“Kot ewe Samol mi Lapalap a alenia ewe aramas lon ewe tanipi Eten pwe epwe tanipini o tümwünü. Iwe, Kot ewe Samol mi Lapalap a allük ngeni ewe aramas, ‘Ka tongeni mongö seni irän ei tanipi meinisin, nge seni ewe irän silei öch me ngau kosap fokun mongö. Pun lon ränin om kopwe mongö seni, kopwe fokun mäla.’”​—Keneses 2:15-17.

Kot a eleenia ewe áeménún mwán, Atam, lón ewe tánipiin Eten, me ena paratis a ur ren chómmóng man me irá mi ling. A wor ekkewe irá mi uwa Atam a tongeni mwéngé seni. Iwe nge, Jiowa Kot a affata ngeni Atam ewe efóch irá esap mwéngé seni. A ereni pwe ika a mwéngé seni, epwe máló.

Itá Atam a weweiti ena allúk? I a silei met ena máló, pún a fen kúna án ekkewe man máló. Ika pwe Atam a fférútá pwe mwirin och fansoun epwe máló, iwe ese pwal wor lamoten án Kot na kapasen éúréúr. I a fen mirititi pwe ika a álleasochisi Kot me esap mwéngé seni ewe irá, iwe epwe manaw fóchófóch, esap máló.

Ekkóch aramas ra lúkú pwe ewe irá a wewe ngeni ewe féfférún lisowu, iwe nge esap ina weween. Jiowa a mochen pwe Atam me pwúlúwan we itan Efa repwe ‘nöünöü o achomongeer’ me ‘fanüfan epwe masou rer o nom fän nemenier.’ (Keneses 1:28) Ewe allúk a weneiti efóch wesewesen irá. Jiowa a eita ngeni, “ewe irän silei öch me ngau” pokiten a wewe ngeni an pwúúng le filatá met mi múrinné are ngaw fán iten aramas. Ika Atam esap mwéngé seni ena irá, epwe pwáló an álleasochis me pwal an aúcheani ewe Emén a fératá me fókkun efeiéchú i.

“Kot a üreni ewe mwän [Atam], ‘Pokiten om . . . mongö seni ewe irä üa allük pwe kosap mongö seni, . . . kopwe mongö anom fän molonom tori om kopwe wiliti pwül ka för seni. Pun pwül en, iei popun om kopwe wiliti pwül.’”​—Keneses 3:17, 19.

 Atam a ocheei féún ewe irá mi pinepin seni. Ena féfférún álleasolap mi fókkun chou. Ina eú angangen ú ngeni Kot. Atam a fókkun aúcheangawa meinisin ekkewe mettóch mi múrinné Jiowa a fen féri fán itan. Ren án Atam ocheei ena féún irá, i a tunaló Jiowa, me filatá an epwe imuló seni i. An na féffér epwe atoto watteen feiengaw.

Usun met Jiowa a fen erá, mwirin och fansoun Atam a máló. Kot a féri Atam “seni pwülün fanü” me a ereni, “kopwe wiliti pwül ka för seni.” Mwirin án Atam máló, ese pwal manaw lón eú sókkun inis are eú leenien ngún. Ese chúen wor manaw ren, i a chék usun ewe pwúl a ffér seni.​—Keneses 2:7; Än Salomon Afalafal 9:5, 10.

“Ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.”​—Rom 5:12.

A watte pwúnúngawen án Atam álleasolap are tipis. Ren an tipis, ese péút seni ewe esin manaw úkúkún ttaman 70 are 80 ier chék, nge a fen péút seni ewe ápilúkúlúkún manaw esemuch. Pwal och, lupwen Atam a tipis a péút seni an unuséch, iwe, mwirimwirin kewe meinisin ra álemwiri seni manaw ese unuséch.

Kich meinisin mwirimwirin Atam. Saminne filiach met sia álemwiri seni Atam, nge sia álemwiri seni ewe sókkun inis ese unuséch mi emmwenikich ach sipwe mochen féri tipis me ló, ló, ló, máló. A mmen pwúng met Paulus a áweweei usun ena mettóch. A makkeei: “Ngang sokun fituk, pwe üa nom fän nemenien tipis. Ngang eman aramas mi attong o weiresikis! Iö epwe angasaei seni ei inis inisin mäla?” Mwirin, a pwal pwisin pélúweni an na kapas eis, a erá: “Kilisou ngeni Kot a angasaei ren ach Samol Jesus Kraist!”​—Rom 7:14, 24, 25.

“Ewe Sam a tinato Nöün we an epwe amanaua chon fanüfan.”​—1 Johannes 4:14.

 Jiowa Kot a akkóta an epwe amóeló minne tipis a atoto me angasakicheló seni pwúnúngawan we, ina málófóchofóch. Ifa usun? A tiinaato seni láng Néún we mi áchengicheng pwe epwe uputiw usun emén aramas mi unuséch usun chék Atam. Nge Jesus a sókkóló seni Atam, pún i ese “föri och tipis.” (1 Petrus 2:22) Pokiten i mi unuséch, iwe, ese nóm fán ewe pwúnúngawen tipis, máló, me a tongeni manaw tori feilfeiló usun emén aramas mi unuséch.

Iwe nge, Jiowa a fen mut ngeni Jesus an epwe ninniiló me ren ekkewe chón oputa i. Mwirin úlúngát rán, Jiowa a amanawasefáli lón inisin ngún pwe mwirin och fansoun a tongeni liwiniti láng. Me ikkena ie, Jesus a mwe ngeni Kot aúchean manawan we manawen aramas mi unuséch pwe epwe méénisefáli met a péút seni Atam me mwirimwirin kewe. Jiowa a etiwa ena asor, iwe a tufich ngeni chókkewe mi anganga ar lúkú Jesus ar repwe angei manaw esemuch.​—Rom 3:23, 24; 1 Johannes 2:2.

Jesus a méénisefáli met a péút seni Atam. A máló fán ásengesich pwe sipwe tongeni kúna manaw esemuch. Ewe Paipel a apasa pwe “ren än Kot ümöümöch” Jesus a “mäla fänäsengesin aramas meinisin.”—Ipru 2:9.

Ena mettóch a áiti ngenikich chómmóng mettóch usun Jiowa. Pokiten an kewe allúk mi pwúngiéch, aramas rese unuséch rese tongeni pwisin méénisefáli manawer. Iwe nge, an tong me úméúméch a amwékútú le awora met epwe mase ngeni pwúngún an kewe allúk inaamwo ika a kon watte met epwe fangóló fán itan, ina an fangóló pwisin Néún we pwe méén manawen aramas.​—Rom 5:6-8.

“A pwüng pwe Kot a amanauasefäli Kraist seni mäla, iei mine a allükülük pwe chokewe mi mäla repwe pwal manausefäl. Pun usun chök mäla a pop seni eman aramas, pwal ina chök usun ewe manausefäl seni mäla a pop seni eman aramas. Pun usun aramas meinisin ra mäla lon Atam, iei usun aramas meinisin repwe manausefäl lon Kraist.”​—1 Korint 15:20-22.

A ffat pwe Jesus mi manaw me máló, nge ikkefa ekkena pisekin ánnet pwe a fen manawsefál? Án Jesus pwá ngeni chómmóng aramas lón sókkópaten fansoun me leeni mwirin an manawsefál, ina eú me lein ekkewe pisekin ánnet mi fataffatéch. Fán eú a pwá ngeni lap seni 500 aramas, usun met aposel Paulus a makkeei lón néún we taropwe ngeni chón Korint. A pwal fósun ekkóch me lein chókkana mi kúna Jesus ra chúen manaw lón ena atun, iwe usun a pwári pwe iir ra tongeni pwáraatá usun met ra fen kúna me rongorong.​—1 Korint 15:3-8.

Nengeni pwe me ren makkeien Paulus, án Kraist manawsefál a eú minen “allükülük” pwe epwe pwal wor ekkóch repwe manawsefál mwirin. Jesus pwisin a erá pwe epwe wor ewe fansoun lupwen “ekewe sotup meinisin repwe . . . towu seni peiaser.”​—Johannes 5:28, 29.

“Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.”​—Johannes 3:16.

 Lepoputáán ewe Paipel, a fós usun ewe fansoun máló a tolong lón fénúfan me péútúlóón ewe Paratis. Nge lesópwólóón ewe Paipel, a fós usun ewe fansoun máló epwe móló me Kot epwe eliwinato Paratis ngeni fénúfan. Aramas repwe tongeni manaw fán pwapwa me eáni angang mi lamot tori feilfeiló. Pwärätä 21:4 a apasa: “Esap chüen wor mäla.” Ren lúkúcharen ena pwon, wokisin 5 a apasa: “Ekei kapas . . . ra let o allükülük.” Met Jiowa a eáni pwon, i a wesewesen tufichin apwénúetá.

Ka lúkú pwe “ekei kapas . . . ra let o allükülük”? Iwe, kopwe alapaaló óm káé pwóróusen Jesus Kraist, me anganga óm lúkú i. Ika ka féri ena, kopwe nóm lón án Jiowa chen. Kopwe kúna an kewe feiéch lón ei fansoun, me kopwe pwal eáni ewe ápilúkúlúkún manaw esemuch lón ewe Paratis wóón fénúfan, ikewe ia “esap chüen wor mäla ika letipeta ika kechü ika cheuch” ie, pún repwele móróló.