Tasi nen Jehova. Tan atan met so uusaren ed saray klase diad Watchtower Educational Center diad Patterson, New York, U.S.A.

12. Panon kalaknab so pangipapatalos na saray lingkor nen Jehova ed saray literaturan base ed Biblia, tan panon ya akatulong so teknolohiya?

¹² Lapud responsabilidad tayon ipulong so maong a balita na Panarian ed amin ya bansa, ipapatalos tayo ray literatura tayo ed manga 700 a lenguahe. Saray computer tan computer program, a singa say MEPS (Multilanguage Electronic Publishing System), et baleg so nitutulong to ed panagpatalos. Bilang resulta, nipupulong so mensahe na Panarian ed interon mundo tan walay pankakasakey tayo. Balet say manunan rason na pankakasakey tayo et lapud natatalosan tayo so puron lenguahe na katuaan ya walad Biblia.—Basaen so Sofonias 3:9.

13, 14. Panon ya akatulong ed saray Kristiano iray ley tan desisyon na korte ed nanduruman bansa?

¹³ Singa inaral tayod imbeneg ya artikulo, baleg so nitulong na ley na Roma ed saray Kristiano nen inmunan siglo. Ontan met natan, baleg so nitutulong na saray ley ed dakel a bansa pian mainomay so panagpulong tayo. Singa bilang, iikdan na Konstitusyon na United States iray totoo ditan na kanepegan ya manpili na relihyon da, inabang so papanisiaan da, tan bulos iran mantitipon. Lapud satan, bulos iray agagi tayod United States ya mandaragup tan aralen so Biblia tan inabang ed arum so nanaaralan da. Wala met so kawayangan tayon  organisaen so sankamundoan a panagpulong diad world headquarters ed United States. Siempre, wala ray panaon ya kinaukolan tayoy onlad korte pian idepensay kanepegan tayon manpulong. (Fil. 1:7) Tan sanen wala ray korte ed United States ya sinebelan da ray agagi ya manpulong, inmapela rad mas atagey iran korte, tan aminpigapiga tayon analo.

¹⁴ Binidbir met na saray korte diad arum a bansa so kanepegan tayon mandayew tan manpulong ed publiko. Diad arum a bansa, wala ray kaso ya atalo tayo balet inmapela tayod internasyonal iran korte. Singa bilang, mabetbet itayon onaapela ed European Court of Human Rights. Nen Hunyo 2014, 57 lan kaso so apanaloan tayod satan a Korte, tan saratan ya desisyon et nepeg ya unoren na saray bansan membro na Council of Europe. Anggano ‘bubusolen itayo na amin a nasyon,’ binidbir na korte ed dakel a bansa ya walay kanepegan tayon dayewen si Jehova.—Mat. 24:9.

15. Panon ya inmaligwas so panag-imprinta, tan panon ya akatulong itan ed sikatayo?

¹⁵ Baleg so nitulong na balo iran paraan na panag-imprinta pian nipulong so maong a balita diad interon mundo. Diad loob na nilasus a taon, inusar na totoo so paraan na panag-imprinta ya inimbento nen Johannes Gutenberg nen manga 1450. Balet diad apalabas ya 200 taon, dakel so inaligwasan na industriyay panag-imprinta. Nagmaliw ya mas angkabaleg, maples, tan de-kalidad iray panag-imprintaan. Mas mamura lay papel tan panag-bookbind. Antoy epekto na sarayan pananguman ed saray publikasyon tayo? Nen Hulyo 1879, say sankaunaan ya Watch Tower et niimprinta ni labat ed English, anggapoy litrato to, tan 6,000 labat ya kopya so niimprinta. Natan, kalabas na 136 taon, masulok ya 50,000,000 ya kopya na kada isyu na The Watchtower so iyiimprinta tan ibubunog. Mararakep tan makolor iray litrato to, tan nabasa lad masulok ya 200 a lenguahe.

16. Anto ran imbension so akatulong ed panagpulong tayo diad interon mundo? (Nengnengen so litratod gapo na artikulo.)

¹⁶ Dakel ya imbension ed apalabas ya 200 taon so inusar na saray lingkor na Dios ed panagpulong. Abitla tayo lay tren, kotse, tan eroplano, balet wadtan met so bisikleta, typewriter, Braille device, telegrama, telepono, kamera, audio tan video recorder, radyo, TV, pelikula, computer, tan Internet. Akatulong iratan ed nanduruman paraan pian nagawaan tayoy kimey tayon panaggaway babangatan. Anggano agtayo iratan inimbento, uusaren tayo iratan pian mamawalay Biblia tan literaturan base ed Biblia diad dakel a lenguahe. Singa tayo ‘susupsupen so gatas na saray nasyon,’ bilang kasumpalan na propesiya na Biblia.—Basaen so Isaias 60:16.

17. (a) Antoy rason no akin ya nasusumpal tayoy panagpulong tayo? (b) Akin ya labay nen Jehova ya magmaliw itayon “kakimeyan” to?

¹⁷ On, talagan malinlinew ya igigiya na Dios so panagpulong tayo. Siempre, ag-akadepende si Jehova ed tulong tayo pian nasumpal so gagala to. Balet, labay na maaron Ama tayod tawen ya magmaliw itayon “kakimeyan” to pian nipanengneng tayoy panangarod sikato tan ed kaparan too. (1 Cor. 3:9; Mar. 12:28-31) Komon ta samboten tayoy amin ya pankanawnawan ipulong so balita na Panarian. Atan so sankaimportantian ya kimey ed dalin. Gawaen tayo sirin so anggaay nayarian tayon ipanengneng ed si Jehova ya aapresyaen tayoy pangigigiya tan pamebendisyon tod sankamundoan ya panagbangat tayo!