1. San ben meki a preikiwroko muilek?

DI A PIPEL fu Yehovah bigin preiki a bun nyunsu moro leki 130 yari pasa, den ben abi furu problema. * Neleki den Kresten fu a fosi yarihondro, den ben preiki wan boskopu di furu sma no ben lobi. Den ben de wan pikin grupu nomo èn sma ben e si den leki sma di no kisi bun skoroleri. Boiti dati, den ben kisi fu du nanga a „bigi atibron” fu Satan Didibri (Openb. 12:12). Wan tra sani na taki den ben o du a preikiwroko fu den na ini „den lasti dei” di ben o „tranga fu pasa”.—2 Tim. 3:1.

2. San Yehovah du fu meki a preikiwroko go na fesi na ini a ten disi?

² Toku Yehovah wani taki en pipel musu preiki a bun nyunsu na heri grontapu èn noti no o man tapu en fu du dati. Neleki fa Yehovah ben puru den Israelsma fu owruten na ini Babilon, na so a de tu taki na ini a ten disi a puru den  futuboi fu en na ini den falsi kerki. Bijbel e kari den kerki disi „Babilon a Bigiwan” (Openb. 18:1-4). Yehovah gi wi leri di bun gi wi, a gi wi freide èn a yepi wi fu gi tra sma leri. (Leisi Yesaya 48:16-18.) Ma disi no wani taki dati Yehovah e kenki ibri situwâsi na grontapu fu meki a preikiwroko go na fesi. A tru taki son situwâsi ben meki en makriki gi wi fu du a preikiwroko. Ma sma e frufolgu wi ete èn wi abi tra problema na ini a grontapu fu Satan. Sobun, nanga a yepi fu Yehovah wawan wi man du a preikiwroko.—Yes. 41:13; 1 Yoh. 5:19.

3. Fa a profeititori fu Danièl kon tru?

³ A profeiti Danièl ben skrifi taki na a ten fu a kaba furu sma ben o kon sabi den tru tori fu Bijbel. (Leisi Danièl 12:4.) Yehovah ben yepi en pipel fu frustan prenspari tru tori fu Bijbel èn fu no bribi den leri fu den falsi Kresten. Na ini a ten disi a e gebroiki en pipel fu fruteri sma na heri grontapu den tru tori fu Bijbel. A de krin taki a profeititori fu Danièl kon tru. Sowan aiti milyun sma e poti bribi na ini den tru tori fu Bijbel èn den e fruteri tra sma san den leri. San na wan tu sani di yepi wi fu preiki na heri grontapu?

4. Na ini omeni tongo sma ben vertaal Bijbel kaba na a ten fu a yari 1900?

⁴ Na ini a ten disi furu sma abi wan Bijbel èn a sani disi yepi wi fu preiki a bun nyunsu. Ma fosi a no ben de so. Hondrohondro yari langa den kerki fesiman fu den falsi Kresten kerki no ben wani meki sma leisi Bijbel. Den frufolgu den sma di ben leisi Bijbel èn den kiri sonwan fu den sma di ben vertaal en. Ma baka a yari 1800, son organisâsi ben vertaal Bijbel na ini sowan 400 tongo èn na a ten fu a yari 1900 furu sma ben abi den eigi Bijbel. Toku den no ben frustan san Bijbel e leri.

5. San Yehovah Kotoigi du fu vertaal Bijbel?

⁵ A pipel fu Yehovah ben sabi taki den musu preiki èn na dati den du tu. Fosi, den ben gebroiki den tra Bijbelvertaling di ben de èn den ben prati den gi sma. Sensi 1950 den druk a heri Nyun-Grontapuvertaling noso pisi fu en na ini moro leki 120 tongo. Na ini 2013 den tyari a moro nyunwan fu na Ingrisitongo Nyun-Grontapuvertaling kon na doro. A Bijbel disi makriki fu frustan èn fu vertaal go na ini tra tongo. Èn te wi e gebroiki wan Bijbel di makriki fu leisi, dan a o yepi wi fu du a preikiwroko.

6, 7. (a) Sortu feti ben de na ini den hondro yari di pasa? (b) Fa a preikiwroko ben waka na ini son kondre te freide ben de?

⁶ Kande yu e aksi yusrefi efu freide ben de trutru. Na ini den hondro yari di pasa, furu feti ben de èn sosrefi tu grontapufeti. Milyunmilyun sma dede na ini den feti dati. Na a ten fu a Di Fu Tu Grontapufeti, Nathan Knorr ben teki fesi na ini na organisâsi fu Yehovah Kotoigi. Na wan kongres na ini 1942, a hori wan moi lezing di nen „Freide man tan fu ala ten?” Brada Knorr ben fruklari a profeititori na ini Openbaring kapitel 17 èn a sori taki Armagedon no ben o bigin na a kaba fu a feti, ma taki wan ten fu freide ben o de.—Openb. 17:3, 11.

⁷ Disi no ben wani taki dati baka a feti freide ben de na heri grontapu. Sensi a  Di Fu Tu Grontapufeti, milyunmilyun sma dede na ini tra feti. Ma ini furu kondre dyugudyugu no ben de èn disi ben meki en makriki gi Yehovah en pipel fu preiki. San ben de a bakapisi? Na a ten fu a Di Fu Tu Grontapufeti wi no ben abi 110.000 Yehovah Kotoigi ete na grontapu. Ma now wi abi sowan 8.000.000 Kotoigi! (Leisi Yesaya 60:22.) Iya, te freide de, dan wi kan preiki a bun nyunsu gi moro sma.

8, 9. (a) Fu san ede a moro makriki now fu go fu a wan presi na a trawan? (b) Fa a sani disi yepi wi na ini a preikiwroko?

⁸ Di Yehovah en pipel bigin preiki na ini Amerkankondre, a no ben makriki gi den fu go fu a wan presi na a trawan. Na ini 1900, sowan 21 yari baka di den bigin druk A Waktitoren na ini Ingrisitongo, pikinmoro 8000 wagi ben de na Amerkankondre èn furu bun pasi no ben de drape. Ma now yu abi moro leki wán nanga afu milyard wagi na heri grontapu èn furu bun pasi de tu. Wi kan teki wagi èn rèi tapu bun pasi fu go preiki gi sma di e tan na farawe presi. Ma srefi te wi e libi na presi pe sani leki wagi no de èn wi musu waka langa pasi, toku wi e du ala san wi man fu preiki gi sma.—Mat. 28:19, 20.

⁹ Boiti wagi wi e gebroiki tra sani tu. Nanga truck, boto èn nanga loko wi e seni Bijbel nanga tra buku go na bun fara kontren na ini wan tu wiki nomo. Den brada fu den Bijkantoro Komte, zendeling nanga tra Kotoigi e teki opolani fu man go hori lezing na den kongres èn fu yepi den gemeente. Boiti dati, den brada fu a Tiri Skin èn tra brada fu na edekantoro e teki opolani go na furu kondre fu gi den brada nanga sisa deki-ati nanga leri. Ala den sani disi e yepi Yehovah pipel fu tan abi wánfasi.—Ps. 133:1-3.

10. Fu san ede wi kan taki dati Ingrisitongo na wan prenspari tongo na grontapu?

¹⁰ Na ini a fosi yarihondro, furu sma na ini a Gran Kownukondre Rome ben e  taki Grikitongo. Na ini a ten disi furu sma na grontapu e taki Ingrisitongo. Wan buku e taki dati pikinmoro 1,7 milyard sma e taki Ingrisitongo noso den e frustan en (English as a Global Language). Furu sma e leri Ingrisitongo fu man taki nanga sma fu difrenti kondre, fu du bisnis èn fu seti politiek afersi. Boiti dati, sabiman èn sma di e meki ala sortu masyin e gebroiki a tongo disi tu te den e wroko.

11. Fa Yehovah pipel gebroiki Ingrisitongo fu du a wroko fu den?

¹¹ Furu sma e taki Ingrisitongo èn a sani disi yepi wi fu panya den tru leri fu Bijbel. Fosi, A Waktitoren nanga tra buku fu wi ben druk na ini Ingrisitongo. Na a edekantoro fu Yehovah Kotoigi den brada nanga sisa e taki Ingrisitongo. Den skoro fu wi di e hori na a Waktitoren Skoro Centrum na ini Patterson, Amerkankondre, de na ini Ingrisitongo tu.

12. Na ini omeni tongo wi vertaal den buku fu wi èn fa computer programa yepi wi nanga a wroko disi?

¹² Wi abi a frantwortu fu preiki a bun nyunsu fu a Kownukondre gi sma fu ala pipel. Dati meki wi vertaal den buku fu wi na ini moro leki 700 tongo. Fa wi ben man du disi? Wi gebroiki computer nanga computer programa soleki MEPS, di e yepi wi fu du a vertaalwroko. Disi e meki taki Yehovah Kotoigi na heri grontapu e frustan a „soifri tongo” fu Bijbel èn dati e meki taki den abi wánfasi.—Leisi Sefanya 3:9.

13, 14. Fa den wet fu lanti nanga den bosroiti fu krutubangi yepi wi?

¹³ Soleki fa wi ben si na ini na artikel na fesi, dan den wet fu den Romesma ben yepi den Kresten fu du a preikiwroko. Na ini a ten disi den wet na ini furu kondre yepi wi tu te wi e du a preikiwroko. Fu eksempre, den wet fu Amerkankondre e gi sma a reti fu anbegi gado na a fasi fa den wani, fu fruteri sma san den e bribi èn fu hori konmakandra. Disi wani taki dati Yehovah Kotoigi na ini Amerkankondre de fri fu hori konmakandra èn fu preiki drape. Fu di na edekantoro fu wi de na Amerkankondre, meki wi man orga a  preikiwroko na heri grontapu. Ma son leisi wi ben musu go na krutu fu feti gi a reti di wi abi fu preiki a bun nyunsu (Fil. 1:7). Èn te den krutuman ben teki a bosroiti taki wi no mag preiki, dan wi ben tyari na afersi go na wan moro hei krutubangi èn nofo tron wi ben wini en.

¹⁴ Krutubangi na ini tra kondre ben lespeki a reti di wi abi fu anbegi èn fu preiki. Na ini son kondre wi ben lasi krutu-afersi, ma dan wi ben go na wan moro hei krutubangi. Fu eksempre, furu tron wi ben go na a Krutubangi fu Europa di e feti gi den reti fu libisma. Na a ten fu yuni 2014, wi ben wini 57 krutu-afersi kaba na a Krutubangi dati èn furu kondre fu Europa musu hori densrefi na den bosroiti di a Krutubangi teki. Aladi sma ’e teige’ wi na ini ala kondre, toku den wet fu furu kondre gi pasi taki wi man anbegi Yehovah.—Mat. 24:9.

15. Na sortu nyun fasi sma ben e druk buku, èn fa dati yepi wi?

¹⁵ Den nyun fasi fa sma e druk buku ben yepi wi tu fu preiki a bun nyunsu gi moro furu sma. Na ini 1450 Johannes Gutenberg ben meki wan drukpers. Hondrohondro yari langa sma ben e druk buku nanga den sortu drukpers dati. Ma na ini den 200 yari di pasa, den masyin fu druk buku kon moro bun, den man druk moro buku, den man wroko moro esi èn den buku moro moi. A ben kon moro bunkopu tu fu meki papira èn fu tai den bladzijde fu den buku na makandra. Fa den kenki disi yepi wi nanga a wroko fu wi? Na ini 1879, a fosi Watch Tower ben druk na ini Ingrisitongo wawan. A no ben abi fowtow èn den ben druk 6000 nomo. Ma now A Waktitoren e druk na ini moro leki 200 tongo. A abi moi fowtow di abi moi kloru èn moro leki 50 milyun fu ibri Waktitoren e druk.

16. Sortu nyun sani di sma meki yepi wi fu preiki a bun nyunsu na heri grontapu? (Luku a prenki na a bigin fu na artikel.)

¹⁶ Furu nyun sani di sma meki na ini den 200 yari di pasa, yepi Yehovah en pipel fu preiki a bun nyunsu. Wi ben taki kaba fu loko, wagi nanga opolani. Ma tra sani kon de tu soleki baisigri, skrifimasyin, masyin fu druk buku gi breni sma, telegraaf, telefon, camera, cassette lolo, video-camera, radio, telefisi, felem, computer nanga Internet. Yehovah Kotoigi no meki den sani disi, ma den e gebroiki den fu meki Bijbel nanga tra buku na ini furu tongo èn fu preiki gi sma na heri grontapu. Na so fasi wi e „soigi a merki fu den pipel” soleki fa a ben skrifi na fesi na ini Bijbel.—Leisi Yesaya 60:16.

17. Fu san ede Yehovah wani taki wi e wroko nanga en?

¹⁷ A de krin taki Yehovah e blesi a preikiwroko. Yehovah no abi wi yepi fanowdu fu du a preikiwroko. Ma fu di a lobi wi, meki a gi wi a grani fu wroko makandra nanga en. Te wi e preiki, dan wi e sori Yehovah taki wi lobi en èn taki wi lobi tra sma (1 Kor. 3:9; Mark. 12:28-31). Wi ati furu nanga tangi taki Yehovah e yepi wi fu preiki na heri grontapu. Sobun, meki wi gebroiki ibri okasi fu fruteri sma fu Yehovah nanga en Kownukondre!