“Yehowa Efile bapangile muntu aye nkumutuula mu lupango lwa Edene bwa kudima nsenga na bwa kwilulama. Yehowa Efile Mukulu nkufundila muntu shi: ‘Wekala na matalwa a kudya kikuba kya mutshi ooso wa mu lupango, anka tookudya kikuba kya ku mutshi wa kushinguula buwa sunga bubi, mwanda, efuku dyoodi kyanka wekala na kya kufwa.’”—Kibangilo 2:15-17.

Efile Mukulu batuudile muntu a kumpala, Adame, mu lupango lwa Edene, mu mpaladiso pa nsenga mubaadi nyema na mitshi ibungi ibuwa kumona. Mubaadi mitshi ayipa bikuba bibaabadi bape Adame bulungantu bwa kudya. Anka, Yehowa Efile Mukulu baadi mutoshe kalolo Adame mutshi umune aye nkumulungula shi todyanga uno mutshi, na nkumudimusha shi su beudi mulombeene kufwa.

Adame baadi mupushe wawa mwiya su? Baadi ashingula akilesha kufwa; baadi mumone nyema ayifu. Su Adame baadi mupangibwe bwashi afwe, kudimusha kw’Efile Mukulu takubadya kwikala na muulo nya. Anka, Adame baadi ashingula shi su bakokyela Efile Mukulu na bakutwa kudya wawa mutshi, ekala na muwa wa looso—tabaadi mulombene kufwa nya.

Bangi abapwandikisha shi wawa mutshi aulesha kusangisha mbidi, kadi tabibaadi byabya nya. Mwanda Yehowa balungwile Adame na mukashi’aye Eeva shi, “etandeeneeyi, uushayi nsenga, nwiyidiile bufumu.” (Kibangilo 1:28) Mwiya ubaadi utale mutshi w’eyendo, ta nkusangisha mbidi nya. Yehowa bewitanyine shi “mutshi wa kushinguula kiibuuwa naa kiibubi” mwanda ubaadi aulesha matalwa aye a kutshibila bantu kibuwa sunga kibubi. Su Adame bakutshile kudya kikuba kya wawa mutshi, badya kulesha kukookyela na dingi badya kulesha lutumbu kwi Yawa bamupangile na bamwelele myabi mu byooso.

Efile Mukulu “nkulungula Adame’shi: ‘Mwanda . . . boodi kikuba kya ku mutshi unaadi mukushidikye, . . . kwituputa dya mpala yoobe ngi kookapete ka-kudya, nyaa na pookaalukiila ku nsenga, mwanda ku’yo ngi koodi mutuukile. Oolo we lufuufi, byabya okalukiila ku lufuufi.’”—Kibangilo 3:17, 19.

Adame badiile kikuba kya ku mutshi ubaabadi bamukandjikye. Wawa mwanda wa kukutwa kukookyela tawubadi wa kulenguula nya. Nyi buntomboshi, kukutwa kwa lutumbu bwa myanda yooso ibuwa ibaadi imukitshine Yehowa. P’aye kudya kyakya kikuba, Adame bapelele Yehowa, asangula eshinda dya kwiludika, mu dyanka baadi na kya kupeta myanda ibubi.

Anka bu bibakwile Yehowa, Adame baadi mufwe. Efile Mukulu baadi ‘mubumbe muntu na lufuufi lubaadi mwate ku nsenga,’ aye nkumulungula shi baadi na kya ‘kwalukiila ku nsenga.’ Adama tabaadya kwikala na muwa mu ungi mushindo sunga ingi mbalo nya. Ku lufu lwaye, baadi na kya kukutwa kwikala kwanka na kwalukiila ku lufuufi kubaabadi bamutushe.—Kibangilo 2:7; Mulungudi 9:5, 10.

“Milwisho ibatwelele pa senga pa mwanda wa muntu umune, Adama, yaya milwisho yafwisha lufu. Byabya, lufu alukwata bantu booso mwanda booso mbalwishe.”—Beena-Looma 5:12.

Adame baakutshile kukookyela—sunga kulwisha—ako kufwishe masaku e bungi. P’aye kukita mulwisho, Adame tabaadi mushimishe penda muwa wa bipwa 70 sunga 80 nya, kadi, muwa wa ikalaika. Akupu, Adame baadi mushimishe muwa upwidikye na kupalakasha kukutwa kwa kupwidika kwi bantu booso.

Atwe booso twi batukile kwi Adame. Kwadi’ye, nyi kwatudi bapyane mbidi ikutwe kupwidika ayitutumu mu kukita milwisho na kwitufisha ku lufu. Mpoolo baadi muleshe kalolo mushindo watudi mu mpombo. Baadi mufunde shi: ‘Nee na mbidi, nemupaanyiibwe ku bupika bwa milwisho. Ami uno, nee muntu shii na mwabi! Naanyi a kunkuula ku ino mbidi ya lufu?’ Aluula aye nabeene lukonko lwaye shi: “Lutumbu kw’Efile Mukulu pa kukiila kwi Yesu Kidishitu Nfumwetu!”—Beena-Looma 7:14, 24, 25.

“Yaaya baatumine Mwan’aye bu Mupaashi aa ba pa nsenga.”—1 Yowano 4:14.

Yehowa baadi mulumbuule mushindo wa kutshokola mulwisho na kwitupoososha ku kibawo kya lufu lwa ikalaika. Mu mushindo kinyi? P’aye kutuma Mwana aaye a kifulo bwadya kutandikwa pano pa nsenga bu muntu mupwidikye bu Adame. Kadi, mu kwilekeena na Adame, Yesu ‘nta mukite milwisho’ nya. (1 Mpyeele 2:22) Bu bibaadi muntu mupwidikye, tabaadi mu kibawo kya lufu nya na baadi mulombeene kwikala na muwa wa looso bu muntu mupwidikye.

Anka, Yehowa baadi mutadiile Yesu bwashi epayibwe na beshikwanyi naaye. Kunyima kwa mafuku asatu, Yehowa baadi mumusangushe na mbidi ya mu kikudi bwadya kwalukiila mwiyilu. Yesu baadi mulambule Efile Mukulu kineemo kya muwa waye upwidikye bwadya kwalusha kyakya kibaadi kishimishe Adame bwaye’ye nabene na bwa beekulu baaye. Yehowa baadi mukumiine wawa mulambu, akita bwashi baaba booso abakumiina mwi Yesu bapete muwa wa ikalaika.—Beena-Looma 3:23, 24; 1 Yowano 2:2.

Yesu baadi mwalushe kyakya kibaadi kishimishe Adame. Bafwile bwashi twikale na muwa wa looso. Bible akula shi: “Yesu, . . . mwanda wa lufu lubaafwambukile nalwo. Byabya, ku buntu bw’Efile Mukulu, mbwa muntu ooso bwadi mumwene lufu.”—Beena-Ebreeyi 2:9.

Bino abilesha myanda ibungi pabitale Yehowa. Miiya yaaye ya kululama ngikite bwashi bantu bashi bapwidikye bakutwe kwikala na mushindo wa kwipaasha abo banabeene. Byabya, kifulo na lusa lwaaye bibaadi bimusukume bwadya kutwela mu kitungo kikile bukata—kya kutuusha Mwana aaye bu mulambu wa nkuulo.—Beena-Looma 5:6-8.

“Kidishitu mmusangukye ku bafwe bu kilombola kya bafwe. Mwanda bu bi lufu lutukile kwi muntu umune, kwi muntu umune akutukila kusanguka kwa bafwe; abifu bantu booso ku mwanda wa Adame, booso abapetela muwa mwi Kidishitu.”—1 Beena-Kodinto 15:20-22.

Tatwi balombene kwela mpaka shi Yesu baadi kwanka na bafwile, kadi, kinyi kilombene kwitushinkamisha shi baadi musangukye ku lufu? Kishinkamiisho kikata akilesha byanka nkya’shi, aye bapu kusanguka, Yesu baadi mumwenekyele bantu bebungi mu nsaa ilekeene na mu ma mbalo elekeene. Ungi mususa baadi mumwenekyele bantu bakile pa 500. Mpoolo mutumibwa bebifundile mu mukanda waye ubatumine bena Kodinto, Alesha shi bamo ba ku baaba bantu bakii na muwa, na mbalombeene kutuula bu kamonyi bwa myanda yabadi bamone na yabadi bapushe.—1 Beena-Kodinto 15:3-8.

Na dingi, pabaadi Mpoolo mufunde shi Kidishitu mmusangukye bu “Kilombola kya bafwe” baadi akyebe kulesha shi bangi namu abakyebe nkasanguka kunyima. Yesu nabene bakwile shi akufiki nguba ‘akatuuku’ baaba “booso balaale mu nyembo.”—Yowano 5:28, 29.

“Efile Mukulu mmufule baa pano bikile, mu kipaso kyadi mupaane mwana aaye eeleka bwashi muntu ooso amukumiina tashiminanga, anka ayikale na muwa wa ikalaika.”—Yowano 3:16.

Mukanda wa kumpala wa mu Bible awitulungula nsaa ibaadi ibangye lufu na bibaadi bishimine mpaladiiso. Mukanda wa nfudiilo awitulungula nsaa yabakakatusha lufu kwi Efile Mukulu na kwalusha Mpaladiiso pa nsenga. Bantu abakyebe kwikala na nshalelo a muloo bwa looso. Mukanda wa Bifumbulwe 21:4 awakula shi: “Lufu taalwikala kwanka dimo.” Bwa kushinkamisha kwa wawa mulailo, verse 5 akula shi: “Myaku ino tayii mpaka ngya binyibinyi.” Kyoso kilee Yehowa e na ngobesha ya kwikilombasha.

Okumiina shi ‘yaaya myaku tayii mpaka na ngya binyibinyi’ su? Byabya, longa ingi myanda pabitale Yesu Kidishitu na kutuula lukumiino mwadi. Su bokitshi byabya, okuminyibwa na Yehowa. Tokyebe kupeta penda myabi yaaye binobino nya, anka, wekala dingi na lukulupilo lwa kwikala na muwa wa looso mu Mpaladiiso pa nsenga, mushyamukeekala dingi lufu, “sunga maalo, sunga kwidila, sunga mukumbo.”