‘Mandaj Taita Diosca runataca mandarcami: “Huertapi tiaj tucui yuracunapi fucushcatami micui ushangui. Ashtahuangarin alita, nalita yachaita cuj yurapi fucushcataca ama micunguichu. Ima punlla cashpapash chai yuramanda micushpaca huañunguipachami”.’ (Génesis 2:15-17.)

Taita Diosca Adanda rurashpaca shuj juyailla paraíso Alpagupimi churarca. Chaipica juyailla animalgucuna, plantacunami tiarca. Maijan frutata munashpapash quirucunamanda japishpa micunallami carca. Shinapash Taita Diosca advirtircami, chaupipi tiajuj quirumandaca ama japishpa micunguichu. Micushpaca huañunguimi nishpa.

Shina nishpa advirtijpica ¿imatashi Adanga intindishcanga? Adanga animalcuna huañujta ricushpami huañui ima cajtaca ali yacharca. Animalcunashnallata huañuchun Adanda rurashca cashpaca yangami Taita Diosca Adandaca huañunguimi nishpa advirtijunman carca. Chaimandami Adanga Taita Diosta na cazushpaca na para siempre causai ushanataca ali intindishcanga.

Huaquingunaca yanmi, na micuna yuraca jarihuan huarmihuan na puñuna cashcatami ricuchijurca nishpa. Shinapash chaica na ciertochu can. Taita Diosca Adán y Evataca nircami: “Huacharishpa ninanda mirashpa, ashtacacunapacha tucushpa, cai pachapi jundanguichi. Cai pachapi imalla tiajcunata cazuchinguichi” nishpa (Génesis 1:28). Na micunachu canguichi nishca yuraca ciertopachami tiarca. Jehová Diosca gentecunapa ima ali cajta ima nali cajta nina derechota charishcata ricuchingapami ‘alita, nalita yachaita cuj yurataca’ churarca. Chai yuramanda na micushpaca Jehová Diosta cazushcata, tucuimanda agradicishcatami Adanga ricuchinman carca.

Taita Diosca Adanda nircami: ‘Ama micunguichu nishca yuramandami micushcangui’. Chaimandami ‘cutin alpa tucungacaman canba ñavipi ninanda jumbishpa micungui. Canga chai alpamanda japishpami rurai tucurcangui. Ñutu alpami cangui, ñutu alpallatami tigrangui’ nishpa (Génesis 3:17, 19).

 Na micunachu cangui nishca yuramanda japishpa Adán micujpica Taita Diosca nimamanda nalicachircachu. Chai yuramanda micushpami Taita Diosta na cazushcata, na agradicishcata, ali causangapaj Taita Diosta na minishtishcata ricuchishpa Adanga jatun llaquipi urmarca.

Jehová Dios advirtishca shinami jipa huatacunamanga Adanga huañurca. Huañushpaca ñutu alpamanllatami tigrarca. Na maipipash causangapaj rircachu. Ñutu alpa tucushpaca ñutu alpashnallatami quedarca (Génesis 2:7; Eclesiastés 9:5, 10).

“Juchata ruranaca, shujlla runamandami cai pachapica callarirca. Chai juchamandami, huañuipash callarirca. Shinallatami tucuicuna juchata rurashcamandaca, huañuipash tucuicunapajman yalijun.” (Romanos 5:12.)

Adán na cazushpa juchata rurashpaca ¿ima llaquicunapita urmarca? Pundapica shuj alipacha causaitami chingachirca. Cunanbimi gentecunaca 70 na cashpaca 80 huatacunata causanchi. Shinapash Adanga para siempre causana oportunidadtapash, jucha illaj causaitapashmi chingachirca. Chaimandami paipa huahuacunapash tucuilla juchayu nacirircanchi.

Adanba culpamandami tucuicunallata juchata rurana munaihuan nacirinchi. Ñucanchi cuerpopash asha ashami na valishpa huañun. Chaimandami apóstol Pabloca nirca: “Tucurinalla aichayu cashpami, juchata rurangapaj ñucallata jatui tucushcani. ¡Imapajpash na valij, aij ñucalla! Huañuchun charijuj cai cuerpomandaca, ¿pita ñucataca cacharichihuanga?” nishpa. Chashna llaquipi cajta cuenta japishpami jipamanga nirca: ‘Ñuca Taita Diostami, ñucanchi Apunchi Jesucristomandaca pagui nijuni’ nishpa (Romanos 7:14, 24, 25).

Taita Diosca gentecunata ‘quishpichingapami paipa Churita cachamurca’ (1 Juan 4:14).

 Jehová Diosca gentecunata juchamanda, huañuimanda quishpichingapami paipa juyashca Churita cai Alpaman cachamurca. Jesusca Adanshna jucha illajmi nacirirca. Adán juchata rurajpipash Jesusca ‘na ima juchatapash rurarcachu’ (1 Pedro 2:22). Chaimandami Jesusca na huañushpa, para siempre causana carca.

Shinapash Jehová Diosca paipa Churita contracuna huañuchichun saquishpami quimsa punlla jipaca causachirca. Jesusca ashtaca poderta charij angelshna causarishpami cieloman tigrarca. Chaipimi Jesusca paipa causaihuan Adanba huahuacunata juchamanda salvashcata ricuchirca. Shina rurajpimi Jehovapash Jesuspa jucha illaj causaita alicachishpa chasquirca. Chaimandami Jesuspi feta churajcunaca para siempre causaita ushan (Romanos 3:23, 24; 1 Juan 2:2).

Adanba culpamanda juchayucuna cajpipash Jesusca paipa jucha illaj causaihuanmi gentecunataca randinshna salvarca. Jesusca ñucanchicuna para siempre causachunmi paipa causaita curca. Bibliapica ninmi: ‘Taita Diospa ninan juyaimandami’ Jesusca tucuicunamanda huañurca nishpa (Hebreos 2:9).

Juchayucuna nacirimandaca Diospa leycunata pactachishpa salvaritaca pipash na usharcanchichu. Shinapash Jehová Diosca ñucanchicunata ninanda juyashpa, llaquishpami paipa leycunata pactachishpa ñucanchita salvarca. Ñucanchita huañuimanda salvangapaca paipa juyashca Churipa causaitami Jehová Diosca cuna tucurca (Romanos 5:6-8).

‘Cristoca huañushcacunapa chaupimandami causarirca. Paica punda causarishpami huañushcacuna causarinata ricuchijun. Shujlla runamandami huañuica callarirca. Shujlla runamandami causarinapash callarirca. Imashinami Adanmandaca tucuicuna huañunajun. Chashnallatami Cristomandaca tucuicuna causachi tucunga’ (1 Corintios 15:20-22).

Jesús cai Alpapi causashcata, ñucanchimanda huañushcataca alimi yachanchi. Shinapash ¿imashinata pai causarishcataca yachanchi? Jesús causarishpaca shuj shuj gentecunaman, shuj shuj ladocunapimi ricurirca. Shuj punllaca 500 yali gentecunamanmi ricurirca. Apóstol Pablopash Corintomanda huauquicunamanga Jesusca 500 yali gentecunamanmi ricurirca nishpami escribirca. Ashtahuangarin, Jesús causarishcata ricuj huauquipanicunallata imata ricushcata, uyashcata villachunmi huaquingunaca cunangamanmi causanajunra nirca (1 Corintios 15:3-8).

Jesús causarishcamanda parlashpaca apóstol Pabloca nircami, Jesusmi ‘punda causarirca’ nishpa. Shinaca Jesús pundata causarishca cajpica shujcunapashmi causaringa. Chaimandami Jesusca nirca: ‘Huañushpa pambai tucushcacunaca tucuillami ñuca rimajta uyanga’ nishpa (Juan 5:28, 29).

“Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, ashtahuangarin causaitami causagringa” (Juan 3:16).

 Bibliapa callari libropica huañui imashina tiai callarishcata, jardín de Edén imashina chingarishcatami parlan. Cutin Bibliapa último libropica huañui tucurinata, cai Alpa shuj Paraíso tucunatami parlan. Chai punllacunapica tucuilla gentecunami cushilla, ali causashun. Apocalipsis 21:4pica ninmi: ‘Huañuipash na ashtahuan tiangachu’ nishpa. Chai shimicuna pactarinata crichunmi Apocalipsis 21:5pica nin: ‘Cai ñuca villajushca shimicunaca na llullashpami pactaringa’ nishpa. Jehová Diosca imata nishpapash siempremi pactachin.

Shinaca ¿Taita Diospa villashca shimicuna na llullashpa pactarinata cripanguichu? Taita Diospa shimicuna pactarinata crishpaca Jesusmanda yachajushpa, Jesuspi feta churapai. Shina rurajpimi Jehová Diosca alicachishpa quiquindaca chasquinga. Paica cunan punllacunapipash ashtaca bendiciongunatami caranga. Shamuj punllacunapicarin shuj juyailla paraíso Alpagupimi causangui. Chaipica “huacaipash, llaquipash, nanaipash, na ashtahuan tiangachu”.