1. Месихчилер вагыз ишинде нәхили кынчылыклара сезевар болярлар?

XIX АСЫРЫҢ ахырында Мукаддес Язгылары өвренйәнлер * энчеме кынчылыклары башдан гечирдилер. Олар хем I асырдакы месихчилер ялы өрән азды ве хош хабары ыхласлы вагыз эдйәрдилер. Эмма көп адамлар олары билимсиз хасаплап, хакыкаты кабул этмейәрдилер. Үстесине-де, олар «гахар-газаба мүнен» Шейтан Иблис билен гөрешмелидилер (Ылх. 12:12). Шейле-де олар «соңкы гүнлер», ягны кын дөвүрде вагыз этмелидилер (2 Тим. 3:1).

2. Ехова вагыз этмәге нәдип көмек эдйәр?

² Эмма Ехова гуллукчыларының хош хабары гөрлүп-эшидилмедик дереҗеде вагыз этмеклерини ислейәр. Оңа ниетини амала ашырмага хич зат пәсгел берип билмез. Ехова гадымы ысрайыл халкыны Бабылың есирлигинден азат эдиши ялы, шу гүнлерем ялан диниң дүнйә империясы болан «Бейик Бабылдан» бизи азат эдйәр (Ылх. 18:1—4). Ол бизе пейдалы затлары өвредйәр, калбымыза рахатлык берйәр  ве хакыкаты ыглан этмәге көмек эдйәр (Ишая 48:16—18-нҗи аятлары окаң) *. Ехова вагыз ишине ёлбашчылык этсе-де, онуң үстүнликли амала ашмагы үчин дүнйәдәки ягдайлара тәсир этмейәр. Муңа гарамаздан, кәбир ягдайлар вагыз ишимизиң илерлемегине көмек эдйәр. Шейле-де Ехова ызарламалара ве бейлеки кынчылыклара дөз гелмәге көмек эдйәр (Иш. 41:13; 1 Яхя 5:19).

3. «Хакыкы билим» нәдип артяр?

³ Даныел пыгамбер Ехованың ылхамы билен дөврүң соңунда «хакыкы (ТД) билимиң артҗагы» барада айтды (Даныел 12:4-и окаң) *. Ехова соңкы гүнлер башламанка халкына Мукаддес Язгылара дүшүнмәге ве христиан дини таглыматларыны паш этмәге көмек этди. Хәзир болса Ол хакыкат билимини өз халкы аркалы дүнйәниң дүрли күнҗегине етирйәр. Биз Даныелиң айдан пыгамберлигиниң ерине етйәндигини гөзүмиз билен гөрйәрис. Шу гүнлер 8 миллиона голай адам Мукаддес Язгылардакы хакыкаты бүтин дүнйәде вагыз эдйәрлер. Хош хабарың бүтин дүнйәде ыглан эдилмегине ене-де нәме көмек эдйәр?

4. XIX асырда Мукаддес Язгылар нәдип гиңден яйраяр?

⁴ Мукаддес Язгыларың гиңден яйрамагы хош хабарың вагыз эдилмегине көмек эдйәр. Асырлар бойы христиан дининиң агзалары адамлара Мукаддес Язгылары окамага пәсгел бердилер. Хатда оны терҗиме эденлериң кәбирини җезаландырдылар. Эмма XIX асырда Мукаддес Язгылары өвренйәнлер Худайың Сөзүни тутушлыгына я-да бөлеклейин 400-е голай дилде терҗиме эдйәрлер. Шол асырың ахырында көп адамларда Мукаддес Язгылар барды, эмма ондакы кәбир таглыматлара догры дүшүнмейәрдилер.

5. Ехованың гуллукчылары Мукаддес Язгылары нәдип терҗиме этдилер?

⁵ Мукаддес Язгылары өвренйәнлер хош хабары вагыз этмелидигине ве хакыкаты дүшүндирмелидигине гөз етирдилер. Илкибашда, Ехованың гуллукчылары Мукаддес Язгыларың дүрли терҗимелеринден пейдаландылар. Олар 1950-нҗи йылдан башлап «Мукаддес Язгыларың Тәзе Дүнйә терҗимесини» бөлеклейин я-да онуң долы гөрнүшини 120-ден говрак дилде чап этдилер. Эмма 2013-нҗи йылда иңлис дилинде хас дүшнүкли «Тәзе Дүнйә терҗимеси» чап эдилйәр. Инди Мукаддес Язгылары башга диллере терҗиме этмек хас-да аңсатлашды. Дүшнүкли ве сада дилде терҗиме эдилен Мукаддес Язгылар хош хабарың яйрамагына ярдам эдйәр.

6, 7. a) Бизиң гүнлеримизде нәхили урушлар болды? б) Парахатчылыклы дөвүр вагыз ишине нәхили тәсир эдйәр?

⁶ Соңкы йүз йылың довамында энчеме урушлар болды. Шейле-де Биринҗи ве Икинҗи җахан уршунда миллионларча адамлар вепат болды. 1942-нҗи йылда Нейтан Норр доганымыз Ехованың Шаятларының конгресинде «Парахатчылык узага чекерми?» диен нутук билен чыкыш этди. Ол Ылхам китабының 17-нҗи бабында айдылан парахатчылык барада гүррүң берди (Ылх. 17:3, 11).

 ⁷ Икинҗи җахан уршы тамамланса-да, ер йүзүнде парахатчылык болмады. Бир маглумата гөрә, 1946—2013-нҗи йыллар аралыгында 331 саны уруш болды ве миллионларча адамлар вепат болды. Муңа гарамаздан, көп юртларда парахатчылык хөкүм сүрйәрди. Шол дөвүрде Ехованың гуллукчылары ыхласлы вагыз эдйәрди. Мунуң нетиҗеси нәхили болды? 1944-нҗи йылда бүтин дүнйәде бары-ёгы 110 мүң вагызчы барды. Хәзир болса оларың саны 8 миллиона етди! (Ишая 60:22-ни окаң) *. Биз парахат дөвүрде хош хабары вагыз эдйәндигимизе миннетдар болмалы дәлми нәме!?

8, 9. Улаг ве арагатнашык ёллары үстүнликли вагыз этмәге нәдип ярдам берйәр?

⁸ Улаг ве арагатнашык ёлларының көмеги билен вагыз иши хас-да үстүнликли амала ашырыляр. 1879-нҗы йылда илкинҗи гезек «Гаравул диңи» журналы чап эдилип башланды. 1900-нҗи йылда АБШ-да бары-ёгы 8 мүң саны улаг ве бирнәче йүз километр текиз ёллар барды. Шу гүнлер болса бүтин дүнйәде 1,5 миллиард улаг ве миллионларча километре узалып гидйән ёллар бар. Улаглар ве ёллар дүнйәниң дүрли күнҗегинде яшаян адамлара хош хабары етирмәге мүмкинчилик дөредйәр. Биз вагыз эдип, шәгирт тайярламак үчин узак ёллары сөкмели болсак-да, элимизде барыны этмели (Мат. 28:19, 20).

⁹ Улагың дүрли гөрнүшлери хош хабарың яйрамагына ярдам эдйәр. Йүк дашаян улаглар, гәмилер, отлылар Мукаддес Язгылары ве оңа эсасланан эдебиятлары бирнәче хепдәниң ичинде узак ерлере элтмәге мүмкинчилик берйәр. Айланян гөзегчилер, филиал комитетиниң агзалары, миссионерлер ве бейлеки доган-уялар конгресе я-да вагыз этмели ерлерине учар аркалы чалт барып билйәрлер. Шейле-де Ёлбашчылык маслахатында ве Баш эдарада гуллук эдйән доганлара дүнйәниң дүрли күнҗегинде яшаян имандашларыны рухландырып, олара гөркезме бермәге көмек эдйәр. Шейлеликде Ехованың гуллукчыларының достлугы хас-да беркейәр (Зеб. 133:1—3).

10. Нәме үчин иңлис дили халкара дил хасапланыляр

¹⁰ I асырда Рим империясында грек  (койне) дили гиңден яйрапды. Шу гүнлер дүнйәде хайсы дил хас көп уланыляр? Элбетде, иңлис дили! «Иңлис дили — халкара дил» атлы китапда шейле дийилйәр: «Ер йүзүндәки адамларың дөртден бир гөтерими иңлис дилинде геплейәрлер я-да оңа дүшүнйәрлер». Иңлис дили дашары юрт дили хөкмүнде гиңден өвредилйәр. Бу халкара дил тәҗирчилик, сыясат, ылым ве технология пудакларында уланыляр.

11. Иңлис дили хакыкы сеждәниң яйрамагына нәхили тәсир эдйәр?

¹¹ Иңлис дили хакыкы сеждәниң яйрамагына ярдам эдйәр. Бирнәче йылың довамында «Гаравул диңи» ве башга-да эдебиятларымыз диңе иңлис дилинде чап эдилйәрди. Ехованың Шаятларының Баш эдарасында ресми дил хөкмүнде иңлис дили уланыляр. Шейле-де Нью-Йорк шәхериндәки (АБШ, Паттерсон) «Гаравул диңи» окув меркезинде сапаклар иңлис дилинде гечирилйәр.

12. Ехованың Шаятлары эдебиятлары нәче дилде терҗиме эдйәр ве нәхили технологиядан пейдаланяр?

¹² Патышалык барадакы хош хабары әхли миллетлере вагыз этмек улы хормат! Шу гүнлер бизиң эдебиятларымыз 700-ден говрак дилде терҗиме эдилйәр. Бу иши үстүнликли амала ашырмага компьютер ве дүрли диллере чап эдйән электрон улгамы (MEPS) көмек эдйәр. Шейлеликде, биз Патышалык барадакы хош хабары гиңден яйрадып, бүтиндүнйә доганлыгымызы беркидйәрис ве хакыкатың «пәк дилинде» гепләп, хас-да җебислешйәрис (Сефаня 3:9-ы окаң) *.

13, 14. Кануның ве казыетиң карарларының нәхили пейдасы бар?

¹³ Гечен макалада Рим канунының I асырдакы месихчилере пейда берендиги барада гүррүң эдилди. Шу гүнлер хем месихчилер өз хукугыны горамак үчин канундан пейдаланярлар. АБШ-ның Конституциясы ислендик дине уймага, өз пикириңи айтмага ве конгреслериң гечирилмегине ругсат берйәр. Шол себәпли АБШ-да йыгнак душушыкларыны ве Мукаддес Язгылар окувыны гечирмәге ругсат берилди. Ол ерде бүтиндүнйә вагыз ишине ёлбашчылык эдйән Баш эдарамыз хем ерлешйәр. Эмма биз кәбир хукукларымызы казыетде горамалы болярыс. (Флп. 1:7).  Кәте казыет АБШ-дакы Ехованың халкына гаршы карар чыкарса-да, биз Ёкары казыетлере йүз тутуп, Патышалык хабарыны вагыз этмек хукугымызы гораярыс.

¹⁴ Башга юртлардакы казыетлерде хем динимизе ресми тайдан ругсат берилйәр. Кәте казыетде еңилсек-де, Ёкары казыетлере йүз тутуп билйәрис. Меселем, 2014-нҗи йылың июнь айында адам хукугыны гораян Европадакы казыетиң 57 саны карары бизиң пейдамыза болды. Бу карарлар Европадакы әхли Ехованың Шаятларына дегишлидир. Бизи «хемме миллетлер... йигренселерем», көп юртлардакы казыетлер хакыкы сеждәмиз бабатдакы хукугымызы гораяр (Мат. 24:9).

15. Чап эдйән гуралларың нәхили тәзе гөрнүшлери чыкды ве олар вагыз ишине нәдип гошант гошяр?

¹⁵ Чап эдйән гуралларың тәзе гөрнүшлериниң чыкмагы бүтин дүнйәде хош хабарың вагыз эдилмегине улы гошант гошды. 1450-нҗи йылда Иоганн Гутенбергиң ойлап тапан чап эдйән гуралы бирнәче асырың довамында уланылды. Соңкы ики асырың довамында чап эдйән гуралларың өрән улы, тиз ишлейән ве ёкары хилли гөрнүшлери ясалды. Шейлеликде, кагызың өндүрилмеги ве китапларың бирикдирилмеги хас арзан болды. Өңки чап эдйән гураллардан тапавутлыкда, кагызы ики тараплайын тиз чап эдйән гурал неширятың ве суратларың хилини хас-да ёкарландырды. Шейле өзгеришлериң вагыз ишине нәхили пейдасы бар? Меселем, 1879-нҗы йылың июлында чыкан «Гаравул диңи» журналының 6 000 нусгасы иңлис дилинде, суратсыз гөрнүшинде чап эдилди. 136 йылдан соң «Гаравул диңиниң» хер санының 50 миллиондан көпрәк нусгасы чап эдилйәр ве халка етирилйәр. Бу журнал овадан реңкли суратлар билен безелип, 200-ден говрак дилде терҗиме эдилйәр.

16. Вагыз ишиниң үстүнликли ерине етирилмегине нәхили затлар көмек эдйәр? (Макаланың башындакы сурата середиң).

¹⁶ 200 йылдан бәри ойлап тапылан гураллар хош хабарың гиңден яйрамагына көмек эдйәр. Биз диңе отлы, улаглар, учарлар барада гүррүң эдипдик, эмма шол дөвүрде тигирлер, хат язян гураллар, көр адамлар үчин китаплар, телеграф, телефонлар, камералар, сес ве видео язгылар, радио, телевизор, херекетли шекиллер, компьютерлер хем-де интернет ялы затлар ойлап тапылды. Олар бизе шәгирт тайярламага көмек эдйәр. Пыгамберлиге гөрә, Ехованың халкы «миллетлериң сүйдүни эмер», ягны бу дүнйәниң дөреден затларындан пейдаланар. Меселем, биз Мукаддес Язгылары ве оңа эсасланан эдебиятлары дүрли диллерде чап этмек үчин ёкары хилли гураллардан пейдаланярыс (Ишая 60:16-ны окаң) *.

17. а) Вагыз ишиниң илерлемеги нәмәни субут эдйәр? б) Биз нәдип Ехованың «ишдеши» болуп билйәрис?

¹⁷ Хава, вагыз ишиниң илерлемеги Худайың ак пата берйәндигини субут эдйәр. Ехова өз ниетини амала ашырмак үчин бизиң көмегимизе мәтәч дәл. Йөне сөйгүден долы гөкдәки Атамыз өз «ишдешлери» болмага бизе мүмкинчилик дөредйәр. Биз вагыз ишини голдап, Ехова ве якынымыза болан сөйгимизи билдирйәрис (1 Кор. 3:9; Мар. 12:28—31). Гелиң, Патышалык хабарыны шатлык билен вагыз эделиң! Ехованың вагыз иши бабатда берйән гөркезмесине ве берекедине миннетдар болалың!